ನವದೆಹಲಿ: ದೇಶದ ಪ್ರಮುಖ ಆಹಾರ ವಿತರಣಾ ಮತ್ತು ಕ್ವಿಕ್-ಕಾಮರ್ಸ್ ಸಂಸ್ಥೆಯಾದ ‘ಸ್ವಿಗ್ಗಿ ಇನ್‌ಸ್ಟಾಮಾರ್ಟ್’ ಇದೀಗ ಗ್ರಾಹಕರಿಗೆ ಅವಧಿ ಮುಗಿದ ಹಾಗೂ ಕಲುಷಿತ ಆಹಾರ ಪದಾರ್ಥಗಳನ್ನು ಸರಬರಾಜು ಮಾಡುತ್ತಿರುವ ಗಂಭೀರ ಆರೋಪ ಎದುರಿಸುತ್ತಿದೆ. ಈ ಹಿನ್ನೆಲೆಯಲ್ಲಿ ಆಹಾರ ಸುರಕ್ಷತೆ ಮತ್ತು ಗುಣಮಟ್ಟ ಪ್ರಾಧಿಕಾರ (FSSAI)ವು ಆಹಾರ ಸುರಕ್ಷತೆ ಮತ್ತು ಗುಣಮಟ್ಟ ಕಾಯ್ದೆ 2006ರ ಅಡಿಯಲ್ಲಿ ನಿಯಮಗಳನ್ನು ಉಲ್ಲಂಘಿಸಿರುವ ಕಾರಣಕ್ಕೆ ಸ್ವಿಗ್ಗಿ ಇನ್‌ಸ್ಟಾಮಾರ್ಟ್‌ಗೆ 9 ಕಾನೂನು ನೋಟಿಸ್‌ಗಳನ್ನು ಜಾರಿಗೊಳಿಸಿದೆ. ಗ್ರಾಹಕರಿಂದ ಸರಣಿ ದೂರುಗಳು ಬಂದಿದ್ದರೂ ಕಂಪನಿಯು ಯಾವುದೇ ಸೂಕ್ತ ಕ್ರಮ ಕೈಗೊಳ್ಳದ ಕಾರಣ ಈ ಕಠಿಣ ಕ್ರಮ ಕೈಗೊಳ್ಳಲಾಗಿದೆ.
ಸ್ವಿಗ್ಗಿ ಇನ್‌ಸ್ಟಾಮಾರ್ಟ್ ಮೂಲಕ ಆರ್ಡರ್ ಮಾಡಲಾದ ಆಹಾರ ಉತ್ಪನ್ನಗಳು ಕಲುಷಿತ, ಕೊಳೆತ ಮತ್ತು ಮನುಷ್ಯರ ಬಳಕೆಗೆ ಸಂಪೂರ್ಣ ಅನರ್ಹವಾಗಿದ್ದವು ಎಂದು ಗ್ರಾಹಕರು ದೂಡಿದ್ದಾರೆ. ‘ಹೆಲ್ತಿಫೈ 100% ವೇ ಪ್ರೋಟೀನ್’ ಮತ್ತು ‘ನಾಯ್ಸ್ ಹೋಮ್‌ಸ್ಟೈಲ್ ಮದ್ರಾಸ್ ಮಿಕ್ಸ್ಚರ್’ ಉತ್ಪನ್ನಗಳನ್ನು ಅವುಗಳ ಎಕ್ಸ್‌ಪೈರಿ ದಿನಾಂಕ ಮುಗಿದ ನಂತರವೂ ಗ್ರಾಹಕರಿಗೆ ತಲುಪಿಸಲಾಗಿದೆ. ಇದಕ್ಕಿಂತಲೂ ಆಘಾತಕಾರಿ ಸಂಗತಿಯೆಂದರೆ, ‘ಅಕ್ಷಯಕಲ್ಪ ಆರ್ಗಾನಿಕ್ ಎಗ್’ (ಮೊಟ್ಟೆ) ಸಂಪೂರ್ಣವಾಗಿ ಕೊಳೆತು ಹೋಗಿದ್ದು, ದುರ್ವಾಸನೆ ಬೀರುತ್ತಿದ್ದರೂ ಅದನ್ನು ಡೆಲಿವರಿ ಮಾಡಲಾಗಿದೆ. ಇದರ ಬಗ್ಗೆ ಗ್ರಾಹಕರು ಕಂಪನಿಗೆ ದೂರು ನೀಡಿದರೂ ಯಾವುದೇ ಪ್ರಯೋಜನವಾಗಿಲ್ಲ ಎಂದು ಎಫ್‌ಎಸ್‌ಎಸ್‌ಎಐ ತನ್ನ ಹೇಳಿಕೆಯಲ್ಲಿ ತಿಳಿಸಿದೆ.
