ಕೊಲೊಂಬೊ : ದಾಂಬುಲ್ಲಾದಲ್ಲಿ ನಡೆಯುತ್ತಿರುವ ಟ್ಯಾಲೆಂಟ್ ತ್ರಿಕೋನ ಸರಣಿಯಲ್ಲಿ ಶ್ರೀಲಂಕಾ ‘ಎ’ ತಂಡದ ವಿರುದ್ಧದ ಪಂದ್ಯದ ವೇಳೆ ಭಾರತ ‘ಎ’ ತಂಡದ ಆಟಗಾರರು ಮಾಡಿದ ಅಜಾಗರೂಕತೆಯ ತಪ್ಪು ತಂಡಕ್ಕೆ ಭಾರೀ ಬೆಲೆ ತೆರುವಂತೆ ಮಾಡಿದೆ. ಭಾರತ ‘ಎ’ ತಂಡದ ಆಲ್ರೌಂಡರ್ ಹಾಗೂ ಡೆಲ್ಲಿ ಕ್ಯಾಪಿಟಲ್ಸ್ ತಂಡದ ಸ್ಪಿನ್ನರ್ ವಿಪ್ರಜ್ ನಿಗಮ್ ಅವರು ಬ್ಯಾಟಿಂಗ್ ಮಾಡುವಾಗ ಪಿಚ್ನ ಸಂರಕ್ಷಿತ ಪ್ರದೇಶದ (Protected Area) ಮೇಲೆ ಎರಡು ಬಾರಿ ಓಡಿ ನಿಯಮ ಉಲ್ಲಂಘಿಸಿದ್ದಾರೆ. ಈ ನಿರ್ಲಕ್ಷ್ಯದ ಪರಿಣಾಮವಾಗಿ ಆನ್-ಫೀಲ್ಡ್ ಅಂಪೈರ್ಗಳು ಭಾರತ ‘ಎ’ ತಂಡಕ್ಕೆ ಒಟ್ಟು 10 ರನ್ಗಳ ದಂಡ ವಿಧಿಸಿದ್ದು, ಇದು ಪಂದ್ಯದಲ್ಲಿ ತಂಡಕ್ಕೆ ಭಾರಿ ಹಿನ್ನಡೆಯನ್ನು ತಂದೊಡ್ಡಿದೆ.
ನಿಯಮ ಉಲ್ಲಂಘನೆ ಮತ್ತು ಅಂಪೈರ್ಗಳ ಕ್ರಮ
ಶ್ರೀಲಂಕಾ ‘ಎ’ ಬೌಲರ್ಗಳ ನಿಖರ ದಾಳಿಗೆ ಸಿಲುಕಿ ಅಲ್ಪ ಮೊತ್ತಕ್ಕೆ ವಿಕೆಟ್ಗಳನ್ನು ಕಳೆದುಕೊಂಡು ಸಂಕಷ್ಟದಲ್ಲಿದ್ದ ಭಾರತ ‘ಎ’ ತಂಡವನ್ನು ಪಾರುಮಾಡುವ ಜವಾಬ್ದಾರಿ ಹೊತ್ತು ಮೈದಾನಕ್ಕಿಳಿದ ವಿಪ್ರಜ್ ನಿಗಮ್, ತಮ್ಮ ಏಕಾಗ್ರತೆಯ ಕೊರತೆಯಿಂದ ವಿವಾದಕ್ಕೆ ಗುರಿಯಾದರು. ಈ ಘಟನೆಗೂ ಮುನ್ನ ಎಂಟನೇ ಕ್ರಮಾಂಕದಲ್ಲಿ ಬ್ಯಾಟಿಂಗ್ಗೆ ಇಳಿದಿದ್ದ ಅನುಕೂಲ್ ರಾಯ್ ಕೂಡ ಪಿಚ್ನ ಮಧ್ಯಭಾಗದಲ್ಲಿ ಓಡಿ ನಿಯಮ ಉಲ್ಲಂಘಿಸಿದ್ದಕ್ಕಾಗಿ ಅಂಪೈರ್ಗಳಿಂದ ಅಧಿಕೃತ ಎಚ್ಚರಿಕೆ ಪಡೆದಿದ್ದರು. ಅನುಕೂಲ್ ರಾಯ್ 33ನೇ ಓವರ್ನಲ್ಲಿ ಔಟ್ ಆಗಿ ಪೆವಿಲಿಯನ್ ಸೇರಿದ್ದರೂ, ಅವರು ಮಾಡಿದ ತಪ್ಪಿನ ಮೇಲಿನ ಎಚ್ಚರಿಕೆ ಭಾರತ ತಂಡಕ್ಕೆ ಅನ್ವಯಿಸುತ್ತಿತ್ತು.
