ಕಠ್ಮಂಡು : ತನ್ನ ಭವಿಷ್ಯವನ್ನು ರೂಪಿಸುವ ಪ್ರಮುಖ ಪರೀಕ್ಷೆಗೆ ವರ್ಷಗಟ್ಟಲೆ ಸಿದ್ಧತೆ ನಡೆಸಿದ್ದ ಆ ಯುವತಿಗೆ, ಪರೀಕ್ಷೆಯ ದಿನ ತನ್ನ ಕಾಲಡಿಯ ಭೂಮಿಯೇ ಅದುರಿಹೋದ ಅನುಭವವಾಗಿತ್ತು. ಆಗಸ್ಟ್ 30ರಂದು ನಡೆದ ನೀಟ್ ಪಿಜಿ (NEET PG) ಪರೀಕ್ಷೆಗೆ ಹಾಜರಾದ ತನ್ವಿ ಎಂಬ ಯುವತಿಗೆ, ನೇಪಾಳದಲ್ಲಿ ಉಂಟಾದ ಭೀಕರ ಪ್ರವಾಹದಲ್ಲಿ ಸಿಲುಕಿ ತನ್ನ ತಂದೆ-ತಾಯಿ ಎಲ್ಲಿದ್ದಾರೆ, ಕ್ಷೇಮವಾಗಿದ್ದಾರೆಯೇ ಎಂಬುದರ ಸಣ್ಣ ಮಾಹಿತಿಯೂ ಇರಲಿಲ್ಲ. ಎದೆಯೊಳಗೆ ಹೆತ್ತವರ ನೆನಪಿನ ಬೆಂಕಿ ಉರಿಯುತ್ತಿದ್ದರೂ, ತನ್ವಿ ಪರೀಕ್ಷಾ ಕೊಠಡಿಗೆ ತೆರಳಿ ಕಣ್ಣೀರಧಾರೆಯ ನಡುವೆಯೇ ಇಡೀ ಪರೀಕ್ಷೆಯನ್ನು ಬರೆದು ಮುಗಿಸಿದ್ದಾಳೆ.
ಕಣ್ಣೀರಿನ ನಡುವೆ ಮೂರು ಗಂಟೆಗಳ ಕಾಲ ಪರೀಕ್ಷೆ
ತನ್ವಿ ಅವರ ತಂದೆ ವೆಂಕಟರಾಮ್ ಅನ್ನಂದೇವರ ಮತ್ತು ತಾಯಿ ಅನಘಾ ಅನ್ನಂದೇವರ ಅವರು 67 ಜನರಿದ್ದ ತಂಡದೊಂದಿಗೆ ಕೈಲಾಸ ಯಾತ್ರೆಗೆ ತೆರಳಿದ್ದರು. ಆದರೆ ನೇಪಾಳದ ಗಡಿ ಭಾಗದ ಫ್ರೆಂಡ್ಶಿಪ್ ಬ್ರಿಡ್ಜ್ ಹಾಗೂ ಇಮಿಗ್ರೇಷನ್ ಸೆಂಟರ್ ಬಳಿ ಸಂಭವಿಸಿದ ಭಾರಿ ಪ್ರವಾಹದಲ್ಲಿ ಈ ಇಡೀ ಗುಂಪು ಕಣ್ಮರೆಯಾಗಿದೆ. ಪೋಷಕರ ಸುಳಿವು ಸಿಗದಿದ್ದರೂ, “ತಂದೆಯ ಕನಸು ನನಸು ಮಾಡಬೇಕು” ಎಂಬ ಒಂದೇ ಒಂದು ಧೃಢ ಸಂಕಲ್ಪದಿಂದ ತನ್ವಿ ಪರೀಕ್ಷಾ ಕೇಂದ್ರಕ್ಕೆ ತೆರಳಿದ್ದರು. “ಮೂರು ಗಂಟೆಯ ಪರೀಕ್ಷೆಯಲ್ಲಿ ನಾನು ಒಂದೂವರೆ ಗಂಟೆ ಕೇವಲ ಕಣ್ಣೀರು ಹಾಕುತ್ತಲೇ ಇದ್ದೆ, ಪ್ರಶ್ನೆಗಳೂ ಸರಿಯಾಗಿ ಕಾಣಿಸುತ್ತಿರಲಿಲ್ಲ. ಆದರೆ ತಂದೆಗಾಗಿ ಇದನ್ನು ಪೂರ್ಣಗೊಳಿಸಲೇಬೇಕಿತ್ತು” ಎಂದು ಆಕೆ ಇನ್ಸ್ಟಾಗ್ರಾಮ್ ವಿಡಿಯೋದಲ್ಲಿ ಕಣ್ಣೀರಿಡುತ್ತಾ ಹೇಳಿಕೊಂಡಿದ್ದಾರೆ.
