ಟೆಹ್ರಾನ್ : ಮಧ್ಯಪ್ರಾಚ್ಯ ಯುದ್ಧದ ವೇಳೆ ಹೊರ್ಮುಜ್ ಜಲಸಂಧಿಯನ್ನು ಮುಚ್ಚುವ ಮೂಲಕ ಜಗತ್ತಿಗೆ ತೈಲ ಮತ್ತು ಇಂಧನದ ಆಘಾತ ನೀಡಿದ್ದ ಇರಾನ್, ಇದೀಗ ಜಾಗತಿಕ ಡಿಜಿಟಲ್ ಲೋಕದ ಮರ್ಮಸ್ಥಾನಕ್ಕೆ ಕೈಹಾಕಲು ಸಜ್ಜಾಗಿದೆ. ಹೊರ್ಮುಜ್ ಜಲಸಂಧಿಯ ಸಮುದ್ರದಾಳದಲ್ಲಿ ಹಾದುಹೋಗಿರುವ ಅಂತಾರಾಷ್ಟ್ರೀಯ ಸಬ್ಸೀ (ಜಲಾಂತರ್ಗಾಮಿ) ಇಂಟರ್ನೆಟ್ ಕೇಬಲ್ಗಳ ಮೇಲೆ ನಿಯಂತ್ರಣ ಸಾಧಿಸಲು ಟೆಹ್ರಾನ್ ಮುಂದಾಗಿದೆ.
ಈ ಜಲಸಂಧಿಯ ಮೂಲಕ ಹಾದುಹೋಗುವ ಸಬ್ಸೀ ಕೇಬಲ್ಗಳ ಬಳಕೆಗಾಗಿ ಜಾಗತಿಕ ತಂತ್ರಜ್ಞಾನ ದೈತ್ಯರಾದ ಗೂಗಲ್, ಮೈಕ್ರೋಸಾಫ್ಟ್, ಮೆಟಾ ಮತ್ತು ಅಮೆಜಾನ್ನಂತಹ ಕಂಪನಿಗಳಿಗೆ ಭಾರಿ ಪ್ರಮಾಣದ ಪರವಾನಗಿ ಶುಲ್ಕ ವಿಧಿಸಲು ಇರಾನ್ ಸರ್ಕಾರ ಯೋಜಿಸುತ್ತಿದೆ ಎಂದು ಅಲ್ಲಿನ ಸರ್ಕಾರಿ ಮಾಧ್ಯಮಗಳು ವರದಿ ಮಾಡಿವೆ. ಒಂದು ವೇಳೆ ಕಂಪನಿಗಳು ಈ ಶುಲ್ಕ ಪಾವತಿಸಲು ನಿರಾಕರಿಸಿದರೆ ಜಾಗತಿಕ ಇಂಟರ್ನೆಟ್ ಸಂಚಾರಕ್ಕೆ ಅಡ್ಡಿಪಡಿಸುವುದಾಗಿ ಇರಾನ್ ಎಚ್ಚರಿಕೆ ನೀಡಿದೆ.
ಈ ಕುರಿತು ಸಾಮಾಜಿಕ ಜಾಲತಾಣ ‘ಎಕ್ಸ್’ನಲ್ಲಿ ಪೋಸ್ಟ್ ಮಾಡಿರುವ ಇರಾನ್ ಸೇನೆಯ ವಕ್ತಾರ ಇಬ್ರಾಹಿಂ ಜೊಲ್ಫಾಘರಿ, “ನಾವು ಇಂಟರ್ನೆಟ್ ಕೇಬಲ್ಗಳ ಮೇಲೆ ಶುಲ್ಕ ವಿಧಿಸಲಿದ್ದೇವೆ” ಎಂದು ಸ್ಪಷ್ಟಪಡಿಸಿದ್ದಾರೆ. ಇರಾನ್ನ ರೆವಲ್ಯೂಷನರಿ ಗಾರ್ಡ್ಸ್ಗೆ ನಿಕಟವಾಗಿರುವ ಮಾಧ್ಯಮಗಳ ಪ್ರಕಾರ, ವಿದೇಶಿ ತಂತ್ರಜ್ಞಾನ ಸಂಸ್ಥೆಗಳು ಇರಾನ್ ಕಾನೂನುಗಳಿಗೆ ಬದ್ಧವಾಗಿರಬೇಕು ಮತ್ತು ಈ ಕೇಬಲ್ಗಳ ದುರಸ್ತಿ ಹಾಗೂ ನಿರ್ವಹಣೆಯ ಸಂಪೂರ್ಣ ಹಕ್ಕನ್ನು ಇರಾನ್ ಕಂಪನಿಗಳಿಗೇ ವಹಿಸಿಕೊಡಬೇಕಾಗುತ್ತದೆ. ಆದರೆ, ಅಮೆರಿಕದ ದಿಗ್ಬಂಧನಗಳ ಕಾರಣದಿಂದಾಗಿ ಅಮೆರಿಕನ್ ಕಂಪನಿಗಳು ಇರಾನ್ಗೆ ಯಾವುದೇ ಹಣ ಪಾವತಿಸುವಂತಿಲ್ಲ. ಹೀಗಾಗಿ ಇರಾನ್ ಈ ನಿಯಮವನ್ನು ಹೇಗೆ ಜಾರಿಗೆ ತರಲಿದೆ ಎಂಬುದು ಸದ್ಯಕ್ಕೆ ಯಕ್ಷಪ್ರಶ್ನೆಯಾಗಿದೆ.
