ಮೆಲ್ಬೋರ್ನ್ : ಆಸ್ಟ್ರೇಲಿಯಾದ ಅಡಿಲೇಡ್ನಲ್ಲಿ ಭಾರತೀಯ ಮೂಲದ ಮಸಾಜ್ ಥೆರಪಿಸ್ಟ್ ಒಬ್ಬ ಗ್ರಾಹಕರಾಗಿ ಬರುತ್ತಿದ್ದ 61 ಮಹಿಳೆಯರ ಮೇಲೆ ಲೈಂಗಿಕ ದೌರ್ಜನ್ಯ ಎಸಗಿರುವ ಘಟನೆ ಬೆಳಕಿಗೆ ಬಂದಿದೆ. ಮಸಾಜ್ ಪಾರ್ಲರ್ ನೆಪದಲ್ಲಿ ಮಹಿಳೆಯರ ನಂಬಿಕೆಯನ್ನು ದುರುಪಯೋಗಪಡಿಸಿಕೊಂಡು ವಿಕೃತಿ ಮೆರೆದಿದ್ದ ಆರೋಪಿಗೆ ಸ್ಥಳೀಯ ನ್ಯಾಯಾಲಯವು 13 ವರ್ಷ 10 ತಿಂಗಳ ಸುದೀರ್ಘ ಜೈಲು ಶಿಕ್ಷೆ ವಿಧಿಸಿದೆ. ಆರೋಪಿಯ ವರ್ತನೆಯು “ಮಿತಿಮೀರಿದ” ಮತ್ತು “ಶೋಷಣಾತ್ಮಕ” ಪ್ರವೃತ್ತಿಯಿಂದ ಕೂಡಿತ್ತು ಎಂದು ನ್ಯಾಯಾಧೀಶರು ತೀವ್ರವಾಗಿ ತರಾಟೆಗೆ ತೆಗೆದುಕೊಂಡಿದ್ದಾರೆ.
9 ತಿಂಗಳಲ್ಲಿ 97 ಅಪರಾಧ ಕೃತ್ಯಗಳು
ದೂರಿನ ಅನ್ವಯ ಬಂಧಿತನಾಗಿರುವ 39 ವರ್ಷದ ಸುಮಿತ್ ಸತೀಶ್ ರಸ್ತೋಗಿ, 2011ರಲ್ಲಿ ದೆಹಲಿಯಿಂದ ಆಸ್ಟ್ರೇಲಿಯಾದ ಅಡಿಲೇಡ್ಗೆ ವಲಸೆ ಹೋಗಿದ್ದ. ಅಡಿಲೇಡ್ನ ಗ್ಲೆನೆಲ್ಗ್ ಉಪನಗರದಲ್ಲಿರುವ ಮಸಾಜ್ ಕೇಂದ್ರವೊಂದರಲ್ಲಿ ಯಾವುದೇ ಅಧಿಕೃತ ಅರ್ಹತೆ ಇಲ್ಲದಿದ್ದರೂ ಈತ ಮಸಾಜ್ ಥೆರಪಿಸ್ಟ್ ಆಗಿ ಕೆಲಸ ಮಾಡುತ್ತಿದ್ದ. ಅಕ್ಟೋಬರ್ 2021ರಿಂದ ಜುಲೈ 2022ರ ನಡುವಿನ ಕೇವಲ 9 ತಿಂಗಳ ಅವಧಿಯಲ್ಲಿ ಈತ ಮಹಿಳೆಯರ ಮೇಲೆ ನಿರಂತರ ದೌರ್ಜನ್ಯ ಎಸಗಿದ್ದಾನೆ. ತನ್ನ ಮೇಲಿನ 55 ರಹಸ್ಯ ವಿಡಿಯೋ ಚಿತ್ರೀಕರಣ ಹಾಗೂ 42 ಗಂಭೀರ ಲೈಂಗಿಕ ದೌರ್ಜನ್ಯದ ಪ್ರಕರಣಗಳು ಸೇರಿದಂತೆ ಒಟ್ಟು 97 ಅಪರಾಧಗಳ ಆರೋಪವನ್ನು ಆತ ನ್ಯಾಯಾಲಯದ ಮುಂದೆ ಒಪ್ಪಿಕೊಂಡಿದ್ದಾನೆ.
