ನವದೆಹಲಿ: ಮುಂಬರುವ ಮಹಿಳಾ ಪ್ರೀಮಿಯರ್ ಲೀಗ್ (ಡಬ್ಲ್ಯೂಪಿಎಲ್) 2027ರ ಆವೃತ್ತಿಯ ಹರಾಜು ಪ್ರಕ್ರಿಯೆ ಅಕ್ಟೋಬರ್ 28ರಂದು ಕೊಚ್ಚಿಯಲ್ಲಿ ನಡೆಯಲಿದ್ದು, ಇದಕ್ಕಾಗಿ ಒಟ್ಟು 146 ಆಟಗಾರ್ತಿಯರ ಅಂತಿಮ ಪಟ್ಟಿಯನ್ನು ಸೋಮವಾರ ಪ್ರಕಟಿಸಲಾಗಿದೆ. ಕೇವಲ 27 ಸ್ಥಾನಗಳಿಗಾಗಿ ನಡೆಯಲಿರುವ ಈ ಹರಾಜು ಪ್ರಕ್ರಿಯೆಯಲ್ಲಿ ಮುಂಬೈ ಇಂಡಿಯನ್ಸ್ ತಂಡದಿಂದ ಬಿಡುಗಡೆಯಾಗಿರುವ ಜಿ. ಕಮಲಿನಿ ಸೇರಿದಂತೆ ಹಲವು ಪ್ರಮುಖ ಆಟಗಾರ್ತಿಯರು ಭಾರಿ ಮೊತ್ತಕ್ಕೆ ಬಿಕಾರಿಯಾಗುವ ನಿರೀಕ್ಷೆ ಹುಟ್ಟುಹಾಕಿದ್ದಾರೆ.
ಡಬ್ಲ್ಯೂಪಿಎಲ್ ಹರಾಜಿನ ಅಂತಿಮ ಪಟ್ಟಿಯಲ್ಲಿ 119 ಭಾರತೀಯ ಹಾಗೂ 27 ವಿದೇಶಿ ಆಟಗಾರ್ತಿಯರಿದ್ದಾರೆ (ಇದರಲ್ಲಿ ಅಸೋಸಿಯೇಟ್ ದೇಶಗಳ ಆರು ಆಟಗಾರ್ತಿಯರು ಸೇರಿದ್ದಾರೆ). ಭಾರತದ 119 ಆಟಗಾರ್ತಿಯರ ಪೈಕಿ 22 ಮಂದಿ ರಾಷ್ಟ್ರೀಯ ತಂಡವನ್ನು ಪ್ರತಿನಿಧಿಸಿದ (ಕ್ಯಾಪ್ಡ್) ಆಟಗಾರ್ತಿಯರಾಗಿದ್ದರೆ, ಉಳಿದ 97 ಮಂದಿ ಅನ್‌ಕ್ಯಾಪ್ಡ್ ಆಟಗಾರ್ತಿಯರಾಗಿದ್ದಾರೆ. ಅಂತೆಯೇ, ವಿದೇಶಿ ಪಟ್ಟಿಯಲ್ಲಿ 14 ಕ್ಯಾಪ್ಡ್ ಹಾಗೂ 13 ಅನ್‌ಕ್ಯಾಪ್ಡ್ ಆಟಗಾರ್ತಿಯರು ಅದೃಷ್ಟ ಪರೀಕ್ಷೆಗೆ ಇಳಿಯಲಿದ್ದಾರೆ. ಐದು ಫ್ರಾಂಚೈಸಿಗಳ ಬಳಿ ಒಟ್ಟು 27 ಸ್ಲಾಟ್‌ಗಳು ಮಾತ್ರ ಖಾಲಿ ಇದ್ದು, ಅದರಲ್ಲಿ 20 ಸ್ಥಾನಗಳು ಭಾರತೀಯರಿಗೆ ಹಾಗೂ ಗರಿಷ್ಠ 7 ಸ್ಥಾನಗಳು ವಿದೇಶಿ ಆಟಗಾರ್ತಿಯರಿಗೆ ಮೀಸಲಾಗಿವೆ.
