ನವದೆಹಲಿ: ದೇಶದ ಆರ್ಥಿಕ ಚಟುವಟಿಕೆಗಳ ಜೀವನಾಡಿ ಎಂದೇ ಕರೆಯಲ್ಪಡುವ ಡೀಸೆಲ್ ಬಳಕೆಯಲ್ಲಿ ನವೆಂಬರ್ ತಿಂಗಳಲ್ಲಿ ಭಾರೀ ಏರಿಕೆ ಕಂಡುಬಂದಿದೆ. ಹಬ್ಬದ ಸೀಸನ್ ನೀಡಿದ ಉತ್ತೇಜನ ಹಾಗೂ ಜಿಎಸ್‌ಟಿ ದರ ಕಡಿತದ ಪರಿಣಾಮವಾಗಿ, ಕಳೆದ ಆರು ತಿಂಗಳಲ್ಲೇ ಅತ್ಯಧಿಕ ಡೀಸೆಲ್ ಮಾರಾಟ ದಾಖಲಾಗಿದೆ ಎಂದು ಪೆಟ್ರೋಲಿಯಂ ಯೋಜನಾ ಮತ್ತು ವಿಶ್ಲೇಷಣಾ ಕೋಶದ (PPAC) ಅಂಕಿಅಂಶಗಳು ತಿಳಿಸಿವೆ.
ಹಬ್ಬದ ಸೀಸನ್ ಮತ್ತು ಕೃಷಿ ಚಟುವಟಿಕೆಗಳ ಪ್ರಭಾವ
ದೇಶದಲ್ಲಿ ಅತಿ ಹೆಚ್ಚು ಬಳಕೆಯಾಗುವ ಇಂಧನವಾದ ಡೀಸೆಲ್, ಒಟ್ಟು ಇಂಧನ ಬಳಕೆಯ ಶೇಕಡಾ 40ರಷ್ಟು ಪಾಲನ್ನು ಹೊಂದಿದೆ. ನವೆಂಬರ್ ತಿಂಗಳಲ್ಲಿ ಡೀಸೆಲ್ ಮಾರಾಟವು ಶೇಕಡಾ 4.7ರಷ್ಟು ಏರಿಕೆಯಾಗಿ 8.55 ಮಿಲಿಯನ್ ಟನ್‌ಗಳಿಗೆ ತಲುಪಿದೆ. ಇದು ಮೇ 2025ರ ನಂತರ ದಾಖಲಾದ ಅತ್ಯುತ್ತಮ ಪ್ರದರ್ಶನವಾಗಿದೆ. ಮುಂಗಾರು ಮಳೆಯಿಂದಾಗಿ ಜೂನ್ ನಂತರದ ತಿಂಗಳುಗಳಲ್ಲಿ ಕೃಷಿ ಪಂಪ್‌ಸೆಟ್‌ಗಳ ಬಳಕೆ ಮತ್ತು ವಾಹನಗಳ ಸಂಚಾರ ತಗ್ಗಿತ್ತು. ಆದರೆ ಅಕ್ಟೋಬರ್‌ನಲ್ಲಿ ಮಳೆ ಕಡಿಮೆಯಾದಂತೆ ಮತ್ತು ಹಬ್ಬಗಳ ಸಾಲು ಪ್ರಾರಂಭವಾದಂತೆ ಸರಕು ಸಾಗಣೆ ಚಟುವಟಿಕೆಗಳು ಚುರುಕುಗೊಂಡವು. ಇದರ ಜೊತೆಗೆ ಸರಕು ಮತ್ತು ಸೇವಾ ತೆರಿಗೆಯಲ್ಲಿನ (ಜಿಎಸ್‌ಟಿ) ಕಡಿತವು ಮಾರುಕಟ್ಟೆಯಲ್ಲಿ ಬೇಡಿಕೆಯನ್ನು ಹೆಚ್ಚಿಸಲು ನೆರವಾಯಿತು. 2023ರ ನವೆಂಬರ್‌ಗೆ ಹೋಲಿಸಿದರೆ ಈ ವರ್ಷ ಡೀಸೆಲ್ ಬಳಕೆಯಲ್ಲಿ ಬರೋಬ್ಬರಿ ಶೇಕಡಾ 13.61ರಷ್ಟು ಏರಿಕೆ ಕಂಡುಬಂದಿರುವುದು ಆರ್ಥಿಕತೆಯ ಚೇತರಿಕೆಯ ಸಂಕೇತವಾಗಿದೆ.
