ಬೆಂಗಳೂರು : ದೇಶದಲ್ಲಿ ದಿನೇದಿನೆ ಆನ್ಲೈನ್ ವಂಚನೆಗಳು ಜಾಸ್ತಿಯಾಗುತ್ತಿವೆ. ಷೇರು ಪೇಟೆ ಹೂಡಿಕೆ, ಹಣ ದುಪ್ಪಟ್ಟು ಮಾಡಲಾಗುವುದು, ಮೊಬೈಲ್ಗೆ ಲಿಂಕ್ ಕಳಿಸುವುದು, ವೆಬ್ಸೈಟ್ಗಳು ಸೇರಿ ಹಲವು ಮಾದರಿಯಲ್ಲಿ ಜನರಿಗೆ ಕೋಟ್ಯಂತರ ರೂಪಾಯಿ ವಂಚಿಸಲಾಗುತ್ತಿದೆ. ಇದನ್ನು ಮನಗಂಡಿರುವ ಕೇಂದ್ರ ಸರ್ಕಾರದ ಪಿಐಬಿ ಫ್ಯಾಕ್ಟ್ ಚೆಕ್ ಘಟಕವು, ಜನರಿಗೆ ನಕಲಿ ವೆಬ್ಸೈಟ್ಗಳನ್ನು ಗುರುತಿಸುವುದು ಹೇಗೆ ಎಂಬುದರ ಮಾಹಿತಿ ನೀಡಿದೆ. 5 ಲಕ್ಷಣಗಳು ಕಂಡುಬಂದರೆ, ಅವು ನಕಲಿ ವೆಬ್ಸೈಟ್ಗಳಾಗಿದ್ದು, ಇವುಗಳನ್ನು ಓಪನ್ ಮಾಡಬಾರದು, ಲಿಂಕ್ ಮೇಲೆ ಕ್ಲಿಕ್ ಮಾಡಬಾರದು ಎಂದು ತಿಳಿಸಿದೆ. ಹಾಗಾದರೆ, ನಕಲಿ ವೆಬ್ಸೈಟ್ಗಳನ್ನು ಗುರುತಿಸುವ 5 ಮಾರ್ಗಗಳು ಯಾವವು? ಇಲ್ಲಿದೆ ಮಾಹಿತಿ.
ವೆಬ್ಸೈಟ್ URL ಪರಿಶೀಲಿಸಿ
ವೆಬ್ಸೈಟ್ ವಿಳಾಸ ಅಥವಾ URL ಗಮನಿಸಿ. ಅದು ‘http’ ಬದಲಿಗೆ ‘https://’ ಎಂದು ಪ್ರಾರಂಭವಾಗುತ್ತದೆಯೇ ಎಂದು ಖಚಿತಪಡಿಸಿಕೊಳ್ಳಿ. ಅಲ್ಲದೆ, ಜನಪ್ರಿಯ ಬ್ರ್ಯಾಂಡ್ಗಳು ಅಥವಾ ಸರ್ಕಾರಿ ವೆಬ್ಸೈಟ್ಗಳ ಹೆಸರನ್ನು ಹೋಲುವಂತೆ ಸ್ವಲ್ಪ ಬದಲಾವಣೆ ಮಾಡಿ ಸೃಷ್ಟಿಸಿರುವ ನಕಲಿ ವೆಬ್ಸೈಟ್ಗಳ ಬಗ್ಗೆ ಎಚ್ಚರ ವಹಿಸಿ. ‘http’ಯಿಂದ ಯುಆರ್ಎಲ್ ಆರಂಭವಾದರೆ, ಅದು ನಕಲಿ ವೆಬ್ ಸೈಟ್ ಎಂದು ಅರ್ಥ.
