“ಭೂಮಿ ಮೇಲಿನ ನರಕ” ಎಂದು ಕರೆಯಲಾಗುವ ಜೈಲೇ ಈಗ ವೆನೆಜುವೆಲಾ ಅಧ್ಯಕ್ಷನ ವಾಸಸ್ಥಾನ!

ನ್ಯೂಯಾರ್ಕ್: ಅಮೆರಿಕದ ಡೆಲ್ಟಾ ಪಡೆಯಿಂದ ಬಂಧಿತರಾದ ವೆನೆಜುವೆಲಾ ಅಧ್ಯಕ್ಷ ನಿಕೋಲಸ್ ಮಡುರೋ ಹಾಗೂ ಅವರ ಪತ್ನಿಯನ್ನು “ಭೂಮಿಯ ಮೇಲಿನ ನರಕ” ಎಂದೇ ಕರೆಯಲ್ಪಡುವ ಅಮೆರಿಕದ ಬ್ರೂಕ್ಲಿನ್‌ನ ಮೆಟ್ರೋಪಾಲಿಟನ್ ಡಿಟೆನ್ಶನ್ ಸೆಂಟರ್‌ನಲ್ಲಿ ಇರಿಸಲಾಗಿದೆ. ಭಾನುವಾರ ರಾತ್ರಿಯೇ ಅವರನ್ನು ಬಿಗಿಭದ್ರತೆಯೊಂದಿಗೆ ಈ ಜೈಲಿಗೆ ಸ್ಥಳಾಂತರಿಸಲಾಗಿದೆ.

1990ರ ದಶಕದ ಆರಂಭದಲ್ಲಿ ನಿರ್ಮಾಣಗೊಂಡಿರುವ ಈ ಜೈಲು ನ್ಯೂಯಾರ್ಕ್‌ನ ಮ್ಯಾನ್‌ಹ್ಯಾಟನ್ ಮತ್ತು ಬ್ರೂಕ್ಲಿನ್ ಫೆಡರಲ್ ನ್ಯಾಯಾಲಯಗಳಿಗೆ ಆರೋಪಿಗಳನ್ನು ಕಳುಹಿಸುವ ಮುನ್ನ ವಶದಲ್ಲಿಟ್ಟುಕೊಳ್ಳುವ ಕೇಂದ್ರವಾಗಿದೆ. ಪ್ರಸ್ತುತ ಇಲ್ಲಿ ಸುಮಾರು 1,300 ಮಂದಿ ಬಂಧನದಲ್ಲಿದ್ದಾರೆ.

ಬ್ರೂಕ್ಲಿನ್‌ನ ನೀರಿನ ತಟದಲ್ಲಿರುವ ಈ ಜೈಲು ಪ್ರತಿಷ್ಠಿತ ಮಾಲ್‌ವೊಂದರ ಮುಂದೆ ಇದೆ. ಇದನ್ನು “ಹೆಲ್ ಆನ್ ಅರ್ಥ್” (ಭೂಮಿಯಲ್ಲಿನ ನರಕ) ಎಂದು ಕರೆಯಲಾಗುತ್ತದೆ. ಖ್ಯಾತ ಗಾಯಕರಾದ ಆರ್ ಕೆಲ್ಲಿ, ನಿರ್ಮಾಪಕ ಡಿಡಿ ಕಮ್ಸ್, ಕ್ರಿಪ್ಟೋ ಉದ್ಯಮಿ ಸ್ಯಾಮ್ ಬ್ಯಾಂಕ್‌ಮನ್-ಫ್ರೈಡ್ ಹಾಗೂ ಜೆಫ್ರಿ ಎಪ್ಸ್ಟೀನ್ ಸಹಚರಳಾದ ಗಿಸ್ಲೇನ್ ಮ್ಯಾಕ್ಸ್‌ವೆಲ್ ಮುಂತಾದ ಹಲವರು ಈ ಜೈಲಲ್ಲಿ ದಿನಕಳೆದಿದ್ದಾರೆ. ಪ್ರಸ್ತುತ ಇಲ್ಲಿ ಮೆಕ್ಸಿಕೋದ ಸಿನಾಲೋವಾ ಡ್ರಗ್ ಕಾರ್ಟೆಲ್ ಸಹ-ಸಂಸ್ಥಾಪಕ ಇಸ್ಮೇಲ್ “ಎಲ್ ಮಾಯೋ” ಝಂಬಡಾ ಗಾರ್ಸಿಯಾ ಮತ್ತು ಯುನೈಟೆಡ್‌ ಹೆಲ್ತ್‌ಕೇರ್ ಸಿಇಒನ ಹತ್ಯೆ ಆರೋಪಿಯಾದ ಲೂಯಿಜಿ ಮಾಂಗಿಯೋನ್ ಸೇರಿದಂತೆ ಅಂತಾರಾಷ್ಟ್ರೀಯ ಅಪರಾಧಿಗಳನ್ನು ಈ ಜೈಲು ಹೊಂದಿದೆ.

