‘ಪವರ್ ಪ್ಲೇ’: ಶೀತಲ ಸಮರ ; ನಾಯಕತ್ವದ ಕಿರೀಟ ಸ್ಮೃತಿ ಮಂಧಾನ ಮುಡಿಗೇರಿದ ಇನ್‌ಸೈಡ್ ಸ್ಟೋರಿ!

ಬೆಂಗಳೂರು: ಭಾರತೀಯ ಮಹಿಳಾ ಕ್ರಿಕೆಟ್‌ನಲ್ಲಿ ಅಕ್ಷರಶಃ ಭಾರಿ ಸಂಚಲನವೊಂದು ಸೃಷ್ಟಿಯಾಗಿದೆ. ಕಳೆದೊಂದು ದಶಕದಿಂದ ಟೀಮ್ ಇಂಡಿಯಾವನ್ನು ಮುನ್ನಡೆಸುತ್ತಿದ್ದ, ಮೈದಾನದಲ್ಲಿ ಅಗ್ರೆಸಿವ್ ಆಟಕ್ಕೆ ಹೆಸರಾಗಿದ್ದ ದಿಗ್ಗಜ ಆಟಗಾರ್ತಿ ಹರ್ಮನ್‌ಪ್ರೀತ್ ಕೌರ್ ಯುಗಾಂತ್ಯವಾಗಿದೆ.
ಅತ್ಯಂತ ನಾಟಕೀಯ ಬೆಳವಣಿಗೆಯೊಂದರಲ್ಲಿ ಭಾರತೀಯ ಕ್ರಿಕೆಟ್ ನಿಯಂತ್ರಣ ಮಂಡಳಿ (ಬಿಸಿಸಿಐ), ತಂಡದ ಸ್ಟಾರ್ ಆರಂಭಿಕ ಆಟಗಾರ್ತಿ ಸ್ಮೃತಿ ಮಂಧಾನ ಅವರಿಗೆ ಎಲ್ಲಾ ಮೂರು ಮಾದರಿಯ (ಟೆಸ್ಟ್, ಏಕದಿನ ಮತ್ತು ಟಿ-20) ನಾಯಕತ್ವದ ಪಟ್ಟ ಕಟ್ಟಿದೆ. ಮೇಲ್ನೋಟಕ್ಕೆ ಇದೊಂದು ಸಹಜ ನಾಯಕತ್ವದ ಬದಲಾವಣೆಯಂತೆ ಕಂಡರೂ, ತೆರೆಯ ಹಿಂದೆ ನಡೆದ ನಾಯಕತ್ವದ ಕಸಿದಾಟ, ಹಿರಿಯ ಆಟಗಾರ್ತಿಯರ ನಡುವಿನ ಮುಸುಕಿನ ಗುದ್ದಾಟ ಹಾಗೂ ಬಿಸಿಸಿಐನ ನಿರ್ದಾಕ್ಷಿಣ್ಯ ನಡೆಯ ಕಹಾನಿ ರೋಚಕ.