ಪ್ಯಾಡ್ಲಾಕ್ ಐಕಾನ್ ಇದೆಯೇ ಎಂದು ನೋಡಿ
ಬ್ರೌಸರ್ ನಲ್ಲಿ ವೆಬ್ಸೈಟ್ ವಿಳಾಸದ ಪಕ್ಕದಲ್ಲಿ ‘ಪ್ಯಾಡ್ಲಾಕ್’ (ಬೀಗದ ಚಿಹ್ನೆ) ಐಕಾನ್ ಇದೆಯೇ ಎಂದು ಪರಿಶೀಲಿಸಿ. ಇದು ವೆಬ್ಸೈಟ್ ಸುರಕ್ಷಿತವಾಗಿದೆ ಎಂಬುದನ್ನು ಸೂಚಿಸುತ್ತದೆ. ಈ ಚಿಹ್ನೆ ಇಲ್ಲದಿದ್ದರೆ, ಅಲ್ಲಿ ನಿಮ್ಮ ಪಾಸ್ ವರ್ಡ್ ಅಥವಾ ಬ್ಯಾಂಕಿಂಗ್ ಮಾಹಿತಿಯನ್ನು ನಮೂದಿಸಬೇಡಿ.
ಅತಿಯಾದ ಪಾಪ್-ಅಪ್ಗಳು ಮತ್ತು ಕ್ಲಿಕ್ ಬೈಟ್ ಗಳಿಂದ ದೂರವಿರಿ
ಅತಿಯಾದ ಜಾಹೀರಾತುಗಳು, ಪಾಪ್-ಅಪ್ ವಿಂಡೋಗಳು ಅಥವಾ ಆಕರ್ಷಕವಾಗಿ ಕಾಣುವ ನಕಲಿ ಆಫರ್ಗಳನ್ನು (Clickbait) ತೋರಿಸುವ ವೆಬ್ಸೈಟ್ಗಳ ಬಗ್ಗೆ ಎಚ್ಚರವಿರಲಿ. ಅಂತಹ ವೆಬ್ಸೈಟ್ ತೆರೆದ ತಕ್ಷಣವೇ ಅದರಿಂದ ಹೊರಬರುವುದು ಉತ್ತಮ.
ಸಂಪರ್ಕ ಮತ್ತು ‘About Us’ ಪುಟಗಳನ್ನು ಪರಿಶೀಲಿಸಿ
ಯಾವುದೇ ಅಪರಿಚಿತ ವೆಬ್ಸೈಟ್ ಅನ್ನು ನಂಬುವ ಮುನ್ನ, ಅದರಲ್ಲಿರುವ ಸಂಪರ್ಕ ವಿವರಗಳು, ಅಧಿಕೃತ ಇಮೇಲ್ ವಿಳಾಸ ಮತ್ತು ಸಂಸ್ಥೆಯ ವಿಳಾಸವನ್ನು ಪರಿಶೀಲಿಸಿ. ಈ ಮಾಹಿತಿ ಇಲ್ಲದಿರುವುದು ವೆಬ್ಸೈಟ್ ನಕಲಿಯಾಗಿರಬಹುದು ಎಂಬುದಕ್ಕೆ ಪ್ರಮುಖ ಸಂಕೇತವಾಗಿದೆ.
ನಂಬಲಸಾಧ್ಯವಾದ ಆಫರ್ ಗಳಿಗೆ ಬಲಿಯಾಗಬೇಡಿ
“ಉಚಿತ ಲ್ಯಾಪ್ ಟಾಪ್”, “ಒಂದೇ ಕ್ಲಿಕ್ ನಲ್ಲಿ ಸರ್ಕಾರಿ ಉದ್ಯೋಗ” ಅಂತಹ ಆಕರ್ಷಕ ಆದರೆ ಅತಿಯಾದ ಆಫರ್ಗಳನ್ನು ನೀಡುವವೆಬ್ಸೈಟ್ಗಳನ್ನು ನಂಬಬೇಡಿ. ಇವು ಆನ್ಲೈನ್ ವಂಚನೆಯ ತಂತ್ರಗಳಾಗಿರಬಹುದು.
ಇದನ್ನೂ ಓದಿ : ಪಶ್ಚಿಮ ಏಷ್ಯಾ ಯುದ್ಧ : ಇರಾನ್ನಿಂದ ಬಹ್ರೇನ್ನಲ್ಲಿನ ಅಮೆರಿಕದ ಡ್ರೋನ್ ವ್ಯವಸ್ಥೆಯೇ ಧ್ವಂಸ?
