‘ಹೊಸ ರಾಜಕೀಯ ಚಳವಳಿ ಆರಂಭ’ : ಬಿಜೆಪಿ ತೊರೆದ ಬೆನ್ನಲ್ಲೇ ಅಣ್ಣಾಮಲೈ ಹೇಳಿದ್ದೇನು?

ಚೆನ್ನೈ/ನವದೆಹಲಿ: ಬಿಜೆಪಿಯ ಪ್ರಾಥಮಿಕ ಸದಸ್ಯತ್ವಕ್ಕೆ ರಾಜೀನಾಮೆ ನೀಡಿದ ಕೆಲವೇ ಗಂಟೆಗಳಲ್ಲಿ, ತಮಿಳುನಾಡು ಬಿಜೆಪಿ ಮಾಜಿ ರಾಜ್ಯಾಧ್ಯಕ್ಷ ಕೆ. ಅಣ್ಣಾಮಲೈ ತಮ್ಮ ಮುಂದಿನ ರಾಜಕೀಯ ನಡೆ ಕುರಿತು ಅಧಿಕೃತವಾಗಿ ಮಹತ್ವದ ಘೋಷಣೆ ಮಾಡಿದ್ದಾರೆ. ಶೀಘ್ರದಲ್ಲೇ ಹೊಸ ರಾಜಕೀಯ ಚಳವಳಿಯೊಂದನ್ನು ಪ್ರಾರಂಭಿಸುವುದಾಗಿ ಹೇಳಿರುವ ಅವರು, ಇದನ್ನು ತಮ್ಮ ಸಾರ್ವಜನಿಕ ಮತ್ತು ರಾಜಕೀಯ ಜೀವನದ ಮುಂದಿನ ಪ್ರಮುಖ ಹಂತ ಎಂದು ಬಣ್ಣಿಸಿದ್ದಾರೆ. ಹೈಕಮಾಂಡ್ ಅವರ ರಾಜೀನಾಮೆಯನ್ನು ಅಂಗೀಕರಿಸಿದ ಬೆನ್ನಲ್ಲೇ ಮಾಧ್ಯಮಗಳನ್ನು ಉದ್ದೇಶಿಸಿ ಮಾತನಾಡಿದ ಅವರು, ಸಾಮಾನ್ಯ ಜನರಿಗಾಗಿ ಹೊಸ ಪರ್ಯಾಯ ರಾಜಕಾರಣದ ಅಗತ್ಯತೆಯನ್ನು ಪ್ರತಿಪಾದಿಸಿದ್ದಾರೆ.

ತಮ್ಮ ರಾಜಕೀಯ ಜೀವನದ ಆರಂಭದ ದಿನಗಳನ್ನು ಸ್ಮರಿಸಿದ ಅಣ್ಣಾಮಲೈ, ತಾವು ರಾಜಕೀಯದ ಪಾಠಗಳನ್ನು ಕಲಿಯಲು ಆರಂಭದಲ್ಲಿ ವಿಜಯಕಾಂತ್ ಅವರು ಸ್ಥಾಪಿಸಿದ್ದ ಪಕ್ಷದಲ್ಲಿ ಇಂಟರ್ನ್ ಆಗಿ ಸೇರಿದ್ದನ್ನು ನೆನಪಿಸಿಕೊಂಡರು. ತದನಂತರ ಬಿಜೆಪಿ ಜೊತೆಗಿನ ಆರು ವರ್ಷಗಳ ಪಯಣ ನನಗೆ ಸಾರ್ವಜನಿಕ ಸೇವೆಯಲ್ಲಿ ಅತ್ಯಂತ ಮಹತ್ವದ ಅವಕಾಶ ಮತ್ತು ಕಲಿಕೆಯ ಅನುಭವವನ್ನು ನೀಡಿದೆ ಎಂದು ಹೇಳಿದರು. “ಆದರೆ ಈಗ ನಮ್ಮ ಗುರಿಗಳು ತಮಿಳುನಾಡಿನ ಹಿತದೃಷ್ಟಿಯಿಂದ ಮತ್ತಷ್ಟು ದೊಡ್ಡದಾಗಿವೆ. ರಾಜ್ಯದಲ್ಲಿ ನಿಜವಾದ ಬದಲಾವಣೆ ತರಬಲ್ಲ ಹೊಸ ರಾಜಕಾರಣದ ತುರ್ತು ಅಗತ್ಯವಿದೆ. ನಾವು ಕೇವಲ ಒಬ್ಬ ವ್ಯಕ್ತಿ ಕೇಂದ್ರಿತ ರಾಜಕಾರಣದಿಂದ ಹೊರಬಂದು, ಸಾಮಾನ್ಯ ಜನರ ಪರವಾಗಿ ನಿಲ್ಲುವ ಸಾಮಾನ್ಯ ಮನುಷ್ಯನ ರಾಜಕೀಯವನ್ನು ಬೆಳೆಸಬೇಕಾಗಿದೆ” ಎಂದು ಅವರು ಅಭಿಪ್ರಾಯಪಟ್ಟಿದ್ದಾರೆ.