ಭಾರತದ ಮೇಲೇನು ಪರಿಣಾಮ?
ವಿಶ್ವದ ಒಟ್ಟಾರೆ ಇಂಟರ್ನೆಟ್ ಮತ್ತು ದತ್ತಾಂಶ (ಡೇಟಾ) ಸಂಚಾರದ ಬಹುಪಾಲು ಭಾಗ ಇಂತಹ ಸಮುದ್ರದಾಳದ ಕೇಬಲ್ಗಳ ಮೂಲಕವೇ ನಡೆಯುತ್ತದೆ. ಇರಾನ್ನ ಈ ಹಠಾತ್ ನಿರ್ಧಾರದಿಂದಾಗಿ ಬ್ಯಾಂಕಿಂಗ್ ವ್ಯವಸ್ಥೆ, ಮಿಲಿಟರಿ ಸಂವಹನ, ಕೃತಕ ಬುದ್ಧಿಮತ್ತೆ (AI), ಹಣಕಾಸು ಮಾರುಕಟ್ಟೆಗಳು ಮತ್ತು ಅಂತಾರಾಷ್ಟ್ರೀಯ ಹಣ ವರ್ಗಾವಣೆ ಪ್ರಕ್ರಿಯೆಗಳು ಸಂಪೂರ್ಣವಾಗಿ ಸ್ತಬ್ಧಗೊಳ್ಳುವ ಭೀತಿ ಎದುರಾಗಿದೆ.
ಭದ್ರತಾ ಕಾರಣಗಳಿಂದಾಗಿ ಅಂತಾರಾಷ್ಟ್ರೀಯ ಕೇಬಲ್ ಆಪರೇಟರ್ಗಳು ಈ ಹಿಂದೆ ಒಮಾನ್ ದೇಶದ ಕಡೆಯಿರುವ ಕಿರಿದಾದ ಜಲಮಾರ್ಗದ ಮೂಲಕ ಕೇಬಲ್ಗಳನ್ನು ಅಳವಡಿಸಿದ್ದರು. ಆದಾಗ್ಯೂ, ‘ಫಾಲ್ಕನ್’ ಮತ್ತು ‘ಗಲ್ಫ್ ಬ್ರಿಡ್ಜ್ ಇಂಟರ್ನ್ಯಾಷನಲ್’ ಎಂಬ ಎರಡು ಪ್ರಮುಖ ಕೇಬಲ್ಗಳು ಇರಾನ್ನ ಪ್ರಾದೇಶಿಕ ಜಲಗಡಿಯಲ್ಲಿ ಹಾದುಹೋಗುತ್ತವೆ ಎಂದು ದೂರಸಂಪರ್ಕ ಸಂಶೋಧನಾ ಸಂಸ್ಥೆ ‘ಟೆಲಿಜಿಯೋಗ್ರಫಿ’ ತಿಳಿಸಿದೆ. ಇರಾನ್ ಏನಾದರೂ ಈ ಕೇಬಲ್ಗಳಿಗೆ ಹಾನಿ ಉಂಟುಮಾಡಿದರೆ, ಭಾರತದ ಇಂಟರ್ನೆಟ್ ಟ್ರಾಫಿಕ್ನ ಬಹುದೊಡ್ಡ ಭಾಗದ ಮೇಲೆ ತೀವ್ರ ಪರಿಣಾಮ ಬೀರಲಿದೆ. ಜೊತೆಗೆ ಸಿಂಗಾಪುರದಂತಹ ಏಷ್ಯಾದ ಪ್ರಮುಖ ಡೇಟಾ ಹಬ್ಗಳು ಮತ್ತು ಯುರೋಪ್ ನಡುವಿನ ಸಂಪರ್ಕ ಕಡಿತಗೊಂಡು, ಪೂರ್ವ ಆಫ್ರಿಕಾದ ಹಲವು ದೇಶಗಳಲ್ಲಿ ಇಂಟರ್ನೆಟ್ ಬ್ಲ್ಯಾಕೌಟ್ ಸಂಭವಿಸುವ ಸಾಧ್ಯತೆಯಿದೆ.