ತಂಡದ ನಿಯಮ ಉಲ್ಲಂಘನೆಯ ಎಚ್ಚರಿಕೆಯ ಹೊರತಾಗಿಯೂ, ಒಂಬತ್ತನೇ ಕ್ರಮಾಂಕದಲ್ಲಿ ಕಣಕ್ಕಿಳಿದ ವಿಪ್ರಜ್ ನಿಗಮ್ ಸೂರ್ಯನ್ಶ್ ಶೆಡ್ಗೆ ಅವರೊಂದಿಗೆ ಬ್ಯಾಟ್ ಮಾಡುತ್ತಿದ್ದಾಗ 35ನೇ ಓವರ್ನಲ್ಲಿ ಮೊದಲ ಬಾರಿಗೆ ಪಿಚ್ನ ಸಂರಕ್ಷಿತ ಪ್ರದೇಶದ ಮೇಲೆ ಓಡಿದರು. ಈ ವೇಳೆ ಅಂಪೈರ್ಗಳು ನಿಯಮಾನುಸಾರ ತಂಡಕ್ಕೆ 5 ರನ್ಗಳ ದಂಡ ವಿಧಿಸಿದರು. ಇದರ ಬಳಿಕ 37ನೇ ಓವರ್ನಲ್ಲಿ ಲಂಕಾ ಸ್ಪಿನ್ನರ್ ಕುಗತದಾಸ್ ಮತುಲನ್ ಅವರ ಬೌಲಿಂಗ್ನಲ್ಲಿ ಶಾರ್ಟ್ ಥರ್ಡ್ ಮ್ಯಾನ್ ಕಡೆಗೆ ಚೆಂಡನ್ನು ಅಟ್ಟಿ ಸಿಂಗಲ್ ಕದಿಯಲು ಮುಂದಾದ ವಿಪ್ರಜ್, ಮತ್ತೊಮ್ಮೆ ಪಿಚ್ನ ಮಧ್ಯದಲ್ಲೇ ಓಡಲು ಶುರುಮಾಡಿದರು. ನಾನ್-ಸ್ಟ್ರೈಕರ್ನಲ್ಲಿದ್ದ ಬ್ಯಾಟರ್ ಅವರನ್ನು ಹಿಂದಕ್ಕೆ ಕಳುಹಿಸಿದರಾದರೂ, ವಿಪ್ರಜ್ ಅದಾಗಲೇ ನಿಯಮ ಉಲ್ಲಂಘಿಸಿದ್ದರು. ತಕ್ಷಣವೇ ಕಾರ್ಯಪ್ರವೃತ್ತರಾದ ಅಂಪೈರ್ಗಳು ಮತ್ತೊಮ್ಮೆ 5 ರನ್ಗಳ ದಂಡ ವಿಧಿಸಿದರು. ಒಟ್ಟಾರೆಯಾಗಿ ಭಾರತ ‘ಎ’ ತಂಡ 10 ರನ್ಗಳ ದಂಡ ತೆರಬೇಕಾಯಿತು.