ಗರಿಷ್ಠ ಮೂಲಬೆಲೆ 50 ಲಕ್ಷ ರೂ.! ಕಮಲಿನಿ ಮೇಲೆ ಎಲ್ಲರ ಕಣ್ಣು
ಹರಾಜಿನಲ್ಲಿ ಇಂಗ್ಲೆಂಡ್‌ನ ಸೋಫಿಯಾ ಡಂಕ್ಲಿ ಹಾಗೂ ಆಸ್ಟ್ರೇಲಿಯಾದ ಸೋಫಿ ಮೊಲಿನೆಕ್ಸ್ ಅವರು ಗರಿಷ್ಠ 50 ಲಕ್ಷ ರೂ. ಮೂಲಬೆಲೆಯಲ್ಲಿ ಕಾಣಿಸಿಕೊಂಡಿದ್ದಾರೆ. ಇನ್ನು ಭಾರತದ ಭರವಸೆಯ ಆಟಗಾರ್ತಿ ಜಿ. ಕಮಲಿನಿ, ಕಿರಣ್ ನವಗಿರೆ, ಆಸ್ಟ್ರೇಲಿಯಾದ ಹೆದರ್ ಗ್ರಹಾಂ ಹಾಗೂ ಜೆಸ್ ಜೊನಾಸೆನ್ 40 ಲಕ್ಷ ರೂ. ಮೂಲಬೆಲೆಯ ಪಟ್ಟಿಯಲ್ಲಿದ್ದಾರೆ. ಇದರ ಜೊತೆಗೆ 30ಕ್ಕೂ ಹೆಚ್ಚು ಆಟಗಾರ್ತಿಯರು 30 ಲಕ್ಷ ರೂ. ಮೂಲಬೆಲೆಯನ್ನು ಹೊಂದಿದ್ದಾರೆ. ಈ ಹಿಂದೆ ಮುಂಬೈ ಇಂಡಿಯನ್ಸ್ ತಂಡದಲ್ಲಿದ್ದ ಕಮಲಿನಿ ಅವರನ್ನು ತಂಡ ಬಿಡುಗಡೆ ಮಾಡಿದ್ದು, ಇದೀಗ ಅವರ ಮೇಲೆ ಉಳಿದ ಫ್ರಾಂಚೈಸಿಗಳು ಕಣ್ಣಿಟ್ಟಿರುವುದು ಕುತೂಹಲ ಮೂಡಿಸಿದೆ.
ತಂತ್ರ ಹೆಣೆಯಲಿರುವ ಫ್ರಾಂಚೈಸಿಗಳು
ಅಕ್ಟೋಬರ್ 28ರಂದು ಸಂಜೆ 5:30ಕ್ಕೆ ಕೊಚ್ಚಿಯಲ್ಲಿ ಹರಾಜು ಪ್ರಕ್ರಿಯೆ ಆರಂಭವಾಗಲಿದೆ. ಲಭ್ಯವಿರುವುದು ಕೇವಲ 27 ಸ್ಥಾನಗಳಾಗಿದ್ದರೂ, ಪೈಪೋಟಿಯಲ್ಲಿ 146 ಆಟಗಾರ್ತಿಯರಿರುವುದರಿಂದ ಫ್ರಾಂಚೈಸಿಗಳು ಬಹಳ ಎಚ್ಚರಿಕೆಯ ಹಾಗೂ ತಂತ್ರಗಾರಿಕೆಯ ಹೆಜ್ಜೆ ಇಡಬೇಕಿದೆ. 2027ರ ಸೀಸನ್‌ಗಾಗಿ ತಮ್ಮ ತಂಡಗಳನ್ನು ಮತ್ತಷ್ಟು ಬಲಿಷ್ಠಗೊಳಿಸಲು ಮಾಲೀಕರು ಯುವ ಹಾಗೂ ಅನುಭವಿ ಆಟಗಾರ್ತಿಯರ ಸಮತೋಲನ ಕಾಯ್ದುಕೊಳ್ಳುವತ್ತ ಗಮನಹರಿಸುವುದು ಖಚಿತವಾಗಿದೆ. ಅನ್‌ಕ್ಯಾಪ್ಡ್ ವಿಭಾಗದಲ್ಲಿ ವೃಂದಾ ದಿನೇಶ್, ಶ್ವೇತಾ ಸೆಹ್ರಾವತ್, ದಿಶಾ ಕಸತ್ ಮುಂತಾದ ಪ್ರತಿಭಾವಂತ ಆಟಗಾರ್ತಿಯರು ಕನಿಷ್ಠ 10 ಲಕ್ಷ ರೂ. ಮೂಲಬೆಲೆಯಲ್ಲಿ ಕಾಣಿಸಿಕೊಂಡಿದ್ದು, ಇವರ ಖರೀದಿಗೆ ಭಾರೀ ಪೈಪೋಟಿ ಏರ್ಪಡುವ ಸಾಧ್ಯತೆಯಿದೆ.
ಇದನ್ನೂ ಓದಿ:2027ರ ಏಕದಿನ ವಿಶ್ವಕಪ್‌ವರೆಗೆ ಬುಮ್ರಾ ಮೂರೂ ಮಾದರಿ ಆಡುವಂತಿಲ್ಲ:BCCIಗೆ ರವಿಶಾಸ್ತ್ರಿ ಖಡಕ್ ಎಚ್ಚರಿಕೆ
