ಗ್ರಾಹಕರ ನಿರೀಕ್ಷೆಯಂತೆಯೇ ಒಪ್ಪೋ ಕಂಪನಿಯು ತನ್ನ ಫ್ಲ್ಯಾಗ್ಶಿಪ್ ಸರಣಿಯ ಅತ್ಯಾಧುನಿಕ ಸ್ಮಾರ್ಟ್ಫೋನ್ ‘ಒಪ್ಪೋ ಫೈಂಡ್ ಎಕ್ಸ್ 9 ಅಲ್ಟ್ರಾ‘ (Oppo Find X9 Ultra) ಅನ್ನು ಚೀನಾದಲ್ಲಿ ಮಂಗಳವಾರ ಅಧಿಕೃತವಾಗಿ ಬಿಡುಗಡೆ ಮಾಡಿದೆ.
ಅತ್ಯಂತ ಶಕ್ತಿಶಾಲಿ ಸ್ನಾಪ್ಡ್ರಾಗನ್ ಪ್ರೊಸೆಸರ್, ಹ್ಯಾಸೆಲ್ಬ್ಲಾಡ್ ಟ್ಯೂನ್ಡ್ ಕ್ಯಾಮೆರಾ ಮತ್ತು ಬೃಹತ್ ಬ್ಯಾಟರಿ ಸಾಮರ್ಥ್ಯದೊಂದಿಗೆ ಮಾರುಕಟ್ಟೆಗೆ ಲಗ್ಗೆ ಇಟ್ಟಿರುವ ಈ ಫೋನ್, ಟೆಕ್ ಪ್ರಿಯರ ಗಮನ ಸೆಳೆಯುವಲ್ಲಿ ಯಶಸ್ವಿಯಾಗಿದೆ. ‘ಫೈಂಡ್ ಎಕ್ಸ್9’ ಸರಣಿಯಲ್ಲಿ ಈಗಾಗಲೇ ಬಿಡುಗಡೆಯಾಗಿರುವ ಎಕ್ಸ್9 ಮತ್ತು ಎಕ್ಸ್9 ಪ್ರೊ ಮಾಡೆಲ್ಗಳ ಸಾಲಿಗೆ ಈ ಹೊಸ ‘ಅಲ್ಟ್ರಾ’ ಆವೃತ್ತಿ ಸೇರ್ಪಡೆಯಾಗಿದೆ. ಸದ್ಯ ಚೀನಾದಲ್ಲಿ ಬಿಡುಗಡೆಯಾಗಿರುವ ಈ ಸ್ಮಾರ್ಟ್ಫೋನ್, ಭಾರತೀಯ ಮಾರುಕಟ್ಟೆಗೆ ಮೇ ತಿಂಗಳಲ್ಲಿ ಪ್ರವೇಶಿಸುವ ಸಾಧ್ಯತೆಯಿದೆ ಎಂದು ಕಂಪನಿ ಖಚಿತಪಡಿಸಿದೆ.
ಬೆಲೆ ಹಾಗೂ ಲಭ್ಯತೆ
ಒಪ್ಪೋ ಫೈಂಡ್ ಎಕ್ಸ್9 ಅಲ್ಟ್ರಾ ಸ್ಮಾರ್ಟ್ಫೋನ್ ಒಟ್ಟು ನಾಲ್ಕು ವೇರಿಯೆಂಟ್ಗಳಲ್ಲಿ ಗ್ರಾಹಕರಿಗೆ ಲಭ್ಯವಿದೆ. 12ಜಿಬಿ ರ್ಯಾಮ್ ಮತ್ತು 256ಜಿಬಿ ಸ್ಟೋರೇಜ್ ಸಾಮರ್ಥ್ಯದ ಮೂಲ ವೇರಿಯೆಂಟ್ ಬೆಲೆ ಚೀನಾದಲ್ಲಿ 7,499 ಯುವಾನ್ (ಭಾರತೀಯ ರೂಪಾಯಿ ಲೆಕ್ಕಾಚಾರದಲ್ಲಿ ಅಂದಾಜು 1,03,000 ರೂ.) ನಿಗದಿಯಾಗಿದೆ. ಅದೇ ರೀತಿ 12ಜಿಬಿ ರ್ಯಾಮ್ + 512ಜಿಬಿ ಸ್ಟೋರೇಜ್ ಮಾದರಿಗೆ 7,999 ಯುವಾನ್ (ಅಂದಾಜು 1,10,000 ರೂ.), 16ಜಿಬಿ ರ್ಯಾಮ್ + 512ಜಿಬಿ ಮಾದರಿಗೆ 8,499 ಯುವಾನ್ (ಅಂದಾಜು 1,17,000 ರೂ.) ಮತ್ತು ಹೈ-ಎಂಡ್ ಮಾದರಿಯಾದ 16ಜಿಬಿ ರ್ಯಾಮ್ + 1ಟಿಬಿ ಸ್ಟೋರೇಜ್ ಫೋನಿಗೆ 9,299 ಯುವಾನ್ (ಅಂದಾಜು 1,27,000 ರೂ.) ನಿಗದಿಪಡಿಸಲಾಗಿದೆ. ಇದಲ್ಲದೆ 9,499 ಯುವಾನ್ (ಅಂದಾಜು 1,30,000 ರೂ.) ಬೆಲೆಯ ವಿಶೇಷ ಆವೃತ್ತಿಯನ್ನೂ ಬಿಡುಗಡೆ ಮಾಡಲಾಗಿದೆ. ಪೋಲಾರ್ ಗ್ಲೇಸಿಯರ್, ರೊಂಗ್ಶಾ ಕ್ಯಾನ್ಯನ್ ಮತ್ತು ಟುಂಡ್ರಾ ಎಂಬ ಮೂರು ಆಕರ್ಷಕ ಬಣ್ಣಗಳಲ್ಲಿ ಇದು ಲಭ್ಯವಿದ್ದು, ಏಪ್ರಿಲ್ 24ರಿಂದ ಚೀನಾದಲ್ಲಿ ಮಾರಾಟ ಆರಂಭವಾಗಲಿದೆ.
ಡಿಸ್ಪ್ಲೇ ಮತ್ತು ಪ್ರೊಸೆಸರ್
ಈ ಹೊಸ ಸ್ಮಾರ್ಟ್ಫೋನ್ 6.82 ಇಂಚಿನ QHD+ (1,440 x 3,168 ಪಿಕ್ಸೆಲ್) ಫ್ಲೆಕ್ಸಿಬಲ್ ಅಮೋಲೆಡ್ (AMOLED) ಸ್ಕ್ರೀನ್ ಹೊಂದಿದ್ದು, 120Hz ರಿಫ್ರೆಶ್ ರೇಟ್ ಬೆಂಬಲದೊಂದಿಗೆ ಅತ್ಯುತ್ತಮ ದೃಶ್ಯಾವಳಿಗಳ ಅನುಭವ ನೀಡುತ್ತದೆ. 1,800 ನಿಟ್ಸ್ ಪೀಕ್ ಬ್ರೈಟ್ನೆಸ್ ಹಾಗೂ 10-ಬಿಟ್ ಕಲರ್ ಡೆಪ್ತ್ ಇದರ ಮತ್ತೊಂದು ವೈಶಿಷ್ಟ್ಯವಾಗಿದೆ. ಕಾರ್ಯಾಚರಣೆಗಾಗಿ ಆಂಡ್ರಾಯ್ಡ್ 16 ಆಧಾರಿತ ‘ಕಲರ್ ಓಎಸ್ 16’ ಅನ್ನು ಬಳಸಲಾಗಿದೆ. ಕಾರ್ಯಕ್ಷಮತೆಯನ್ನು ಹೆಚ್ಚಿಸಲು ಅತ್ಯಾಧುನಿಕ ಕ್ವಾಲ್ಕಾಮ್ ‘ಸ್ನಾಪ್ಡ್ರಾಗನ್ 8 ಎಲೈಟ್ ಜೆನ್ 5’ ಚಿಪ್ಸೆಟ್ ಅನ್ನು ಅಳವಡಿಸಲಾಗಿದ್ದು, 16GB ವರೆಗಿನ LPDDR5x ರ್ಯಾಮ್ ಹಾಗೂ 1TB ವರೆಗಿನ UFS 4.1 ಸ್ಟೋರೇಜ್ ಆಯ್ಕೆ ಇದರಲ್ಲಿದೆ. ಗ್ರಾಫಿಕ್ಸ್ ಬೆಂಬಲಕ್ಕಾಗಿ Adreno 840 ಜಿಪಿಯು ನೀಡಲಾಗಿದೆ.
