ಬೆಂಗಳೂರು : ಭಾರತೀಯ ವಾಹನ ಮಾರುಕಟ್ಟೆಯ ಮಧ್ಯಮ ಗಾತ್ರದ ಸೆಡಾನ್ ಕಾರುಗಳ ವಿಭಾಗದಲ್ಲಿ ‘ಸ್ಕೋಡಾ ಸ್ಲಾವಿಯಾ‘ ತನ್ನದೇ ಆದ ವಿಶಿಷ್ಟ ಛಾಪು ಮೂಡಿಸಿದೆ. 2021ರ ನವೆಂಬರ್ನಲ್ಲಿ ಮೊದಲ ಬಾರಿಗೆ ಮಾರುಕಟ್ಟೆ ಪ್ರವೇಶಿಸಿದ್ದ ಈ ಕಾರು, ಅತ್ಯುತ್ತಮ ನಿರ್ವಹಣೆ ಹಾಗೂ ವಿನ್ಯಾಸದಿಂದ ಗ್ರಾಹಕರ ಮನಗೆದ್ದಿತ್ತು. ಆದರೆ, ಬಿಡುಗಡೆಯಾದಾಗಿನಿಂದ ಈ ಕಾರಿನಲ್ಲಿ ಯಾವುದೇ ಪ್ರಮುಖ ಬದಲಾವಣೆಗಳಾಗಿರಲಿಲ್ಲ. ಗ್ರಾಹಕರ ಈ ನಿರೀಕ್ಷೆಯನ್ನು ಅರಿತಿರುವ ವಾಹನ ತಯಾರಕ ಕಂಪನಿ ಸ್ಕೋಡಾ, ಈಗ ತನ್ನ ಜನಪ್ರಿಯ ‘ಸ್ಲಾವಿಯಾ’ ಮಾದರಿಯ ಮಧ್ಯಂತರ ನವೀಕೃತ ಆವೃತ್ತಿಯನ್ನು (ಫೇಸ್ಲಿಫ್ಟ್) ಮಾರುಕಟ್ಟೆಗೆ ಪರಿಚಯಿಸಲು ಸಜ್ಜಾಗಿದೆ.
ಆಟೋಮೊಬೈಲ್ ವಲಯದ ಇತ್ತೀಚಿನ ವರದಿಗಳ ಪ್ರಕಾರ, ಬಹುನಿರೀಕ್ಷಿತ ಸ್ಕೋಡಾ ಸ್ಲಾವಿಯಾ ಫೇಸ್ಲಿಫ್ಟ್ ಕಾರು 2026ರ ಆಗಸ್ಟ್ ತಿಂಗಳಲ್ಲಿ ಅಧಿಕೃತವಾಗಿ ಬಿಡುಗಡೆಯಾಗಲಿದೆ. ಕಂಪನಿಯು ಬಿಡುಗಡೆಯ ನಿಖರ ದಿನಾಂಕವನ್ನು ಮುಂಬರುವ ವಾರಗಳಲ್ಲಿ ಪ್ರಕಟಿಸುವ ನಿರೀಕ್ಷೆಯಿದ್ದು, ಹೊಸ ವೈಶಿಷ್ಟ್ಯಗಳ ಸೇರ್ಪಡೆಯಿಂದಾಗಿ ಪ್ರಸ್ತುತ ಬೆಲೆಗಿಂತ ಕೊಂಚ ಏರಿಕೆಯಾಗುವ ಸಾಧ್ಯತೆ ದಟ್ಟವಾಗಿದೆ.
ಗಮನಾರ್ಹ ಬದಲಾವಣೆ
ಹೊಸ ಸ್ಕೋಡಾ ಸ್ಲಾವಿಯಾ ಫೇಸ್ಲಿಫ್ಟ್ ಕಾರಿನ ವಿನ್ಯಾಸದಲ್ಲಿ ಗಮನಾರ್ಹ ಬದಲಾವಣೆಗಳನ್ನು ತರಲಾಗುತ್ತಿದೆ. ಬಹುತೇಕ ಫೇಸ್ಲಿಫ್ಟ್ ಮಾದರಿಗಳಂತೆಯೇ ಇದರ ಮುಂಭಾಗದ ವಿನ್ಯಾಸವನ್ನು ಸಂಪೂರ್ಣವಾಗಿ ನವೀಕರಿಸಾಲಾಗಿದ್ದು, ಈ ಹಿಂದಿಗಿಂತಲೂ ದೊಡ್ಡದಾದ ಹಾಗೂ ಆಕರ್ಷಕವಾದ ಗ್ರಿಲ್ ಅನ್ನು ಅಳವಡಿಸಲಾಗಿದೆ. ಇತ್ತೀಚೆಗೆ ಸೋರಿಕೆಯಾದ ಚಿತ್ರಗಳ ಪ್ರಕಾರ, ನೂತನ ಎಲ್ಇಡಿ ಹೆಡ್ಲೈಟ್ಗಳು ಅತ್ಯಂತ ಕ್ಲಾಸಿ ಲುಕ್ ಹೊಂದಿದ್ದು, ಹೊಸ ಕುಶಾಕ್ ಮಾದರಿಯಲ್ಲಿರುವಂತೆ ಚುಕ್ಕೆಗಳ ಶೈಲಿಯ (ಡಾಟೆಡ್ ಶೈಲಿ) ಹೊಸ ಎಲ್ಇಡಿ ಡಿಆರ್ಎಲ್ಗಳನ್ನು ಒದಗಿಸಲಾಗಿದೆ.
