ವಾಷಿಂಗ್ಟನ್: ಐಸಿಸ್ (ಇಸ್ಲಾಮಿಕ್ ಸ್ಟೇಟ್) ಉಗ್ರ ಸಂಘಟನೆಗೆ ಬಹುದೊಡ್ಡ ಹೊಡೆತ ನೀಡಿರುವ ಅಮೆರಿಕ ಮತ್ತು ನೈಜೀರಿಯಾ ಪಡೆಗಳು ಐಸಿಸ್ನ ಜಾಗತಿಕ ಮಟ್ಟದ ಎರಡನೇ ಪ್ರಮುಖ ನಾಯಕ ಅಬು-ಬಿಲಾಲ್ ಅಲ್-ಮಿನುಕಿಯನ್ನು ಹೊಡೆದುರುಳಿಸಿವೆ. ಈ ಜಂಟಿ ಕಾರ್ಯಾಚರಣೆಯು ಯಶಸ್ವಿಯಾಗಿ ಮುಕ್ತಾಯವಾಗಿದೆ ಎಂದು ಸ್ವತಃ ಅಮೆರಿಕ ಅಧ್ಯಕ್ಷ ಡೊನಾಲ್ಡ್ ಟ್ರಂಪ್ ಅವರೇ ಘೋಷಿಸಿದ್ದಾರೆ.
ಈ ಕುರಿತು ತಮ್ಮ ‘ಟ್ರುತ್ ಸೋಶಿಯಲ್’ ಜಾಲತಾಣದಲ್ಲಿ ಮಾಹಿತಿ ಹಂಚಿಕೊಂಡಿರುವ ಅವರು, “ನನ್ನ ನೇರ ಮಾರ್ಗದರ್ಶನದಲ್ಲಿ ಅಮೆರಿಕದ ದಿಟ್ಟ ಸೈನಿಕರು ಮತ್ತು ನೈಜೀರಿಯಾದ ಸಶಸ್ತ್ರ ಪಡೆಗಳು ಅತ್ಯಂತ ಸಂಕೀರ್ಣ ಹಾಗೂ ನಿಖರವಾದ ಜಂಟಿ ಕಾರ್ಯಾಚರಣೆ ನಡೆಸಿವೆ. ವಿಶ್ವದ ಅತ್ಯಂತ ಸಕ್ರಿಯ ಉಗ್ರನನ್ನು ಯುದ್ಧಭೂಮಿಯಿಂದ ಸಂಪೂರ್ಣವಾಗಿ ನಿರ್ಮೂಲನೆ ಮಾಡಲಾಗಿದೆ” ಎಂದು ತಿಳಿಸಿದ್ದಾರೆ.
ಆಫ್ರಿಕಾದಲ್ಲಿ ಅಡಗಿದ್ದ ಉಗ್ರನಿಗೆ ಜಂಟಿ ಆಪರೇಷನ್ ಶಾಕ್
ಐಸಿಸ್ ಸಂಘಟನೆಯಲ್ಲಿ ಅತ್ಯಂತ ಪ್ರಭಾವಿ ಹುದ್ದೆಯಲ್ಲಿದ್ದ ಅಬು-ಬಿಲಾಲ್, ಆಫ್ರಿಕಾ ಖಂಡದಲ್ಲಿ ತಲೆಮರೆಸಿಕೊಂಡು ಸಂಘಟನೆಯ ಜಾಲವನ್ನು ವಿಸ್ತರಿಸಲು ಯತ್ನಿಸುತ್ತಿದ್ದ. “ಅವನು ಆಫ್ರಿಕಾದಲ್ಲಿ ಅಡಗಿಕೊಂಡಿರಬಹುದು ಎಂದು ಭಾವಿಸಿದ್ದ, ಆದರೆ ಆತನ ಪ್ರತಿಯೊಂದು ಚಲನವಲನದ ಬಗ್ಗೆ ನಮ್ಮ ಆಪ್ತ ಮೂಲಗಳು ನಿರಂತರವಾಗಿ ಮಾಹಿತಿ ನೀಡುತ್ತಿದ್ದವು ಎಂಬುದು ಆತನಿಗೆ ತಿಳಿದಿರಲಿಲ್ಲ” ಎಂದು ಟ್ರಂಪ್ ಹೇಳಿದ್ದಾರೆ. ಈ ಯಶಸ್ವಿ ಜಂಟಿ ಕಾರ್ಯಾಚರಣೆಗಾಗಿ ನೈಜೀರಿಯಾ ಸರ್ಕಾರಕ್ಕೆ ಟ್ರಂಪ್ ಧನ್ಯವಾದಗಳನ್ನು ಅರ್ಪಿಸಿದ್ದಾರೆ. ಅಬು-ಬಿಲಾಲ್ ಹತ್ಯೆಯಿಂದಾಗಿ ಐಸಿಸ್ನ ಜಾಗತಿಕ ಕಾರ್ಯಾಚರಣೆಯ ಸಾಮರ್ಥ್ಯಕ್ಕೆ ಭಾರಿ ಹಿನ್ನಡೆಯಾಗಿದೆ ಎಂದು ವಿಶ್ಲೇಷಿಸಲಾಗಿದೆ.
ಯಾರು ಈ ಅಬು-ಬಿಲಾಲ್ ಅಲ್-ಮಿನುಕಿ?
