ಬೆಂಗಳೂರು : ಐಪಿಎಲ್ 2026ರ ಫೈನಲ್ ಪಂದ್ಯದಲ್ಲಿ ಗುಜರಾತ್ ಟೈಟನ್ಸ್ ವಿರುದ್ಧ 5 ವಿಕೆಟ್‌ಗಳ ಭರ್ಜರಿ ಜಯ ಸಾಧಿಸಿ, ಸತತ ಎರಡನೇ ಬಾರಿಗೆ ಚಾಂಪಿಯನ್ ಆಗಿ ಹೊರಹೊಮ್ಮಿದ ರಾಯಲ್ ಚಾಲೆಂಜರ್ಸ್ ಬೆಂಗಳೂರು ತಂಡದ ಡ್ರೆಸ್ಸಿಂಗ್ ರೂಮ್‌ನಲ್ಲಿ ಭಾವನಾತ್ಮಕ ವಾತಾವರಣ ನಿರ್ಮಾಣವಾಗಿತ್ತು. ಕೇವಲ ತಾರೆಗಳ ಬಲದಿಂದ ಪಂದ್ಯ ಗೆಲ್ಲಲು ಸಾಧ್ಯವಿಲ್ಲ, ಅದಕ್ಕೆ ಆಟಗಾರರ ನಡುವಿನ ನಂಬಿಕೆ ಮತ್ತು ಡ್ರೆಸ್ಸಿಂಗ್ ರೂಮ್‌ನ ಶಿಸ್ತಿನ ಸಂಸ್ಕೃತಿ ಮುಖ್ಯ ಎಂಬುದನ್ನು ಆರ್ಸಿಬಿ ಮತ್ತೊಮ್ಮೆ ಸಾಬೀತುಪಡಿಸಿದೆ.
ಪ್ರಶಸ್ತಿ ಗೆದ್ದ ಬೆನ್ನಲ್ಲೇ ಆಟಗಾರರನ್ನು ಉದ್ದೇಶಿಸಿ ಮಾತನಾಡಿದ ಮುಖ್ಯ ಕೋಚ್ ಆಂಡಿ ಫ್ಲವರ್, ಇಡೀ ಸರಣಿಯ ಯಶಸ್ಸಿನ ಹಿಂದಿರುವ ಆಟಗಾರರ ನೈಜ ಗುಣಗಳನ್ನು ತೆರೆದಿಟ್ಟಿದ್ದಾರೆ. ಈ ವೇಳೆ ಅವರು ಯಾವುದೇ ಅಂಕಿ-ಅಂಶಗಳು ಅಥವಾ ದಾಖಲೆಗಳ ಬಗ್ಗೆ ಮಾತನಾಡದೆ, ತಂಡದ ಒಗ್ಗಟ್ಟನ್ನು ಕೊಂಡಾಡಿದ್ದು ವಿಶೇಷವಾಗಿತ್ತು.
