ಎಲಾನ್ ಮಸ್ಕ್ ಹೊಸ ದಾಖಲೆ : ತೈವಾನ್ ದೇಶದ ಆರ್ಥಿಕತೆಗಿಂತಲೂ ಮಸ್ಕ್ ಈಗ ಶ್ರೀಮಂತ!

ವಾಷಿಂಗ್ಟನ್ : ಟೆಕ್ ದೈತ್ಯ ಎಲಾನ್ ಮಸ್ಕ್ ಅವರು ಇದೀಗ ಜಾಗತಿಕ ಉದ್ಯಮ ರಂಗದಲ್ಲಿ ಹೊಸ ಇತಿಹಾಸ ಬರೆದಿದ್ದಾರೆ. ತಮ್ಮ ಒಡೆತನದ ಬಾಹ್ಯಾಕಾಶ ಸಂಶೋಧನಾ ಸಂಸ್ಥೆ ‘ಸ್ಪೇಸ್‌ಎಕ್ಸ್'(SpaceX)ನ ಐತಿಹಾಸಿಕ ಐಪಿಒ (IPO) ಯಶಸ್ಸಿನ ಬೆನ್ನಲ್ಲೇ, ಎಲಾನ್ ಮಸ್ಕ್ ಅಧಿಕೃತವಾಗಿ ವಿಶ್ವದ ಅತ್ಯಂತ ಮೊದಲ ‘ಟ್ರಿಲಿಯನೇರ್’ (ಲಕ್ಷ ಕೋಟಿ ಡಾಲರ್ ಒಡೆಯ) ಆಗಿ ಹೊರಹೊಮ್ಮಿದ್ದಾರೆ. ಇತಿಹಾಸದಲ್ಲಿ ಇದುವರೆಗೆ ಯಾವುದೇ ವ್ಯಕ್ತಿ ತಲುಪದ ಮಹೋನ್ನತ ಆರ್ಥಿಕ ಶಿಖರವನ್ನು ಮಸ್ಕ್ ಮುಟ್ಟಿದ್ದಾರೆ. ಕಂಪನಿಯ ಹಣಕಾಸು ದಾಖಲೆಗಳು ಮತ್ತು ಫೋರ್ಬ್ಸ್ ಅಂದಾಜಿನ ಪ್ರಕಾರ, ಸ್ಪೇಸ್‌ಎಕ್ಸ್ ಷೇರು ಮಾರುಕಟ್ಟೆ ಪ್ರವೇಶಿಸುತ್ತಿದ್ದಂತೆ ಮಸ್ಕ್ ಅವರ ಒಟ್ಟು ಆಸ್ತಿ ಮೌಲ್ಯ 1.1 ಲಕ್ಷಕೋಟಿ ಡಾಲರ್ ಗಡಿಯನ್ನು ದಾಟಿದೆ.

ತೈವಾನ್ ಜಿಡಿಪಿಗಿಂತಲೂ ಹೆಚ್ಚು

ಎಲಾನ್ ಮಸ್ಕ್ ಅವರ ಈ ಹೊಸ ಆಸ್ತಿ ಮೌಲ್ಯವು ಜಗತ್ತಿನ ಪ್ರಮುಖ ದೇಶಗಳ ವಾರ್ಷಿಕ ಆರ್ಥಿಕ ಉತ್ಪಾದನೆಗಿಂತಲೂ ಹೆಚ್ಚಾಗಿದೆ. ಅಂತಾರಾಷ್ಟ್ರೀಯ ಹಣಕಾಸು ಸಂಸ್ಥೆ (IMF) ಅಂದಾಜಿನ ಪ್ರಕಾರ, ಜಾಗತಿಕ ಸೆಮಿಕಂಡಕ್ಟರ್ ಮತ್ತು ಕೃತಕ ಬುದ್ಧಿಮತ್ತೆ (AI) ಚಿಪ್‌ಗಳ ತಯಾರಿಕಾ ಕೇಂದ್ರವಾಗಿರುವ ತೈವಾನ್ ದೇಶದ ಒಟ್ಟು ಆರ್ಥಿಕತೆಯ ಮೌಲ್ಯ 976.7 ಬಿಲಿಯನ್ ಡಾಲರ್ ಆಗಿದೆ. ಅಂದರೆ ಮಸ್ಕ್ ಅವರ ವೈಯಕ್ತಿಕ ಆಸ್ತಿ ಈಗ ಇಡೀ ತೈವಾನ್ ದೇಶದ ಆರ್ಥಿಕತೆಗಿಂತಲೂ ದೊಡ್ಡದಾಗಿದೆ. ಅಷ್ಟೇ ಅಲ್ಲದೆ, ಭಾರತದ ಒಟ್ಟು ಜಿಡಿಪಿಯ (4.15 ಟ್ರಿಲಿಯನ್ ಡಾಲರ್) ಸುಮಾರು ನಾಲ್ಕನೇ ಒಂದು ಭಾಗದಷ್ಟು ಸಂಪತ್ತನ್ನು ಮಸ್ಕ್ ಒಬ್ಬರೇ ಹೊಂದಿದ್ದಾರೆ.

