ಬೆಂಗಳೂರು : ಉದ್ಯೋಗಿಗಳ ಭವಿಷ್ಯ ನಿಧಿ ಸಂಘಟನೆಯು (EPFO) 7 ಕೋಟಿಗೂ ಅಧಿಕ ಸದಸ್ಯರಿಗೆ ಒಂದು ಪ್ರಮುಖ ಎಚ್ಚರಿಕೆ ನೀಡಿದೆ. ಇ-ನಾಮಿನೇಷನ್ ಪ್ರಕ್ರಿಯೆಯಲ್ಲಿ ಮಾಡುವ ಒಂದು ಸಣ್ಣ ತಪ್ಪಿನಿಂದಾಗಿ, ನಿಮ್ಮ ಮರಣದ ನಂತರ ನಿಮ್ಮ ನಾಮಿನಿಗೆ (ವಾರಸುದಾರರಿಗೆ) ಪಿಎಫ್ ಹಣ, ಪಿಂಚಣಿ ಮತ್ತು ವಿಮಾ ಸೌಲಭ್ಯಗಳು ಸಿಗದೆ ಹೋಗಬಹುದು. ಹಾಗಾಗಿ, ಕೂಡಲೇ ಎಲ್ಲರೂ ಆಧಾರ್ ಇ-ಸೈನ್ ಮಾಡಿಸಬೇಕು ಎಂದು ಕೂಡ ಸೂಚಿಸಿದೆ.
ಹೆಚ್ಚಿನ ಪಿಎಫ್ ಖಾತೆದಾರರು ಆನ್ ಲೈನ್ ನಲ್ಲಿ ನಾಮಿನಿ ವಿವರಗಳನ್ನು ಭರ್ತಿ ಮಾಡಿದ ತಕ್ಷಣ ತಮ್ಮ ಕೆಲಸ ಮುಗಿಯಿತು ಎಂದು ಭಾವಿಸುತ್ತಾರೆ. ಆದರೆ, ಆಧಾರ್ ದೃಢೀಕರಣದ ಮೂಲಕ ಇ-ಸೈನ್ (e-Sign) ಮಾಡದಿದ್ದರೆ ಆ ಇ-ನಾಮಿನೇಷನ್ ಸಿಂಧುವಾಗುವುದಿಲ್ಲ ಎಂದು ಇಪಿಎಫ್ಒ ಸ್ಪಷ್ಟಪಡಿಸಿದೆ.
ಒಂದು ವೇಳೆ ಖಾತೆದಾರರು ಇ-ಸೈನ್ ಮಾಡದೆ ಮರಣ ಹೊಂದಿದರೆ, ಆ ನಾಮಿನೇಷನ್ ಫಾರ್ಮ್ ಅನ್ನು ಪರಿಗಣಿಸಲಾಗುವುದಿಲ್ಲ. ಇದರಿಂದಾಗಿ ಕುಟುಂಬದವರಿಗೆ ಪಿಎಫ್ ಹಣ, ಪಿಂಚಣಿ ಹಾಗೂ ವಿಮೆಯ ಪ್ರಯೋಜನ ಪಡೆಯಲು ತುಂಬಾ ತೊಂದರೆಯಾಗುತ್ತದೆ ಎಂದು ತಿಳಿಸಿದೆ.
ಇ-ನಾಮಿನೇಷನ್ ಸಲ್ಲಿಕೆ ಮಾಡುವುದು ಹೇಗೆ?
• ಮೊದಲಿಗೆ EPFO ಸದಸ್ಯರ ಪೋರ್ಟಲ್ https://unifiedportal-mem.epfindia.gov.in/ ಗೆ ಭೇಟಿ ನೀಡಿ, ನಿಮ್ಮ UAN ಮತ್ತು ಪಾಸ್ ವರ್ಡ್ ಬಳಸಿ ಲಾಗಿನ್ ಆಗಿ.
• ಮೇಲಿರುವ ‘Manage’ ಟ್ಯಾಬ್ ಕ್ಲಿಕ್ ಮಾಡಿ, ಅಲ್ಲಿ ‘e-Nomination’ ಆಯ್ಕೆಯನ್ನು ಆರಿಸಿ.
• ನಿಮ್ಮ ಪ್ರೊಫೈಲ್ ವಿವರಗಳನ್ನು ಪರಿಶೀಲಿಸಿದ ನಂತರ, ‘Having Family?’ ಎಂಬ ಪ್ರಶ್ನೆಗೆ ‘Yes’ ಎಂದು ಆಯ್ಕೆ ಮಾಡಿ.
• ನಿಮ್ಮ ಕುಟುಂಬದ ನಾಮಿನಿಯ ಆಧಾರ್ ಸಂಖ್ಯೆ, ಹೆಸರು, ಜನ್ಮ ದಿನಾಂಕ, ಭಾವಚಿತ್ರ ಮತ್ತು ಬ್ಯಾಂಕ್ ವಿವರಗಳನ್ನು ನಮೂದಿಸಿ, ಅವರಿಗೆ ಎಷ್ಟು ಪರ್ಸೆಂಟ್ ಹಣ ಸಿಗಬೇಕು ಎಂಬುದನ್ನು ಹಂಚಿಕೆ ಮಾಡಿ. ನಂತರ ‘Save EPF Nomination’ ಕ್ಲಿಕ್ ಮಾಡಿ.
• ಈಗ ಇ-ಸೈನ್ ಮಾಡಲು ಒಂದು ಹೊಸ ಪೇಜ್ ತೆರೆದುಕೊಳ್ಳುತ್ತದೆ. ಅಲ್ಲಿ ನಿಮ್ಮ ಆಧಾರ್ ಸಂಖ್ಯೆ ಅಥವಾ ವರ್ಚುವಲ್ ಐಡಿ ಹಾಕಿ, ವೆರಿಫೈ ಮಾಡಿ.
• ನಿಮ್ಮ ಆಧಾರ್ ಗೆ ಲಿಂಕ್ ಆಗಿರುವ ಮೊಬೈಲ್ ಸಂಖ್ಯೆಗೆ ಬರುವ OTP ಯನ್ನು ನಮೂದಿಸಿ ಸಬ್ಮಿಟ್ ಮಾಡಿ. ಈಗ ನಿಮ್ಮ ಇ-ನಾಮಿನೇಷನ್ ಯಶಸ್ವಿಯಾಗಿ ಪೂರ್ಣಗೊಳ್ಳುತ್ತದೆ.
ಇದನ್ನೂ ಓದಿ : ಟಾಟಾ ಅವಿನ್ಯಾ EVಗೆ ಮೇಜರ್ ಅಪ್ಡೇಟ್ : ಪ್ಲಾಟ್ಫಾರ್ಮ್ ಬದಲಾವಣೆಗೆ ಸಜ್ಜು!