ಪಿಚ್ನ ಸಂರಕ್ಷಿತ ಪ್ರದೇಶದ ಮಹತ್ವ ಮತ್ತು ದಂಡದ ನಿಯಮ
ಬ್ಯಾಟರ್ಗಳು ಪಿಚ್ನ ಮಧ್ಯಭಾಗದಲ್ಲಿ ಅಂದರೆ ಸಂರಕ್ಷಿತ ಪ್ರದೇಶದಲ್ಲಿ ಓಡಬಾರದು ಎಂಬುದು ಕ್ರಿಕೆಟ್ನ ಪ್ರಮುಖ ನಿಯಮಗಳಲ್ಲೊಂದು. ಇದು ಪಿಚ್ನ ಅತ್ಯಂತ ಪ್ರಮುಖ ಭಾಗವಾಗಿದ್ದು, ಬೌಲರ್ಗಳು ಹಾಕುವ ಚೆಂಡು ಹೆಚ್ಚಾಗಿ ಇದೇ ಜಾಗದಲ್ಲಿ ಬೀಳುತ್ತದೆ. ಆಟಗಾರರು ತಮ್ಮ ಸ್ಪೈಕ್ (ಮೊಳೆ) ಇರುವ ಶೂಗಳನ್ನು ಹಾಕಿಕೊಂಡು ಪದೇ ಪದೇ ಈ ಪ್ರದೇಶದ ಮೇಲೆ ಓಡುವುದರಿಂದ ಪಿಚ್ನಲ್ಲಿ ಬಿರುಕುಗಳು ಹಾಗೂ ಗುಂಡಿಗಳು ಉಂಟಾಗುತ್ತವೆ. ಇದರಿಂದಾಗಿ ಬೌಲರ್ಗಳಿಗೆ ಅಸಹಜ ಬೌನ್ಸ್, ವೇಗ ಅಥವಾ ಸ್ಪಿನ್ ಸಿಗುವ ಸಾಧ್ಯತೆಯಿದ್ದು, ಇದು ಪಂದ್ಯದ ಸಮತೋಲನವನ್ನು ಹಾಳುಮಾಡುತ್ತದೆ. ಈ ಕಾರಣಕ್ಕಾಗಿ ಬ್ಯಾಟರ್ಗಳು ಪಿಚ್ನ ಪಕ್ಕದಲ್ಲಿ ಓಡಬೇಕೆಂದು ಕಟ್ಟುನಿಟ್ಟಾಗಿ ಸೂಚಿಸಲಾಗುತ್ತದೆ.
ಏಕದಿನ ಕ್ರಿಕೆಟ್ ನಿಯಮಗಳ ಪ್ರಕಾರ, ಬ್ಯಾಟರ್ ಉದ್ದೇಶಪೂರ್ವಕವಾಗಿ ಅಥವಾ ಅಜಾಗರೂಕತೆಯಿಂದ ಸಂರಕ್ಷಿತ ಪ್ರದೇಶದಲ್ಲಿ ಓಡಿದರೆ, ಅಂಪೈರ್ ಮೊದಲು ಎಚ್ಚರಿಕೆ ನೀಡಿ ಕ್ಯಾಪ್ಟನ್ಗೆ ತಿಳಿಸುತ್ತಾರೆ. ಅದೇ ತಂಡದ ಯಾವುದೇ ಬ್ಯಾಟರ್ ಮತ್ತೆ ಅದೇ ತಪ್ಪನ್ನು ಮರುಕಳಿಸಿದರೆ, ಫೀಲ್ಡಿಂಗ್ ಮಾಡುತ್ತಿರುವ ತಂಡಕ್ಕೆ 5 ರನ್ಗಳ ಪೆನಾಲ್ಟಿ ನೀಡಲಾಗುತ್ತದೆ. ಶಾಟ್ ಹೊಡೆದ ನಂತರ ಆಟಗಾರನ ವೇಗದ ನಿಯಂತ್ರಣ ತಪ್ಪಿ ಆಕಸ್ಮಿಕವಾಗಿ ಪಿಚ್ನ ಮಧ್ಯಭಾಗಕ್ಕೆ ಬಂದರೆ ಅಂಪೈರ್ಗಳು ವಿನಾಯಿತಿ ನೀಡಬಹುದು, ಆದರೆ ಪದೇ ಪದೇ ನಡೆಯುವ ನಿರ್ಲಕ್ಷ್ಯದ ಓಟಗಳಿಗೆ ದಂಡ ವಿಧಿಸಲಾಗುತ್ತದೆ. ವಿಪ್ರಜ್ ನಿಗಮ್ ಅವರ ಈ ನಿರ್ಲಕ್ಷ್ಯದ ನಡೆ, ಸಂಕಷ್ಟದಲ್ಲಿದ್ದ ಭಾರತ ‘ಎ’ ತಂಡದ ಮೇಲೆ ಮತ್ತಷ್ಟು ಒತ್ತಡ ಹೇರಲು ಕಾರಣವಾಯಿತು
ಇದನ್ನೂ ಓದಿ : ಟಿ20 ವಿಶ್ವಕಪ್ : ಪಾಕ್ ವಿರುದ್ಧ 5 ವಿಕೆಟ್ ಕಬಳಿಸಿ ಮಿಂಚಿದ ದೀಪ್ತಿ ಶರ್ಮಾ!