ಡ್ರೆಸ್ಸಿಂಗ್ ರೂಮ್‌ನ ನಿಜವಾದ ಹೃದಯಬಡಿತ ವಿರಾಟ್ ಕೊಹ್ಲಿ
ಆರ್ಸಿಬಿ ಹಂಚಿಕೊಂಡಿರುವ ವಿಶೇಷ ವಿಡಿಯೋದಲ್ಲಿ, ಮಾಜಿ ನಾಯಕ ಹಾಗೂ ಜಾಗತಿಕ ಕ್ರಿಕೆಟ್‌ನ ದಿಗ್ಗಜ ವಿರಾಟ್ ಕೊಹ್ಲಿ ಅವರ ಕೊಡುಗೆಯನ್ನು ಆಂಡಿ ಫ್ಲವರ್ ಮುಕ್ತಕಂಠದಿಂದ ಶ್ಲಾಘಿಸಿದ್ದಾರೆ. ಫೈನಲ್ ಪಂದ್ಯದಲ್ಲಿ ಕೊಹ್ಲಿ ಗಳಿಸಿದ ಅಜೇಯ 75 ರನ್‌ಗಳ ಮ್ಯಾಚ್ ವಿನ್ನಿಂಗ್ ಪ್ರದರ್ಶನಕ್ಕಿಂತಲೂ ಮಿಗಿಲಾಗಿ, ಅವರು ತಂಡದಲ್ಲಿ ಸೃಷ್ಟಿಸಿರುವ ಧನಾತ್ಮಕ ವಾತಾವರಣವನ್ನು ಕೋಚ್ ಎತ್ತಿ ತೋರಿಸಿದ್ದಾರೆ. ವಿರಾಟ್ ಕೊಹ್ಲಿ ಈ ಡ್ರೆಸ್ಸಿಂಗ್ ರೂಮ್‌ನ ನಿಜವಾದ ‘ಹೃದಯಬಡಿತ’ ಎಂದು ಬಣ್ಣಿಸಿದ ಫ್ಲವರ್, ಮೈದಾನದಲ್ಲಿ ಕೊಹ್ಲಿ ತೋರುವ ಅಪ್ರತಿಮ ಧೈರ್ಯ ಮತ್ತು ಜಗತ್ತಿನ ಅತ್ಯುತ್ತಮ ಬೌಲಿಂಗ್ ದಾಳಿಯನ್ನು ಎದುರಿಸುವ ಅವರ ಬದ್ಧತೆ ತಂಡದ ಪ್ರತಿಯೊಬ್ಬ ಯುವ ಆಟಗಾರನಿಗೂ ಅತ್ಯುತ್ತಮ ಮಾದರಿಯಾಗಿದೆ ಎಂದು ಹೆಮ್ಮೆಯಿಂದ ಹೇಳಿಕೊಂಡಿದ್ದಾರೆ.
ಬೌಲಿಂಗ್ ಪಡೆಯ ಸದ್ದಿಲ್ಲದ ರೂವಾರಿಗಳು
ಕೇವಲ ಬ್ಯಾಟಿಂಗ್ ವಿಭಾಗವನ್ನಷ್ಟೇ ಅಲ್ಲದೆ, ಈ ಬಾರಿಯ ಟೂರ್ನಿಯಲ್ಲಿ ಆರ್ಸಿಬಿಯ ಬೌಲಿಂಗ್ ವಿಭಾಗವನ್ನು ಮುನ್ನಡೆಸಿದ ಹಿರಿಯ ವೇಗಿಗಳಾದ ಭುವನೇಶ್ವರ್ ಕುಮಾರ್ ಮತ್ತು ಜೋಶ್ ಹೇಜಲ್‌ವುಡ್ ಅವರ ಶ್ರಮವನ್ನು ಆಂಡಿ ಫ್ಲವರ್ ವಿಶೇಷವಾಗಿ ನೆನೆದಿದ್ದಾರೆ. ಪವರ್‌ಪ್ಲೇ ಹಾಗೂ ಪಂದ್ಯದ ನಿರ್ಣಾಯಕ ಡೆತ್ ಓವರ್‌ಗಳಲ್ಲಿ ವಿಶ್ವದ ಶ್ರೇಷ್ಠ ಬ್ಯಾಟರ್‌ಗಳು ಧಾಳಿ ನಡೆಸಲು ಸಜ್ಜಾಗಿದ್ದಾಗಲೂ, ಇವರಿಬ್ಬರು ತಮ್ಮ ಚಾಣಾಕ್ಷತನ, ಕೌಶಲ್ಯ ಹಾಗೂ ಅಪ್ರತಿಮ ಧೈರ್ಯದಿಂದ ಬೌಲಿಂಗ್ ಘಟಕವನ್ನು ಮುನ್ನಡೆಸಿದ ರೀತಿಯನ್ನು ಕೋಚ್ ಶ್ಲಾಘಿಸಿದ್ದಾರೆ. ಹಿರಿಯ ಆಟಗಾರರ ಈ ಜವಾಬ್ದಾರಿಯುತ ನಡವಳಿಕೆಯೇ ತಂಡದ ಸತತ ಯಶಸ್ಸಿನ ಅಸಲಿ ರಹಸ್ಯ ಎಂಬುದನ್ನು ಅವರು ಮನವರಿಕೆ ಮಾಡಿಕೊಟ್ಟಿದ್ದಾರೆ.
