ಇರಾನ್‌ನ ಹಾರ್ಮುಜ್ ಜಲಸಂಧಿಯಲ್ಲಿದೆ ನಿಸರ್ಗದ ವಿಸ್ಮಯ: ಇಲ್ಲಿದೆ ಕೆಂಪು ಕಡಲತೀರ, ಮರಳನ್ನು ತಿನ್ನಲೂ ಸಾಧ್ಯ!

ಟೆಹ್ರಾನ್: ಇರಾನ್ ಮತ್ತು ಅಮೆರಿಕ-ಇಸ್ರೇಲ್ ನಡುವಿನ ಯುದ್ಧದ ಹಿನ್ನೆಲೆಯಲ್ಲಿ ಜಾಗತಿಕ ತೈಲ ಮತ್ತು ನೈಸರ್ಗಿಕ ಅನಿಲ ಸಾಗಾಟದ ಜೀವನಾಡಿಯಾಗಿರುವ ಹಾರ್ಮುಜ್ ಜಲಸಂಧಿಯು ಇದೀಗ ಮುಚ್ಚಿರುವ ಕಾರಣ, ಭಾರತ ಸೇರಿದಂತೆ ಹಲವು ದೇಶಗಳ ತೈಲ ಪೂರೈಕೆಯಲ್ಲಿ ತೀವ್ರ ವ್ಯತ್ಯಯ ಉಂಟಾಗಿದೆ. ಜಗತ್ತಿನ ಗಮನವೆಲ್ಲ ಈ ಆಯಕಟ್ಟಿನ ಪ್ರದೇಶದ ಮೇಲಿರುವಾಗಲೇ, ಇದೇ ಜಲಸಂಧಿಯಲ್ಲಿರುವ ಒಂದು ಅದ್ಭುತ ನೈಸರ್ಗಿಕ ವಿಸ್ಮಯವೊಂದು ಪ್ರವಾಸಿಗರು, ಭೂಗರ್ಭಶಾಸ್ತ್ರಜ್ಞರು ಹಾಗೂ ಛಾಯಾಗ್ರಾಹಕರನ್ನು ಕೈಬೀಸಿ ಕರೆಯುತ್ತಿದೆ. ಅದುವೇ ಹೊರ್ಮುಜ್ ದ್ವೀಪದ ‘ಕೆಂಪು ಕಡಲತೀರ’ (Red Beach).

ಈ ಕೆಂಪು ಬೀಚ್ ಕೇವಲ ನೋಡುಗರ ಕಣ್ಮನ ಸೆಳೆಯುವುದಷ್ಟೇ ಅಲ್ಲದೆ, ಇಲ್ಲಿನ ಮರಳನ್ನು ಆಹಾರದ ಭಾಗವಾಗಿ ಸೇವಿಸುವುದು ಈ ಕಡಲತೀರದ ಅತ್ಯಂತ ಅಚ್ಚರಿಯ ಸಂಗತಿಯಾಗಿದೆ.

ಕಣ್ಣಿಗೆ ಹಬ್ಬ ನೀಡುವ ‘ಸೋರ್ಖ್ ಬೀಚ್’

ಇರಾನ್‌ನ ಹೊರ್ಮುಜ್ ದ್ವೀಪದಲ್ಲಿರುವ ‘ಸೋರ್ಖ್ ಬೀಚ್’ (Sorkh Beach) ತನ್ನ ಗಾಢವಾದ ಕೆಂಪು ಮರಳು ಮತ್ತು ಹೊಳೆಯುವ ನೀರಿನಿಂದ ಜಗತ್ಪ್ರಸಿದ್ಧವಾಗಿದೆ. ಈ ಮರಳಿನಲ್ಲಿ ಕಬ್ಬಿಣದ ಆಕ್ಸೈಡ್ (Iron oxide) ಅಂಶ ಹೇರಳವಾಗಿರುವ ಕಾರಣ, ಅದು ರಕ್ತವರ್ಣದಲ್ಲಿ ಕಂಗೊಳಿಸುತ್ತದೆ. ಖನಿಜಾಂಶಗಳಿಂದ ಸಮೃದ್ಧವಾಗಿರುವ ಈ ಮಣ್ಣು, ಇಡೀ ಕಡಲತೀರಕ್ಕೆ ಒಂದು ಸುಂದರವಾದ ವರ್ಣಚಿತ್ರದಂತಹ ನೈಸರ್ಗಿಕ ರೂಪವನ್ನು ನೀಡಿದೆ.

