ನವದೆಹಲಿ: ಕೆನಡಾದಲ್ಲಿ ನಡೆದ ಸಾರ್ವತ್ರಿಕೆ ಚುನಾವಣೆಯಲ್ಲಿ(Canada Election) ಖಲಿಸ್ತಾನ ಪರ ನಾಯಕ ಎಂದೇ ಬಿಂಬಿಸಲ್ಪಟ್ಟಿದ್ದ ನ್ಯೂ ಡೆಮಾಕ್ರಟಿಕ್ ಪಾರ್ಟಿ (ಎನ್ಡಿಪಿ) ಮುಖ್ಯಸ್ಥ ಜಗ್ಮೀತ್ ಸಿಂಗ್ ಹೀನಾಯ ಸೋಲು ಕಂಡಿದ್ದಾರೆ. ಇದರ ಬೆನ್ನಲ್ಲೇ ತಮ್ಮ ಸ್ಥಾನವನ್ನು ಉಳಿಸಿಕೊಳ್ಳಲು ವಿಫಲವಾದ ಹಿನ್ನೆಲೆಯಲ್ಲಿ ಅವರು ರಾಜೀನಾಮೆ ನೀಡಿದ್ದಾರೆ.
ಸತತ ಮೂರನೇ ಬಾರಿ ಗೆಲುವಿನ ನಿರೀಕ್ಷೆಯಿಲ್ಲಿದ್ದ ಜಗ್ಮೀತ್ ಸಿಂಗ್ಗೆ ಮಂಗಳವಾರ ಪ್ರಕಟವಾದ ಫಲಿತಾಂಶ ನಿರಾಸೆ ಮೂಡಿಸಿದೆ. ಬ್ರಿಟಿಷ್ ಕೊಲಂಬಿಯಾದ ಬರ್ನಬೀ ಸೆಂಟ್ರಲ್ ಕ್ಷೇತ್ರದಲ್ಲಿ ಕಣಕ್ಕಿಳಿದಿದ್ದ ಜಗ್ಮೀತ್ ಸಿಂಗ್ ಅವರು ಲಿಬರಲ್ ಪಕ್ಷದ ಅಭ್ಯರ್ಥಿ ವೇಡ್ ಚಾಂಗ್ ವಿರುದ್ಧ ಸೋಲು ಕಂಡಿದ್ದಾರೆ. ಸಿಂಗ್ ಅವರು ಶೇ.27ರಷ್ಟು ಮತಗಳು ಬಂದಿದ್ದರೆ, ಚಾಂಗ್ ಅವರಿಗೆ ಶೇ.40ಕ್ಕೂ ಅಧಿಕ ಮತಗಳು ದೊರೆತಿವೆ.
ಅಷ್ಟೇ ಅಲ್ಲದೆ, ಸಿಂಗ್ ಅವರ ಪಕ್ಷವು ಈ ಚುನಾವಣೆಯಲ್ಲಿ ಉತ್ತಮ ಸಾಧನೆ ತೋರಿಲ್ಲ. ಹೀಗಾಗಿ ಅದು ರಾಷ್ಟ್ರೀಯ ಸ್ಥಾನಮಾನವನ್ನು ಕಳೆದುಕೊಳ್ಳುವ ಭೀತಿಯನ್ನೂ ಎದುರಿಸಿದೆ. ರಾಷ್ಟ್ರೀಯ ಸ್ಥಾನಮಾನ ದೊರೆಯಬೇಕೆಂದರೆ ಪಕ್ಷಗಳು ಕನಿಷ್ಠ 12 ಸ್ಥಾನಗಳನ್ನು ಗಳಿಸಬೇಕಾಗುತ್ತದೆ.
“ಈ ರಾತ್ರಿ ನ್ಯೂ ಡೆಮಾಕ್ರಾಟ್ಗಳಿಗೆ ನಿರಾಶಾದಾಯಕವಾಗಿದೆ ಎಂದು ನನಗೆ ತಿಳಿದಿದೆ. ಆದರೆ ಉತ್ತಮ ಕೆನಡಾದ ಕನಸು ಕಾಣಲು ಸಾಧ್ಯವಿಲ್ಲ ಎಂದು ಹೇಳುವವರನ್ನು ನಾವು ನಂಬಿದಾಗ ಮಾತ್ರ ನಾವು ಸೋಲುತ್ತೇವೆ” ಎಂದು ಅವರು ಟ್ವೀಟ್ ಮಾಡಿದ್ದಾರೆ.