ರಾಜೀನಾಮೆ ವೇಳೆ ರಜನಿಕಾಂತ್ ಆಫರ್ ನೆನೆದ ಅಣ್ಣಾಮಲೈ

ಸುದ್ದಿಗೋಷ್ಠಿಯಲ್ಲಿ ಒಂದು ಆಸಕ್ತಿದಾಯಕ ವೈಯಕ್ತಿಕ ರಹಸ್ಯವನ್ನು ಹಂಚಿಕೊಂಡ ಅಣ್ಣಾಮಲೈ, “ನಾನು ಬಿಜೆಪಿ ಸೇರುವ ಕೇವಲ ಒಂದು ದಿನದ ಮುಂಚೆ, ಸೂಪರ್‌ಸ್ಟಾರ್ ರಜನಿಕಾಂತ್ ಅವರು ನನ್ನನ್ನು ಭೇಟಿಯಾಗಲು ಕರೆದು, ತಮ್ಮ ರಾಜಕೀಯ ಚಳವಳಿಯ ಭಾಗವಾಗುವಂತೆ ಆಹ್ವಾನ ನೀಡಿದ್ದರು. ಆದರೆ ನಾನು ಆ ಸಮಯದಲ್ಲಿ ಬಿಜೆಪಿ ಸೇರಲು ನಿರ್ಧರಿಸಿದ್ದೆ. ನಾನು ಬಿಜೆಪಿ ಸೇರಿದಾಗಲೂ ರಜನಿಕಾಂತ್ ಅವರು ವೈಯಕ್ತಿಕವಾಗಿ ನನಗೆ ಶುಭ ಹಾರೈಸಿದ್ದರು” ಎಂದು ನೆನಪಿಸಿಕೊಂಡಿದ್ದಾರೆ. ನಾನು ಬಿಜೆಪಿಯಿಂದ ಹೊರಬಂದಿರುವುದನ್ನು ಯಾವುದೇ ಸಂಘರ್ಷದ ಹಾದಿ ಎಂದು ಯಾರೂ ಭಾವಿಸಬಾರದು ಎಂದ ಅವರು, ಭಿನ್ನಾಭಿಪ್ರಾಯಗಳನ್ನು ವ್ಯಕ್ತಪಡಿಸಿದ ನಂತರ ಗೌರವಯುತವಾಗಿ ಪರಸ್ಪರ ಬೇರ್ಪಡುವುದು ತಮಿಳು ಸಂಸ್ಕೃತಿಯ ಭಾಗವಾಗಿದೆ ಎಂದು ಸ್ಪಷ್ಟಪಡಿಸಿದ್ದಾರೆ.