ಈ ಜೈಲಿನ ಒಳಗಿನ ಕರಾಳ ವ್ಯವಸ್ಥೆಯ ವಿವರ ಇಲ್ಲಿದೆ:

ಅಸಹನೀಯ ಹವಾಮಾನ
ಈ ಜೈಲಿನಲ್ಲಿ ಕಿಟಕಿಗಳಿಲ್ಲದೆ ಇರುವುದರಿಂದ ಹೊರಗಿನ ಗಾಳಿ ಅಥವಾ ಸೂರ್ಯನ ಬೆಳಕು ಕೈದಿಗಳಿಗೆ ಸಿಗುವುದಿಲ್ಲ. 2019ರಲ್ಲಿ ನ್ಯೂಯಾರ್ಕ್‌ನಲ್ಲಿ ಶೂನ್ಯಕ್ಕಿಂತ ಕಡಿಮೆ ತಾಪಮಾನವಿದ್ದಾಗ ಜೈಲಿನಲ್ಲಿ ವಿದ್ಯುತ್ ಸಂಪರ್ಕ ಕಡಿತವಾಗಿತ್ತು. ಆಗ ಕೈದಿಗಳು ಯಾವುದೇ ಬೆಚ್ಚಗಿನ ವ್ಯವಸ್ಥೆ (Heating) ಇಲ್ಲದೆ ವಾರಗಟ್ಟಲೆ ಕತ್ತಲಲ್ಲಿ ನಡುಗುತ್ತಾ ಕಳೆದಿದ್ದರು.

ಕೊಳಚೆ ಮತ್ತು ಶಿಲೀಂಧ್ರ: ಜೈಲಿನಲ್ಲಿ ಸರಿಯಾದ ನಿರ್ವಹಣೆ ಇಲ್ಲದ ಕಾರಣ ಗೋಡೆಗಳಲ್ಲಿ ಶಿಲೀಂಧ್ರ ಬೆಳೆದಿರುತ್ತದೆ ಮತ್ತು ಇಲಿ-ಹೆಗ್ಗಣಗಳ ಕಾಟ ವಿಪರೀತವಾಗಿದೆ.

ಸಿಬ್ಬಂದಿ ಕೊರತೆಯಿದ್ದಾಗ “ಲಾಕ್‌ಡೌನ್”