ಮಕ್ಕಳ ಆಹಾರದಲ್ಲೂ ನಿರ್ಲಕ್ಷ್ಯ, ಹಳಸಿದ ಪರೋಟ ಮಾರಾಟ
ಕಂಪನಿಯ ಬೇಜವಾಬ್ದಾರಿತನ ಕೇವಲ ದಿನಸಿ ಪದಾರ್ಥಗಳಿಗೆ ಸೀಮಿತವಾಗಿಲ್ಲ. ಇನ್‌ಸ್ಟಾಮಾರ್ಟ್ ಡೆಲಿವರಿ ಮಾಡಿದ್ದ ‘ಪರೋಟ’ ಹಳಸಿ ಹೋಗಿದ್ದು, ತಿನ್ನಲು ಅಸಾಧ್ಯವಾದ ಸ್ಥಿತಿಯಲ್ಲಿತ್ತು. ಇನ್ನು ಅತ್ಯಂತ ಸೂಕ್ಷ್ಮವಾದ ನವಜಾತ ಶಿಶುಗಳ ಆಹಾರದ ವಿಷಯದಲ್ಲೂ ಸಂಸ್ಥೆ ಬೇಜವಾಬ್ದಾರಿ ತೋರಿದೆ. ಹಾಳಾಗಿದ್ದ ಹಾಗೂ ಕಲುಷಿತಗೊಂಡಿದ್ದ ಶಿಶು ಆಹಾರದ ಪ್ಯಾಕೆಟ್ ಅನ್ನು ಗ್ರಾಹಕರು ವಾಪಸ್ ಮಾಡಿದ ನಂತರವೂ, ಅದೇ ದೋಷಪೂರಿತ ಉತ್ಪನ್ನವನ್ನು ಮತ್ತೊಮ್ಮೆ ಪೂರೈಸಲಾಗಿತ್ತು ಎಂಬ ಗಂಭೀರ ಆರೋಪ ಕೇಳಿಬಂದಿದೆ. ಅಸಮರ್ಪಕ ಸಂಗ್ರಹಣೆ ಹಾಗೂ ನಿರ್ವಹಣೆಯೇ ಇದಕ್ಕೆ ಕಾರಣ ಎಂದು ಪ್ರಾಧಿಕಾರ ಪತ್ತೆಹಚ್ಚಿದೆ.
ಕಾನೂನು ಕ್ರಮದ ಎಚ್ಚರಿಕೆ
ಆಹಾರ ಪದಾರ್ಥಗಳ ಗುಣಮಟ್ಟದ ಜೊತೆಗೆ, ಸ್ವಿಗ್ಗಿ ಇನ್‌ಸ್ಟಾಮಾರ್ಟ್ ಪ್ಲಾಟ್‌ಫಾರ್ಮ್‌ನಲ್ಲಿ ನೋಂದಾಯಿತವಾಗಿರುವ ಹಲವು ಆಹಾರ ವ್ಯಾಪಾರ ಸಂಸ್ಥೆಗಳ ಎಫ್‌ಎಸ್‌ಎಸ್‌ಎಐ ಪರವಾನಗಿ ಸಂಖ್ಯೆಗಳು ತಪ್ಪಾಗಿವೆ ಅಥವಾ ಅಸ್ತಿತ್ವದಲ್ಲೇ ಇಲ್ಲ ಎಂದು ನೋಟಿಸ್‌ನಲ್ಲಿ ಉಲ್ಲೇಖಿಸಲಾಗಿದೆ. ಕೆಲವು ಸಂಸ್ಥೆಗಳ ಹೆಸರುಗಳು ಅವುಗಳ ಅಧಿಕೃತ ನೋಂದಣಿಗೆ ಹೊಂದಾಣಿಕೆಯಾಗುತ್ತಿಲ್ಲ. ಈ ಎಲ್ಲಾ ಲೋಪದೋಷಗಳ ಕುರಿತು ಸಮಗ್ರ ವಿವರಣೆ ಹಾಗೂ ದಾಖಲೆ ಸಹಿತ ಅನುಸರಣಾ ವರದಿಯನ್ನು ಸಲ್ಲಿಸುವಂತೆ ಸ್ವಿಗ್ಗಿಗೆ ಸೂಚಿಸಲಾಗಿದೆ. ಒಂದು ವೇಳೆ ನಿಗದಿತ ಅವಧಿಯಲ್ಲಿ ಸೂಕ್ತ ಸ್ಪಷ್ಟನೆ ನೀಡದಿದ್ದರೆ ತಕ್ಷಣವೇ ಕಾನೂನು ಕ್ರಮ ಜರುಗಿಸುವುದಾಗಿ ಎಫ್‌ಎಸ್‌ಎಸ್‌ಎಐ ಖಡಕ್ ಎಚ್ಚರಿಕೆ ನೀಡಿದೆ.
