ಕೋಲ್ಕತ್ತಾ : ಐಪಿಎಲ್ 2026ರ ಋತುವಿನಲ್ಲಿ ಮುಂಬೈ ಇಂಡಿಯನ್ಸ್ ತಂಡದ ಕಳಪೆ ಪ್ರದರ್ಶನ ಮುಂದುವರಿದಿದೆ. ಈಡನ್ ಗಾರ್ಡನ್ಸ್ನಲ್ಲಿ ಕೋಲ್ಕತ್ತಾ ನೈಟ್ ರೈಡರ್ಸ್ ವಿರುದ್ಧ ನಡೆದ ಪಂದ್ಯದಲ್ಲಿ ಅನುಭವಿಸಿದ ಸೋಲಿನ ಬಳಿಕ ಮಾತನಾಡಿದ ನಾಯಕ ಹಾರ್ದಿಕ್ ಪಾಂಡ್ಯ, ತಂಡದ ಈ ಹೀನಾಯ ಸ್ಥಿತಿಗೆ ಕಳಪೆ ಫೀಲ್ಡಿಂಗ್ ಹಾಗೂ ಕೈಚೆಲ್ಲಿದ ಕ್ಯಾಚ್ಗಳೇ ಪ್ರಮುಖ ಕಾರಣ ಎಂದು ಬಹಿರಂಗವಾಗಿ ಒಪ್ಪಿಕೊಂಡಿದ್ದಾರೆ. ಇದುವರೆಗೆ ಆಡಿರುವ 13 ಪಂದ್ಯಗಳಲ್ಲಿ ಕೇವಲ 4ರಲ್ಲಿ ಮಾತ್ರ ಜಯ ಸಾಧಿಸಿರುವ ಮುಂಬೈ, ಪ್ಲೇಆಫ್ ರೇಸ್ನಿಂದ ಈಗಾಗಲೇ ಅಧಿಕೃತವಾಗಿ ಹೊರಬಿದ್ದಿದ್ದು, ಅಂಕಪಟ್ಟಿಯಲ್ಲಿ ಕೇವಲ 8 ಅಂಕಗಳೊಂದಿಗೆ ಎರಡನೇ ಕೊನೆಯ ಸ್ಥಾನದಲ್ಲಿದೆ.
ಕೈಚೆಲ್ಲಿದ ಕ್ಯಾಚ್ಗಳು ಮತ್ತು ಬೆನ್ನಟ್ಟಿದ ಸೋಲು
ಕೆಕೆಆರ್ ವಿರುದ್ಧದ ಸೋಲಿನ ಬಳಿಕ ತಂಡದ ವೈಫಲ್ಯಗಳನ್ನು ಮುಚ್ಚಿಡಲು ಯತ್ನಿಸದ ಹಾರ್ದಿಕ್, ಫೀಲ್ಡಿಂಗ್ ವಿಭಾಗದ ಲೋಪಗಳನ್ನು ಎತ್ತಿ ತೋರಿಸಿದರು. “ಈ ಋತುವಿನುದ್ದಕ್ಕೂ ನಮ್ಮ ಫೀಲ್ಡಿಂಗ್ ಅತ್ಯಂತ ಕಳಪೆಯಾಗಿತ್ತು. ನಾವು ಹಲವು ಸುಲಭ ಕ್ಯಾಚ್ಗಳನ್ನು ಕೈಚೆಲ್ಲಿದ್ದೇವೆ. ಉದ್ದೇಶಪೂರ್ವಕವಾಗಿ ಯಾರೂ ಕ್ಯಾಚ್ ಬಿಡುವುದಿಲ್ಲ, ಆದರೆ ಈ ವಿಚಾರದಲ್ಲಿ ನಾವು ನಮ್ಮ ತಪ್ಪುಗಳನ್ನು ಮುಚ್ಚಿಡುವಂತಿಲ್ಲ. ಪಂದ್ಯಗಳನ್ನು ಗೆಲ್ಲಬೇಕಾದರೆ ಸಿಗುವ ಪ್ರತಿಯೊಂದು ಅವಕಾಶವನ್ನು, ಅಷ್ಟೇ ಏಕೆ, ಅರ್ಧ-ಅವಕಾಶಗಳನ್ನು ಸಹ ನಾವು ಬಳಸಿಕೊಳ್ಳಲೇಬೇಕು. ಪಂದ್ಯದ ಗತಿಯನ್ನೇ ಬದಲಿಸಬಲ್ಲ ಕ್ಯಾಚ್ಗಳನ್ನು ಕೈಚೆಲ್ಲಿದಾಗ ನಾವು ಸಹಜವಾಗಿಯೇ ಹಿನ್ನಡೆ ಅನುಭವಿಸುತ್ತೇವೆ” ಎಂದು ಬೇಸರ ವ್ಯಕ್ತಪಡಿಸಿದರು.
