ಸೂರತ್ : ಭಾರತದ ಖಾಸಗಿ ಬಾಹ್ಯಾಕಾಶ ಕ್ಷೇತ್ರದಲ್ಲಿ ಹೊಸ ಕ್ರಾಂತಿ ಎಂಬಂತೆ ಭಾರತೀಯ ಬಾಹ್ಯಾಕಾಶ ಸಂಶೋಧನಾ ಸಂಸ್ಥೆಯ (ಇಸ್ರೋ) ನಿವೃತ್ತ ವಿಜ್ಞಾನಿಗಳ ತಂಡವೊಂದು ಗುಜರಾತ್‌ನ ಸೂರತ್‌ನಲ್ಲಿ ‘ಭಾರತ್ ಸ್ಪೇಸ್ ವೆಹಿಕಲ್’ (BSV) ಎಂಬ ಸ್ಟಾರ್ಟ್‌ಅಪ್ ಆರಂಭಿಸಿದ್ದು, ಕೇವಲ 24 ಗಂಟೆಗಳಲ್ಲಿ ಉಡಾವಣೆಗೆ ಸಿದ್ಧವಾಗಬಲ್ಲ ‘ಅಗಸ್ತ್ಯ-1’ ಎಂಬ ಅದ್ಭುತ ರಾಕೆಟ್ ಅನ್ನು ಅಭಿವೃದ್ಧಿಪಡಿಸುತ್ತಿದೆ.
ಸಾಮಾನ್ಯವಾಗಿ ಸಣ್ಣ ಉಪಗ್ರಹಗಳನ್ನು ಹೊತ್ತೊಯ್ಯುವ ರಾಕೆಟ್‌ಗಳು ಘನ ಇಂಧನವನ್ನು ಬಳಸುತ್ತವೆ. ಆದರೆ, ಬಿಎಸ್‌ವಿ ಸಂಸ್ಥೆಯು ‘ಅಗಸ್ತ್ಯ-1’ ರಾಕೆಟ್‌ಗೆ ದ್ರವ ಆಮ್ಲಜನಕ ಮತ್ತು ಸೀಮೆಎಣ್ಣೆ (Liquid Oxygen/Kerosene) ಇಂಧನವನ್ನು ಆಯ್ದುಕೊಂಡಿದೆ. 28 ಮೀಟರ್ ಎತ್ತರದ ಈ ರಾಕೆಟ್ 500 ರಿಂದ 800 ಕೆಜಿ ತೂಕದ ಉಪಗ್ರಹಗಳನ್ನು ಭೂಮಿಯ ಕೆಳ ಕಕ್ಷೆಗೆ ಸೇರಿಸುವ ಸಾಮರ್ಥ್ಯ ಹೊಂದಿದೆ.
ಘನ ಇಂಧನದ ರಾಕೆಟ್‌ಗಳನ್ನು ಉಡಾವಣಾ ದಿನದಂದೇ ಪರೀಕ್ಷಿಸಬೇಕಾಗುತ್ತದೆ, ಆದರೆ ದ್ರವ ಇಂಧನದ ಇಂಜಿನ್‌ಗಳನ್ನು ಉಡಾವಣೆಗೂ ಮುನ್ನವೇ ಭೂಮಿಯ ಮೇಲೆ ಪರೀಕ್ಷಿಸಿ ಅದರ ದಕ್ಷತೆಯನ್ನು ಖಚಿತಪಡಿಸಿಕೊಳ್ಳಬಹುದು ಎಂಬುದು ಇಲ್ಲಿನ ಪ್ರಮುಖ ತಾಂತ್ರಿಕ ಪ್ಲಸ್ ಪಾಯಿಂಟ್.
