ಬೆಂಗಳೂರು : ಶನಿವಾರ ಬೆಂಗಳೂರಿನ ಎಂ. ಚಿನ್ನಸ್ವಾಮಿ ಕ್ರೀಡಾಂಗಣದಲ್ಲಿ ನಡೆಯಲಿರುವ ರಾಯಲ್ ಚಾಲೆಂಜರ್ಸ್ ಬೆಂಗಳೂರು (RCB) ವಿರುದ್ಧದ ಮಹತ್ವದ ಪಂದ್ಯಕ್ಕೂ ಮುನ್ನ, ಡೆಲ್ಲಿ ಕ್ಯಾಪಿಟಲ್ಸ್ (DC) ತಂಡದ ಮುಖ್ಯ ಕೋಚ್ ಹೇಮಂಗ್ ಬದಾನಿ (Hemang Badani) ಅವರು ತಮ್ಮ ಯುವ ವೇಗದ ಬೌಲರ್ ಆಕಿಬ್ ನಬಿಗೆ (Auqib Nabi) ದೃಢ ಬೆಂಬಲ ವ್ಯಕ್ತಪಡಿಸಿದ್ದಾರೆ.
ಇತ್ತೀಚೆಗಷ್ಟೇ ಸಿಎಸ್ಕೆ (CSK) ವಿರುದ್ಧದ ಪಂದ್ಯದಲ್ಲಿ ತಮ್ಮ ಐಪಿಎಲ್ ಪದಾರ್ಪಣೆ ಮಾಡಿದ್ದ ಜಮ್ಮು ಮತ್ತು ಕಾಶ್ಮೀರ ಮೂಲದ ಆಕಿಬ್ ನಬಿ, ಆ ಪಂದ್ಯದಲ್ಲಿ ಹೇಳಿಕೊಳ್ಳುವಂತಹ ಪ್ರದರ್ಶನ ನೀಡಿರಲಿಲ್ಲ. ಹೀಗಿದ್ದರೂ ತಂಡದ ಮ್ಯಾನೇಜ್ಮೆಂಟ್ ಅವರ ಮೇಲೆ ಸಂಪೂರ್ಣ ವಿಶ್ವಾಸವಿಟ್ಟಿದೆ ಎಂದು ಬದಾನಿ ಸ್ಪಷ್ಟಪಡಿಸಿದ್ದಾರೆ.
ಆಕಿಬ್ ನಬಿಯವರ ಗುಣಗಾನ ಮಾಡಿದ ಬದಾನಿ
ಆರ್ಸಿಬಿ ವಿರುದ್ಧದ ಪಂದ್ಯಕ್ಕೂ ಮುನ್ನ ಮಾತನಾಡಿದ ಹೇಮಂಗ್ ಬದಾನಿ, “ಮೊದಲ ಪಂದ್ಯದಲ್ಲಿ ಪ್ರತಿಯೊಬ್ಬರಿಗೂ ಆತಂಕ (nerves) ಇರುತ್ತದೆ. ಆ ಪಂದ್ಯದಲ್ಲಿ ಆಕಿಬ್ಗೂ ಅದೇ ರೀತಿ ಆತಂಕವಿತ್ತು ಎಂದು ನನಗನಿಸುತ್ತಿದೆ. ಆದರೆ ಅವರು ಖಂಡಿತವಾಗಿಯೂ ನಮ್ಮ ತಂಡಕ್ಕಾಗಿ ಉತ್ತಮ ಪ್ರದರ್ಶನ ನೀಡಲಿದ್ದಾರೆ” ಎಂದು ವಿಶ್ವಾಸ ವ್ಯಕ್ತಪಡಿಸಿದ್ದಾರೆ.
