ಬೆಂಗಳೂರು: ಭಾರತದ ಪ್ರಮುಖ ದ್ವಿಚಕ್ರ ವಾಹನ ತಯಾರಕ ಕಂಪನಿಯಾದ ಬಜಾಜ್ ಆಟೋ, ತನ್ನ ಅತಿ ಹೆಚ್ಚು ಮಾರಾಟವಾಗುವ 125-160cc ಮೋಟಾರ್ಸೈಕಲ್ಗಳ ಶ್ರೇಣಿಯನ್ನು ಮೇಲ್ದರ್ಜೆಗೇರಿಸುವ (ಅಪ್ಡೇಟ್) ಮಹತ್ವದ ಯೋಜನೆಯನ್ನು ಪ್ರಕಟಿಸಿದೆ. 2027ರ ಆರ್ಥಿಕ ವರ್ಷದ ಮೊದಲ ತ್ರೈಮಾಸಿಕದಲ್ಲಿ (Q1 FY27) ಅತ್ಯುತ್ತಮ ಮಾರಾಟ ಹಾಗೂ ದಾಖಲೆಯ ಆದಾಯ ಗಳಿಸಿದ ಬೆನ್ನಲ್ಲೇ ಈ ನಿರ್ಧಾರವನ್ನು ತೆಗೆದುಕೊಳ್ಳಲಾಗಿದೆ. ಭಾರತದ ಅತಿ ದೊಡ್ಡ ಮೋಟಾರ್ಸೈಕಲ್ ವಿಭಾಗದಲ್ಲಿ ತನ್ನ ಮಾರುಕಟ್ಟೆ ಪಾಲನ್ನು ಇನ್ನಷ್ಟು ವಿಸ್ತರಿಸುವ ಹಾಗೂ ಗ್ರಾಹಕರನ್ನು ಸೆಳೆಯುವ ನಿಟ್ಟಿನಲ್ಲಿ ಬಜಾಜ್ ಈ ಹೆಜ್ಜೆ ಇರಿಸಿದೆ. ಪ್ರಸ್ತುತ ಕಂಪನಿಯ 125-160cc ವಿಭಾಗದಲ್ಲಿ ಜನಪ್ರಿಯ ಪಲ್ಸರ್ (Pulsar) ಮತ್ತು ಫ್ರೀಡಂ (Freedom) ಬ್ರಾಂಡ್ಗಳ ಅಡಿಯಲ್ಲಿ ಹಲವು ಮಾದರಿಗಳಿವೆ. ಆದರೆ, ನಿಖರವಾಗಿ ಯಾವ ಮಾದರಿಗಳು ನವೀಕರಣಗೊಳ್ಳಲಿವೆ ಅಥವಾ ಯಾವಾಗ ಬಿಡುಗಡೆಯಾಗಲಿವೆ ಎಂಬ ಬಗ್ಗೆ ಕಂಪನಿ ಇನ್ನೂ ಅಧಿಕೃತ ಸ್ಪಷ್ಟನೆ ನೀಡಿಲ್ಲ.
