ಬೆಂಗಳೂರು : ಮನೆಯಲ್ಲಿ ಈಗಾಗಲೇ ಎಲ್ ಪಿಜಿ ಸಿಲಿಂಡರ್ ಹೊಂದಿದ್ದು, ಪೈಪ್ಡ್ ನ್ಯಾಚುರಲ್ ಗ್ಯಾಸ್ (PNG) ಸಂಪರ್ಕ ಪಡೆದ ಗ್ರಾಹಕರಿಗೆ ಕೇಂದ್ರ ಸರ್ಕಾರವು ಒಂದು ಮಹತ್ವದ ವಿನಾಯಿತಿ ನೀಡಿದೆ. ನೀವೇನಾದರೂ ಹೊಸದಾಗಿ PNG ಸಂಪರ್ಕ ಪಡೆದರೆ, ನಿಮ್ಮ ಹಳೆಯ LPG (Indane, HP, Bharat Gas) ಸಂಪರ್ಕವನ್ನು ರದ್ದುಗೊಳಿಸಲು ಈಗ 30 ದಿನಗಳ ಕಾಲಾವಕಾಶ ನೀಡಲಾಗಿದೆ.
ಕೇಂದ್ರ ಪೆಟ್ರೋಲಿಯಂ ಮತ್ತು ನೈಸರ್ಗಿಕ ಅನಿಲ ಸಚಿವಾಲಯವು ‘ದ್ರವೀಕೃತ ಪೆಟ್ರೋಲಿಯಂ ಅನಿಲ (ಸರಬರಾಜು ಮತ್ತು ವಿತರಣೆ ನಿಯಂತ್ರಣ) ತಿದ್ದುಪಡಿ ಆದೇಶ, 2026’ರ ಅಡಿಯಲ್ಲಿ ಈ ಹೊಸ ನಿಯಮವನ್ನು ಜಾರಿಗೆ ತಂದಿದೆ. ಹೊಸ ನಿಯಮದಲ್ಲಿ ಏನೇನಿದೆ? ಇದರಿಂದ ಜನರಿಗೆ ಏನೆಲ್ಲ ಅನುಕೂಲಗಳಿವೆ ಎಂಬುದನ್ನು ತಿಳಿಯೋಣ ಬನ್ನಿ.
ಹೊಸ ನಿಯಮಗಳು ಏನೇನು?
- ನಿಮ್ಮ ಮನೆಯಲ್ಲಿ PNG ಸಕ್ರಿಯಗೊಂಡ ತಕ್ಷಣ, ನೀವು LPG ಸಿಲಿಂಡರ್ ಬುಕಿಂಗ್ ಅಥವಾ ರೀಫಿಲ್ ಮಾಡುವಂತಿಲ್ಲ. ಆದರೂ 30 ದಿನಗಳವರೆಗೆ ಅದನ್ನು ಬಳಸಬಹುದು.
- ಹೊಸ ನಿಯಮದ ದೊಡ್ಡ ಅನುಕೂಲವೆಂದರೆ, ನೀವು LPG ಸಂಪರ್ಕವನ್ನು ಶಾಶ್ವತವಾಗಿ ಕಳೆದುಕೊಳ್ಳುವುದಿಲ್ಲ. ಬದಲಿಗೆ ಗ್ಯಾಸ್ ಏಜೆನ್ಸಿಯಿಂದ ‘ಟ್ರಾನ್ಸ್ ಫರ್ ವೋಚರ್’ ಪಡೆದುಕೊಳ್ಳಬಹುದು.
ಯಾರಿಗೆಲ್ಲ ಅನುಕೂಲ?
ಹೊಸ ತಿದ್ದುಪಡಿಯು ಪ್ರಮುಖವಾಗಿ ವರ್ಗಾವಣೆಯಾಗುವ ಉದ್ಯೋಗಿಗಳು, ಬಾಡಿಗೆದಾರರು, ವಲಸೆ ಕುಟುಂಬಗಳು ಮತ್ತು ವಿದ್ಯಾರ್ಥಿಗಳಿಗೆ ವರದಾನವಾಗಿದೆ. ಮುಂದೊಂದು ದಿನ ನೀವು PNG ಸೌಲಭ್ಯವಿಲ್ಲದ ಬೇರೆ ಮನೆಗೆ ಅಥವಾ ಬೇರೆ ಊರಿಗೆ ಶಿಫ್ಟ್ ಆದಾಗ, ಈ ಟ್ರಾನ್ಸ್ ಫರ್ ವೋಚರ್ ತೋರಿಸಿ ಯಾವುದೇ ಹೆಚ್ಚುವರಿ ಭದ್ರತಾ ಠೇವಣಿ ನೀಡದೆ ಸುಲಭವಾಗಿ ನಿಮ್ಮ ಹಳೆಯ LPG ಸಂಪರ್ಕವನ್ನು ಮತ್ತೆ ಸಕ್ರಿಯಗೊಳಿಸಿಕೊಳ್ಳಬಹುದು.
ಕಳೆದ ಮಾರ್ಚ್ ನಲ್ಲಿ ಪಶ್ಚಿಮ ಏಷ್ಯಾದಲ್ಲಿನ ಯುದ್ಧದ ಪರಿಸ್ಥಿತಿಯಿಂದಾಗಿ ಎಲ್ ಪಿಜಿ ಆಮದಿನಲ್ಲಿ ವ್ಯತ್ಯಯ ಉಂಟಾಗಬಹುದು ಎಂಬ ಕಾರಣಕ್ಕೆ, PNG ಹೊಂದಿರುವವರು ತಕ್ಷಣವೇ LPG ಕನೆಕ್ಷನ್ ಸರೆಂಡರ್ ಮಾಡಬೇಕೆಂದು ಕಡ್ಡಾಯಗೊಳಿಸಲಾಗಿತ್ತು. ಆದರೆ ಸಾರ್ವಜನಿಕರ ಅನುಕೂಲಕ್ಕಾಗಿ ಸರ್ಕಾರ ಈಗ ಈ ನಿಯಮವನ್ನು ಸಡಿಲಗೊಳಿಸಿ, ಗ್ರಾಹಕರಿಗೆ ತಮ್ಮ ಸಂಪರ್ಕವನ್ನು ಭವಿಷ್ಯಕ್ಕಾಗಿ ಕಾಯ್ದಿರಿಸುವ ಅವಕಾಶ ನೀಡಿದೆ.
ಇದನ್ನೂ ಓದಿ : ರಾಜ್ಯದ ವಿದ್ಯುತ್ ಕ್ಷೇತ್ರ ಖಾಸಗೀಕರಣದತ್ತ? ಟಾಟಾ ಪವರ್ ಅರ್ಜಿ ಚರ್ಚೆಗೆ ಗ್ರಾಸ!
