ನವದೆಹಲಿ : ಸಂಸತ್ತಿನ ಮುಂಗಾರು ಅಧಿವೇಶನದ ಮೊದಲ ದಿನ ಮಾಧ್ಯಮಗಳನ್ನು ಉದ್ದೇಶಿಸಿ ಮಾತನಾಡಿದ ಪ್ರಧಾನಿ ನರೇಂದ್ರ ಮೋದಿ, ಹೈದರಾಬಾದ್ ಮೂಲದ ಬಾಹ್ಯಾಕಾಶ ಸ್ಟಾರ್ಟ್ಅಪ್ ‘ಸ್ಕೈರೂಟ್ ಏರೋಸ್ಪೇಸ್’ ಸಾಧನೆಯನ್ನು ಶ್ಲಾಘಿಸುತ್ತಲೇ ಕಾಂಗ್ರೆಸ್ ನಾಯಕ ಹಾಗೂ ಲೋಕಸಭೆಯ ವಿಪಕ್ಷ ನಾಯಕ ರಾಹುಲ್ ಗಾಂಧಿ ಅವರನ್ನು ಪರೋಕ್ಷವಾಗಿ ಲೇವಡಿ ಮಾಡಿದ್ದಾರೆ. ದೇಶದ ಯುವಶಕ್ತಿಯ ಸಾಮರ್ಥ್ಯವನ್ನು ಕೊಂಡಾಡಿದ ಅವರು, 56 ವರ್ಷದ ನಾಯಕನನ್ನು ‘ಯುವಕ’ ಎಂದು ಬಿಂಬಿಸುವುದನ್ನು ವ್ಯಂಗ್ಯವಾಡಿದ್ದಾರೆ.
ದೇಶದ ಮೊದಲ ಖಾಸಗಿ ರಾಕೆಟ್ ವಿಕ್ರಂ-1 ಉಡಾವಣೆ ಮಾಡುವ ಮೂಲಕ ಬಾಹ್ಯಾಕಾಶ ಕ್ಷೇತ್ರದಲ್ಲಿ ಖಾಸಗಿ ಸಂಸ್ಥೆ ಸ್ಕೈರೂಟ್ ಸಾಧನೆಯನ್ನು ಹೆಮ್ಮೆಯಿಂದ ಹಂಚಿಕೊಂಡ ಪ್ರಧಾನಿ ಮೋದಿ, “ಭಾರತದ ಯುವಜನತೆ ಬಾಹ್ಯಾಕಾಶ ರಂಗದಲ್ಲಿ ಹೊಸ ಸಂಚಲನ ಸೃಷ್ಟಿಸಿದ್ದಾರೆ. ‘ಸ್ಕೈರೂಟ್’ ಸ್ಟಾರ್ಟ್ಅಪ್ನಲ್ಲಿ ಕಾರ್ಯನಿರ್ವಹಿಸಿದ ಇಡೀ ತಂಡದ ಸರಾಸರಿ ವಯಸ್ಸು ಕೇವಲ 28 ವರ್ಷಗಳು. ಇಂತಹ ನಿಜವಾದ ಯುವಕರು ಈ ಐತಿಹಾಸಿಕ ಸಾಧನೆ ಮಾಡಿದ್ದಾರೆ. ನಾನು ಇಲ್ಲಿ 56 ವರ್ಷದ ‘ಯುವಕ’ನ ಬಗ್ಗೆ ಮಾತನಾಡುತ್ತಿಲ್ಲ” ಎಂದು ಹೆಸರು ಹೇಳದೆ ರಾಹುಲ್ ಗಾಂಧಿ ವಿರುದ್ಧ ಚಾಟಿ ಬೀಸಿದರು. ದೇಶದ ನವೋದ್ಯಮಗಳು (ಸ್ಟಾರ್ಟ್ಅಪ್ಗಳು) ಜಾಗತಿಕ ಮಟ್ಟದಲ್ಲಿ ಭಾರತದ ಕೀರ್ತಿಪತಾಕೆಯನ್ನು ಹಾರಿಸುತ್ತಿವೆ ಎಂದರು.
