ಅಮೆರಿಕದಲ್ಲಿ ಭಾರತೀಯ ಯುವತಿಯ ದಾರುಣ ಅಂತ್ಯ | ಹತ್ಯೆಗೈದು ಭಾರತಕ್ಕೆ ಪರಾರಿಯಾದ ಮಾಜಿ ಪ್ರೇಮಿ

ನ್ಯೂಯಾರ್ಕ್: ಹೊಸ ವರ್ಷದ ಸಂಭ್ರಮದಲ್ಲಿರಬೇಕಿದ್ದ ಭಾರತೀಯ ಕುಟುಂಬವೊಂದು ಈಗ ಮಗಳ ಸಾವಿನ ಶೋಕದಲ್ಲಿ ಮುಳುಗಿದೆ. ಅಮೆರಿಕದ ಮೇರಿಲ್ಯಾಂಡ್‌ನಲ್ಲಿ ನೆಲೆಸಿದ್ದ 27 ವರ್ಷದ ಪ್ರತಿಭಾವಂತ ಯುವತಿ ನಿಕಿತಾ ರಾವ್ ಗೋಡಿಶಾಲಾ ಅವರ ಕ್ರೂರ ಹತ್ಯೆಯಾಗಿದ್ದು, ಕೊಲೆ ಮಾಡಿದ ಶಂಕಿತ ಮಾಜಿ ಪ್ರೇಮಿ ಅಮೆರಿಕದಿಂದ ಭಾರತಕ್ಕೆ ಪರಾರಿಯಾಗಿದ್ದಾನೆ.

ಡಿಸೆಂಬರ್ 31ರ ಸಂಜೆ ನಿಕಿತಾ ಅವರು ತನ್ನ ಮಾಜಿ ಪ್ರೇಮಿ ಅರ್ಜುನ್ ಶರ್ಮಾ ಅವರ ಅಪಾರ್ಟ್‌ಮೆಂಟ್‌ಗೆ ತೆರಳಿದ್ದರು. ಅಂದಿನಿಂದ ಅವರು ನಾಪತ್ತೆಯಾಗಿದ್ದರು. ಜ.2ರಂದು ಅರ್ಜುನ್ ಶರ್ಮಾ ಅವರೇ ಪೊಲೀಸರಿಗೆ ಫೋನ್ ಮಾಡಿ “ನಿಕಿತಾ ಕಾಣೆಯಾಗಿದ್ದಾರೆ” ಎಂದು ದೂರು ನೀಡಿದ್ದ. ಆದರೆ, ಪೊಲೀಸರು ತನಿಖೆ ಆರಂಭಿಸುವ ಮುನ್ನವೇ ಆತ ವಿಮಾನವೇರಿ ಭಾರತಕ್ಕೆ ಪರಾರಿಯಾಗಿದ್ದಾನೆ. ಜ.3ರಂದು ಪೊಲೀಸರು ಅರ್ಜುನ್ ಮನೆಯನ್ನು ಶೋಧಿಸಿದಾಗ, ಇರಿತದ ಗಾಯಗಳೊಂದಿಗೆ ನಿಕಿತಾ ಅವರ ಶವ ಪತ್ತೆಯಾಗಿದೆ.

ಯಾರು ಈ ನಿಕಿತಾ ರಾವ್ ಗೋಡಿಶಾಲಾ?