ದೀಪಕ್-ರಾಬಿನ್ ನಡುವಿನ ಗೊಂದಲ ಮತ್ತು ಕೈತಪ್ಪಿದ ಅವಕಾಶ
ಕೆಕೆಆರ್ ವಿರುದ್ಧ ಮೊದಲು ಬ್ಯಾಟ್ ಮಾಡಿದ ಮುಂಬೈ ಕೇವಲ 147 ರನ್ ಗಳಿಸಿತ್ತು. ಗುರಿ ಬೆನ್ನಟ್ಟಿದ ಕೆಕೆಆರ್ ತಂಡಕ್ಕೂ ಆರಂಭದಲ್ಲಿ ಕಡಿವಾಣ ಹಾಕುವ ಅವಕಾಶಗಳಿದ್ದವು. ಆದರೆ 10ನೇ ಓವರ್ನಲ್ಲಿ ನಡೆದ ಒಂದು ಘಟನೆ ಮುಂಬೈ ತಂಡದ ಫೀಲ್ಡಿಂಗ್ ಗುಣಮಟ್ಟವನ್ನು ಬಿಚ್ಚಿಟ್ಟಿತು. ಹಾರ್ದಿಕ್ ಪಾಂಡ್ಯ ಬೌಲಿಂಗ್ನಲ್ಲಿ ರೋವ್ಮನ್ ಪೊವೆಲ್ ಬಾರಿಸಿದ ಚೆಂಡು ಗಾಳಿಗೆ ಚಿಮ್ಮಿತ್ತು. ಸುಲಭ ಕ್ಯಾಚ್ ಆಗಿದ್ದರೂ, ಫೀಲ್ಡರ್ಗಳಾದ ದೀಪಕ್ ಚಹಾರ್ ಮತ್ತು ರಾಬಿನ್ ಮಿಂಜ್ ನಡುವಿನ ಗೊಂದಲದಿಂದಾಗಿ ಇಬ್ಬರೂ ಕ್ಯಾಚ್ ಹಿಡಿಯಲು ಮುಂದಾಗಲಿಲ್ಲ. ಪರಿಣಾಮ ಚೆಂಡು ಇಬ್ಬರ ನಡುವೆ ನೆಲಕ್ಕೆ ಬಿತ್ತು. ಇಂಥದ್ದೇ ಹಲವು ಪ್ರಮಾದಗಳು ಈ ಬಾರಿಯ ಐಪಿಎಲ್ನಲ್ಲಿ ಮುಂಬೈಗೆ ಮುಳುವಾಗಿವೆ.
ಒಂದೇ ಪಂದ್ಯದಲ್ಲಿ ಐದು ಕ್ಯಾಚ್ ಕೈಚೆಲ್ಲಿದ್ದ ಮುಂಬೈ
ಈ ಟೂರ್ನಿಯ ಆರಂಭಿಕ ಪಂದ್ಯವೊಂದರಲ್ಲಿ ಪಂಜಾಬ್ ಕಿಂಗ್ಸ್ ವಿರುದ್ಧ ಮುಂಬೈ ಫೀಲ್ಡರ್ಗಳು ಬರೋಬ್ಬರಿ ಐದು ಕ್ಯಾಚ್ಗಳನ್ನು ಬಿಟ್ಟಿದ್ದರು. ಶಿಸ್ತುಬದ್ಧ ಆಟಕ್ಕೆ ಹೆಸರಾಗಿದ್ದ ಮುಂಬೈ ತಂಡ ಈ ಬಾರಿ ಫೀಲ್ಡಿಂಗ್ ವಿಭಾಗದಲ್ಲಿ ಇಷ್ಟು ದೊಡ್ಡ ಮಟ್ಟದ ಕುಸಿತ ಕಂಡಿರುವುದು ಕ್ರಿಕೆಟ್ ಪಂಡಿತರಿಗೂ ಅಚ್ಚರಿ ಮೂಡಿಸಿದೆ. ಮತ್ತೊಂದೆಡೆ ಕೆಕೆಆರ್ ತಂಡ, ತಮ್ಮ ಫೀಲ್ಡಿಂಗ್ ಕೋಚ್ ದಿಶಾಂತ್ ಯಾಗ್ನಿಕ್ ಅವರ ಗರಡಿಯಲ್ಲಿ ಅತ್ಯುತ್ತಮ ಫೀಲ್ಡಿಂಗ್ ತಂಡವಾಗಿ ಹೊರಹೊಮ್ಮಿದೆ. ಮುಂಬೈ ವಿರುದ್ಧದ ಪಂದ್ಯದಲ್ಲಿ ಕೆಮರೂನ್ ಗ್ರೀನ್, ರೋಹಿತ್ ಶರ್ಮಾ ಅವರ ಅದ್ಭುತ ಕ್ಯಾಚ್ ಹಿಡಿದು ಪಂದ್ಯದ ಚಿತ್ರಣ ಬದಲಿಸಿದ್ದರು. ಮನೀಶ್ ಪಾಂಡೆ ಹಾಗೂ ರಿಂಕು ಸಿಂಗ್ ಅವರ ಜವಾಬ್ದಾರಿಯುತ ಆಟದಿಂದ ಕೆಕೆಆರ್ ಸುಲಭ ಜಯ ಸಾಧಿಸಿತು.
ಸತತ ಸೋಲುಗಳು ಮತ್ತು ಕಳಪೆ ಪ್ರದರ್ಶನದಿಂದ ಕಂಗೆಟ್ಟಿರುವ ಮುಂಬೈ ಇಂಡಿಯನ್ಸ್, ತನ್ನ ಅಂತಿಮ ಲೀಗ್ ಪಂದ್ಯದಲ್ಲಿ ರಾಜಸ್ಥಾನ್ ರಾಯಲ್ಸ್ ತಂಡವನ್ನು ಎದುರಿಸಲಿದೆ. ಆದರೆ, ಈ ಋತುವಿನ ವೈಫಲ್ಯಗಳು ಮುಂಬರುವ 2027ರ ಐಪಿಎಲ್ ಹರಾಜು ಮತ್ತು ತಂಡದ ರಚನೆಯ ಮೇಲೆ ಭಾರಿ ಪ್ರಶ್ನೆಗಳನ್ನು ಹುಟ್ಟುಹಾಕಿವೆ.
ಇದನ್ನೂ ಓದಿ : ಮುಂಬೈ ವಿರುದ್ಧ ಕೋಲ್ಕತ್ತಾಗೆ 4 ವಿಕೆಟ್ಗಳ ಜಯ – ಪ್ಲೇಆಫ್ ಕನಸು ಜೀವಂತ
