ಅಮೆರಿಕ, ಯುರೋಪ್, ಭಾರತದಲ್ಲಿ ಒನ್‌ಪ್ಲಸ್ ವ್ಯವಹಾರ ಸ್ಥಗಿತ? ; ಕಂಪನಿ ನೀಡಿದ ಸ್ಪಷ್ಟನೆ ಏನು?

ನವದೆಹಲಿ : ತಂತ್ರಜ್ಞಾನ ಪ್ರಿಯರ ನೆಚ್ಚಿನ ಸ್ಮಾರ್ಟ್‌ಫೋನ್ ಬ್ರ್ಯಾಂಡ್ ಆದ ಒನ್‌ಪ್ಲಸ್ (OnePlus), ಅಮೆರಿಕ, ಯುರೋಪ್ ಮತ್ತು ಭಾರತ ಸೇರಿದಂತೆ ಪ್ರಮುಖ ಜಾಗತಿಕ ಮಾರುಕಟ್ಟೆಗಳಿಂದ ತನ್ನ ವ್ಯವಹಾರವನ್ನು ಸಂಪೂರ್ಣವಾಗಿ ಸ್ಥಗಿತಗೊಳಿಸಲು ಸಿದ್ಧತೆ ನಡೆಸುತ್ತಿದೆ ಎಂಬ ಆಘಾತಕಾರಿ ವರದಿಯೊಂದು ಹೊರಬಿದ್ದಿದೆ. ಒನ್‌ಪ್ಲಸ್‌ನ ಮಾತೃ ಸಂಸ್ಥೆಯಾದ ಒಪ್ಪೋ (Oppo) ಹಮ್ಮಿಕೊಂಡಿರುವ ಜಾಗತಿಕ ಮರುಸಂಘಟನೆ ಪ್ರಕ್ರಿಯೆಯ ಭಾಗವಾಗಿ ಈ ನಿರ್ಧಾರ ಕೈಗೊಳ್ಳಲಾಗುತ್ತಿದ್ದು, ಈ ವಾರದಲ್ಲೇ ಅಧಿಕೃತ ಘೋಷಣೆ ಹೊರಬೀಳುವ ಸಾಧ್ಯತೆಯಿದೆ ಎಂದು ಬ್ಲೂಮ್‌ಬರ್ಗ್ ವರದಿ ಮಾಡಿದೆ.

ವರದಿಗಳ ಪ್ರಕಾರ, ಅಮೆರಿಕ ಮತ್ತು ಯುರೋಪ್ ಮಾರುಕಟ್ಟೆಗಳಲ್ಲಿ ಒನ್‌ಪ್ಲಸ್ ಈ ವಾರವೇ ತನ್ನ ಕಾರ್ಯಾಚರಣೆಯನ್ನು ಸ್ಥಗಿತಗೊಳಿಸಲಿದ್ದು, ಮುಂದಿನ ವರ್ಷ ಅಂದರೆ 2027ರ ವೇಳೆಗೆ ಭಾರತೀಯ ಮಾರುಕಟ್ಟೆಯಿಂದಲೂ ಹೊರನಡೆಯಲು ಯೋಜನೆ ರೂಪಿಸಿದೆ.

ಒಪ್ಪೋ ಸಂಸ್ಥೆಯು ಪ್ರಸ್ತುತ ಎದುರಿಸುತ್ತಿರುವ ಆರ್ಥಿಕ ಹಿಂಜರಿತ, ಜಾಗತಿಕ ಮಾರುಕಟ್ಟೆಯಲ್ಲಿನ ತೀವ್ರ ಪೈಪೋಟಿ, ಚೀನೀ ಬ್ರ್ಯಾಂಡ್‌ಗಳ ಮೇಲಿರುವ ಭೌಗೋಳಿಕ ರಾಜಕೀಯ ಒತ್ತಡಗಳು ಹಾಗೂ ಆ್ಯಪಲ್ ಸಂಸ್ಥೆ ಹೂಡಿರುವ ವ್ಯಾಪಾರ ರಹಸ್ಯಗಳ ಉಲ್ಲಂಘನೆ ಮೊಕದ್ದಮೆಗಳು ಈ ಹಿನ್ನಡೆಗೆ ಮುಖ್ಯ ಕಾರಣ ಎನ್ನಲಾಗಿದೆ. ಒನ್‌ಪ್ಲಸ್ ಜೊತೆಗೆ ಅದರ ಸೋದರ ಸಂಸ್ಥೆಯಾದ ರಿಯಲ್‌ಮಿ (Realme) ಕೂಡ ಚೀನಾ ಸೇರಿದಂತೆ ಪ್ರಮುಖ ಮಾರುಕಟ್ಟೆಗಳಿಂದ ಹೊರನಡೆಯಲಿದ್ದು, ಕೇವಲ ಯುರೋಪ್‌ನ ಕೆಲವು ಆಯ್ದ ಭಾಗಗಳ ಮೇಲೆ ಮಾತ್ರ ಗಮನ ಹರಿಸಲಿದೆ ಎಂದು ಹೇಳಲಾಗಿದೆ.