ಅಡ್ಮಿಟ್ ಕಾರ್ಡ್ ಫೋಟೋ ಮತ್ತು ಅಮ್ಮನ ನೆನಪು
ಪರೀಕ್ಷಾ ಕೇಂದ್ರದ ಕಂಪ್ಯೂಟರ್ ಪರದೆಯ ಮೇಲೆ ತನ್ನ ಅಡ್ಮಿಟ್ ಕಾರ್ಡ್ನ ಫೋಟೋ ನೋಡಿದಾಗ ತನ್ವಿ ಅವರಿಗೆ ದುಃಖ ತಡೆಯಲಾಗಲಿಲ್ಲ. ಏಕೆಂದರೆ ಆ ಫೋಟೋವನ್ನು ಆಕೆಯ ತಂದೆಯೇ ತೆಗೆದಿದ್ದರು. ಇನ್ನು ಪ್ರತಿ ಬಾರಿ ಪ್ರಮುಖ ಪರೀಕ್ಷೆಗೆ ಹೋಗುವ ಮುನ್ನ ತಾಯಿ ಪ್ರೀತಿಯಿಂದ ತಿನ್ನಿಸುತ್ತಿದ್ದ ‘ಮೊಸರು-ಸಕ್ಕರೆ’ಯ ನೆನಪು ಆಕೆಯನ್ನು ತೀವ್ರವಾಗಿ ಕಾಡಿತು. ಈ ಬಾರಿ ಪರೀಕ್ಷೆಯ ಆತಂಕಕ್ಕಿಂತಲೂ, ತಾಯಿಯ ಆ ಸಾಂಪ್ರದಾಯಿಕ ಹಾರೈಕೆ ಇಲ್ಲದಿರುವುದೇ ತನಗೆ ಹೆಚ್ಚು ನೋವು ತಂದಿತು ಎಂದು ತನ್ವಿ ವಿವರಿಸಿದ್ದಾರೆ.
ಪೋಷಕರ ಮರಳುವಿಕೆಗಾಗಿ ಭಾವುಕ ಕಾಯುವಿಕೆ
“ಅವರು ಖಂಡಿತ ಮರಳಿ ಬಂದೇ ಬರುತ್ತಾರೆ” ಎಂಬ ದೃಢ ನಂಬಿಕೆಯೊಂದಿಗೆ ತನ್ವಿ ಕಾಯುತ್ತಿದ್ದಾರೆ. ಪ್ರವಾಹದಲ್ಲಿ ಸಿಲುಕಿರುವ ಪ್ರವಾಸಿಗರ ಹಾಗೂ ಆಯೋಜಕರ ಸಂಪರ್ಕ ಸಾಧಿಸಲು ತನ್ವಿ ಸಾಮಾಜಿಕ ಜಾಲತಾಣಗಳ ಮೂಲಕ ಸಾರ್ವಜನಿಕರು ಮತ್ತು ಅಧಿಕಾರಿಗಳ ನೆರವು ಕೋರಿದ್ದಾರೆ. ಯಾವುದೇ ಪರೀಕ್ಷೆಯೂ ತರಬೇತಿ ನೀಡಲಾಗದಂತಹ ಕಠಿಣ ಜೀವನದ ಪರೀಕ್ಷೆಯನ್ನು ಎದುರಿಸುತ್ತಿರುವ ಈ ಯುವತಿಯ ಧೈರ್ಯಕ್ಕೆ ಮತ್ತು ಹೆತ್ತವರ ಮೇಲಿನ ಭಕ್ತಿಗೆ ಇಡೀ ದೇಶವೇ ಸಾಕ್ಷಿಯಾಗಿದೆ.
ಇದನ್ನೂ ಓದಿ : ಸ್ಟೋಕ್ಸ್ ಜೊತೆ ಆಡಲಿರುವ ಮಯಾಂಕ್ ಅಗರ್ವಾಲ್ ; 4 ಕೌಂಟಿ ಪಂದ್ಯಗಳಲ್ಲಿ ಕಣಕ್ಕೆ!
