ಆಗಸದಲ್ಲೇ ಡಿಕ್ಕಿಯಾದವೇ ಅಮೆರಿಕದ ಬೃಹತ್ ಇಂಧನ ವಿಮಾನಗಳು?

ವಾಷಿಂಗ್ಟನ್: ಮಧ್ಯಪ್ರಾಚ್ಯ ಯುದ್ಧದ ನಡುವೆಯೇ ಅಮೆರಿಕದ ಸೇನೆಗೆ ಭಾರೀ ಹಿನ್ನಡೆಯೆಂಬಂತೆ, ಇರಾಕ್‌ನ ವಾಯುಪ್ರದೇಶದಲ್ಲಿ ಅಮೆರಿಕದ ಅತಿದೊಡ್ಡ ವಾಯು ಇಂಧನ ಪೂರೈಕೆ ವಿಮಾನವೊಂದು (KC-135) ಪತನಗೊಂಡಿದ್ದು, ಮತ್ತೊಂದು ವಿಮಾನ ತೀವ್ರವಾಗಿ ಹಾನಿಗೀಡಾಗಿರುವ ಘಟನೆ ವರದಿಯಾಗಿದೆ. ಈ ಘಟನೆಯು ಶತ್ರುಗಳ ದಾಳಿಯಿಂದಾಗಲಿ ಅಥವಾ ಆಕಸ್ಮಿಕ ಗುಂಡಿನ ದಾಳಿಯಿಂದಾಗಲಿ ನಡೆದಿಲ್ಲ ಎಂದು ಅಮೆರಿಕದ ಸೆಂಟ್ರಲ್ ಕಮಾಂಡ್ ಸ್ಪಷ್ಟಪಡಿಸಿದೆ. ಈ ಹೇಳಿಕೆಯು ಎರಡು ಬೃಹತ್ ವಿಮಾನಗಳ ನಡುವೆ ಆಗಸದಲ್ಲೇ ಡಿಕ್ಕಿ ಸಂಭವಿಸಿರಬಹುದೆಂಬ ಊಹಾಪೋಹಗಳಿಗೆ ಕಾರಣವಾಗಿದೆ.

ಹಾನಿಗೀಡಾದ ವಿಮಾನದ ಚಿತ್ರ ವೈರಲ್

ಹಾನಿಗೊಳಗಾದ ಮತ್ತೊಂದು ಕೆಸಿ-135 ಇಂಧನ ಪೂರೈಕೆ ವಿಮಾನವು ಇಸ್ರೇಲ್‌ನ ಟೆಲ್ ಅವೀವ್‌ನಲ್ಲಿ ಸುರಕ್ಷಿತವಾಗಿ ಇಳಿದಿದೆ ಎಂದು ಅಮೆರಿಕದ ಸೇನೆ ತಿಳಿಸಿದೆ. ಆದರೆ ಸಾಮಾಜಿಕ ಜಾಲತಾಣಗಳಲ್ಲಿ ಹರಿದಾಡುತ್ತಿರುವ ದೃಶ್ಯಗಳ ಪ್ರಕಾರ, ಸುರಕ್ಷಿತವಾಗಿ ಲ್ಯಾಂಡ್ ಆಗಿರುವ ಈ ವಿಮಾನದ ಹಿಂಭಾಗದ ರೆಕ್ಕೆಯ (Vertical stabiliser) ಅರ್ಧದಷ್ಟು ಭಾಗ ಸಂಪೂರ್ಣವಾಗಿ ಕತ್ತರಿಸಿಹೋಗಿರುವುದು ಕಂಡುಬಂದಿದೆ. “ಒಎಸ್ಐಎನ್‌ಟಿ ಟೆಕ್ನಿಕಲ್” (OSINTtechnical) ಎಂಬ ಎಕ್ಸ್ (ಟ್ವಿಟರ್) ಖಾತೆಯು ಈ ಚಿತ್ರವನ್ನು ಹಂಚಿಕೊಂಡಿದೆ. ಈ ಚಿತ್ರಗಳನ್ನು ಗಮನಿಸಿರುವ ಸೇನಾ ವಿಶ್ಲೇಷಕರು, ಇಂಧನ ವರ್ಗಾವಣೆ ಪ್ರಕ್ರಿಯೆ ನಡೆಯುತ್ತಿದ್ದಾಗ ಈ ಎರಡು ಟ್ಯಾಂಕರ್‌ಗಳು ಪರಸ್ಪರ ಡಿಕ್ಕಿ ಹೊಡೆದಿರುವ ಸಾಧ್ಯತೆ ದಟ್ಟವಾಗಿದೆ ಎಂದು ಅಭಿಪ್ರಾಯಪಟ್ಟಿದ್ದಾರೆ.