ಸ್ಪೋರ್ಟ್ಸ್ ವಿಭಾಗದಲ್ಲಿ ಭಾರೀ ಏರಿಕೆ
ಬಜಾಜ್ ಆಟೋದ ತ್ರೈಮಾಸಿಕ ವರದಿಗಳ ಪ್ರಕಾರ, ಸ್ಪೋರ್ಟ್ಸ್ ಮೋಟಾರ್ಸೈಕಲ್ ವಿಭಾಗವು ಭಾರಿ ಬೇಡಿಕೆ ಕಂಡುಕೊಂಡಿದ್ದು, ಈ ಹಿಂದಿಗಿಂತ ಬರೋಬ್ಬರಿ ಶೇಕಡಾ 50ರಷ್ಟು ಬೆಳವಣಿಗೆ ಸಾಧಿಸಿದೆ. ವಿಶೇಷವಾಗಿ ಪಲ್ಸರ್ ಶ್ರೇಣಿಯ ಬೈಕ್ಗಳಲ್ಲಿ ಮಾಡಿದ ಹಲವು ಹೊಸ ಬದಲಾವಣೆಗಳು ಮಾರುಕಟ್ಟೆಯಲ್ಲಿ ಕಂಪನಿಯ ಪರವಾಗಿ ಉತ್ತಮ ಫಲಿತಾಂಶವನ್ನು ನೀಡಿವೆ. ಈ ಯಶಸ್ಸಿನ ಬೆನ್ನಲ್ಲೇ, 125-160cc ಬೈಕ್ಗಳ ನವೀಕರಣವು ಕಂಪನಿಗೆ ಸ್ಪೋರ್ಟ್ಸ್ ವಿಭಾಗದಲ್ಲಿ ಮತ್ತಷ್ಟು ಭದ್ರವಾದ ಸ್ಥಾನ ಒದಗಿಸುವ ನಿರೀಕ್ಷೆಯಿದೆ. ಈ ಹಿಂದೆಯೆ ವಾರ್ಷಿಕ ವರದಿಯಲ್ಲಿ ದೇಶೀಯ ಮಾರುಕಟ್ಟೆಯಲ್ಲಿ 125cc-ಪ್ಲಸ್ ಮೋಟಾರ್ಸೈಕಲ್ಗಳ ಮೇಲೆ ಹೆಚ್ಚಿನ ಗಮನಹರಿಸುವುದಾಗಿ ಬಜಾಜ್ ಆಟೋ ತಿಳಿಸಿತ್ತು. ಇದರ ಮುನ್ಸೂಚನೆಯಾಗಿ, ಮುಂಬರುವ ಹಬ್ಬದ ಸೀಸನ್ ವೇಳೆಗೆ ಬಿಡುಗಡೆಯಾಗುವ ನಿರೀಕ್ಷೆಯಿರುವ ‘ಪಲ್ಸರ್ 125 ಕ್ಲಾಸಿಕ್’ (Pulsar 125 Classic) ಬೈಕ್ ಈಗಾಗಲೇ ಹಲವು ಬಾರಿ ರಸ್ತೆ ಪರೀಕ್ಷೆ (ಟೆಸ್ಟಿಂಗ್) ನಡೆಸುತ್ತಿರುವುದು ಕಂಡುಬಂದಿದ್ದು, ಒಟ್ಟಾರೆ ಯೋಜನೆಯ ಪ್ರಮುಖ ಭಾಗವಾಗಿ ಇದು ಮಾರುಕಟ್ಟೆಗೆ ಲಗ್ಗೆ ಇಡುವ ಸಾಧ್ಯತೆಯಿದೆ.
ದಾಖಲೆಯ ಆದಾಯ-ಲಾಭ ಕಂಡ ಬಜಾಜ್ ಆಟೋ
ಆರ್ಥಿಕ ದೃಷ್ಟಿಯಿಂದ ನೋಡಿದರೆ, Q1 FY27 ಬಜಾಜ್ ಆಟೋ ಕಂಪನಿಗೆ ಒಂದು ಐತಿಹಾಸಿಕ ಹಾಗೂ ದಾಖಲೆಯ ತ್ರೈಮಾಸಿಕವಾಗಿದೆ. ಈ ಅವಧಿಯಲ್ಲಿ ಕಂಪನಿಯ ಕಾರ್ಯಾಚರಣೆಗಳ ಒಟ್ಟು ಆದಾಯವು ಕಳೆದ ವರ್ಷಕ್ಕೆ ಹೋಲಿಸಿದರೆ ಶೇಕಡಾ 37ರಷ್ಟು ಏರಿಕೆ ಕಂಡು ಬರೋಬ್ಬರಿ 17,244 ಕೋಟಿ ರೂಪಾಯಿಗಳಿಗೆ ತಲುಪಿದೆ. ಅದೇ ರೀತಿ ತೆರಿಗೆ ನಂತರದ ಲಾಭವು ಶೇಕಡಾ 42ರಷ್ಟು ಜಿಗಿತ ಕಂಡು 2,983 ಕೋಟಿ ರೂಪಾಯಿಗಳಷ್ಟಾಗಿದ್ದರೆ, EBITDA ಶೇ. 45ರಷ್ಟು ಏರಿಕೆಯಾಗಿ 3,596 ಕೋಟಿ ರೂ. ಮುಟ್ಟಿದ್ದು, ಶೇಕಡಾ 20.9ರಷ್ಟು ಆಕರ್ಷಕ EBITDA ಮಾರ್ಜಿನ್ ದಾಖಲಿಸಿದೆ.