ನಿಕಿತಾ ಅವರು ಕೇವಲ ಒಬ್ಬ ಉದ್ಯೋಗಿಯಷ್ಟೇ ಅಲ್ಲ, ಅತ್ಯಂತ ಪ್ರತಿಭಾವಂತ ವೃತ್ತಿಪರರಾಗಿದ್ದರು. ಎಲಿಕಾಟ್ ಸಿಟಿಯ ‘ವ್ಹೀಡಾ ಹೆಲ್ತ್’ (Vheda Health) ಕಂಪನಿಯಲ್ಲಿ ಡೇಟಾ ಮತ್ತು ಸ್ಟ್ರಾಟೆಜಿ ವಿಶ್ಲೇಷಕರಾಗಿ ಕಾರ್ಯನಿರ್ವಹಿಸುತ್ತಿದ್ದರು. ತಮ್ಮ ಕೆಲಸದ ದಕ್ಷತೆಗಾಗಿ ಸಂಸ್ಥೆಯ ಅತ್ಯುನ್ನತ “ಆಲ್-ಇನ್ ಅವಾರ್ಡ್” ಗೌರವಕ್ಕೆ ಪಾತ್ರರಾಗಿದ್ದರು. ಹೈದರಾಬಾದ್‌ನ ಜೆಎನ್‌ಟಿಯುನಲ್ಲಿ ಫಾರ್ಮಸಿ ಪದವಿ ಮುಗಿಸಿ, ಅಮೆರಿಕದ ಯುನಿವರ್ಸಿಟಿ ಆಫ್ ಮೇರಿಲ್ಯಾಂಡ್‌ನಲ್ಲಿ ಸ್ನಾತಕೋತ್ತರ ಪದವಿ ಪಡೆದಿದ್ದರು. ಹೈದರಾಬಾದ್‌ನ ಪ್ರಖ್ಯಾತ ಕಿಮ್ಸ್ ಆಸ್ಪತ್ರೆಯಲ್ಲಿ ಫಾರ್ಮಸಿಸ್ಟ್ ಆಗಿ ಕಾರ್ಯನಿರ್ವಹಿಸಿದ ಅನುಭವ ಹೊಂದಿದ್ದರು.

ಹಂತಕನಿಗಾಗಿ ಎಫ್‌ಬಿಐ ಬಲೆ

ಆರೋಪಿ ಅರ್ಜುನ್ ಶರ್ಮಾ ವಿರುದ್ಧ ಮೊದಲ ಮತ್ತು ಎರಡನೇ ದರ್ಜೆಯ ಕೊಲೆ ಆರೋಪದಡಿ ಬಂಧನ ವಾರಂಟ್ ಜಾರಿಯಾಗಿದೆ. ಆತ ಭಾರತಕ್ಕೆ ಪರಾರಿಯಾಗಿರುವ ಹಿನ್ನೆಲೆಯಲ್ಲಿ, ಅಮೆರಿಕದ ಫೆಡರಲ್ ತನಿಖಾ ಸಂಸ್ಥೆ (ಎಫ್‌ಬಿಐ) ಈಗ ಭಾರತೀಯ ತನಿಖಾ ಸಂಸ್ಥೆಗಳೊಂದಿಗೆ ಸಂಪರ್ಕ ಸಾಧಿಸಿದೆ.

ಹಸ್ತಾಂತರ ಪ್ರಕ್ರಿಯೆ ಹೇಗೆ?

ಭಾರತ ಮತ್ತು ಅಮೆರಿಕ ನಡುವೆ ಹಸ್ತಾಂತರ ಒಪ್ಪಂದ ಇರುವುದರಿಂದ, ಶೀಘ್ರದಲ್ಲೇ ರಾಜತಾಂತ್ರಿಕ ಸಮಾಲೋಚನೆಗಳ ಮೂಲಕ ಆರೋಪಿಯನ್ನು ಅಮೆರಿಕಕ್ಕೆ ಕರೆದೊಯ್ಯುವ ಪ್ರಕ್ರಿಯೆ ಆರಂಭವಾಗಲಿದೆ. ವಾಷಿಂಗ್ಟನ್‌ನಲ್ಲಿರುವ ಭಾರತೀಯ ರಾಯಭಾರಿ ಕಚೇರಿಯು ನಿಕಿತಾ ಕುಟುಂಬದೊಂದಿಗೆ ಸಂಪರ್ಕದಲ್ಲಿದ್ದು, ನ್ಯಾಯ ಕೊಡಿಸುವ ಭರವಸೆ ನೀಡಿದೆ.

ಇದನ್ನೂ ಓದಿ: ಬೆಂಗಳೂರಿನ ಅಪಾರ್ಟ್‌ಮೆಂಟ್‌ನಲ್ಲಿ ಮಂಗಳೂರಿನ ಯುವತಿ ದುರಂತ ಅಂತ್ಯ.. ಆಗಿದ್ದೇನು?