ಹತ್ಯೆಗೀಡಾದ ಅಬು-ಬಿಲಾಲ್ ಐಸಿಸ್ನ ಜಾಗತಿಕ ಆಡಳಿತ ಮಂಡಳಿಯಾದ ‘ಜನರಲ್ ಡೈರೆಕ್ಟರೇಟ್ ಆಫ್ ಪ್ರಾವಿನ್ಸಸ್’ನ (ವಿವಿಧ ಪ್ರಾಂತ್ಯಗಳ ಪ್ರಧಾನ ನಿರ್ದೇಶನಾಲಯ) ಪ್ರಮುಖ ಭಾಗವಾಗಿದ್ದ. ಜಗತ್ತಿನಾದ್ಯಂತ ಐಸಿಸ್ ಜಾಲಕ್ಕೆ ಆರ್ಥಿಕ ನೆರವು ಮತ್ತು ಕಾರ್ಯಾಚರಣೆಯ ಮಾರ್ಗಸೂಚಿಗಳನ್ನು ಒದಗಿಸುವ ಜವಾಬ್ದಾರಿ ಈತನ ಮೇಲಿತ್ತು. ಪಶ್ಚಿಮ ಆಫ್ರಿಕಾ ಮತ್ತು ಸಾಹೆಲ್ ಪ್ರದೇಶದಲ್ಲಿ ಭಯೋತ್ಪಾದಕ ಚಟುವಟಿಕೆಗಳನ್ನು ಮುನ್ನಡೆಸುತ್ತಿದ್ದ ಹಿನ್ನೆಲೆಯಲ್ಲಿ, ಅಮೆರಿಕದ ವಿದೇಶಾಂಗ ಇಲಾಖೆಯು 2023ರಲ್ಲಿಯೇ ಈತನನ್ನು ‘ಜಾಗತಿಕ ಭಯೋತ್ಪಾದಕ’ ಎಂದು ಘೋಷಿಸಿ ನಿರ್ಬಂಧಗಳನ್ನು ಹೇರಿತ್ತು.
ನೈಜೀರಿಯಾದಲ್ಲಿ ಹೆಚ್ಚಿದ ಅಮೆರಿಕದ ಹಸ್ತಕ್ಷೇಪ
ಕಳೆದ ಕೆಲವು ವರ್ಷಗಳಿಂದ ನೈಜೀರಿಯಾ ಸರ್ಕಾರವು ಸ್ಥಳೀಯ ಇಸ್ಲಾಮಿಕ್ ಉಗ್ರಗಾಮಿ ಸಂಘಟನೆಗಳಾದ ಬೊಕೊ ಹರಾಮ್ ಮತ್ತು ಐಸಿಸ್ ಪ್ರೇರಿತ ಗುಂಪುಗಳಿಂದ ತೀವ್ರ ಸವಾಲನ್ನು ಎದುರಿಸುತ್ತಿದೆ. ಉಗ್ರ ನಿಗ್ರಹಕ್ಕೆ ಕಠಿಣ ಕ್ರಮ ಕೈಗೊಳ್ಳದ ಹಿನ್ನೆಲೆಯಲ್ಲಿ 2025ರ ಕೊನೆಯ ಭಾಗದಲ್ಲಿ ಅಮೆರಿಕವು ನೈಜೀರಿಯಾ ಸರ್ಕಾರದ ಮೇಲೆ ತೀವ್ರ ಒತ್ತಡ ಹೇರಿತ್ತು. ಇದರ ಬೆನ್ನಲ್ಲೇ ಕಳೆದ ವರ್ಷದ ಕ್ರಿಸ್ಮಸ್ ದಿನದಂದು ಅಮೆರಿಕ ಮತ್ತು ನೈಜೀರಿಯಾ ಜಂಟಿಯಾಗಿ ಸಾಹೆಲ್ ಪ್ರದೇಶದ ಐಸಿಸ್ ಉಗ್ರರನ್ನು ಗುರಿಯಾಗಿಸಿ ಭಾರಿ ವೈಮಾನಿಕ ದಾಳಿ ನಡೆಸಿದ್ದವು. ಸದ್ಯ ನೈಜೀರಿಯಾ ಸೇನೆಗೆ ತರಬೇತಿ ಮತ್ತು ರಕ್ಷಣಾ ನೆರವು ನೀಡಲು ನೂರಾರು ಅಮೆರಿಕನ್ ಸೈನಿಕರನ್ನು ಅಲ್ಲಿ ನಿಯೋಜಿಸಲಾಗಿದೆ.
ಆದರೆ, ಪ್ರಸ್ತುತ ಅಬು-ಬಿಲಾಲ್ ಹತ್ಯೆಗಾಗಿ ಸೈನಿಕರು ನೇರ ದಾಳಿ ನಡೆಸಿದ್ದರೇ ಅಥವಾ ವೈಮಾನಿಕ ದಾಳಿ ನಡೆಸಲಾಗಿದೆಯೇ ಮತ್ತು ಈ ಕಾರ್ಯಾಚರಣೆ ನಿಖರವಾಗಿ ಎಲ್ಲಿ ನಡೆದಿದೆ ಎಂಬ ತಾಂತ್ರಿಕ ವಿವರಗಳನ್ನು ಅಮೆರಿಕ ರಹಸ್ಯವಾಗಿಟ್ಟಿದೆ.