ಇರಾನ್ ವಾದವೇನು?
ತಾನು ವಿಧಿಸಲು ಹೊರಟಿರುವ ಶುಲ್ಕವು 1982ರ ವಿಶ್ವಸಂಸ್ಥೆಯ ಸಮುದ್ರ ಕಾನೂನು ಒಪ್ಪಂದಕ್ಕೆ (UNCLOS) ಅನುಗುಣವಾಗಿದೆ ಎಂದು ಇರಾನ್ ಮಾಧ್ಯಮಗಳು ಸಮರ್ಥಿಸಿಕೊಳ್ಳುತ್ತಿವೆ. ಈ ಒಪ್ಪಂದದ 79ನೇ ವಿಧಿಯ ಪ್ರಕಾರ, ಕರಾವಳಿ ರಾಷ್ಟ್ರಗಳು ತಮ್ಮ ಪ್ರಾದೇಶಿಕ ಜಲಗಡಿಯಲ್ಲಿ ಹಾದುಹೋಗುವ ಕೇಬಲ್ಗಳು ಅಥವಾ ಪೈಪ್ಲೈನ್ಗಳಿಗೆ ಷರತ್ತುಗಳನ್ನು ವಿಧಿಸುವ ಹಕ್ಕನ್ನು ಹೊಂದಿರುತ್ತವೆ. ಆದರೆ ಇಲ್ಲಿ ಗಮನಿಸಬೇಕಾದ ಅಂಶವೆಂದರೆ, ಇರಾನ್ ಈ ಒಪ್ಪಂದಕ್ಕೆ ಸಹಿ ಹಾಕಿದ್ದರೂ ಅದನ್ನು ಇಂದಿಗೂ ಅಧಿಕೃತವಾಗಿ ಅಂಗೀಕರಿಸಿಲ್ಲ.
ತನ್ನ ವಾದಕ್ಕೆ ಈಜಿಪ್ಟ್ ದೇಶದ ಉದಾಹರಣೆ ನೀಡಿರುವ ಇರಾನ್, ಸುಯೆಜ್ ಕಾಲುವೆಯ ಮೂಲಕ ಹಾದುಹೋಗುವ ಸಬ್ಸೀ ಕೇಬಲ್ಗಳಿಗೆ ಈಜಿಪ್ಟ್ ಶುಲ್ಕ ವಸೂಲಿ ಮಾಡುತ್ತಿರುವುದನ್ನು ಎತ್ತಿ ತೋರಿಸಿದೆ. ಆದರೆ ಸುಯೆಜ್ ಕಾಲುವೆಯು ಈಜಿಪ್ಟ್ ಭೂಭಾಗದಲ್ಲಿ ನಿರ್ಮಿಸಲಾದ ಕೃತಕ ಜಲಮಾರ್ಗವಾಗಿದ್ದರೆ, ಹೊರ್ಮುಜ್ ಜಲಸಂಧಿಯು ನೈಸರ್ಗಿಕ ಜಲಮಾರ್ಗವಾಗಿದೆ. ಹಾಗಾಗಿ ಇವೆರಡನ್ನೂ ಹೋಲಿಸಲು ಬರುವುದಿಲ್ಲ ಎಂದು ಜಾಗತಿಕ ಕಾನೂನು ತಜ್ಞರು ಅಭಿಪ್ರಾಯಪಟ್ಟಿದ್ದಾರೆ. ಒಂದು ವೇಳೆ ಇರಾನ್ ಸಮುದ್ರದಾಳದಲ್ಲಿ ಕೇಬಲ್ ದುರಸ್ತಿ ಮಾಡುವ ಹಡಗುಗಳ ಮೇಲೆ ದಾಳಿ ನಡೆಸಿದರೆ, ಜಾಗತಿಕ ಡಿಜಿಟಲ್ ಸಂಪರ್ಕ ಕೊಂಡಿ ಸಂಪೂರ್ಣವಾಗಿ ಕಳಚಿಕೊಳ್ಳುವ ಆತಂಕ ಎದುರಾಗಿದೆ.
ಇದನ್ನೂ ಓದಿ : “ಕನ್ಯೆಯ ಮೌನವೇ ಮದುವೆಗೆ ಸಮ್ಮತಿ” : ಅಫ್ಘನ್ ತಾಲಿಬಾನ್ ಸರ್ಕಾರದಿಂದ ಬಾಲ್ಯವಿವಾಹ ಕಾನೂನುಬದ್ಧ!
