ಹೊಸ ದೆಹಲಿ : ಟೆಕ್ ದೈತ್ಯ ಆ್ಯಪಲ್ (Apple), ಮಧ್ಯಮ ವರ್ಗದ ಗ್ರಾಹಕರು ಮತ್ತು ವಿದ್ಯಾರ್ಥಿಗಳನ್ನು ಗುರಿಯಾಗಿಸಿಕೊಂಡು ತನ್ನ ಇತಿಹಾಸದಲ್ಲೇ ಅತ್ಯಂತ ಕಡಿಮೆ ಬೆಲೆಯ ಲ್ಯಾಪ್ಟಾಪ್ ‘ಮ್ಯಾಕ್ಬುಕ್ ನಿಯೋ’ ಅನ್ನು ಭಾರತೀಯ ಮಾರುಕಟ್ಟೆಗೆ ಪರಿಚಯಿಸಿದೆ. ಇದುವರೆಗೆ ಮ್ಯಾಕ್ಬುಕ್ ಖರೀದಿಸುವುದು ಒಂದು ದುಬಾರಿ ಕನಸಾಗಿದ್ದವರಿಗೆ ಆ್ಯಪಲ್ ಈಗ ಹೊಸ ದಾರಿ ಮಾಡಿಕೊಟ್ಟಿದೆ.
ಕೇವಲ 69,900 ರೂಪಾಯಿಗಳ ಆರಂಭಿಕ ಬೆಲೆಯೊಂದಿಗೆ ಬಿಡುಗಡೆಯಾಗಿರುವ ಈ ಲ್ಯಾಪ್ಟಾಪ್, ಬಜೆಟ್ ವಿಂಡೋಸ್ ಲ್ಯಾಪ್ಟಾಪ್ಗಳಿಗೆ ಪ್ರಬಲ ಪೈಪೋಟಿ ನೀಡುವ ಮುನ್ಸೂಚನೆ ನೀಡಿದೆ.
ಶಿಕ್ಷಣ ಮತ್ತು ಬಜೆಟ್ ಮಾರುಕಟ್ಟೆಯೇ ಆಪಲ್ ಗುರಿ
ಕಳೆದ ಒಂದು ದಶಕದಿಂದ ಮ್ಯಾಕ್ಬುಕ್ ಏರ್ (MacBook Air) ಆ್ಯಪಲ್ನ ಆರಂಭಿಕ ಹಂತದ ಲ್ಯಾಪ್ಟಾಪ್ ಆಗಿತ್ತು. ಆದರೆ ಅದರ ಬೆಲೆ ಲಕ್ಷದ ಆಸುಪಾಸಿನಲ್ಲಿರುತ್ತಿತ್ತು. ಈಗ ಆ್ಯಪಲ್ ತನ್ನ ಕಾರ್ಯತಂತ್ರವನ್ನು ಬದಲಿಸಿದ್ದು, ಅಸೂಸ್, ಹೆಚ್ಪಿ ಮತ್ತು ಕ್ರೋಮ್ಬುಕ್ಗಳ ಪ್ರಾಬಲ್ಯವಿರುವ ಶಾಲಾ-ಕಾಲೇಜು ಹಾಗೂ ಬಜೆಟ್ ಮಾರುಕಟ್ಟೆಯನ್ನು ಆಕ್ರಮಿಸಿಕೊಳ್ಳಲು ‘ನಿಯೋ’ ಬ್ರ್ಯಾಂಡ್ ಅನ್ನು ಬಳಸಿಕೊಂಡಿದೆ. ಈ ಲ್ಯಾಪ್ಟಾಪ್ ಇಂಡಿಗೋ, ಸಿಟ್ರಸ್ ಮತ್ತು ಬ್ಲಶ್ ಅಂತಹ ಆಕರ್ಷಕ ಬಣ್ಣಗಳಲ್ಲಿ ಲಭ್ಯವಿರುವುದು ಯುವಜನತೆಯನ್ನು ಸೆಳೆಯುವಂತಿದೆ.
ಐಫೋನ್ ಚಿಪ್ನ ಶಕ್ತಿ ಮತ್ತು ತಾಂತ್ರಿಕ ವಿಶೇಷತೆ
ಮ್ಯಾಕ್ಬುಕ್ ನಿಯೋದಲ್ಲಿ ಒಂದು ತಾಂತ್ರಿಕ ಬದಲಾವಣೆ ಮಾಡಲಾಗಿದೆ. ಸಾಮಾನ್ಯವಾಗಿ ಮ್ಯಾಕ್ಬುಕ್ಗಳಲ್ಲಿ ‘M’ ಸರಣಿಯ ಚಿಪ್ಗಳನ್ನು ಬಳಸಲಾಗುತ್ತದೆ. ಆದರೆ ವೆಚ್ಚ ತಗ್ಗಿಸಲು ಈ ನಿಯೋ ಮಾದರಿಯಲ್ಲಿ ಐಫೋನ್ 16 ಪ್ರೊನಲ್ಲಿರುವ ‘A18 Pro’ ಚಿಪ್ ಅನ್ನು ಬಳಸಲಾಗಿದೆ. ಇದು 6-ಕೋರ್ ಸಿಪಿಯು ಮತ್ತು 5-ಕೋರ್ ಜಿಪಿಯು ಹೊಂದಿದ್ದು, ದೈನಂದಿನ ಕೆಲಸಗಳಿಗೆ ಬೇಕಾದ ವೇಗವನ್ನು ನೀಡುತ್ತದೆ. 13-ಇಂಚಿನ ಲಿಕ್ವಿಡ್ ರೆಟಿನಾ ಡಿಸ್ಪ್ಲೇ, 500 ನಿಟ್ಸ್ ಬ್ರೈಟ್ನೆಸ್ ಮತ್ತು ಫ್ಯಾನ್ಲೆಸ್ ವಿನ್ಯಾಸ ಇದರ ಪ್ರಮುಖ ಆಕರ್ಷಣೆಗಳಾಗಿವೆ.