ಡ್ರೆಸ್ಸಿಂಗ್ ರೂಮ್‌ನ ಶೀತಲ ಸಮರ

ಕಳೆದ ಕೆಲವು ತಿಂಗಳುಗಳಿಂದ ಭಾರತೀಯ ಡ್ರೆಸ್ಸಿಂಗ್ ರೂಮ್‌ನಲ್ಲಿ ಎಲ್ಲವೂ ಸರಿಯಿಲ್ಲ ಎಂಬ ಗುಸುಗುಸು ಕೇಳಿಬರುತ್ತಲೇ ಇತ್ತು. ತಂಡದ ಮೂಲಗಳು ಹಾಗೂ ಇತ್ತೀಚಿನ ಪಿಟಿಐ ವರದಿಯ ಪ್ರಕಾರ, ಹರ್ಮನ್‌ಪ್ರೀತ್ ಕೌರ್ ಮತ್ತು ಸ್ಮೃತಿ ಮಂಧಾನ ನಡುವೆ ನಾಯಕತ್ವದ ವಿಚಾರವಾಗಿ ತೀವ್ರ ಶೀತಲ ಸಮರವೇ ನಡೆಯುತ್ತಿತ್ತು. ಇಬ್ಬರೂ ಹಿರಿಯ ಆಟಗಾರ್ತಿಯರ ನಡುವೆ ಹೊಂದಾಣಿಕೆಯ ಭಾರಿ ಕೊರತೆಯಿತ್ತು ಎಂಬುದು ಈಗ ಗುಟ್ಟಾಗಿ ಉಳಿದಿಲ್ಲ. ಟಿ-20 ವಿಶ್ವಕಪ್‌ಗಳಲ್ಲಿ ತಂಡದ ಸತತ ಕಳಪೆ ಪ್ರದರ್ಶನ ಹಾಗೂ ಆರಂಭಿಕ ಹಂತದಲ್ಲೇ ಟೂರ್ನಿಯಿಂದ ಹೊರಬಿದ್ದಿದ್ದರಿಂದ ಹರ್ಮನ್‌ಪ್ರೀತ್ ನಾಯಕತ್ವದ ಮೇಲೆ ತೂಗುಗತ್ತಿ ನೇತಾಡುತ್ತಿತ್ತು. ನಾಯಕತ್ವ ಕೈತಪ್ಪುವ ಮುನ್ಸೂಚನೆ ಅರಿತಿದ್ದ ಹರ್ಮನ್‌ಪ್ರೀತ್, ಕನಿಷ್ಠ ಟೆಸ್ಟ್ ಹಾಗೂ ಏಕದಿನ ಮಾದರಿಯಲ್ಲಾದರೂ ಕ್ಯಾಪ್ಟನ್ ಆಗಿ ಮುಂದುವರಿಯುವ ಪಟ್ಟು ಹಿಡಿದಿದ್ದರು. ಆದರೆ, ಕಠಿಣ ನಿರ್ಧಾರಕ್ಕೆ ಮುಂದಾಗಿದ್ದ ಬಿಸಿಸಿಐ, ತಂಡವನ್ನು ಸರಿದಾರಿಗೆ ತರಲು ಯುವ ನಾಯಕತ್ವದತ್ತ ಒಲವು ತೋರಿ ಸ್ಮೃತಿಗೆ ಸಂಪೂರ್ಣ ಜವಾಬ್ದಾರಿ ನೀಡಿದೆ.

ಸಾಧನೆಯ ಶಿಖರದಲ್ಲಿದ್ದರೂ ಬಿಸಿಸಿಐನಿಂದ ನಿರ್ದಾಕ್ಷಿಣ್ಯ ಕೊಕ್!

ಹರ್ಮನ್‌ಪ್ರೀತ್ ಕೌರ್ ಭಾರತೀಯ ಕ್ರಿಕೆಟ್‌ನ ಸಾಮಾನ್ಯ ಆಟಗಾರ್ತಿಯಲ್ಲ. 2016ರಲ್ಲಿ ಟಿ-20 ನಾಯಕಿಯಾಗಿ, ಬಳಿಕ ಏಕದಿನ ಹಾಗೂ ಟೆಸ್ಟ್ ತಂಡದ ಚುಕ್ಕಾಣಿ ಹಿಡಿದ ಅವರು ತಂಡಕ್ಕೆ ನೀಡಿದ ಕೊಡುಗೆ ಅಪಾರ. ಅವರ ನಾಯಕತ್ವದಲ್ಲಿ ಭಾರತ ಚೊಚ್ಚಲ ಏಕದಿನ ವಿಶ್ವಕಪ್ ಮುಡಿಗೇರಿಸಿಕೊಂಡಿತ್ತು. ಇತ್ತೀಚೆಗಷ್ಟೇ ಏಷ್ಯನ್ ಗೇಮ್ಸ್‌ನಲ್ಲಿ ಸತತ ಎರಡನೇ ಬಾರಿಗೆ ಚಿನ್ನ, 2022ರ ಕಾಮನ್‌ವೆಲ್ತ್ ಗೇಮ್ಸ್‌ನಲ್ಲಿ ಬೆಳ್ಳಿ ಪದಕ ಗೆದ್ದ ಇತಿಹಾಸ ಹರ್ಮನ್‌ಪ್ರೀತ್ ಬೆನ್ನಿಗಿದೆ. ಆದರೆ, ಬಿಸಿಸಿಐ ಕೇವಲ ಹಿಂದಿನ ಇತಿಹಾಸದ ಮೇಲೆ ಬದುಕುವ ಸಂಸ್ಥೆಯಲ್ಲ. ಐಸಿಸಿ ಟ್ರೋಫಿ, ವಿಶೇಷವಾಗಿ ಟಿ-20 ವಿಶ್ವಕಪ್‌ಗಳಲ್ಲಿ ತಂಡ ಪದೇ ಪದೇ ಎಡವುತ್ತಿದ್ದದ್ದು ಮಂಡಳಿಯ ಅಸಮಾಧಾನಕ್ಕೆ ಕಾರಣವಾಗಿತ್ತು. ಗುವಾಹಟಿಯಲ್ಲಿ ಬಿಸಿಸಿಐ ಕಾರ್ಯದರ್ಶಿ ದೇವಜಿತ್ ಸೈಕಿಯಾ ನೇತೃತ್ವದಲ್ಲಿ ನಡೆದ ಪರಿಶೀಲನಾ ಸಭೆಯಲ್ಲಿ ಈ ಬಗ್ಗೆ ಸುದೀರ್ಘ ಚರ್ಚೆ ನಡೆಸಿ, ಹರ್ಮನ್‌ಪ್ರೀತ್‌ಗೆ ನಾಯಕತ್ವ ಬದಲಾವಣೆಯ ಕಠಿಣ ಸಂದೇಶವನ್ನು ಸ್ಪಷ್ಟವಾಗಿ ರವಾನಿಸಲಾಯಿತು.

