ಕೋಲ್ಕತ್ತಾ : ವೆಸ್ಟ್ ಇಂಡೀಸ್ ವಿರುದ್ಧದ ರೋಚಕ ಪಂದ್ಯದಲ್ಲಿ ಸಂಜು ಸ್ಯಾಮ್ಸನ್ ಅವರ ಅಬ್ಬರದ ಬ್ಯಾಟಿಂಗ್ ಎಲ್ಲರ ಗಮನ ಸೆಳೆದಿದ್ದರೆ, ಬೌಲಿಂಗ್ ವಿಭಾಗದಲ್ಲಿ ಟೀಮ್ ಇಂಡಿಯಾದ ಭರವಸೆಯ ವೇಗಿ ಜಸ್ಪ್ರೀತ್ ಬುಮ್ರಾ ಮೌನವಾಗಿಯೇ ತಮ್ಮ ಕೆಲಸ ಮುಗಿಸಿ ತಂಡದ ಗೆಲುವಿನ ಅನ್-ಸಂಗ್ ಹೀರೊ ಆಗಿ ಹೊರಹೊಮ್ಮಿದ್ದಾರೆ. ಬುಮ್ರಾ ಅವರ ಈ ಅದ್ಭುತ ಪ್ರದರ್ಶನವನ್ನು ಕಂಡು ಬೆರಗಾಗಿರುವ ಇಂಗ್ಲೆಂಡ್ ತಂಡದ ಮಾಜಿ ನಾಯಕ ಮೈಕಲ್ ವಾನ್, ಬುಮ್ರಾ ಅವರನ್ನು ಒಂದು ಅಪ್ರತಿಮ ಬೌಲಿಂಗ್ ಯಂತ್ರಕ್ಕೆ ಹೋಲಿಸಿದ್ದಾರೆ.
ಸಂಜು ಅಬ್ಬರದ ನಡುವೆ ಬುಮ್ರಾ ಮ್ಯಾಜಿಕ್
ಈಡನ್ ಗಾರ್ಡನ್ನಲ್ಲಿ ನಡೆದ ಪಂದ್ಯದಲ್ಲಿ ವೆಸ್ಟ್ ಇಂಡೀಸ್ ಬ್ಯಾಟರ್ಗಳು ಅರ್ಶ್ದೀಪ್ ಸಿಂಗ್, ಹಾರ್ದಿಕ್ ಪಾಂಡ್ಯ ಮತ್ತು ವರುಣ್ ಚಕ್ರವರ್ತಿ ಅವರ ಓವರ್ಗಳಲ್ಲಿ ಸುಲಭವಾಗಿ ರನ್ ಗಳಿಸುತ್ತಿದ್ದರು. ಆದರೆ ಜಸ್ಪ್ರೀತ್ ಬುಮ್ರಾ ದಾಳಿಗಿಳಿದಾಗ ಮಾತ್ರ ವಿಂಡೀಸ್ ಪಡೆಯಲ್ಲಿ ನಡುಕ ಶುರುವಾಗಿತ್ತು. ರಿಯಾನ್ ಚೇಸ್ ಮತ್ತು ಶಿಮ್ರಾನ್ ಹೆಟ್ಮೆಯರ್ ಅವರಂತಹ ಅಪಾಯಕಾರಿ ಬ್ಯಾಟರ್ಗಳನ್ನು ಪೆವಿಲಿಯನ್ಗೆ ಅಟ್ಟಿದ ಬುಮ್ರಾ, ತಮ್ಮ 4 ಓವರ್ಗಳ ಕೋಟಾದಲ್ಲಿ 36 ರನ್ ನೀಡಿ 3 ಪ್ರಮುಖ ವಿಕೆಟ್ ಪಡೆದರು. ಉಳಿದ ಬೌಲರ್ಗಳು ಪ್ರತಿ ಓವರ್ಗೆ ಸರಾಸರಿ 10ಕ್ಕಿಂತ ಹೆಚ್ಚು ರನ್ ನೀಡಿ ದುಬಾರಿಯಾಗುತ್ತಿದ್ದಾಗ, ಬುಮ್ರಾ ಕೇವಲ 9.00ರ ಎಕಾನಮಿಯಲ್ಲಿ ಶಿಸ್ತುಬದ್ಧ ಬೌಲಿಂಗ್ ಪ್ರದರ್ಶಿಸಿ ರನ್ ವೇಗಕ್ಕೆ ಬ್ರೇಕ್ ಹಾಕಿದರು.