ಅನುಭವದ ಗಣಿಯೇ ಈ ಸ್ಟಾರ್ಟ್‌ಅಪ್‌ಗೆ ಬಲ
ಈ ಸಂಸ್ಥೆಯ ಹಿಂದೆ ಇಸ್ರೋದ 70 ವರ್ಷಗಳಿಗೂ ಹೆಚ್ಚಿನ ಜಂಟಿ ಅನುಭವವಿರುವ ಘಟಾನುಘಟಿ ವಿಜ್ಞಾನಿಗಳಿದ್ದಾರೆ. ಇಸ್ರೋದ ಲಿಕ್ವಿಡ್ ಪ್ರೊಪಲ್ಷನ್ ಸಿಸ್ಟಮ್ಸ್ ಸೆಂಟರ್‌ನ ಮಾಜಿ ನಿರ್ದೇಶಕ ಮತ್ತು ಪದ್ಮಶ್ರೀ ಪುರಸ್ಕೃತ ಡಾ. ಎನ್. ವೇದಾಚಲಂ ಅವರು ಈ ತಂಡದ ಪ್ರಮುಖ ಮಾರ್ಗದರ್ಶಕರು. ಇವರೊಂದಿಗೆ ಡಾ. ಎ.ಪಿ.ಜೆ. ಅಬ್ದುಲ್ ಕಲಾಂ ಅವರ ಜೊತೆ ಎಸ್‌ಎಲ್‌ವಿ-3 ಯೋಜನೆಯಲ್ಲಿ ಕೆಲಸ ಮಾಡಿದ್ದ ಅನುಭವಿ ಇಂಜಿನಿಯರ್ ಎಸ್.ವಿ. ಶರ್ಮಾ ಹಾಗೂ ಐಐಟಿ ಕಾನ್ಪುರದ ಪ್ರತಿಭಾನ್ವಿತ ಭವಿನ್ ಪಟೇಲ್ ಈ ಸಾಹಸಕ್ಕೆ ಕೈಜೋಡಿಸಿದ್ದಾರೆ. ಈ ಅನುಭವಿಗಳ ತಂಡವು ಈಗ ಇಸ್ರೋದ ಮೂಲಸೌಕರ್ಯಗಳನ್ನು ಬಳಸಿಕೊಳ್ಳಲು ಅಧಿಕೃತ ಒಪ್ಪಂದವನ್ನೂ ಮಾಡಿಕೊಂಡಿದೆ.
ಗುಜರಾತ್ ಆಗಲಿದೆಯೇ ಭಾರತದ ಮುಂದಿನ ‘ಸ್ಪೇಸ್‌ಪೋರ್ಟ್’?
ಇಲ್ಲಿಯವರೆಗೆ ಆಂಧ್ರಪ್ರದೇಶದ ಶ್ರೀಹರಿಕೋಟಾ ಭಾರತದ ಪ್ರಮುಖ ಉಡಾವಣಾ ಕೇಂದ್ರವಾಗಿತ್ತು. ಆದರೆ ಈಗ ಭಾರತ್ ಸ್ಪೇಸ್ ವೆಹಿಕಲ್ ಸಂಸ್ಥೆಯು ಗುಜರಾತ್‌ನ ಗಿರ್ ಸೋಮನಾಥ್ ಜಿಲ್ಲೆಯ ಕೊಡಿನಾರ್ ಬಳಿ ಉಡಾವಣಾ ಸಂಕೀರ್ಣ ನಿರ್ಮಿಸಲು ಪ್ರಸ್ತಾವನೆ ಸಲ್ಲಿಸಿದೆ. ಅರಬ್ಬೀ ಸಮುದ್ರದ ತೀರದಲ್ಲಿರುವ ಈ ಸ್ಥಳವು ಉಪಗ್ರಹ ಉಡಾವಣೆಗೆ ಭೌಗೋಳಿಕವಾಗಿ ಅತ್ಯಂತ ಸೂಕ್ತವಾಗಿದೆ ಎಂದು ಗುಜರಾತ್ ಸರ್ಕಾರ ಕೂಡ ವಿಶ್ವಾಸ ವ್ಯಕ್ತಪಡಿಸಿದೆ. ಒಂದು ವೇಳೆ ಇದು ಕಾರ್ಯರೂಪಕ್ಕೆ ಬಂದರೆ, ಭಾರತದ ಪಶ್ಚಿಮ ಕರಾವಳಿಯಲ್ಲಿ ಮೊದಲ ಬಾಹ್ಯಾಕಾಶ ನಿಲ್ದಾಣ ತಲೆಯೆತ್ತಲಿದೆ.
ಒಟ್ಟಾರೆಯಾಗಿ, ರಕ್ಷಣೆ ಮತ್ತು ವಿಪತ್ತು ನಿರ್ವಹಣೆಯಂತಹ ತುರ್ತು ಸಂದರ್ಭಗಳಲ್ಲಿ ಅತೀ ವೇಗವಾಗಿ ಉಪಗ್ರಹಗಳನ್ನು ಕಕ್ಷೆಗೆ ಸೇರಿಸುವ ಅಗತ್ಯವನ್ನು ‘ಅಗಸ್ತ್ಯ-1’ ಪೂರೈಸಲಿದೆ. ಇಸ್ರೋ ಕಟ್ಟಿ ಬೆಳೆಸಿದ ವಿಜ್ಞಾನಿಗಳೇ ಈಗ ಖಾಸಗಿ ವಲಯದಲ್ಲಿ ಹೊಸ ಇತಿಹಾಸ ಬರೆಯಲು ಹೊರಟಿರುವುದು ಭಾರತದ ಹೆಮ್ಮೆಯ ವಿಷಯವಾಗಿದೆ.
ಇದನ್ನೂ ಓದಿ : ನಂಜನಗೂಡು ರಥೋತ್ಸವದಲ್ಲಿ ಕಾಲ್ತುಳಿತ – ತಂದೆ, ಮಗನ ಸ್ಥಿತಿ ಚಿಂತಾಜನಕ