ನಿಯಂತ್ರಣ ತಪ್ಪಿದ್ದ ಕಾಮುಕನ ವಿಕೃತಿ
ದಕ್ಷಿಣ ಆಸ್ಟ್ರೇಲಿಯಾ ಜಿಲ್ಲಾ ನ್ಯಾಯಾಲಯದ ನ್ಯಾಯಾಧೀಶರಾದ ಕಾರ್ಮೆನ್ ಮಟ್ಟೆಯೊ ಅವರು ಮೂರು ಗಂಟೆಗಳ ಕಾಲ ವಿಚಾರಣೆ ನಡೆಸಿದರು. ಈ ವೇಳೆ ಮಾತನಾಡಿದ ಅವರು, ಸುರಕ್ಷತೆ, ಗೌರವ ಮತ್ತು ಘನತೆಯನ್ನು ನಿರೀಕ್ಷಿಸಿ ನಂಬಿಕೆಯಿಂದ ಬರುತ್ತಿದ್ದ ಮಹಿಳೆಯರನ್ನು ರಸ್ತೋಗಿ ಅತ್ಯಂತ ಕ್ರೂರವಾಗಿ ಬಳಸಿಕೊಂಡಿದ್ದಾನೆ ಎಂದು ಬೇಸರ ವ್ಯಕ್ತಪಡಿಸಿದರು. ಆರಂಭದಲ್ಲಿ ಸಣ್ಣದಾಗಿ ಶುರುವಾದ ಈತನ ವಿಕೃತಿ, ದಿನಕಳೆದಂತೆ ಧೈರ್ಯ ಹೆಚ್ಚಾಗಿ ಮಹಿಳೆಯರ ಒಳ ಉಡುಪುಗಳೊಂದಿಗೆ ಆಟವಾಡುವ ಹಾಗೂ ಅವರ ಖಾಸಗಿ ದೃಶ್ಯಗಳನ್ನು ರಹಸ್ಯವಾಗಿ ಕ್ಯಾಮೆರಾದಲ್ಲಿ ಸೆರೆಹಿಡಿಯುವ ಮಟ್ಟಿಗೆ ಬೆಳೆದಿತ್ತು. ಜುಲೈ 2022 ರಲ್ಲಿ ಸಿಕ್ಕಿಬೀಳುವವರೆಗೂ ಈತನ ವಿಕೃತಿ ನಿಯಂತ್ರಣ ಮೀರಿತ್ತು ಎಂದು ನ್ಯಾಯಾಧೀಶರು ಅಭಿಪ್ರಾಯಪಟ್ಟಿದ್ದಾರೆ.
ಸಂತ್ರಸ್ತ ಮಹಿಳೆಯರ ಜೀವಮಾನದ ಆಘಾತ
ಈ ಘಟನೆಯಿಂದ ನೊಂದ ಹಲವು ಮಹಿಳೆಯರು ತಮಗಾದ ಮಾನಸಿಕ ಆಘಾತವನ್ನು ನ್ಯಾಯಾಲಯದ ಮುಂದೆ ಹಂಚಿಕೊಂಡಿದ್ದಾರೆ. ಸಂತ್ರಸ್ತೆಯೊಬ್ಬರು ಮಾತನಾಡಿ, ತಮ್ಮ ಹನಿಮೂನ್ ಅವಧಿಯಲ್ಲಿ ಈ ಘಟನೆ ನಡೆದಿದ್ದು, ಜೀವನದ ಅತ್ಯಂತ ಸುಂದರ ದಿನಗಳು ಈಗ ಕಹಿ ನೆನಪಾಗಿ ಕಾಡುತ್ತಿವೆ ಎಂದಿದ್ದಾರೆ. ಈ ಘಟನೆಯ ನಂತರ ತಮಗೆ ಯಾವುದೇ ಪುರುಷ ವೈದ್ಯರು ಅಥವಾ ಫಿಸಿಯೋಥೆರಪಿಸ್ಟ್ಗಳನ್ನು ನಂಬಲು ಸಾಧ್ಯವಾಗುತ್ತಿಲ್ಲ ಎಂದು ಅಳಲು ತೋಡಿಕೊಂಡಿದ್ದಾರೆ. ಮತ್ತೊಬ್ಬ ಮಹಿಳೆ ಸುದೀರ್ಘ ನ್ಯಾಯಾಂಗ ಪ್ರಕ್ರಿಯೆಯನ್ನು ಟೀಕಿಸಿದ್ದು, ಘಟನೆ ನಡೆದು 1,271 ದಿನಗಳ ನಂತರ ಶಿಕ್ಷೆಯಾಗುತ್ತಿರುವುದು ಬೇಸರ ತಂದಿದೆ ಎಂದಿದ್ದಾರೆ. ನ್ಯಾಯಾಲಯದ ಆವರಣದ ಹೊರಗೆ ಮಾತನಾಡಿದ ಮಹಿಳೆಯರು, ಯಾವುದೇ ಸಂದರ್ಭದಲ್ಲಿ ತಪ್ಪು ಎನಿಸಿದರೆ ಮಹಿಳೆಯರು ಸುಮ್ಮನಿರಬಾರದು ಎಂದು ಕರೆ ನೀಡಿದ್ದಾರೆ.
ವಾಯುರಿಸ್ಟಿಕ್ ಡಿಸಾರ್ಡರ್
ಮನೋವೈದ್ಯರ ತಪಾಸಣೆ ವೇಳೆ ರಸ್ತೋಗಿ ‘ವಾಯುರಿಸ್ಟಿಕ್ ಡಿಸಾರ್ಡರ್’ (ಅರೆನಗ್ನ ಮಹಿಳೆಯರನ್ನು ರಹಸ್ಯವಾಗಿ ನೋಡಿ ಲೈಂಗಿಕ ತೃಪ್ತಿ ಪಡುವ ಕಾಯಿಲೆ) ಎಂಬ ಮಾನಸಿಕ ಸಮಸ್ಯೆಯಿಂದ ಬಳಲುತ್ತಿದ್ದಾನೆ ಎಂಬುದು ದೃಢಪಟ್ಟಿದೆ. ಆದರೆ ಇದು ಆತನ ಅಪರಾಧದ ತೀವ್ರತೆಯನ್ನು ಕಡಿಮೆ ಮಾಡುವುದಿಲ್ಲ ಎಂದು ನ್ಯಾಯಾಲಯ ಹೇಳಿದೆ. ಸದ್ಯ ನ್ಯಾಯಾಲಯವು ಆತನಿಗೆ 13 ವರ್ಷ 10 ತಿಂಗಳ ಜೈಲು ಶಿಕ್ಷೆ ವಿಧಿಸಿದ್ದು, ಕನಿಷ್ಠ 10 ವರ್ಷ 10 ತಿಂಗಳ ಕಾಲ ಆತನಿಗೆ ಯಾವುದೇ ಪೆರೋಲ್ ಸಿಗುವುದಿಲ್ಲ. 2035ರ ನಂತರವಷ್ಟೇ ಆತ ಪೆರೋಲ್ಗೆ ಅರ್ಹನಾಗಲಿದ್ದಾನೆ. ಜೈಲು ಶಿಕ್ಷೆಯ ಅವಧಿ ಪೂರ್ಣಗೊಂಡ ನಂತರ ಆತನನ್ನು ಆಸ್ಟ್ರೇಲಿಯಾದಿಂದ ಭಾರತಕ್ಕೆ ಗಡಿಪಾರು ಮಾಡುವ ಸಾಧ್ಯತೆಯಿದೆ ಎಂದು ಕಾನೂನು ಮೂಲಗಳು ತಿಳಿಸಿವೆ.
ಇದನ್ನೂ ಓದಿ : ಬುಮ್ರಾ ಬೆನ್ನಿಗೆ ಬಿಸಿಸಿಐ ಬಲಿಷ್ಠ ಪ್ಲಾನ್ ; ವಿಶೇಷ ‘ವರ್ಕ್ಲೋಡ್ ಮ್ಯಾನೇಜ್ಮೆಂಟ್’ ಜಾರಿ!