ವೇಗದಲ್ಲಿನ ವೈವಿಧ್ಯತೆಯೇ ಬುಮ್ರಾ ಶಕ್ತಿ
ಪಂದ್ಯದ ನಂತರ ಕ್ರಿಕ್ಬಜ್ ಕಾರ್ಯಕ್ರಮದಲ್ಲಿ ಮಾತನಾಡಿದ ಮೈಕಲ್ ವಾನ್ ಅವರು ಬುಮ್ರಾ ಕೇವಲ ವೇಗಕ್ಕೆ ಹೆಸರಾದವರಲ್ಲ, ಬದಲಾಗಿ ತಮ್ಮ ವೇಗದಲ್ಲಿ ತರುವ ಅದ್ಭುತ ವೈವಿಧ್ಯತೆ ಅವರನ್ನು ಜಗತ್ತಿನ ನಂಬರ್ 1 ಬೌಲರ್ ಮಾಡಿದೆ ಎಂದು ವಿಶ್ಲೇಷಿಸಿದ್ದಾರೆ. ಅಂಕಿಅಂಶಗಳ ಸಮೇತ ವಿವರಣೆ ನೀಡಿದ ವಾನ್, ಬುಮ್ರಾ 128 ಕಿ.ಮೀ ಗಿಂತ ಕಡಿಮೆ ವೇಗದಲ್ಲಿ ಬೌಲಿಂಗ್ ಮಾಡಿದಾಗ ಸರಾಸರಿ 7.41 ರಂತೆ ವಿಕೆಟ್ ಪಡೆದಿದ್ದಾರೆ ಮತ್ತು ಅವರ ಎಕಾನಮಿ ಕೇವಲ 4.52 ರಷ್ಟಿದೆ. ಹಾಗೆಯೇ 140 ಕಿ.ಮೀ ಗಿಂತ ಹೆಚ್ಚು ವೇಗದಲ್ಲಿ ಬೌಲಿಂಗ್ ಮಾಡಿದಾಗಲೂ ಅವರ ಸರಾಸರಿ 10 ರ ಆಸುಪಾಸಿನಲ್ಲಿದೆ. ಇಷ್ಟು ಕಡಿಮೆ ರನ್ ನೀಡಿ ವಿಕೆಟ್ ಪಡೆಯುವ ಕಲೆ ಬುಮ್ರಾಗೆ ಮಾತ್ರ ಸಿದ್ಧಿಸಿದೆ ಎಂದು ವಾನ್ ಮೆಚ್ಚುಗೆ ವ್ಯಕ್ತಪಡಿಸಿದ್ದಾರೆ.