ಅಪಾಯಕಾರಿ ಕಾರ್ಯಾಚರಣೆ

ಮಿಲಿಟರಿ ವಾಯುಯಾನದಲ್ಲಿ ವಿಮಾನವಾಹಕ ನೌಕೆಗಳ ಮೇಲೆ ಲ್ಯಾಂಡಿಂಗ್ ಮಾಡುವುದನ್ನು ಬಿಟ್ಟರೆ, ನಡುಬಾನಿನಲ್ಲಿ ಇಂಧನ ತುಂಬುವುದು ಅತ್ಯಂತ ಕಷ್ಟಕರ ಹಾಗೂ ಅಪಾಯಕಾರಿ ಸಾಹಸವಾಗಿದೆ. ಈ ಕಾರ್ಯಾಚರಣೆಯ ವೇಳೆ ಎರಡು ವಿಮಾನಗಳು ಕೇವಲ 100 ಅಡಿಗಳಷ್ಟು ಹತ್ತಿರದಲ್ಲಿ ಹಾರಾಟ ನಡೆಸಬೇಕಾಗುತ್ತದೆ. ಕೊಂಚ ಏರುಪೇರಾದರೂ ಡಿಕ್ಕಿಯ ಅಪಾಯ ಖಂಡಿತ. ಆರು ದಶಕಗಳಿಂದ ಅಮೆರಿಕ ಸೇನೆಯಲ್ಲಿರುವ ಈ ಕೆಸಿ-135 ಟ್ಯಾಂಕರ್‌ಗಳು, ಯುದ್ಧವಿಮಾನಗಳಿಗೆ ಬಹುದೂರದವರೆಗೆ ಸಾಗಲು ನೆರವಾಗುವ ಮೂಲಕ ಸೇನಾ ಕಾರ್ಯಾಚರಣೆಯ ಬಲವನ್ನು ಹೆಚ್ಚಿಸುವ ‘ಫೋರ್ಸ್ ಮಲ್ಟಿಪ್ಲೈಯರ್‌’ಗಳಾಗಿವೆ. ಸಾಮಾನ್ಯವಾಗಿ ಈ ವಿಮಾನದಲ್ಲಿ ಪೈಲಟ್, ಕೋ-ಪೈಲಟ್ ಮತ್ತು ಇಂಧನ ತುಂಬುವ ಪ್ರಕ್ರಿಯೆಯನ್ನು ನಿರ್ವಹಿಸುವ ಸಿಬ್ಬಂದಿ ಸೇರಿದಂತೆ ಕನಿಷ್ಠ ಮೂವರು ಇರುತ್ತಾರೆ. ಕೆಲವು ಮಿಷನ್‌ಗಳಲ್ಲಿ ನ್ಯಾವಿಗೇಟರ್ ಸೇರಿ 37ರಷ್ಟು ಮಂದಿ ಪ್ರಯಾಣಿಸಲು ಇದರಲ್ಲಿ ಅವಕಾಶವಿದೆ.

ಅಮೆರಿಕ ಸೇನೆಗೆ ಸತತ ಹಿನ್ನಡೆ

ಅಮೆರಿಕ ಮತ್ತು ಇರಾನ್ ನಡುವಿನ ಸಂಘರ್ಷದ ಕಾವು ಹೆಚ್ಚುತ್ತಿರುವ ಈ ಸಂದರ್ಭದಲ್ಲಿ, ಅಮೆರಿಕ ಸೇನೆ ಕಳೆದುಕೊಂಡ ಕನಿಷ್ಠ ನಾಲ್ಕನೇ ಮಿಲಿಟರಿ ವಿಮಾನ ಇದಾಗಿದೆ. ಕೆಲವೇ ದಿನಗಳ ಹಿಂದಷ್ಟೇ ಕುವೈತ್‌ನ ವಾಯುಪ್ರದೇಶದಲ್ಲಿ ಮೂರು ಎಫ್-15ಇ ಸ್ಟ್ರೈಕ್ ಈಗಲ್ (F-15E Strike Eagles) ಯುದ್ಧವಿಮಾನಗಳು ಆಕಸ್ಮಿಕ ಗುಂಡಿನ ದಾಳಿಗೆ ಸಿಲುಕಿ ಪತನಗೊಂಡಿದ್ದವು. ಅಷ್ಟೇ ಅಲ್ಲದೆ, ದುಬಾರಿ ಬೆಲೆಯ ‘ಥಾಡ್’ (THAAD) ಕ್ಷಿಪಣಿ ನಿರೋಧಕ ವ್ಯವಸ್ಥೆಯ ರೇಡಾರ್ ನಾಶವಾದ ಬೆನ್ನಲ್ಲೇ ಈ ಇಂಧನ ಪೂರೈಕೆ ವಿಮಾನದ ಪತನವು ಅಮೆರಿಕದ ಸೇನೆಗೆ ತೀವ್ರ ಆಘಾತವನ್ನುಂಟು ಮಾಡಿದೆ.

ಇದನ್ನೂ ಓದಿ : ಇಂಡಸ್ಟ್ರಿಗೂ ತಟ್ಟಿದ ಗ್ಯಾಸ್ ಶಾಕ್.. ಪೀಣ್ಯದಲ್ಲಿ 6 ಸಾವಿರಕ್ಕೂ ಹೆಚ್ಚು ಕೈಗಾರಿಕೆಗಳಿಗೆ ಶಟ್‌ಡೌನ್ ಭೀತಿ