ಜೈಪುರ : ಇಂಡಿಯನ್ ಪ್ರೀಮಿಯರ್ ಲೀಗ್ (ಐಪಿಎಲ್) 2026ರ ಆವೃತ್ತಿಯಲ್ಲಿ ರಾಜಸ್ಥಾನ್ ರಾಯಲ್ಸ್ ತಂಡದ ಪೂರ್ಣಾವಧಿ ನಾಯಕನಾಗಿ ಯುವ ಆಟಗಾರ ರಿಯಾನ್ ಪರಾಗ್ ಅವರನ್ನು ನೇಮಕ ಮಾಡಿರುವ ಫ್ರಾಂಚೈಸಿಯ ನಿರ್ಧಾರ ಇದೀಗ ತೀವ್ರ ಚರ್ಚೆಗೆ ಗ್ರಾಸವಾಗಿದೆ. ಟೀಮ್ ಇಂಡಿಯಾದ ಮಾಜಿ ಕ್ರಿಕೆಟಿಗ ಹಾಗೂ ಜನಪ್ರಿಯ ವೀಕ್ಷಕ ವಿವರಣೆಗಾರ ಸಂಜಯ್ ಮಂಜ್ರೇಕರ್ ಅವರು ರಾಜಸ್ಥಾನ್ ರಾಯಲ್ಸ್ ತಂಡದ ಈ ಅಚ್ಚರಿಯ ನಡೆಯನ್ನು ಕಟುವಾಗಿ ಟೀಕಿಸಿದ್ದು, ಕ್ರಿಕೆಟ್ ದೃಷ್ಟಿಕೋನದಿಂದ ಈ ನಿರ್ಧಾರ ‘ಅರ್ಥಹೀನ’ ಎಂದು ಅಸಮಾಧಾನ ಹೊರಹಾಕಿದ್ದಾರೆ.
ಕ್ರಿಕೆಟ್ ದೃಷ್ಟಿಯಿಂದ ನಾಯಕನ ಆಯ್ಕೆ ಸಮರ್ಥನೀಯವಲ್ಲ
ಸ್ಪೋರ್ಟ್ಸ್ಟಾರ್ನ ಇನ್ಸೈಟ್ ಎಡ್ಜ್ ಪಾಡ್ಕ್ಯಾಸ್ಟ್ನಲ್ಲಿ ಮಾತನಾಡಿದ ಸಂಜಯ್ ಮಂಜ್ರೇಕರ್, ಫ್ರಾಂಚೈಸಿಯ ಈ ನಿರ್ಧಾರದ ಬಗ್ಗೆ ಅಚ್ಚರಿ ವ್ಯಕ್ತಪಡಿಸಿದ್ದಾರೆ. 2019ರಿಂದಲೂ ರಾಜಸ್ಥಾನ್ ತಂಡದ ಭಾಗವಾಗಿರುವ 24 ವರ್ಷದ ರಿಯಾನ್ ಪರಾಗ್, ತಮ್ಮ ಬ್ಯಾಟಿಂಗ್ನಲ್ಲಿ ಈವರೆಗೂ ಯಾವುದೇ ಸ್ಥಿರ ಪ್ರದರ್ಶನ ಕಾಯ್ದುಕೊಂಡಿಲ್ಲ. ಹೀಗಿದ್ದರೂ ಫ್ರಾಂಚೈಸಿ ಅವರ ಮೇಲೆ ಇಟ್ಟಿರುವ ಅತಿಯಾದ ನಂಬಿಕೆ ತಮಗೆ ಅರ್ಥವಾಗುತ್ತಿಲ್ಲ ಎಂದಿದ್ದಾರೆ. ಹಲವು ವರ್ಷಗಳ ಕಾಲ ತಂಡವನ್ನು ಮುನ್ನಡೆಸಿದ್ದ ಸಂಜು ಸ್ಯಾಮ್ಸನ್ ಅವರನ್ನು ಕೆಳಗಿಳಿಸಿ, ಆ ಜಾಗಕ್ಕೆ ರಿಯಾನ್ ಪರಾಗ್ ಅವರನ್ನು ತಂದಿರುವ ನಿರ್ಧಾರ ಕ್ರಿಕೆಟ್ ಲೆಕ್ಕಾಚಾರದಲ್ಲಿ ಯಾವುದೇ ರೀತಿಯಲ್ಲೂ ಸಮರ್ಥನೀಯವಲ್ಲ ಎಂದು ಮಂಜ್ರೇಕರ್ ಸ್ಪಷ್ಟಪಡಿಸಿದ್ದಾರೆ.
ಶ್ರಮವಿಲ್ಲದೆ ಒಲಿದುಬಂದ ದೊಡ್ಡ ಬಹುಮಾನ
ರಿಯಾನ್ ಪರಾಗ್ ಅವರು ಮೈದಾನದಲ್ಲಿ ತೋರುವ ಹಾವಭಾವಗಳು ಮತ್ತು ಅವರ ನಡವಳಿಕೆಗಳು ಸಾಮಾನ್ಯ ಭಾರತೀಯ ಆಟಗಾರರಿಗಿಂತ ಭಿನ್ನವಾಗಿದೆ ಎಂದು ಮಂಜ್ರೇಕರ್ ಅಭಿಪ್ರಾಯಪಟ್ಟಿದ್ದಾರೆ. ಕಳಪೆ ಪ್ರದರ್ಶನ ನೀಡುತ್ತಿರುವಾಗಲೂ ಮೈದಾನದಲ್ಲಿ ಅವರು ತೋರುವ ಅತಿಯಾದ ಆತ್ಮವಿಶ್ವಾಸ ಕೆಲವೊಮ್ಮೆ ಅಹಂಕಾರದಂತೆ ಕಾಣುತ್ತದೆ. ಕಷ್ಟಪಟ್ಟು ದುಡಿಯದೆ, ಯಾವುದೇ ಮಹತ್ವದ ಸಾಧನೆ ಮಾಡದೆ ಅವರಿಗೆ ನಾಯಕತ್ವದಂತಹ ದೊಡ್ಡ ಬಹುಮಾನವನ್ನು ನೀಡಲಾಗಿದೆ. ಇದು ರಾಜಸ್ಥಾನ್ ರಾಯಲ್ಸ್ ತಂಡದ ಪಾಲಿಗೆ ಅತ್ಯಂತ ವಿಚಿತ್ರವಾದ ಪ್ರಕರಣ ಎಂದು ಅವರು ಹೇಳಿದ್ದಾರೆ.