ಬೆಲೆ ತಗ್ಗಿಸಲು ಮಾಡಲಾದ ಕೆಲವು ಬದಲಾವಣೆಗಳು
ಕಡಿಮೆ ಬೆಲೆಗೆ ನೀಡುವ ಸಲುವಾಗಿ ಆ್ಯಪಲ್ ಕೆಲವು ಪ್ರೀಮಿಯಂ ಫೀಚರ್ಗಳನ್ನು ಕೈಬಿಟ್ಟಿದೆ. ಮ್ಯಾಕ್ಬುಕ್ ನಿಯೋದಲ್ಲಿ ‘ಬ್ಯಾಕ್ಲಿಟ್ ಕೀಬೋರ್ಡ್’ (ಕತ್ತಲಲ್ಲಿ ಹೊಳೆಯುವ ಕೀಬೋರ್ಡ್) ಇರುವುದಿಲ್ಲ. ಅಲ್ಲದೆ, ಇದರಲ್ಲಿ ಕೇವಲ ಎರಡು ಯುಎಸ್ಬಿ-ಸಿ ಪೋರ್ಟ್ಗಳಿದ್ದು, ಮ್ಯಾಗ್ಸೇಫ್ ಚಾರ್ಜಿಂಗ್ ಪೋರ್ಟ್ ಅನ್ನು ತೆಗೆದುಹಾಕಲಾಗಿದೆ. ಬೇಸ್ ಮಾಡೆಲ್ನಲ್ಲಿ ಟಚ್ ಐಡಿ ಸೌಲಭ್ಯ ಇರುವುದಿಲ್ಲ ಮತ್ತು ಸ್ಪಿಂಕರ್ಗಳ ಸಂಖ್ಯೆಯನ್ನು ಎರಡಕ್ಕೆ ಸೀಮಿತಗೊಳಿಸಲಾಗಿದೆ. 36.5 Wh ಬ್ಯಾಟರಿಯನ್ನು ಹೊಂದಿರುವ ಈ ಲ್ಯಾಪ್ಟಾಪ್ ಒಂದು ಬಾರಿ ಚಾರ್ಜ್ ಮಾಡಿದರೆ 16 ಗಂಟೆಗಳ ಕಾಲ ವಿಡಿಯೋ ಸ್ಟ್ರೀಮಿಂಗ್ ನೀಡುತ್ತದೆ ಎಂದು ಕಂಪನಿ ತಿಳಿಸಿದೆ.
ಭಾರತದಲ್ಲಿ ಬೆಲೆ ಮತ್ತು ಲಭ್ಯತೆ
- 256GB ಸ್ಟೋರೇಜ್ ಆವೃತ್ತಿ: 69,900 ರೂ.
- 512GB ಸ್ಟೋರೇಜ್ ಆವೃತ್ತಿ: 79,900 ರೂ. (ಇದರಲ್ಲಿ ಟಚ್ ಐಡಿ ಸೌಲಭ್ಯ ಇರಲಿದೆ).
ಗ್ರಾಹಕರು ಇಂದಿನಿಂದಲೇ ಆಪಲ್ ವೆಬ್ಸೈಟ್ನಲ್ಲಿ ಪ್ರಿ-ಆರ್ಡರ್ ಮಾಡಬಹುದಾಗಿದ್ದು, ಮಾರ್ಚ್ 11, 2026 ರಿಂದ ಮಾರಾಟ ಆರಂಭವಾಗಲಿದೆ. ಬಜೆಟ್ ಬೆಲೆಯಲ್ಲಿ ಮ್ಯಾಕ್ಬುಕ್ ಅನುಭವ ಪಡೆಯಲು ಬಯಸುವವರಿಗೆ ಇದು ಅತ್ಯುತ್ತಮ ಆಯ್ಕೆಯಾಗಲಿದೆ.
ಇದನ್ನೂ ಓದಿ : ಶಕ್ತಿ ಯೋಜನೆಯಿಂದ ಆರ್ಥಿಕ ‘ಶಕ್ತಿ’ ಕಳೆದುಕೊಂಡ ಸಾರಿಗೆ ನಿಗಮಗಳು.. ಸಿಬ್ಬಂದಿಗಳ ‘ಭವಿಷ್ಯ’ ನಿಧಿಗೆ ಸಂಕಷ್ಟ!