ಎನ್ಡಿಪಿಗೆ ಹೆಚ್ಚಿನ ಸ್ಥಾನಗಳನ್ನು ಗೆಲ್ಲಲು ಸಾಧ್ಯವಾಗಲಿಲ್ಲ. ಇದು ನನಗೆ ನಿರಾಸೆ ಉಂಟುಮಾಡಿದೆ. ಆದರೆ, ನಮ್ಮ ಚಳವಳಿಯ ವಿಷಯದಲ್ಲಿ ನಾನು ನಿರಾಸೆಗೊಂಡಿಲ್ಲ. ನನಗೆ ಭರವಸೆಯಿದೆ ಎಂದು 46 ವರ್ಷದ ಸಿಂಗ್ ಬರೆದುಕೊಂಡಿದ್ದಾರೆ.
ಕೆನಡಾ ಚುನಾವಣೆಯಲ್ಲಿ ಮಾರ್ಕ್ ಕಾರ್ನಿಯವರ ಪಕ್ಷಕ್ಕೆ ಗೆಲುವು
ಪ್ರಧಾನಿ ಮಾರ್ಕ್ ಕಾರ್ನಿ ನೇತೃತ್ವದ ಲಿಬರಲ್ಸ್ ಪಕ್ಷವು ಕೆನಡಾದ ಸಾರ್ವತ್ರಿಕ ಚುನಾವಣೆಯಲ್ಲಿ ಗೆಲುವು ಸಾಧಿಸಿದ್ದು, ಲಿಬರಲ್ಸ್ ಗಳೇ ಮುಂದಿನ ಸರ್ಕಾರವನ್ನು ರಚಿಸಲಿದ್ದಾರೆ ಎಂದು ಮಾಧ್ಯಮಗಳು ವರದಿ ಮಾಡಿವೆ. ಆದರೆ ಸಂಸತ್ತಿನಲ್ಲಿ ಲಿಬರಲ್ ಪಕ್ಷ ಬಹುಮತ ಹೊಂದುತ್ತದೆಯೇ ಎಂಬುದು ಇನ್ನೂ ಸ್ಪಷ್ಟವಾಗಿಲ್ಲ.
ಸದ್ಯದ ಮಾಹಿತಿ ಪ್ರಕಾರ ಲಿಬರಲ್ಸ್ ಗಳು 164 ಕ್ಷೇತ್ರಗಳಲ್ಲಿ ಗೆಲುವು ಸಾಧಿಸಿದರೆ, ಕನ್ಸರ್ವೇಟಿವ್ ಗಳು 147ರಲ್ಲಿ ಜಯ ಸಾಧಿಸಿದ್ದಾರೆ. ಮತಗಳ ಎಣಿಕೆ ಮುಂದುವರಿದಿದೆ ಎನ್ನಲಾಗಿದೆ.
ಸತತ ನಾಲ್ಕು ಚುನಾವಣೆಗಳನ್ನು ಗೆದ್ದಿರುವ ಲಿಬರಲ್ ಗಳು ಬಹುಮತ ಪಡೆಯಲು ಹೌಸ್ ಆಫ್ ಕಾಮನ್ಸ್ ನ 172 ಸ್ಥಾನಗಳನ್ನು ಗೆಲ್ಲಬೇಕು. ಸರಳ ಬಹುಮತ ದೊರೆತರೆ ಸಣ್ಣ ಪುಟ್ಟ ಪಕ್ಷಗಳ ಬೆಂಬಲ ಅಗತ್ಯವಿಲ್ಲದೇ ಸರ್ಕಾರ ರಚಿಸಬಹುದು.
ಯುಎಸ್ ಅಧ್ಯಕ್ಷ ಡೊನಾಲ್ಡ್ ಟ್ರಂಪ್ ಅವರ ಸುಂಕ ಯುದ್ಧದ ಮಧ್ಯೆಯೇ ಕಳೆದ ತಿಂಗಳು ಜಸ್ಟಿನ್ ಟ್ರುಡೊ ರಾಜೀನಾಮೆ ಬಳಿಕ ಅವರ ಬದಲಿಗೆ ಪ್ರಧಾನಿಯಾಗಿ ನೇಮಕಗೊಂಡ ಕಾರ್ನಿ, ಈ ಹಿಂದೆ ಕೆನಡಾ ಮತ್ತು ಬ್ರಿಟನ್ ಎರಡರಲ್ಲೂ ಕೇಂದ್ರ ಬ್ಯಾಂಕ್ ಗವರ್ನರ್ ಆಗಿ ಸೇವೆ ಸಲ್ಲಿಸಿದ್ದರು.