ವಿವಾದಗಳ ಸುಳಿಯಲ್ಲಿ ರಾಜಸ್ಥಾನ್ ನಾಯಕ
ಮೈದಾನದಲ್ಲಿನ ಕಳಪೆ ಆಟದ ಜೊತೆಗೆ ಮೈದಾನದ ಹೊರಗಿನ ವಿವಾದಗಳಿಗೂ ರಿಯಾನ್ ಪರಾಗ್ ಗುರಿಯಾಗಿದ್ದಾರೆ. ಕಳೆದ ವಾರ ಪಂಜಾಬ್ ಕಿಂಗ್ಸ್ ವಿರುದ್ಧದ ಪಂದ್ಯದ ವೇಳೆ ಡ್ರೆಸ್ಸಿಂಗ್ ರೂಮ್ನಲ್ಲಿ ಇ-ಸಿಗರೇಟ್ (vaping) ಸೇದುತ್ತಾ ಸಿಕ್ಕಿಬಿದ್ದ ಘಟನೆ ಭಾರೀ ವಿವಾದ ಸೃಷ್ಟಿಸಿತ್ತು. ಈ ಅಶಿಸ್ತಿನ ವರ್ತನೆಗಾಗಿ ಯುವ ಆಟಗಾರನಿಗೆ ಪಂದ್ಯದ ಶುಲ್ಕದ ಶೇಕಡಾ 25ರಷ್ಟು ದಂಡವನ್ನು ಸಹ ವಿಧಿಸಲಾಗಿತ್ತು. ತಂಡವನ್ನು ಮುನ್ನಡೆಸುವ ಜವಾಬ್ದಾರಿ ಹೊತ್ತಿರುವ ನಾಯಕನೇ ಇಂತಹ ವಿವಾದಗಳಿಗೆ ಸಿಲುಕಿರುವುದು ತಂಡದ ವರ್ಚಸ್ಸಿಗೆ ಧಕ್ಕೆ ತಂದಿದೆ.
ಅತಿಯಾದ ಆತ್ಮವಿಶ್ವಾಸವೇ ಪರಾಗ್ಗೆ ಮುಳುವಾಯಿತೇ?
ಪರಾಗ್ ಅವರ ಆಟದ ಶೈಲಿಯನ್ನು ವಿಶ್ಲೇಷಿಸಿರುವ ಮಂಜ್ರೇಕರ್, ಅವರ ಬ್ಯಾಟಿಂಗ್ನಲ್ಲಿನ ನ್ಯೂನತೆಗಳನ್ನು ಎತ್ತಿ ತೋರಿಸಿದ್ದಾರೆ. ಪರಾಗ್ ಕ್ರೀಸ್ಗೆ ಬಂದು ಅತ್ಯುತ್ತಮವಾದ ಒಂದೆರಡು ಶಾಟ್ಗಳನ್ನು ಬಾರಿಸಿದಾಗ ವೀಕ್ಷಕರು ಮೂಕವಿಸ್ಮಿತರಾಗುತ್ತಾರೆ. ಆದರೆ, ಮರುಕ್ಷಣವೇ ಅದೇ ರೀತಿಯ ಅಪಾಯಕಾರಿ ಶಾಟ್ ಆಡಲು ಹೋಗಿ ವಿಕೆಟ್ ಒಪ್ಪಿಸುವುದು ಅವರ ಖಾಯಂ ಚಾಳಿಯಾಗಿದೆ. ಅತಿಯಾದ ಆತ್ಮವಿಶ್ವಾಸದಿಂದಲೇ ಅವರು ಕಳಪೆ ಹೊಡೆತಗಳಿಗೆ ಕೈಹಾಕಿ ಔಟಾಗುತ್ತಿದ್ದಾರೆ. ಇಂತಹ ಅಸ್ಥಿರ ಆಟಗಾರನ ಕೈಗೆ ನಾಯಕತ್ವದ ಪಟ್ಟ ಕಟ್ಟಿರುವುದನ್ನು ಅರ್ಥಮಾಡಿಕೊಳ್ಳುವುದು ಕಷ್ಟ ಎಂದು ಮಂಜ್ರೇಕರ್ ತಮ್ಮ ತೀವ್ರ ಅಸಮಾಧಾನವನ್ನು ವ್ಯಕ್ತಪಡಿಸಿದ್ದಾರೆ.
ಇದನ್ನೂ ಓದಿ : SRH ವಿರುದ್ಧ ಗೆಲುವಿನ ಲಯಕ್ಕೆ ಮರಳಲು ಶ್ರೇಯಸ್ ಪಡೆ ಕಸರತ್ತು – ಪ್ಲೇಆಫ್ಗೂ ಮುನ್ನ ಪ್ರತಿಷ್ಠೆಯ ಕದನ!