ಆಹಾರದಲ್ಲೂ ಬಳಕೆ

ಇಲ್ಲಿನ ಕೆಂಪು ಮಣ್ಣನ್ನು ಸ್ಥಳೀಯರು ‘ಗೆಲಾಕ್’ (Gelak) ಎಂದು ಕರೆಯುತ್ತಾರೆ. ಇದರ ಬಣ್ಣ ಎಷ್ಟು ಗಾಢವಾಗಿದೆ ಎಂದರೆ, ಇದು ಚರ್ಮಕ್ಕೆ ತಾಗಿದರೆ ಹಲವು ದಿನಗಳ ಕಾಲ ಕಲೆ ಹಾಗೆಯೇ ಉಳಿಯುತ್ತದೆ. ಕಬ್ಬಿಣದ ಅಂಶ ಅತಿಯಾಗಿರುವ ಕಾರಣ ಕೆಲವು ಮರಳಿನ ಕಣಗಳು ಆಯಸ್ಕಾಂತಕ್ಕೂ ಆಕರ್ಷಿತವಾಗುತ್ತವೆ. ವಿಶೇಷವೆಂದರೆ, ಹೊರ್ಮುಜ್‌ನ ಸ್ಥಳೀಯರು ಈ ‘ಗೆಲಾಕ್’ ಅನ್ನು ನೇರವಾಗಿ ಪುಡಿಯ ರೂಪದಲ್ಲಿ ತಿನ್ನುವುದಿಲ್ಲ, ಬದಲಾಗಿ ತಮ್ಮ ದೈನಂದಿನ ಅಡುಗೆಯಲ್ಲಿ ಮಸಾಲೆ ಪದಾರ್ಥವಾಗಿ ಬಳಸುತ್ತಾರೆ. ಪ್ರಮುಖವಾಗಿ ‘ಸೂರಾಗ್’ (Sooragh) ಎಂಬ ಸಾಂಪ್ರದಾಯಿಕ ಹುದುಗಿಸಿದ (Fermented) ಮೀನಿನ ಸಾಸ್ ತಯಾರಿಕೆಯಲ್ಲಿ ಇದು ಪ್ರಮುಖ ಸಾಮಗ್ರಿಯಾಗಿದೆ. ನೈಸರ್ಗಿಕವಾಗಿ ಕಬ್ಬಿಣದ ಅಂಶವನ್ನು ಒದಗಿಸುವ ಕಾರಣ, ಮಹಿಳೆಯರು ಋತುಚಕ್ರದ ಸಮಯದಲ್ಲಿ ಇದನ್ನು ಅಲ್ಪ ಪ್ರಮಾಣದಲ್ಲಿ ಸೇವಿಸುವ ವಾಡಿಕೆಯೂ ಇದೆ.
ಬಟ್ಟೆಗಳಿಗೆ ಬಣ್ಣ ಹಚ್ಚಲು ಹಾಗೂ ಮಡಿಕೆಗಳನ್ನು ವಿನ್ಯಾಸಗೊಳಿಸಲೂ ಈ ಮಣ್ಣನ್ನು ಸಾಂಪ್ರದಾಯಿಕವಾಗಿ ಬಳಸಲಾಗುತ್ತದೆ. ಸೌಂದರ್ಯವರ್ಧಕಗಳು ಮತ್ತು ಕರಕುಶಲ ವಸ್ತುಗಳ ತಯಾರಿಕೆಗಾಗಿ ಈ ‘ಗೆಲಾಕ್’ ಅನ್ನು ಸೀಮಿತ ಪ್ರಮಾಣದಲ್ಲಿ ರಫ್ತು ಕೂಡ ಮಾಡಲಾಗುತ್ತದೆ.

ನಾವಿಕರಿಗೆ ದಾರಿದೀಪ

ಅಲೆಗಳು ಈ ಕೆಂಪು ಮರಳಿನ ಮೇಲೆ ಅಪ್ಪಳಿಸಿದಾಗ, ಸಮುದ್ರದ ನೀರು ಕೂಡ ಕೆಂಪು ಮತ್ತು ಗುಲಾಬಿ ಬಣ್ಣಕ್ಕೆ ತಿರುಗುತ್ತದೆ. ಪರ್ಷಿಯನ್ ಕೊಲ್ಲಿಯ ಪ್ರಶಾಂತವಾದ ನೀಲಿ ನೀರಿನೊಂದಿಗೆ ಬೆರೆಯುವ ಈ ಕೆಂಪು ವರ್ಣ, ಸೂರ್ಯೋದಯ ಮತ್ತು ಸೂರ್ಯಾಸ್ತದ ಸಮಯದಲ್ಲಿ ಮಾಂತ್ರಿಕ ಲೋಕವನ್ನೇ ಸೃಷ್ಟಿಸುತ್ತದೆ. ಈ ಕಡಲತೀರದ ಕೆಂಪು ಹೊಳಪು ಬಹುದೂರದವರೆಗೂ ನಿಚ್ಚಳವಾಗಿ ಕಾಣುವುದರಿಂದ, ಹಿಂದಿನ ಕಾಲದಲ್ಲಿ ನಾವಿಕರು ಹೊರ್ಮುಜ್ ಜಲಸಂಧಿಯಲ್ಲಿ ಇದನ್ನು ನೈಸರ್ಗಿಕ ದಿಕ್ಸೂಚಿಯನ್ನಾಗಿ (Navigation marker) ಬಳಸುತ್ತಿದ್ದರು.

ವಿಜ್ಞಾನದ ಆಚೆಗೂ ಈ ಕೆಂಪು ಕಡಲತೀರದ ಬಗ್ಗೆ ಅನೇಕ ಜಾನಪದ ಕಥೆಗಳು ಮತ್ತು ಪೌರಾಣಿಕ ನಂಬಿಕೆಗಳು ಸ್ಥಳೀಯವಾಗಿ ಹಾಸುಹೊಕ್ಕಾಗಿವೆ. ಬಾನಂಗಳದ ಕೌತುಕಗಳು ಅಥವಾ ಪೌರಾಣಿಕ ಜೀವಿಗಳೇ ಈ ಕೆಂಪು ಬಣ್ಣಕ್ಕೆ ಕಾರಣ ಎಂಬ ರೋಚಕ ಕಥೆಗಳೂ ಇಲ್ಲಿನ ಜನರ ಬಾಯಲ್ಲಿ ಕೇಳಸಿಗುತ್ತವೆ.

ಇದನ್ನೂ ಓದಿ : ಆಗಸದಲ್ಲೇ ಡಿಕ್ಕಿಯಾದವೇ ಅಮೆರಿಕದ ಬೃಹತ್ ಇಂಧನ ವಿಮಾನಗಳು?