ಇಲ್ಲಿ ಸಿಬ್ಬಂದಿಗಳ ಸಂಖ್ಯೆ ಅತ್ಯಂತ ಕಡಿಮೆ ಇದೆ. ಈ ಕೊರತೆಯನ್ನು ಮುಚ್ಚಿಹಾಕಲು ಅಧಿಕಾರಿಗಳು ಆಗಾಗ್ಗೆ ಜೈಲನ್ನು ಸಂಪೂರ್ಣ ‘ಲಾಕ್‌ಡೌನ್’ ಮಾಡುತ್ತಾರೆ. ಲಾಕ್‌ಡೌನ್ ಸಮಯದಲ್ಲಿ ಕೈದಿಗಳು ದಿನದ 24 ಗಂಟೆಯೂ ತಮ್ಮ ಸಣ್ಣ ಕೋಣೆಗಳಲ್ಲೇ ಇರಬೇಕಾಗುತ್ತದೆ. ಅವರಿಗೆ ಹೊರಗೆ ಬಂದು ವ್ಯಾಯಾಮ ಮಾಡಲು, ಸ್ನಾನ ಮಾಡಲು ಅಥವಾ ತಮ್ಮ ವಕೀಲರನ್ನು ಭೇಟಿ ಮಾಡಲು ಸಹ ಅವಕಾಶ ಇರುವುದಿಲ್ಲ. ಇದು ಕೈದಿಗಳ ಮಾನಸಿಕ ಆರೋಗ್ಯದ ಮೇಲೆ ತೀವ್ರ ಪರಿಣಾಮ ಬೀರುತ್ತದೆ.

ಭದ್ರತಾ ವೈಫಲ್ಯ

ಇಲ್ಲಿ ಕೈದಿಗಳ ನಡುವೆ ಆಗಾಗ್ಗೆ ಮಾರಣಾಂತಿಕ ಗಲಾಟೆಗಳು ನಡೆಯುತ್ತವೆ. ಕೇವಲ 2024ರ ಜೂನ್ ಮತ್ತು ಜುಲೈ ತಿಂಗಳಿನಲ್ಲಿಯೇ ಇಬ್ಬರು ಕೈದಿಗಳು ಹತ್ಯೆಯಾಗಿದ್ದಾರೆ. ಇತ್ತೀಚೆಗೆ ಲೂಯಿಜಿ ಮಾಂಗಿಯೋನ್ ಎಂಬ ಹೈಪ್ರೊಫೈಲ್ ಕೈದಿಯ ಮೇಲೆ ಸಹ ಹಲ್ಲೆ ನಡೆದಿದೆ.

ಚಿತ್ರಹಿಂಸೆಯ ನರಕ

ಕೈದಿಗಳಿಗೆ ಗಾಯವಾದಾಗ ಅಥವಾ ಅನಾರೋಗ್ಯಕ್ಕೊಳಗಾದಾಗ ಸರಿಯಾದ ಸಮಯಕ್ಕೆ ವೈದ್ಯಕೀಯ ಚಿಕಿತ್ಸೆ ಸಿಗುವುದಿಲ್ಲ. ಅನೇಕ ಬಾರಿ ಗಂಭೀರ ಕಾಯಿಲೆ ಇದ್ದರೂ ಕೇವಲ ನೋವು ನಿವಾರಕ ಮಾತ್ರೆಗಳನ್ನು ನೀಡಿ ಕೈಬಿಡಲಾಗುತ್ತದೆ ಎಂಬ ಆರೋಪವಿದೆ. ಇಲ್ಲಿನ ಸಿಬ್ಬಂದಿಗಳೇ ಕೈದಿಗಳಿಗೆ ಡ್ರಗ್ಸ್, ಮೊಬೈಲ್ ಫೋನ್ ಮತ್ತು ಇತರ ನಿಷೇಧಿತ ವಸ್ತುಗಳನ್ನು ಪೂರೈಸುವಲ್ಲಿ ಭಾಗಿಯಾಗಿದ್ದಾರೆ. ಸಿಬ್ಬಂದಿಗಳು ಲಂಚ ಪಡೆದು ಕೈದಿಗಳಿಗೆ ಅನುಕೂಲ ಮಾಡಿಕೊಡುವುದು ಇಲ್ಲಿ ಬಹಿರಂಗ ರಹಸ್ಯವಾಗಿದೆ.