ಇದೇ ವೇಳೆ, ಹರಾಜಿನಲ್ಲಿ 8.4 ಕೋಟಿ ರೂ. ನೀಡಿ ಆಕಿಬ್ ನಬಿಯನ್ನು ಖರೀದಿಸಲು ಪ್ರಮುಖ ಎರಡು ಕಾರಣಗಳನ್ನು ಬದಾನಿ ವಿವರಿಸಿದ್ದಾರೆ. “ಒಂದು ಅವರ ಮನಸ್ಥಿತಿ (temperament). ಅವರ ಜೊತೆ ಒಳ್ಳೆಯದಾಗಲಿ ಅಥವಾ ಕೆಟ್ಟದ್ದೇ ಆಗಲಿ, ಅವರು ಸದಾ ಒಂದೇ ರೀತಿಯ ಸಮತೋಲನ ಕಾಯ್ದುಕೊಳ್ಳುವುದನ್ನು ನಾನು ನೋಡಿದ್ದೇನೆ. ಇನ್ನೊಂದು ಅವರ ಸ್ಥಿರತೆ (consistency). ನಿರ್ದಿಷ್ಟ ಲೈನ್ ಮತ್ತು ಲೆಂಗ್ತ್ನಲ್ಲಿ ಸತತವಾಗಿ ಬೌಲಿಂಗ್ ಮಾಡುವ ಸಾಮರ್ಥ್ಯ ಅವರಲ್ಲಿದೆ. ಉನ್ನತ ಮಟ್ಟದ ಕ್ರಿಕೆಟ್ನಲ್ಲಿ ಯಶಸ್ವಿಯಾಗಲು ಬೇಕಾದ ಕೌಶಲ ಅವರ ಬಳಿ ಇದೆ” ಎಂದು ಬದಾನಿ ಶ್ಲಾಘಿಸಿದ್ದಾರೆ.
ತಂಡದ ಪ್ರದರ್ಶನದ ಬಗ್ಗೆ ಕೋಚ್ ಮಾತು
ಈ ಬಾರಿಯ ಟೂರ್ನಿಯಲ್ಲಿ ಡೆಲ್ಲಿ ಕ್ಯಾಪಿಟಲ್ಸ್ ತಂಡದ ಆರಂಭಿಕ ಪ್ರದರ್ಶನ ಅಷ್ಟೇನೂ ಸ್ಥಿರವಾಗಿಲ್ಲ. ಆದರೆ, ಟೂರ್ನಿಯ ಇಂಥ ಹಂತದಲ್ಲಿ ‘ಮೊಮೆಂಟಮ್’ (momentum) ಬಗ್ಗೆ ತಲೆಕೆಡಿಸಿಕೊಳ್ಳುವ ಅಗತ್ಯವಿಲ್ಲ ಎಂದು ಬದಾನಿ ಹೇಳಿದ್ದಾರೆ. “ಹಲವು ತರಬೇತುದಾರರು ಮತ್ತು ವಿಶ್ಲೇಷಕರು ಮೊಮೆಂಟಮ್ ಬಗ್ಗೆ ಮಾತನಾಡುತ್ತಾರೆ. ಆದರೆ ನನ್ನ ಪ್ರಕಾರ, ತಂಡದ ನ್ಯೂನತೆಗಳನ್ನು ಗುರುತಿಸಿ ಸರಿಪಡಿಸುವುದು ಹೆಚ್ಚು ಮುಖ್ಯ. ನಮ್ಮ ಬ್ಯಾಟಿಂಗ್ ವಿಭಾಗದ ಬಗ್ಗೆ ಹೆಚ್ಚು ಚಿಂತೆಯಿಲ್ಲ. ನಾವು ಸತತವಾಗಿ 180ಕ್ಕೂ ಅಧಿಕ ರನ್ ಕಲೆಹಾಕುತ್ತಿದ್ದೇವೆ. ನಿರ್ಣಾಯಕ ಘಟ್ಟದಲ್ಲಿ ನಮ್ಮ ಬ್ಯಾಟರ್ಗಳು ಉತ್ತಮ ಪ್ರದರ್ಶನ ನೀಡಿದರೆ ಸಾಕು, ನಮಗೆ ತೊಂದರೆಯಾಗುವುದಿಲ್ಲ” ಎಂದು ಅವರು ವಿಶ್ವಾಸ ವ್ಯಕ್ತಪಡಿಸಿದ್ದಾರೆ.
ಇದನ್ನೂ ಓದಿ : ಕೆರೆಗೆ ಮೀನು ಹಿಡಿಯಲು ಹೋದ ಯುವಕ ನೀರುಪಾಲು!