ಮುಂಭಾಗದ ಬಂಪರ್ ವಿನ್ಯಾಸದಲ್ಲಿಯೂ ಹೆಕ್ಸಾಗೋನಲ್ ಮಾದರಿಯ ಸೆಂಟ್ರಲ್ ಏರ್ ಡ್ಯಾಮ್ ನೀಡುವ ಮೂಲಕ ಸ್ಪೋರ್ಟಿ ಲುಕ್ ನೀಡಲಾಗಿದೆ. ಕಾರಿನ ಪಾರ್ಶ್ವ ವಿನ್ಯಾಸದಲ್ಲಿ ಅಂತಹ ದೊಡ್ಡ ಬದಲಾವಣೆಗಳಿಲ್ಲದಿದ್ದರೂ, ಹೊಸ 17-ಇಂಚಿನ ಡೈಮಂಡ್ ಕಟ್ ಅಲಾಯ್ ವೀಲ್ಗಳ ಸೇರ್ಪಡೆ ಕಾರಿನ ಅಂದವನ್ನು ಮತ್ತಷ್ಟು ಹೆಚ್ಚಿಸಿದೆ. ಹಿಂಭಾಗದಲ್ಲಿ ಹೊಸ ಎಲ್ಇಡಿ ಟೈಲ್ಲೈಟ್ಗಳು, ಕುಶಾಕ್ ಮಾದರಿಯಂತೆ ಆಕರ್ಷಕವಾಗಿ ಬೆಳಗುವ ‘ಸ್ಕೋಡಾ’ ಅಕ್ಷರಗಳು ಹಾಗೂ ಪರಿಷ್ಕೃತ ಹಿಂಭಾಗದ ಬಂಪರ್ ವಿನ್ಯಾಸ ಈ ಹೊಸ ಫೇಸ್ಲಿಫ್ಟ್ನ ಕಳೆ ಹೆಚ್ಚಿಸಿದೆ.
ಇಂಟೀರಿಯರ್ ರಿಚ್
ಹೊರನೋಟದ ಜೊತೆಗೆ ಒಳಾಂಗಣ ವಿನ್ಯಾಸದಲ್ಲೂ (ಇಂಟೀರಿಯರ್) ಸ್ಕೋಡಾ ಹಲವಾರು ನವೀನ ಬದಲಾವಣೆಗಳನ್ನು ಮಾಡಿದೆ. ಪ್ರಸ್ತುತ ಲಭ್ಯವಿರುವ ಮಾಹಿತಿಯ ಪ್ರಕಾರ, ಹೊಸ ಕುಶಾಕ್ ಮಾದರಿಯಲ್ಲಿರುವಂತೆ ದೊಡ್ಡ 10.2-ಇಂಚಿನ ಡಿಜಿಟಲ್ ಇನ್ಸ್ಟ್ರುಮೆಂಟ್ ಕ್ಲಸ್ಟರ್ ಅನ್ನು ಅಳವಡಿಸಲಾಗಿದ್ದು, ಇದು ಚಾಲಕನಿಗೆ ಸಂಪೂರ್ಣ ವಿಭಿನ್ನ ಅನುಭವ ನೀಡಲಿದೆ. ಇದರ ಜೊತೆಗೆ ಹೊಸ ಬಣ್ಣದ ಅಪ್ಹೋಲ್ಸ್ಟರಿ, ಹಿಂಬದಿ ಪ್ರಯಾಣಿಕರಿಗೆ ಮಸಾಜ್ ಸೀಟುಗಳಂತಹ ಪ್ರೀಮಿಯಂ ಸೌಲಭ್ಯಗಳನ್ನು ಒದಗಿಸಲಾಗುತ್ತಿದೆ. ಈ ಹಿಂದೆ, ಈ ಫೇಸ್ಲಿಫ್ಟ್ ಆವೃತ್ತಿಯಲ್ಲಿ ಪನೋರಮಿಕ್ ಸನ್ರೂಫ್ ಹಾಗೂ ಅಡ್ವಾನ್ಸಡ್ ಡ್ರೈವರ್ ಅಸಿಸ್ಟೆನ್ಸ್ ಸಿಸ್ಟಮ್ (ಲೆವೆಲ್-2 ADAS) ತಂತ್ರಜ್ಞಾನ ಇರಲಿದೆ ಎಂದು ಅಂದಾಜಿಸಲಾಗಿತ್ತು. ಆದರೆ, ಇತ್ತೀಚಿನ ಸೋರಿಕೆಯಾದ ಚಿತ್ರಗಳ ಪ್ರಕಾರ ಈ ಅತ್ಯಾಧುನಿಕ ಫೀಚರ್ಗಳು ಈ ಬಾರಿ ಲಭ್ಯವಿರುವುದಿಲ್ಲ. ಬದಲಾಗಿ ಮುಂದಿನ ತಲೆಮಾರಿನ (ನೆಕ್ಸ್ಟ್ ಜನರೇಷನ್) ಸ್ಲಾವಿಯಾ ಕಾರುಗಳಲ್ಲಿ ಇವುಗಳನ್ನು ಪರಿಚಯಿಸುವ ಸಂಭವವಿದೆ ಎಂದು ವರದಿಗಳು ತಿಳಿಸಿವೆ.