ಯಾವುದೇ ಬದಲಾವಣೆ ಇಲ್ಲದ ಬೌಲಿಂಗ್ ಆಕ್ಷನ್
ಬುಮ್ರಾ ಅವರ ಬೌಲಿಂಗ್ ಶೈಲಿಯ ಬಗ್ಗೆ ಮತ್ತಷ್ಟು ಮಾತನಾಡಿದ ವಾನ್, ಅವರು ಬೌಲಿಂಗ್ ಮಾಡುವ ರೀತಿ ನೋಡಿದರೆ ಒಂದು ಯಂತ್ರದಂತೆ ಭಾಸವಾಗುತ್ತದೆ ಎಂದು ಹೇಳಿದ್ದಾರೆ. ಸಾಮಾನ್ಯವಾಗಿ ಬೌಲರ್ಗಳು ಚೆಂಡನ್ನು ಸ್ವಿಂಗ್ ಮಾಡಲು ಅಥವಾ ನಿಧಾನಗತಿಯ ಎಸೆತಗಳನ್ನು ಎಸೆಯಲು ತಮ್ಮ ಬೌಲಿಂಗ್ ಆಕ್ಷನ್ನಲ್ಲಿ ಸಣ್ಣ ಬದಲಾವಣೆಗಳನ್ನು ಮಾಡಿಕೊಳ್ಳುತ್ತಾರೆ. ಆದರೆ ಬುಮ್ರಾ ಅವರ ವಿಶೇಷತೆಯೆಂದರೆ ಅವರು ಯಾವುದೇ ರೀತಿಯ ಬದಲಾವಣೆ ತೋರದೆ ಇನ್-ಸ್ವಿಂಗರ್ ಅಥವಾ ಇತರ ಎಸೆತಗಳನ್ನು ಎಸೆಯುತ್ತಾರೆ. ಇದರಿಂದಾಗಿ ಬ್ಯಾಟರ್ಗಳಿಗೆ ಬುಮ್ರಾ ಯಾವ ರೀತಿಯ ಎಸೆತ ಎಸೆಯಲಿದ್ದಾರೆ ಎಂಬುದನ್ನು ಊಹಿಸುವುದು ಅಸಾಧ್ಯವಾಗುತ್ತದೆ.
ವಿಶ್ವಕಪ್ನಲ್ಲಿ ಬುಮ್ರಾ ನಾಗಾಲೋಟ
ಪ್ರಸಕ್ತ 2026ರ ಟಿ20 ವಿಶ್ವಕಪ್ನಲ್ಲಿ ಬುಮ್ರಾ ಭಾರತದ ಪಾಲಿಗೆ ಬ್ರಹ್ಮಾಸ್ತ್ರವಾಗಿದ್ದಾರೆ. ಆಡಿರುವ 6 ಪಂದ್ಯಗಳಲ್ಲಿ ಒಟ್ಟು 9 ವಿಕೆಟ್ ಕಬಳಿಸಿರುವ ಅವರು, ಪಾಕಿಸ್ತಾನ ಮತ್ತು ದಕ್ಷಿಣ ಆಫ್ರಿಕಾ ಅಂತಹ ದೊಡ್ಡ ತಂಡಗಳ ವಿರುದ್ಧವೂ ಅಮೋಘ ಪ್ರದರ್ಶನ ನೀಡಿದ್ದಾರೆ. ಇದೀಗ ಸೆಮಿಫೈನಲ್ ಪಂದ್ಯಕ್ಕಾಗಿ ಟೀಮ್ ಇಂಡಿಯಾ ಮುಂಬೈಗೆ ಬಂದಿಳಿದಿದ್ದು, ಮಾರ್ಚ್ 5 ರಂದು ನಡೆಯಲಿರುವ ಇಂಗ್ಲೆಂಡ್ ವಿರುದ್ಧದ ಹೈವೋಲ್ಟೇಜ್ ಪಂದ್ಯದಲ್ಲೂ ಬುಮ್ರಾ ಅವರ ಬೌಲಿಂಗ್ ಮ್ಯಾಜಿಕ್ ಮೇಲೆ ಇಡೀ ದೇಶದ ಕಣ್ಣಿದೆ.
ಇದನ್ನೂ ಓದಿ : ಅಭಿಷೇಕ್ ಶರ್ಮಾ ಆಟಕ್ಕೆ ‘ಗೌರವ’ ಕೊಡುತ್ತಿಲ್ಲವೇ? ಯುವ ಆಟಗಾರನ ವರ್ತನೆ ಕಂಡು ಕಿಡಿಕಾರಿದ ಮುರಳಿ ಕಾರ್ತಿಕ್!
