ಬೆಂಗಳೂರು : ಭಾರತೀಯ ಸ್ಟೇಟ್ ಬ್ಯಾಂಕ್ ಫೌಂಡೇಷನ್ (SBI Foundation) ವತಿಯಿಂದ 14ನೇ ಸರಣಿಯ ಎಸ್ ಬಿಐ ಯೂತ್ ಫಾರ್ ಇಂಡಿಯಾ ಫೆಲೋಶಿಪ್ ಗೆ (SBI Youth For India Fellowship) ಅರ್ಜಿಗಳನ್ನು ಆಹ್ವಾನಿಸಲಾಗಿದೆ. ಗ್ರಾಮೀಣ ಭಾಗದಲ್ಲಿ ಅಭಿವೃದ್ಧಿ ಯೋಜನೆಗಳಲ್ಲಿ ಕಾರ್ಯನಿರ್ವಹಿಸಲು ಇಚ್ಛಿಸುವವರು ಅರ್ಜಿಗಳನ್ನು ಸಲ್ಲಿಸಬಹುದಾಗಿದೆ.
ಗ್ರಾಮೀಣ ಭಾಗಗಳಲ್ಲಿ ವಿದ್ಯಾವಂತ ಯುವಕರು ಮಹಿಳಾ ಸಬಲೀಕರಣ, ಶಿಕ್ಷಣ, ಆರೋಗ್ಯ ಸೇರಿ ಹಲವು ಕ್ಷೇತ್ರಗಳಲ್ಲಿ ಎನ್ ಜಿಒಗಳೊಂದಿಗೆ ಕಾರ್ಯನಿರ್ವಹಿಸಬೇಕಾಗುತ್ತದೆ. ಸುಮಾರು 13 ತಿಂಗಳು ಫೆಲೋಶಿಪ್ ಇರುತ್ತದೆ. ಇದಕ್ಕಾಗಿ ಎಸ್ ಬಿಐ ಫೌಂಡೇಷನ್ ವತಿಯಿಂದ ಮಾಸಿಕ 16 ಸಾವಿರ ರೂಪಾಯಿ ಸ್ಟೈಪೆಂಡ್ ಕೂಡ ನೀಡಲಾಗುತ್ತದೆ.
ಅರ್ಹತೆಗಳು ಏನು?
ಅರ್ಜಿ ಸಲ್ಲಿಸಲು ಬಯಸುವವರು ಭಾರತೀಯ ಪ್ರಜೆಯಾಗಿರಬೇಕು
ಕನಿಷ್ಠ 21ರಿಂದ 32 ವರ್ಷದೊಳಗಿನವರಾಗಿರಬೇಕು
ಮಾನ್ಯತೆ ಪಡೆದ ವಿವಿಯಿಂದ ಕನಿಷ್ಠ ಪದವಿ ಪಡೆದಿರಬೇಕು
ಭಾರತೀಯರು ಮಾತ್ರವಲ್ಲದೆ ನೇಪಾಳ ಮತ್ತು ಭೂತಾನ್ ಪ್ರಜೆಗಳು ಅಥವಾ ಓವರ್ ಸೀಸ್ ಸಿಟಿಜನ್ ಆಫ್ ಇಂಡಿಯಾ (OCI) ಕಾರ್ಡ್ ಹೊಂದಿರುವವರು ಅರ್ಜಿ ಸಲ್ಲಿಸಬಹುದು.
ಅರ್ಹ ಹಾಗೂ ಆಸಕ್ತ ಅಭ್ಯರ್ಥಿಗಳು ಎಸ್ ಬಿಐ ಯೂತ್ ಫಾರ್ ಇಂಡಿಯಾ ಅಧಿಕೃತ ಜಾಲತಾಣವಾದ register.youthforindia.org ಮೂಲಕ ಆನ್ ಲೈನ್ ನಲ್ಲಿ ಅರ್ಜಿ ಸಲ್ಲಿಸಬಹುದಾಗಿದೆ. ಸ್ಟೈಪೆಂಡ್ ಜತೆಗೆ ಸಾರಿಗೆ ವೆಚ್ಚವಾಗಿ ಪ್ರತಿ ತಿಂಗಳು 2 ಸಾವಿರ ರೂ. ನೀಡಲಾಗುತ್ತದೆ. ಆರೋಗ್ಯ ಮತ್ತು ಅಪಘಾತ ವಿಮೆ ಕೂಡ ಇರುತ್ತದೆ. ಫೆಲೋಶಿಪ್ ಮುಗಿದ ಬಳಿಕ ಪ್ರಮಾಣಪತ್ರದ ಜತೆಗೆ 1.10 ಲಕ್ಷ ರೂಪಾಯಿ ಒಂದು ಬಾರಿಯ ಭತ್ಯೆಯನ್ನೂ ನೀಡಲಾಗುತ್ತದೆ.
ಇದನ್ನೂ ಓದಿ : ಮತ್ತೆ ಯುದ್ಧ ನಿಲ್ಲಿಸಿದ್ದು ನಾನೇ ