ಲಂಡನ್: ಜಗತ್ತಿನ ಅತ್ಯಂತ ಭೀಕರ ಸಮುದ್ರ ದುರಂತಗಳಲ್ಲಿ ಒಂದಾದ ಟೈಟಾನಿಕ್ ಹಡಗು ದುರಂತದ ನೆನಪುಗಳನ್ನು ಸ್ಮರಣೀಯವಾಗಿಸಿದ ಸಾಧನಗಳಿಗೆ ಇಂದಿಗೂ ಜಾಗತಿಕ ಮಟ್ಟದಲ್ಲಿ ಅಪಾರ ಬೇಡಿಕೆ ಇದೆ ಎಂಬುದು ಮತ್ತೊಮ್ಮೆ ಸಾಬೀತಾಗಿದೆ. ಟೈಟಾನಿಕ್ ಹಡಗು ಮುಳುಗುವ ಸಮಯದಲ್ಲಿ ಪ್ರಯಾಣಿಕರೊಬ್ಬರು ಧರಿಸಿದ್ದ ಲೈಫ್ ಜಾಕೆಟ್ ಶನಿವಾರ ನಡೆದ ಹರಾಜಿನಲ್ಲಿ ಬರೋಬ್ಬರಿ 6,70,000 ಪೌಂಡ್ (ಸುಮಾರು 8.39 ಕೋಟಿ ರೂಪಾಯಿ)ಗೆ ಮಾರಾಟವಾಗಿದೆ.
ಈ ಲೈಫ್ ಜಾಕೆಟ್ ಟೈಟಾನಿಕ್‌ನ ಪ್ರಥಮ ದರ್ಜೆ ಪ್ರಯಾಣಿಕರಾಗಿದ್ದ ಲಾರಾ ಮೇಬಲ್ ಫ್ರಾಂಕಟೆಲ್ಲಿ ಅವರಿಗೆ ಸೇರಿದ್ದಾಗಿದೆ. ಹಡಗು ಮುಳುಗುತ್ತಿದ್ದಾಗ ಲೈಫ್ ಬೋಟ್ ಮೂಲಕ ಇವರು ಪ್ರಾಣಾಪಾಯದಿಂದ ಪಾರಾಗಿದ್ದರು. ವಿಶೇಷವೆಂದರೆ, ಈ ಜಾಕೆಟ್ ಮೇಲೆ ಲಾರಾ ಮತ್ತು ಅವರೊಂದಿಗೆ ಅದೇ ಬೋಟ್‌ನಲ್ಲಿ ಬದುಕುಳಿದ ಇತರ ಪ್ರಯಾಣಿಕರ ಸಹಿಗಳಿವೆ. ಪಶ್ಚಿಮ ಇಂಗ್ಲೆಂಡ್‌ನ ಹೆನ್ರಿ ಆಲ್ಡ್ರಿಡ್ಜ್ ಅಂಡ್ ಸನ್ ಹರಾಜು ಸಂಸ್ಥೆಯು ಈ ಹರಾಜನ್ನು ಆಯೋಜಿಸಿತ್ತು. ಆರಂಭದಲ್ಲಿ ಈ ಜಾಕೆಟ್ 2.5 ರಿಂದ 3.5 ಲಕ್ಷ ಪೌಂಡ್ ಬೆಲೆ ಬಾಳಬಹುದು ಎಂದು ಅಂದಾಜಿಸಲಾಗಿತ್ತು, ಆದರೆ ಅಂತಿಮವಾಗಿ ನಿರೀಕ್ಷೆಗೂ ಮೀರಿದ ಬೆಲೆಗೆ ಮಾರಾಟವಾಗಿದೆ.
ಹರಾಜಿನಲ್ಲಿ ವಿಕ್ರಮ ಸಾಧಿಸಿದ ಇತರ ವಸ್ತುಗಳು
ಕೇವಲ ಲೈಫ್ ಜಾಕೆಟ್ ಮಾತ್ರವಲ್ಲದೆ, ಟೈಟಾನಿಕ್‌ನ ಲೈಫ್ ಬೋಟ್‌ನಲ್ಲಿ ಬಳಸಲಾಗಿದ್ದ ಸೀಟ್ ಕುಶನ್ ಕೂಡ 3,90,000 ಪೌಂಡ್ (ಸುಮಾರು 4 ಕೋಟಿ ರೂ.) ಮೊತ್ತಕ್ಕೆ ಹರಾಜಾಗಿದೆ. ಇದನ್ನು ಅಮೆರಿಕದ ಟೆನೆಸಿ ಮತ್ತು ಮಿಸೌರಿಯಲ್ಲಿರುವ ಟೈಟಾನಿಕ್ ಮ್ಯೂಸಿಯಂನ ಮಾಲೀಕರು ಖರೀದಿಸಿದ್ದಾರೆ. “ಈ ದಾಖಲೆ ಮಟ್ಟದ ಬೆಲೆಗಳು ಟೈಟಾನಿಕ್ ಕಥೆಯ ಬಗ್ಗೆ ಜನರಲ್ಲಿರುವ ನಿರಂತರ ಆಸಕ್ತಿ ಮತ್ತು ಆ ದುರಂತದಲ್ಲಿ ಮಡಿದವರ ಹಾಗೂ ಬದುಕುಳಿದವರ ಬಗ್ಗೆ ಇರುವ ಗೌರವವನ್ನು ಪ್ರತಿಬಿಂಬಿಸುತ್ತವೆ” ಎಂದು ಹರಾಜುದಾರ ಆಂಡ್ರ್ಯೂ ಆಲ್ಡ್ರಿಡ್ಜ್ ಹೇಳಿದ್ದಾರೆ.
ವಿವಾದಕ್ಕೆ ಕಾರಣವಾಗಿದ್ದ ಲೈಫ್ ಬೋಟ್ ಸಂಖ್ಯೆ 1
ಲಾರಾ ಮೇಬಲ್ ಅವರು ತಮ್ಮ ಉದ್ಯೋಗಿ ಹಾಗೂ ಫ್ಯಾಷನ್ ಡಿಸೈನರ್ ಆಗಿದ್ದ ಲೂಸಿ ಡಫ್ ಗಾರ್ಡನ್ ಮತ್ತು ಅವರ ಪತಿ ಕಾಸ್ಮೋ ಡಫ್ ಗಾರ್ಡನ್ ಅವರೊಂದಿಗೆ ಪ್ರಯಾಣಿಸುತ್ತಿದ್ದರು. ಇವರೆಲ್ಲರೂ ಲೈಫ್ ಬೋಟ್ ಸಂಖ್ಯೆ 1ರ ಮೂಲಕ ಪಾರಾಗಿದ್ದರು. ಈ ಬೋಟ್ 40 ಜನರ ಸಾಮರ್ಥ್ಯ ಹೊಂದಿದ್ದರೂ ಕೇವಲ 12 ಜನರನ್ನು ಹೊತ್ತು ಸಾಗಿತ್ತು. ಅಂದು ನೀರಿನಲ್ಲಿ ಮುಳುಗುತ್ತಿದ್ದ ಇತರರನ್ನು ರಕ್ಷಿಸಲು ಈ ಬೋಟ್ ಮುಂದಾಗದಿದ್ದುದು ಇತಿಹಾಸದಲ್ಲಿ ದೊಡ್ಡ ಮಟ್ಟದ ವಿವಾದಕ್ಕೆ ಕಾರಣವಾಗಿತ್ತು.
1912ರ ಏಪ್ರಿಲ್ 15ರಂದು ಇಂಗ್ಲೆಂಡ್‌ನಿಂದ ನ್ಯೂಯಾರ್ಕ್‌ಗೆ ತನ್ನ ಮೊದಲ ಪ್ರಯಾಣ ಕೈಗೊಂಡಿದ್ದ ‘ಅನ್ ಸಿಂಕಬಲ್’ ಖ್ಯಾತಿಯ ಟೈಟಾನಿಕ್ ಹಡಗು ಮಂಜುಗಡ್ಡೆಗೆ ಡಿಕ್ಕಿ ಹೊಡೆದು ಮುಳುಗಿತ್ತು. ಈ ದುರಂತದಲ್ಲಿ ಸುಮಾರು 1,500 ಜನರು ಪ್ರಾಣ ಕಳೆದುಕೊಂಡಿದ್ದರು. ಸದ್ಯದ ಮಾಹಿತಿಯ ಪ್ರಕಾರ, ಟೈಟಾನಿಕ್ ಸ್ಮರಣಿಕೆಗಳ ಪೈಕಿ 2024ರಲ್ಲಿ ಮಾರಾಟವಾದ ಗೋಲ್ಡ್ ಪಾಕೆಟ್ ವಾಚ್ (ಸುಮಾರು 1.56 ಮಿಲಿಯನ್ ಪೌಂಡ್) ಈವರೆಗಿನ ಗರಿಷ್ಠ ಮೊತ್ತದ ದಾಖಲೆ ಹೊಂದಿದೆ.
ಇದನ್ನೂ ಓದಿ: ಪತಿ ಜತೆ ಅಕ್ರಮ ಸಂಬಂಧದ ಶಂಕೆ : ಪತಿಯ ಕಚೇರಿ ಸಿಬ್ಬಂದಿಯನ್ನು ಬರ್ಬರವಾಗಿ ಕೊಂದ ವಕೀಲನ ಪತ್ನಿ!