‘ರಿಫಾರ್ಮ್ ಎಕ್ಸ್ಪ್ರೆಸ್’ ನೀಡಿದ ಯಶಸ್ಸು
ಕೇಂದ್ರ ಸರ್ಕಾರ ಜಾರಿಗೆ ತಂದಿರುವ ಸತತ ಸುಧಾರಣಾ ನೀತಿಗಳಿಂದಾಗಿ ದೇಶದ ಯುವ ಆವಿಷ್ಕಾರಕರಿಗೆ ಸೂಕ್ತ ವೇದಿಕೆ ಸಿಕ್ಕಿದೆ ಎಂದ ಪ್ರಧಾನಿ, “ಭಾರತವು ‘ರಿಫಾರ್ಮ್ ಎಕ್ಸ್ಪ್ರೆಸ್'(ಸುಧಾರಣಾ ಎಕ್ಸ್ಪ್ರೆಸ್) ಹತ್ತಿರುವುದರ ಫಲವಾಗಿಯೇ ಇಂದು ಯುವಕರು ಇಂತಹ ಸಾಹಸಗಳಿಗೆ ಕೈಹಾಕಿ ಯಶಸ್ಸು ಕಾಣುತ್ತಿದ್ದಾರೆ” ಎಂದು ಬಣ್ಣಿಸಿದರು. ಜಗತ್ತಿನ ತೀರಾ ಕೆಲವು ದೇಶಗಳಲ್ಲಿ ಮಾತ್ರ ಇಂತಹ ಖಾಸಗಿ ಬಾಹ್ಯಾಕಾಶ ಉದ್ಯಮಶೀಲತೆ ಸಾಧ್ಯವಾಗಿದ್ದು, ಭಾರತದ ವಿಜ್ಞಾನಿಗಳು, ಎಂಜಿನಿಯರ್ಗಳು ಮತ್ತು ನವೋದ್ಯಮಿಗಳ ಶ್ರಮದಿಂದಾಗಿ ದೇಶದ ಪ್ರೊಫೈಲ್ ಜಾಗತಿಕವಾಗಿ ಎತ್ತರಕ್ಕೆ ಬೆಳೆದಿದೆ ಎಂದು ಪ್ರಶಂಸಿಸಿದರು.
ಕಳೆದ ಒಂದು ತಿಂಗಳ ಪ್ರಮುಖ ಮೈಲಿಗಲ್ಲುಗಳು
ಇದೇ ವೇಳೆ ಕಳೆದ ಒಂದು ತಿಂಗಳಲ್ಲಿ ದೇಶ ಸಾಧಿಸಿದ ವಿವಿಧ ಕ್ಷೇತ್ರಗಳ ಪ್ರಗತಿಯನ್ನು ಉಲ್ಲೇಖಿಸಿದ ಮೋದಿ, ರಾಜಸ್ಥಾನದಲ್ಲಿ ಬೃಹತ್ ತೈಲ ಸಂಸ್ಕರಣಾಗಾರವನ್ನು ದೇಶಕ್ಕೆ ಸಮರ್ಪಿಸಿರುವುದು, ದೇಶದ ಮೂರನೇ ಸೆಮಿಕಂಡಕ್ಟರ್ ಸ್ಥಾವರ ಉದ್ಘಾಟನೆ ಹಾಗೂ ವಿಶ್ವದ ಅತ್ಯಂತ ಸುಧಾರಿತ ಹೈಡ್ರೋಜನ್ ಚಾಲಿತ ರೈಲನ್ನು ಪರಿಚಯಿಸಿರುವುದನ್ನು ನೆನಪಿಸಿಕೊಂಡರು. ಈ ಎಲ್ಲಾ ಸಾಧನೆಗಳು ದೇಶದ ಆರ್ಥಿಕ ಪ್ರತಿರೋಧ ಮತ್ತು ಮಹತ್ವಾಕಾಂಕ್ಷೆಯನ್ನು ಪ್ರತಿಬಿಂಬಿಸುತ್ತಿದ್ದು, ಸಂಸತ್ತಿನ ಅಧಿವೇಶನದಲ್ಲೂ ದೇಶದ ಅಭಿವೃದ್ಧಿಗೆ ಪೂರಕವಾದ ಫಲಪ್ರದ ಚರ್ಚೆಗಳು ನಡೆಯಲಿ ಎಂದು ಆಶಿಸಿದರು.
ಇದನ್ನೂ ಓದಿ : CJP ‘ಚಲೋ ಸಂಸದ್’ ರ್ಯಾಲಿ ; ಪ್ರತಿಭಟನಾಕಾರರ ಮೇಲೆ ಪೊಲೀಸ್ ಲಾಠಿ ಪ್ರಹಾರ.. ರಣರಂಗವಾದ ದೆಹಲಿ