ಪೆಟ್ರೋಲ್ ಮತ್ತು ವಿಮಾನ ಇಂಧನದಲ್ಲೂ ಚೇತರಿಕೆ
ಕೇವಲ ಡೀಸೆಲ್ ಮಾತ್ರವಲ್ಲದೆ, ಪೆಟ್ರೋಲ್ ಮತ್ತು ವಿಮಾನ ಇಂಧನದ (ATF) ಬಳಕೆಯಲ್ಲೂ ಗಮನಾರ್ಹ ಏರಿಕೆ ದಾಖಲಾಗಿದೆ. ನವೆಂಬರ್‌ನಲ್ಲಿ ಪೆಟ್ರೋಲ್ ಬಳಕೆ ಶೇಕಡಾ 2.19ರಷ್ಟು ಹೆಚ್ಚಳವಾಗಿ 3.5 ಮಿಲಿಯನ್ ಟನ್‌ಗಳಿಗೆ ತಲುಪಿದೆ. ಕಳೆದ ವರ್ಷಕ್ಕೆ ಹೋಲಿಸಿದರೆ ಪೆಟ್ರೋಲ್ ಮಾರಾಟದಲ್ಲಿ ಶೇಕಡಾ 12ರಷ್ಟು ಪ್ರಗತಿ ಕಂಡುಬಂದಿದೆ. ಇನ್ನು ವಿಮಾನಯಾನ ಕ್ಷೇತ್ರವೂ ಚೇತರಿಸಿಕೊಳ್ಳುತ್ತಿದ್ದು, ಎಟಿಎಫ್ ಬಳಕೆಯು ಶೇಕಡಾ 4.7ರಷ್ಟು ಏರಿಕೆಯಾಗಿ 7,83,000 ಟನ್‌ಗಳನ್ನು ಮುಟ್ಟಿದೆ. 2019ರಿಂದ ಈಚೆಗೆ ವಿಮಾನ ಇಂಧನ ವಲಯವು ಸ್ಥಿರವಾದ ಬೆಳವಣಿಗೆಯನ್ನು ಕಾಯ್ದುಕೊಂಡಿದೆ.
ಅಡುಗೆ ಅನಿಲ ಬೇಡಿಕೆಯಲ್ಲಿ ಹೆಚ್ಚಳ
ಗೃಹಬಳಕೆಯ ಎಲ್‌ಪಿಜಿ ಸಿಲಿಂಡರ್ ಮಾರಾಟದಲ್ಲಿಯೂ ಉತ್ಸಾಹದಾಯಕ ಬೆಳವಣಿಗೆ ಕಂಡುಬಂದಿದೆ. ನವೆಂಬರ್ ತಿಂಗಳಲ್ಲಿ ಎಲ್‌ಪಿಜಿ ಬಳಕೆ ಶೇಕಡಾ 7.62ರಷ್ಟು ಹೆಚ್ಚಳವಾಗಿ ಸುಮಾರು 3 ಮಿಲಿಯನ್ ಟನ್‌ಗಳಷ್ಟಾಗಿದೆ. ಪ್ರಧಾನ ಮಂತ್ರಿ ಉಜ್ವಲ ಯೋಜನೆಯಡಿ (PMUY) ಸುಮಾರು 25 ಲಕ್ಷ ಹೊಸ ಸಂಪರ್ಕಗಳನ್ನು ನೀಡಲಾಗಿದ್ದು, ಫಲಾನುಭವಿಗಳ ಸಂಖ್ಯೆ 10.33 ಕೋಟಿಯಿಂದ 10.58 ಕೋಟಿಗೆ ಏರಿಕೆಯಾಗಿದೆ. ಇದು ಗ್ರಾಮೀಣ ಭಾಗದಲ್ಲಿ ಅಡುಗೆ ಅನಿಲದ ಬೇಡಿಕೆ ಹೆಚ್ಚಲು ಪ್ರಮುಖ ಕಾರಣವಾಗಿದೆ ಎಂದು ತಜ್ಞರು ವಿಶ್ಲೇಷಿಸಿದ್ದಾರೆ.
ಇದನ್ನೂ ಓದಿ : ಸುರಕ್ಷತೆಯಲ್ಲಿ ಹೊಸ ಅಧ್ಯಾಯ : ‘ಭಾರತ್ ಎನ್‌ಸಿಎಪಿ’ಯಲ್ಲಿ ಮಾರುತಿ ಇ-ವಿಟಾರಾಗೆ 5-ಸ್ಟಾರ್ ಕಿರೀಟ!