ಸ್ಟಾರ್ ಬಲಕ್ಕಿಂತ ಕಾರ್ಯತಂತ್ರಕ್ಕೆ ಸಿಕ್ಕ ಜಯ
ಐಪಿಎಲ್ ಇತಿಹಾಸದಲ್ಲಿ ಮುಂಬೈ ಇಂಡಿಯನ್ಸ್‌ನಂತಹ ಬಲಿಷ್ಠ ತಂಡಗಳು ಸ್ಟಾರ್ ಆಟಗಾರರ ದಂಡನ್ನೇ ಹೊಂದಿದ್ದರೂ ಸತತ ಯಶಸ್ಸು ಕಾಣಲು ಪರದಾಡುತ್ತಿರುವ ಉದಾಹರಣೆಗಳ ನಡುವೆ, ಆರ್ಸಿಬಿ ಈ ಬಾರಿ ಭಿನ್ನವಾಗಿ ಯೋಚಿಸಿತ್ತು. ಮೆಗಾ ಹರಾಜಿನ ವೇಳೆಯೇ ಕೇವಲ ದೊಡ್ಡ ಹೆಸರುಗಳ ಹಿಂದೆ ಬೀಳದೆ, ಪ್ರತಿಯೊಬ್ಬ ಆಟಗಾರನಿಗೆ ನಿರ್ದಿಷ್ಟ ಪಾತ್ರಗಳನ್ನು ನಿಗದಿಪಡಿಸಿ ಸಮತೋಲಿತ ತಂಡವನ್ನು ಕಟ್ಟಿತ್ತು. ಮ್ಯಾನೇಜ್‌ಮೆಂಟ್ ಆಟಗಾರರ ಮೇಲೆ ಇಟ್ಟ ನಂಬಿಕೆ ಮತ್ತು ಆಟಗಾರರಲ್ಲಿ ಮೂಡಿದ ಪರಸ್ಪರ ಜವಾಬ್ದಾರಿಯೇ ಈ ಬ್ಯಾಕ್-ತು-ಬ್ಯಾಕ್ ಪ್ರಶಸ್ತಿಗೆ ಕಾರಣವಾಗಿದೆ. ಹೀಗಾಗಿಯೇ ಆಂಡಿ ಫ್ಲವರ್ ಪಾಲಿಗೆ ಐಪಿಎಲ್ ಟ್ರೋಫಿಗಿಂತಲೂ, ಈ ಯಶಸ್ಸಿಗೆ ಕಾರಣವಾದ ಆರ್ಸಿಬಿ ಡ್ರೆಸ್ಸಿಂಗ್ ರೂಮ್‌ನ ಆರೋಗ್ಯಕರ ಸಂಸ್ಕೃತಿಯೇ ಅತ್ಯಂತ ದೊಡ್ಡ ಬಹುಮಾನವಾಗಿ ಕಾಣಿಸಿದೆ.
ಇದನ್ನೂ ಓದಿ : ‘ನಾನು ಬೆಂಗಳೂರಿಗೆ ಬಂದೆ, ನೀವು ಕಪ್ ಗೆಲ್ಲಲು ಶುರು ಮಾಡಿದ್ರಿ’ : RCB ಗೆಲುವಿಗೆ ‘ಲಕ್ಕಿ ಚಾರ್ಮ್’ ಎಂದ ಸಿಂಧು