ಇತಿಹಾಸದ ಅತಿ ದೊಡ್ಡ ಐಪಿಒ ತಂದ ಅದೃಷ್ಟ

ಮಸ್ಕ್ ಸಂಪತ್ತಿನಲ್ಲಿ ಈ ದಿಢೀರ್ ಜಿಗಿತ ಕಂಡುಬರಲು ಸ್ಪೇಸ್‌ಎಕ್ಸ್ ಸಂಸ್ಥೆ ಮಾರುಕಟ್ಟೆಗೆ ಬಿಡುಗಡೆ ಮಾಡಿದ 75 ಬಿಲಿಯನ್ ಡಾಲರ್ ಮೌಲ್ಯದ ದಾಖಲೆಯ ಐಪಿಒ ಕಾರಣ. ಇದು ಜಾಗತಿಕ ಇತಿಹಾಸದಲ್ಲೇ ಅತಿ ದೊಡ್ಡ ಐಪಿಒ ಎಂದು ರಾಯಿಟರ್ಸ್ ವರದಿ ಮಾಡಿದೆ. ಈ ಷೇರು ಮಾರಾಟಕ್ಕೂ ಮುನ್ನ ಮಸ್ಕ್ ಆಸ್ತಿ 780 ಬಿಲಿಯನ್ ಡಾಲರ್ ಆಸುಪಾಸಿನಲ್ಲಿತ್ತು. ಆದರೆ ಈಗ ಸ್ಪೇಸ್‌ಎಕ್ಸ್‌ನಲ್ಲಿರುವ ಅವರ ಪಾಲು ಒಂದೇ ಬರೋಬ್ಬರಿ 866 ಬಿಲಿಯನ್ ಡಾಲರ್‌ಗೆ ಏರಿಕೆಯಾಗಿದೆ. ಇದು ಅವರ ಒಟ್ಟು ಸಂಪತ್ತಿನ ಅತಿ ದೊಡ್ಡ ಮೂಲವಾಗಿದೆ. ಇದರೊಂದಿಗೆ ಟೆಸ್ಲಾ (Tesla) ಮತ್ತು ಸಾಮಾಜಿಕ ಮಾಧ್ಯಮ ‘X'(ಟ್ವೀಟರ್) ಸೇರಿದಂತೆ ಅವರ ಇತರ ಉದ್ಯಮಗಳ ಮೌಲ್ಯವೂ ಸೇರಿ ಅವರು ಇದೀಗ 1.1 ಟ್ರಿಲಿಯನ್ ಡಾಲರ್ ಒಡೆಯನಾಗಿದ್ದಾರೆ.

ಪ್ರತಿಸ್ಪರ್ಧಿಗಳಿಗಿಂತ 3 ಪಟ್ಟು ಮುನ್ನಡೆ

ಬ್ಲೂಮ್‌ಬರ್ಗ್ ಬಿಲಿಯನೇರ್ಸ್ ಇಂಡೆಕ್ಸ್ ಪ್ರಕಾರ, ಮಸ್ಕ್ ಈ ಮೈಲಿಗಲ್ಲು ದಾಟುವ ಮುನ್ನವೇ 971 ಬಿಲಿಯನ್ ಡಾಲರ್ ಸಂಪತ್ತಿನೊಂದಿಗೆ ವಿಶ್ವದ ಅತ್ಯಂತ ಶ್ರೀಮಂತ ವ್ಯಕ್ತಿಯಾಗಿದ್ದರು. ಸದ್ಯ ಜಗತ್ತಿನ ಎರಡನೇ ಅತಿ ದೊಡ್ಡ ಶ್ರೀಮಂತರಾಗಿರುವ ಆಲ್ಫಾಬೆಟ್ ಸಹ-ಸಂಸ್ಥಾಪಕ ಲ್ಯಾರಿ ಪೇಜ್ ಅವರ ಆಸ್ತಿ ಕೇವಲ 304 ಬಿಲಿಯನ್ ಡಾಲರ್ ಆಗಿದೆ. ಅಂದರೆ ಮಸ್ಕ್ ತಮ್ಮ ಹತ್ತಿರದ ಪ್ರತಿಸ್ಪರ್ಧಿಗಳಿಗಿಂತ ಮೂರು ಪಟ್ಟು ಹೆಚ್ಚು ಶ್ರೀಮಂತರಾಗಿದ್ದಾರೆ. ಫೋರ್ಬ್ಸ್ ವೆಲ್ತ್ ನಿಯತಕಾಲಿಕೆಯ ಪ್ರಕಾರ, ಇತಿಹಾಸದಲ್ಲಿ ಒರಾಕಲ್ ಸಂಸ್ಥೆಯ ಲ್ಯಾರಿ ಎಲಿಸನ್ ($400 ಬಿಲಿಯನ್) ಹೊರತುಪಡಿಸಿ ಬೇರೆ ಯಾರೂ ಇಷ್ಟು ಹತ್ತಿರಕ್ಕೂ ಬಂದಿರಲಿಲ್ಲ.

ಇದನ್ನೂ ಓದಿ : ಧರ್ಮಸ್ಥಳ ಕೇಸಲ್ಲಿ ಪ್ರಕಾಶ್‌ ರಾಜ್‌ ಹೆಸರು ತಳುಕು – ಚಿನ್ನಯ್ಯ ಆರೋಪಕ್ಕೆ ಪ್ರಿಯಾಂಕ್ ಖರ್ಗೆ ಹೇಳಿದ್ದೇನು?