ಶ್ರೀರಾಂಪುರದ ಏಳು ಜನರ ಬರ್ಬರ ಹತ್ಯಾಕಾಂಡದ ಹಿಂದೆ ಸೈಕೋ ಶೇಖರ್ ಎರಡು ತಿಂಗಳಿಂದ ನಡೆಸಿದ್ದ ಪೂರ್ವನಿಯೋಜಿತ ಪಕ್ಕಾ ಪ್ರೀ ಪ್ಲಾನ್ ಬಯಲಾಗಿದೆ. ಯೂಟ್ಯೂಬ್ ಅಥವಾ ಗೂಗಲ್ ಸರ್ಚ್ ಮಾಡಿ ಸರಣಿ ಹತ್ಯೆ ನಡೆಸಿರುವ ಶಂಕೆ ಇದೆ. ಯಾರಿಗೂ ಅನುಮಾನ ಬರದ ರೀತಿ ಕೃತ್ಯ ಎಸಗಲು ಕ್ರೈಂ ಥ್ರಿಲ್ಲರ್ ಸಿನಿಮಾ ವೀಕ್ಷಿಸಿರುವ ಅನುಮಾನ ವ್ಯಕ್ತವಾಗಿದೆ.
ತನ್ನೊಟ್ಟಿಗಿರುವವರಿಗೆ ಏನೂ ಹೇಳದೆ, ಯಾರಿಗೂ ಸಂಶಯ ಬಾರದಂತೆ ಸುನಿತಾ ಪರಿವಾರದವರನ್ನು ಒಬ್ಬೊಬ್ಬರನ್ನೇ ಮನೆಗೆ ಕರೆಸಿಕೊಂಡು ಕೊಲೆ ಮಾಡಿದ್ದಾನೆ. ಒಂದೇ ರುಬ್ಬುಗುಂಡು ಬಳಸಿ ಮುಖ ಜಜ್ಜಿ ಕೊಲೆ ಮಾಡಿರುವುದರ ಹಿಂದೆ ತೀವ್ರ ದ್ವೇಷ ಅಡಗಿದೆ. ಕೌಟುಂಬಿಕ ಕಲಹ ಮಾತ್ರವಲ್ಲದೆ ಆರೋಪಿಯನ್ನ ಸಂಬಂಧಿಕರ ಮುಂದೆಯೇ ಕುಟುಂಬಸ್ಥರು ಅವಮಾನ ಮಾಡಿದ್ದರು ಎನ್ನಲಾಗಿದೆ. ರಕ್ತ ತೊಳೆದು ಸಾಕ್ಷ್ಯ ನಾಶ ಮಾಡಲು ರಾಸಾಯನಿಕ ಬಳಕೆ ಹಾಗೂ ಮೃತದೇಹಗಳ ಸಾಗಾಟದ ಪ್ಲಾನ್ ನೋಡಿ ಪೊಲೀಸರೇ ಶಾಕ್ ಆಗಿದ್ದಾರೆ. ಸದ್ಯ ಪೊಲೀಸರು ಆರೋಪಿಯ ಮೊಬೈಲ್ ವಶಕ್ಕೆ ಪಡೆದು ತೀವ್ರ ಪರಿಶೀಲನೆ ನಡೆಸುತ್ತಿದ್ದಾರೆ.