ಎಂಜಿನ್ ಹಾಗೂ ಪವರ್ ಟ್ರೇನ್ ವಿಚಾರಕ್ಕೆ ಬಂದರೆ, ಸ್ಕೋಡಾ ತನ್ನ ನಂಬಿಗಾರ್ಹ 1.0-ಲೀಟರ್ ಹಾಗೂ 1.5-ಲೀಟರ್ ಟಿಎಸ್ಐ ಟರ್ಬೊ ಪೆಟ್ರೋಲ್ ಎಂಜಿನ್ಗಳನ್ನೇ ಈ ಹೊಸ ಫೇಸ್ಲಿಫ್ಟ್ನಲ್ಲೂ ಮುಂದುವರಿಸಲಿದೆ. 1.0-ಲೀಟರ್ ಎಂಜಿನ್ 115 ಪಿಎಸ್ ಪವರ್ ಹಾಗೂ 178 ಎನ್ಎಂ ಕಮರಿತ (ಟಾರ್ಕ್) ಉತ್ಪಾದಿಸುವ ಸಾಮರ್ಥ್ಯ ಹೊಂದಿದ್ದರೆ, ಶಕ್ತಿಶಾಲಿ 1.5-ಲೀಟರ್ ಎಂಜಿನ್ 150 ಪಿಎಸ್ ಪವರ್ ಮತ್ತು 250 ಎನ್ಎಂ ಟಾರ್ಕ್ ಒದಗಿಸಲಿದೆ. ಗೇರ್ಬಾಕ್ಸ್ ಆಯ್ಕೆಗಳಲ್ಲಿ ಕುಶಾಕ್ ಫೇಸ್ಲಿಫ್ಟ್ ಮಾದರಿಯಂತೆಯೇ ದೊಡ್ಡ ಬದಲಾವಣೆ ಮಾಡಲಾಗಿದೆ. 1.0-ಲೀಟರ್ ಎಂಜಿನ್ನೊಂದಿಗೆ ಹೊಸ 8-ಸ್ಪೀಡ್ ಆಟೋಮ್ಯಾಟಿಕ್ ಗೇರ್ಬಾಕ್ಸ್ ಹಾಗೂ 6-ಸ್ಪೀಡ್ ಮ್ಯಾನ್ಯುವಲ್ ಕಡ್ಡಾಯವಾಗಿ ಲಭ್ಯವಿರಲಿದೆ. ಆದರೆ 1.5-ಲೀಟರ್ ಎಂಜಿನ್ ಕಾರಿನಲ್ಲಿ ಇನ್ನು ಮುಂದೆ ಕೇವಲ 7-ಸ್ಪೀಡ್ ಡಿಎಸ್ಜಿ (DSG) ಗೇರ್ಬಾಕ್ಸ್ ಆಯ್ಕೆಯನ್ನು ಮಾತ್ರ ನೀಡಲಾಗುತ್ತದೆ.
ಇದನ್ನೂ ಓದಿ ; ಪತಿಯ ಫ್ರೆಂಡ್ ಜೊತೆಯೇ ಓಡಿಹೋದ ಪತ್ನಿ – ಆಕ್ರೋಶಗೊಂಡ ಮಹಿಳೆ ಕುಟುಂಬಸ್ಥರಿಂದ ಯುವಕನ ಮನೆ ಧ್ವಂಸ!