ಕ್ಯಾಮೆರಾ ಮತ್ತು ಬ್ಯಾಟರಿ ಸಾಮರ್ಥ್ಯ
ಛಾಯಾಗ್ರಹಣ ಪ್ರಿಯರಿಗಾಗಿ ಫೈಂಡ್ ಎಕ್ಸ್9 ಅಲ್ಟ್ರಾ ಬೆರಗುಗೊಳಿಸುವ ಕ್ವಾಡ್ ರಿಯರ್ (ನಾಲ್ಕು) ಕ್ಯಾಮೆರಾ ಸೆಟ್ಅಪ್ ಹೊಂದಿದೆ. ಆಪ್ಟಿಕಲ್ ಇಮೇಜ್ ಸ್ಟೆಬಿಲೈಸೇಶನ್ (OIS) ಬೆಂಬಲವಿರುವ 200 ಮೆಗಾಪಿಕ್ಸೆಲ್ ಪ್ರೈಮರಿ ಕ್ಯಾಮೆರಾ ಇದರ ಪ್ರಮುಖ ಆಕರ್ಷಣೆಯಾಗಿದೆ. ಇದರ ಜೊತೆಗೆ 50 ಮೆಗಾಪಿಕ್ಸೆಲ್ ಅಲ್ಟ್ರಾ-ವೈಡ್ ಲೆನ್ಸ್, 200 ಮೆಗಾಪಿಕ್ಸೆಲ್ ಟೆಲಿಫೋಟೋ ಲೆನ್ಸ್ ಮತ್ತು 50 ಮೆಗಾಪಿಕ್ಸೆಲ್ ಅಲ್ಟ್ರಾ-ಟೆಲಿಫೋಟೋ ಲೆನ್ಸ್ ಅಳವಡಿಸಲಾಗಿದೆ. ಇದು 10x ಆಪ್ಟಿಕಲ್ ಜೂಮ್ ಹಾಗೂ 120x ಡಿಜಿಟಲ್ ಜೂಮ್ ಸಾಮರ್ಥ್ಯವನ್ನು ಹೊಂದಿದೆ. ಸೆಲ್ಫಿ ಹಾಗೂ ವಿಡಿಯೋ ಕರೆಗಳಿಗಾಗಿ ಮುಂಭಾಗದಲ್ಲಿ 50 ಮೆಗಾಪಿಕ್ಸೆಲ್ ಕ್ಯಾಮೆರಾ ನೀಡಲಾಗಿದೆ. ಈ ಕ್ಯಾಮೆರಾಗಳು ಹ್ಯಾಸೆಲ್ಬ್ಲಾಡ್ ಇಮೇಜಿಂಗ್, XPAN ಮೋಡ್, 8K ವಿಡಿಯೋ ರೆಕಾರ್ಡಿಂಗ್ ಮತ್ತು ಡಾಲ್ಬಿ ವಿಷನ್ ಕ್ಯಾಪ್ಚರ್ನಂತಹ ಸುಧಾರಿತ ವೈಶಿಷ್ಟ್ಯಗಳನ್ನು ಬೆಂಬಲಿಸುತ್ತವೆ. ಈ ಸ್ಮಾರ್ಟ್ಫೋನ್ ದೀರ್ಘಕಾಲಿಕ ಬಾಳಿಕೆಗಾಗಿ 7,050mAh ಸಾಮರ್ಥ್ಯದ ಸಿಲಿಕಾನ್-ಕಾರ್ಬನ್ ಬ್ಯಾಟರಿಯನ್ನು ಹೊಂದಿದ್ದು, ಇದು 100W ವೈರ್ಡ್ ಫಾಸ್ಟ್ ಚಾರ್ಜಿಂಗ್ ಹಾಗೂ 50W ವೈರ್ಲೆಸ್ ಚಾರ್ಜಿಂಗ್ ಬೆಂಬಲದೊಂದಿಗೆ ಬರಲಿದೆ. ಸಂಪರ್ಕಕ್ಕಾಗಿ ವೈ-ಫೈ 7, ಬ್ಲೂಟೂತ್, ಎನ್ಎಫ್ಸಿ ಜೊತೆಗೆ ಭದ್ರತೆಗಾಗಿ 3D ಅಲ್ಟ್ರಾಸಾನಿಕ್ ಇನ್-ಡಿಸ್ಪ್ಲೇ ಫಿಂಗರ್ಪ್ರಿಂಟ್ ಸೆನ್ಸಾರ್ ಅಳವಡಿಸಲಾಗಿದೆ.
ಇದನ್ನೂ ಓದಿ : ಪ್ರಧಾನಿ ಮೋದಿ ‘ಭಯೋತ್ಪಾದಕ’ ಎಂದ ಖರ್ಗೆಗೆ ಉಪರಾಷ್ಟ್ರಪತಿ ಸಿ.ಪಿ. ರಾಧಾಕೃಷ್ಣನ್ ಟಾಂಗ್!