ಮುಂದಿನ ಸಾರ್ವತ್ರಿಕ ಚುನಾವಣೆಯಲ್ಲಿ ಸ್ವತಂತ್ರ ಸ್ಪರ್ಧೆ

ಇದೇ ವೇಳೆ ತಮ್ಮ ಭವಿಷ್ಯದ ರಾಜಕೀಯ ಕಾರ್ಯತಂತ್ರವನ್ನು ಬಹಿರಂಗಪಡಿಸಿದ ಅಣ್ಣಾಮಲೈ, ಮುಂಬರುವ ಸಾರ್ವತ್ರಿಕ ಚುನಾವಣೆಗಳಲ್ಲಿ ಹೊಸ ಚಳವಳಿಯ ಮೂಲಕ ಸ್ವತಂತ್ರವಾಗಿ ಸ್ಪರ್ಧಿಸುವುದಾಗಿ ಘೋಷಿಸಿದ್ದಾರೆ. “ನಾವು ಇನ್ಮುಂದೆ ಡಿಎಂಕೆ (DMK), ಎಐಎಡಿಎಂಕೆ (AIADMK), ಟಿಟಿವಿ ದಿನಕರನ್, ವೈಕೋ ಮತ್ತು ಸೀಮನ್ ಅವರ ಪಕ್ಷಗಳನ್ನು ಹೇಗೆ ರಾಜಕೀಯವಾಗಿ ನೋಡುತ್ತೇವೆಯೋ, ಅದೇ ರೀತಿ ಬಿಜೆಪಿಯನ್ನೂ ಕೂಡ ರಾಜಕೀಯ ಎದುರಾಳಿಯಾಗಿಯೇ ಪರಿಗಣಿಸುತ್ತೇವೆ” ಎಂದು ಹೇಳುವ ಮೂಲಕ ರಾಷ್ಟ್ರೀಯ ಪಕ್ಷದ ಹಂಗಿಲ್ಲದೆ ಮುನ್ನಡೆಯುವ ಸ್ಪಷ್ಟ ಸಂದೇಶ ರವಾನಿಸಿದ್ದಾರೆ.

‘ಎಕ್ಸ್’ (X) ಖಾತೆಯ ಬಯೋ ಬದಲಾವಣೆ

ಬಿಜೆಪಿಯಿಂದ ಹೊರಬಂದ ತಕ್ಷಣವೇ ಅಣ್ಣಾಮಲೈ ಅವರು ಡಿಜಿಟಲ್ ವೇದಿಕೆಯಲ್ಲೂ ತಮ್ಮ ರಾಜಕೀಯ ರೀಬ್ರ್ಯಾಂಡಿಂಗ್ ಆರಂಭಿಸಿದ್ದಾರೆ. ತಮ್ಮ ಅಧಿಕೃತ ‘ಎಕ್ಸ್’ (ಟ್ವಿಟರ್) ಖಾತೆಯ ಬಯೋವನ್ನು (Bio) ಬದಲಾಯಿಸಿಕೊಂಡಿರುವ ಅವರು, “ಒಳ್ಳೆಯ ರಾಜಕಾರಣದ ಹುಡುಕಾಟದಲ್ಲಿರುವ ಒಬ್ಬ ಸಾಮಾನ್ಯ ಮನುಷ್ಯ!” (A common man in search of good politics!) ಎಂದು ಬರೆದುಕೊಂಡಿದ್ದಾರೆ. ಈ ಒಂದು ಸಾಲು ಅವರು ಕೇವಲ ಮತ್ತೊಂದು ಸಾಂಪ್ರದಾಯಿಕ ರಾಜಕೀಯ ಪಕ್ಷವನ್ನು ಕಟ್ಟುತ್ತಿಲ್ಲ, ಬದಲಿಗೆ ತಮಿಳುನಾಡಿನಲ್ಲಿ ಹೊಸ ಆಯಾಮದ ಪರ್ಯಾಯ ರಾಜಕೀಯ ಶಕ್ತಿಯನ್ನು ಹುಟ್ಟುಹಾಕಲು ಹೊರಟಿದ್ದಾರೆ ಎಂಬುದನ್ನು ಸ್ಪಷ್ಟವಾಗಿ ಸಾರಿದೆ.