ಮಾರಾಟ ಹಾಗೂ ರಫ್ತಿನಲ್ಲಿ ಹೊಸ ಮೈಲಿಗಲ್ಲು
ವಾಹನಗಳ ಒಟ್ಟು ಮಾರಾಟದಲ್ಲಿಯೂ ಬಜಾಜ್ ಹೊಸ ದಾಖಲೆ ಬರೆದಿದೆ. ಈ ತ್ರೈಮಾಸಿಕದಲ್ಲಿ ಬಜಾಜ್ ಒಟ್ಟು 1.44 ಮಿಲಿಯನ್ (14.4 ಲಕ್ಷ) ಯುನಿಟ್ ವಾಹನಗಳನ್ನು ಮಾರಾಟ ಮಾಡಿದ್ದು, ವರ್ಷದಿಂದ ವರ್ಷದ ಲೆಕ್ಕಾಚಾರದಲ್ಲಿ ಶೇಕಡಾ 29ರಷ್ಟು ಬೃಹತ್ ಏರಿಕೆ ಕಂಡಿದೆ. ಕೇವಲ ದೇಶೀಯ ಮಾರುಕಟ್ಟೆಯ ದ್ವಿಚಕ್ರ ವಾಹನಗಳ ಮಾರಾಟದಲ್ಲಿ ಶೇಕಡಾ 11ರಷ್ಟು ಹೆಚ್ಚಳವಾಗಿದ್ದರೆ, ರಫ್ತು ವಿಭಾಗದಲ್ಲಿ ಕಂಪನಿಯು ತನ್ನ ಸಾರ್ವಕಾಲಿಕ ಗರಿಷ್ಠ ತ್ರೈಮಾಸಿಕ ಮಟ್ಟವನ್ನು ತಲುಪಿದ್ದು, ಬರೋಬ್ಬರಿ ಶೇಕಡಾ 52ರಷ್ಟು ಭಾರಿ ಏರಿಕೆ ದಾಖಲಿಸಿದೆ. ಪಲ್ಸರ್, ಅವೆಂಜರ್ ಮತ್ತು ಡೊಮಿನಾರ್ ಬ್ರಾಂಡ್ಗಳು ಈ ತ್ರೈಮಾಸಿಕದ ಅತ್ಯುತ್ತಮ ಬೆಳವಣಿಗೆಗೆ ಪ್ರಮುಖ ಕಾರಣವಾಗಿವೆ. ಒಟ್ಟಾರೆಯಾಗಿ, ಗ್ರಾಹಕರ ಬೇಡಿಕೆಗೆ ತಕ್ಕಂತೆ ಬೈಕ್ಗಳನ್ನು ಅಪ್ಡೇಟ್ ಮಾಡುತ್ತಿರುವ ಬಜಾಜ್ನ ಹೊಸ ಕಾರ್ಯತಂತ್ರ ಭವಿಷ್ಯದ ಮಾರುಕಟ್ಟೆಯಲ್ಲಿ ಮತ್ತಷ್ಟು ಸಂಚಲನ ಮೂಡಿಸುವ ಸಾಧ್ಯತೆಯಿದೆ.