ಒಪ್ಪೋ ಜೊತೆ ವಿಲೀನಗೊಳ್ಳುತ್ತಿರುವ ಸೇವೆಗಳು

ಕಳೆದ ಕೆಲವು ತಿಂಗಳುಗಳಿಂದ ಒನ್‌ಪ್ಲಸ್ ತನ್ನ ಆಡಳಿತಾತ್ಮಕ ಮತ್ತು ತಾಂತ್ರಿಕ ವಿಭಾಗಗಳಲ್ಲಿ ಹಲವು ಪ್ರಮುಖ ಬದಲಾವಣೆಗಳನ್ನು ಮಾಡಿಕೊಳ್ಳುತ್ತಿದೆ. ಭಾರತದಲ್ಲಿ ಒನ್‌ಪ್ಲಸ್‌ನ ಸ್ವತಂತ್ರ ಸೇವಾ ಕೇಂದ್ರಗಳನ್ನು ಮುಚ್ಚಲಾಗುತ್ತಿದ್ದು, ಗ್ರಾಹಕರಿಗೆ ಒಪ್ಪೋ ಸೇವಾ ನೆಟ್‌ವರ್ಕ್ ಮೂಲಕವೇ ಸೇವೆ ಒದಗಿಸಲಾಗುತ್ತಿದೆ.

ಅಷ್ಟೇ ಅಲ್ಲದೆ, ಜರ್ಮನಿ ಮತ್ತು ಸ್ಪೇನ್‌ನಂತಹ ಯುರೋಪಿಯನ್ ಮಾರುಕಟ್ಟೆಗಳಲ್ಲಿ ಒನ್‌ಪ್ಲಸ್ ಅಧಿಕೃತ ವೆಬ್‌ಸೈಟ್‌ಗಳು ಈಗಾಗಲೇ ಒಪ್ಪೋ ಉತ್ಪನ್ನಗಳನ್ನು ಪ್ರದರ್ಶಿಸಲು ಆರಂಭಿಸಿವೆ. ಮುಂದಿನ ದಿನಗಳಲ್ಲಿ ಒನ್‌ಪ್ಲಸ್‌ನ ಪ್ರಸಿದ್ಧ ‘ಆಕ್ಸಿಜನ್ ಓಎಸ್’ (OxygenOS) ಮತ್ತು ರಿಯಲ್‌ಮಿಯ ‘ರಿಯಲ್‌ಮಿ ಯುಐ’ (Realme UI) ಕಾರ್ಯಾಚರಣಾ ವ್ಯವಸ್ಥೆಗಳನ್ನು ಸಂಪೂರ್ಣವಾಗಿ ಸ್ಥಗಿತಗೊಳಿಸಿ, ಎಲ್ಲಾ ಫೋನ್‌ಗಳಲ್ಲೂ ಒಪ್ಪೋದ ‘ಕಲರ್ ಓಎಸ್’ (ColorOS) ಅನ್ನೇ ಬಳಸಲು ನಿರ್ಧರಿಸಲಾಗಿದೆ ಎಂಬ ವದಂತಿಗಳು ತಾಂತ್ರಿಕ ವಲಯದಲ್ಲಿ ದಟ್ಟವಾಗಿವೆ.

ವರದಿಗಳನ್ನು ತಳ್ಳಿಹಾಕಿದ ಒನ್‌ಪ್ಲಸ್ ಇಂಡಿಯಾ

ಒನ್‌ಪ್ಲಸ್ ಭಾರತೀಯ ಮಾರುಕಟ್ಟೆಯನ್ನು ತೊರೆಯಲಿದೆ ಎಂಬ ವರದಿಗಳು ತೀವ್ರ ಚರ್ಚೆಗೆ ಗ್ರಾಸವಾಗುತ್ತಿದ್ದಂತೆ, ಕಂಪನಿಯು ಅಧಿಕೃತ ಪ್ರಕಟಣೆ ಹೊರಡಿಸುವ ಮೂಲಕ ಸ್ಪಷ್ಟನೆ ನೀಡಿದೆ. ಭಾರತದಲ್ಲಿ ಒನ್‌ಪ್ಲಸ್‌ನ ವ್ಯವಹಾರಗಳು ಎಂದಿನಂತೆ ಅತ್ಯಂತ ಸುಗಮವಾಗಿ ಸಾಗುತ್ತಿದ್ದು, ಎಲ್ಲಾ ಸ್ಥಳೀಯ ಕಾರ್ಯಾಚರಣೆಗಳು ನಿಗದಿತ ಯೋಜನೆಯಂತೆಯೇ ಮುಂದುವರಿಯುತ್ತಿವೆ ಎಂದು ಕಂಪನಿ ತಿಳಿಸಿದೆ. ಇಂತಹ ಯಾವುದೇ ಅಪಪ್ರಚಾರ ಅಥವಾ ಪರಿಶೀಲಿಸದ ಊಹಾಪೋಹಗಳಿಗೆ ಮಾಧ್ಯಮಗಳು ಮತ್ತು ಗ್ರಾಹಕರು ಕಿವಿಗೊಡಬಾರದು ಎಂದು ಒನ್‌ಪ್ಲಸ್ ಇಂಡಿಯಾ ಮನವಿ ಮಾಡಿದೆ. ಆದಾಗ್ಯೂ, ಬಿಡಿಭಾಗಗಳ ಕೊರತೆ ಮತ್ತು ಸ್ಮಾರ್ಟ್‌ಫೋನ್ ಮಾರುಕಟ್ಟೆಯಲ್ಲಿನ ಕುಸಿತದ ನಡುವೆ ಕಂಪನಿಯ ಮುಂದಿನ ಹೆಜ್ಜೆ ತೀವ್ರ ಕುತೂಹಲ ಕೆರಳಿಸಿದೆ.

ಇದನ್ನೂ ಓದಿ : ‘ನೀನು ಮುಸ್ಲಿಮನಾ?’ ಎಂದು ಕೇಳಿ ಅಮೆರಿಕದಲ್ಲಿ ಭಾರತದ ಪ್ರಜೆಗೆ 15 ಬಾರಿ ಚಾಕು ಇರಿದ ದುಷ್ಕರ್ಮಿ