ಬೆಂಗಳೂರು : ತಂತ್ರಜ್ಞಾನವು ದಿನೇದಿನೆ ಹಲವು ಆಯಾಮ ಪಡೆದುಕೊಳ್ಳುತ್ತಿದೆ. ಅದರಲ್ಲೂ, ಕೃತಕ ಬುದ್ಧಿಮತ್ತೆ (ಎಐ) ತಂತ್ರಜ್ಞಾನವು ಜಗತ್ತನ್ನೇ ಬದಲಾಯಿಸುತ್ತಿದೆ. ಹಲವು ಹೊಸ ಹೊಸ ಅವಕಾಶಗಳನ್ನು ಕಲ್ಪಿಸುತ್ತಿದೆ. ಕಂಪನಿಗಳು ಈಗ ಎಐ ಬಲ್ಲವರಿಗೇ ಉದ್ಯೋಗ ನೀಡುತ್ತಿವೆ. ಇದನ್ನು ಮನದಲ್ಲಿಟ್ಟುಕೊಂಡಿರುವ ಕೇಂದ್ರ ಸರ್ಕಾರವು, ಉಚಿತವಾಗಿ ಎಐ ಕೋರ್ಸ್ ಮುಗಿಸಲು ಅವಕಾಶ ನೀಡಿದೆ.
ಹೌದು, ಇಂಡಿಯಾ ಎಐ ಮಿಷನ್ (IndiaAI Mission) ಅಡಿಯಲ್ಲಿ ಎಲೆಕ್ಟ್ರಾನಿಕ್ಸ್ ಮತ್ತು ಮಾಹಿತಿ ತಂತ್ರಜ್ಞಾನ ಸಚಿವಾಲಯವು ಆನ್ ಲೈನ್ ಮೂಲಕ ಉಚಿತ ಎಐ ತರಬೇತಿ ಕೋರ್ಸ್ ಆರಂಭಿಸಿದೆ. ಯುಎ ಎಐ (YUVA AI) ಎಂಬ ಕೋರ್ಸ್ ಆರಂಭಿಸಲಾಗಿದ್ದು, ಯುವಕ-ಯುವತಿಯರು ಉಚಿತವಾಗಿ ಎಐ ಬಳಕೆಯ ತರಬೇತಿ ಪಡೆಯಬಹುದಾಗಿದೆ. ಇದಾದ ಬಳಿಕ ಪ್ರಮಾಣಪತ್ರವನ್ನೂ ನೀಡಲಾಗುತ್ತದೆ.
ಕೇಂದ್ರ ಸರ್ಕಾರ ಬೆಂಬಲಿತ ಫ್ಯೂಚರ್ ಸ್ಕಿಲ್ಸ್ ಪ್ರೈಮ್ (FutureSkills) ಹಾಗೂ ಐಜಿಒಟಿ ಕರ್ಮಯೋಗಿ (iGOT Karmayogi) ಆನ್ ಲೈನ್ ಪ್ಲಾಟ್ ಫಾರ್ಮ್ ಗಳಲ್ಲಿ ಎಐ ಕೋರ್ಸ್ ಮುಗಿಸಬಹುದಾಗಿದೆ. ಕೋರ್ಸ್ ಮುಗಿಸಲು ನಾಲ್ಕೂವರೆ ಗಂಟೆ ಬೇಕಾಗುತ್ತದೆ. ಎಐ ಬಳಕೆ, ಇದು ಹೇಗೆ ಕೆಲಸ ಮಾಡುತ್ತದೆ ಎಂಬುದರ ಮಾಹಿತಿ, ಎಐ ಸೇಫ್ಟಿ, ಪ್ರಾಮುಖ್ಯತೆ, ಕರಿಯರ್ ಅವಕಾಶಗಳ ಕುರಿತು ಮಾಹಿತಿ ನೀಡಲಾಗುತ್ತದೆ.
ಯಾರು ಬೇಕಾದರೂ ಎಐ ಕೋರ್ಸ್ ಮುಗಿಸಬಹುದಾಗಿದೆ. ಓದಲು ಹಾಗೂ ಬರೆಯಲು ಬರುವವರು ಕೋರ್ಸ್ ತೆಗೆದುಕೊಳ್ಳಲು ಅರ್ಹರು. ವಿದ್ಯಾರ್ಥಿಗಳು, ವೃತ್ತಿಪರರು, ಉದ್ಯಮಿಗಳು, ಶಿಕ್ಷಕರು, ಗೃಹಿಣಿಯರು ಸೇರಿ ಯಾರು ಬೇಕಾದರೂ ಕೋರ್ಸ್ ಮುಗಿಸಬಹುದು. ಆಸಕ್ತಿ ಇರುವವರು https://www.futureskillsprime.in/course/yuva-ai-for-all/ ವೆಬ್ ಸೈಟ್ ಗೆ ಭೇಟಿ ನೀಡಿ ನೋಂದಣಿ ಮಾಡಿಕೊಳ್ಳುವ ಮೂಲಕ ಕಲಿಯಬಹುದಾಗಿದೆ.
ಇದನ್ನೂ ಓದಿ : ಬಿಡುಗಡೆಯಾದ ಕೆಲವೇ ದಿನದಲ್ಲಿ ಸ್ಯಾಮ್ಸಂಗ್ ಗ್ಯಾಲಕ್ಸಿ M47 5ಜಿ ಸ್ಮಾರ್ಟ್ಫೋನ್ ಬೆಲೆ ಭಾರೀ ಏರಿಕೆ