ಮಂಧಾನ ಡಿಪ್ಲೊಮ್ಯಾಟಿಕ್ ಪೋಸ್ಟ್: ಬಿರುಕು ಮುಚ್ಚುವ ತೇಪೆ ಕಾರ್ಯಾಚರಣೆ?

ಒಂದೆಡೆ ನಾಯಕತ್ವದ ಕಿತ್ತಾಟದ ಸುದ್ದಿಗಳು ಮಾಧ್ಯಮಗಳಲ್ಲಿ ರಾರಾಜಿಸುತ್ತಿದ್ದಂತೆಯೇ, ಡ್ಯಾಮೇಜ್ ಕಂಟ್ರೋಲ್‌ಗೆ ಮುಂದಾದ ನೂತನ ನಾಯಕಿ ಸ್ಮೃತಿ ಮಂಧಾನ ತಮ್ಮ ಇನ್‌ಸ್ಟಾಗ್ರಾಮ್‌ನಲ್ಲಿ ಭಾವುಕ ಪೋಸ್ಟ್ ಒಂದನ್ನು ಹಂಚಿಕೊಂಡಿದ್ದಾರೆ. ಹರ್ಮನ್‌ಪ್ರೀತ್ ಅವರ ಹತ್ತು ವರ್ಷಗಳ ಅದ್ಭುತ ನಾಯಕತ್ವವನ್ನು ಕೊಂಡಾಡಿರುವ ಮಂಧಾನ, “ಇಷ್ಟು ವರ್ಷಗಳ ಕಾಲ ನಿಮ್ಮೊಂದಿಗೆ ಆಡಿದ್ದು ನನಗೆ ಅತ್ಯಂತ ಸಂತೋಷದ ವಿಚಾರ. ಮುಂದೆಯೂ ನಾವಿಬ್ಬರೂ ಒಟ್ಟಾಗಿ ದೇಶಕ್ಕೆ ಕೀರ್ತಿ ತರೋಣ” ಎಂದು ಬರೆದುಕೊಂಡಿದ್ದಾರೆ. ಬಿರುಕಿನ ವದಂತಿಗಳನ್ನು ತಣ್ಣಗಾಗಿಸುವ ನಿಟ್ಟಿನಲ್ಲಿ ಮಂಧಾನ ಈ ‘ಡಿಪ್ಲೊಮ್ಯಾಟಿಕ್’ ಹೆಜ್ಜೆ ಇಟ್ಟಿದ್ದಾರೆ ಎಂಬುದು ಕ್ರಿಕೆಟ್ ಪಂಡಿತರ ವಿಶ್ಲೇಷಣೆಯಾಗಿದೆ. ಏನೇ ಆದರೂ, ಸದ್ಯ ಭಾರತೀಯ ಮಹಿಳಾ ಕ್ರಿಕೆಟ್‌ನಲ್ಲಿ ಹೊಸ ಶಕೆಯೊಂದು ಆರಂಭವಾಗಿದ್ದು, ಒಡೆದ ಮನಸ್ಸುಗಳನ್ನು ಒಗ್ಗೂಡಿಸಿ ತಂಡವನ್ನು ವಿಶ್ವ ಚಾಂಪಿಯನ್ ಮಾಡುವ ಬಹುದೊಡ್ಡ ಸವಾಲು ಮಂಧಾನ ಹೆಗಲೇರಿದೆ.

ಇದನ್ನೂ ಓದಿ :ಡೆಲ್ಲಿ ಕ್ಯಾಪಿಟಲ್ಸ್ ಕೋಚ್ ಹುದ್ದೆ: ‘ಹಿತಾಸಕ್ತಿ ಸಂಘರ್ಷ’ದ ಟೀಕೆಗಳಿಗೆ BCCI ಆದೇಶದ ಮೂಲಕ ತಿರುಗೇಟು ನೀಡಿದ ಸೌರವ್ ಗಂಗೂಲಿ!