ಆಹಾರ ಸೇರಿ ಮೂಲಭೂತ ಸೌಕರ್ಯಗಳ ಕೊರತೆ

ಇಲ್ಲಿ ನೀಡಲಾಗುವ ಆಹಾರ ಅತ್ಯಂತ ಕಳಪೆಯಾಗಿರುತ್ತದೆ ಮತ್ತು ಕೆಲವೊಮ್ಮೆ ತಿನ್ನಲು ಅಸಾಧ್ಯವಾದ ಸ್ಥಿತಿಯಲ್ಲಿರುತ್ತದೆ ಎಂದು ಕೈದಿಗಳು ದೂರುತ್ತಾರೆ. ಕೈದಿಗಳು ತಮ್ಮ ಕುಟುಂಬ ಸದಸ್ಯರೊಂದಿಗೆ ಫೋನ್‌ನಲ್ಲಿ ಮಾತನಾಡಲು ಅಥವಾ ಇಮೇಲ್ ಮಾಡಲು ಸಹ ಇಲ್ಲಿ ಹರಸಾಹಸ ಪಡಬೇಕಾಗುತ್ತದೆ.

ಅಲ್ಲಿ ಏನು ಮಾಡಲಾಗುತ್ತದೆ?

ಇದು ಶಿಕ್ಷೆ ಅನುಭವಿಸುವ ಜೈಲಿಗಿಂತ ಹೆಚ್ಚಾಗಿ, ವಿಚಾರಣಾಧೀನ ಕೈದಿಗಳನ್ನು ಇರಿಸುವ ಕೇಂದ್ರವಾಗಿದೆ. ಆರೋಪಿಗಳನ್ನು ಕೋರ್ಟ್‌ಗೆ ಹಾಜರುಪಡಿಸುವ ಮುನ್ನ ಇಲ್ಲಿ ತೀವ್ರ ತಪಾಸಣೆಗೆ ಒಳಪಡಿಸಲಾಗುತ್ತದೆ. ಮಡುರೋ ಅವರಂತಹ ಹೈಪ್ರೊಫೈಲ್ ಕೈದಿಗಳನ್ನು ಅಥವಾ ಅಪಾಯಕಾರಿ ಕ್ರಿಮಿನಲ್‌ಗಳನ್ನು ಇತರರಿಂದ ಪ್ರತ್ಯೇಕವಾಗಿ ಸಣ್ಣ ಕೋಣೆಗಳಲ್ಲಿ ಇರಿಸಲಾಗುತ್ತದೆ. ಇಲ್ಲಿ ಅವರಿಗೆ ಯಾರೊಂದಿಗೂ ಮಾತನಾಡಲು ಅವಕಾಶವಿರುವುದಿಲ್ಲ. ಸಿಸಿಟಿವಿ ಕ್ಯಾಮೆರಾಗಳು ಮತ್ತು ಸಶಸ್ತ್ರ ಭದ್ರತಾ ಸಿಬ್ಬಂದಿಯ ನಿರಂತರ ಕಣ್ಗಾವಲಿನಲ್ಲಿ ಕೈದಿಗಳನ್ನು ಇಡಲಾಗುತ್ತದೆ. ಒಟ್ಟಾರೆಯಾಗಿ, ಮೂಲಭೂತ ಮಾನವ ಹಕ್ಕುಗಳ ಸಂಪೂರ್ಣ ಉಲ್ಲಂಘನೆಯಾಗುವ ವಾತಾವರಣ ಇಲ್ಲಿರುವುದರಿಂದಲೇ ಇದನ್ನು ‘ನರಕ’ ಎನ್ನಲಾಗುತ್ತದೆ.

ಇದನ್ನೂ ಓದಿ:ಅಮೆರಿಕದಲ್ಲಿ ಭಾರತೀಯ ಯುವತಿಯ ದಾರುಣ ಅಂತ್ಯ | ಹತ್ಯೆಗೈದು ಭಾರತಕ್ಕೆ ಪರಾರಿಯಾದ ಮಾಜಿ ಪ್ರೇಮಿ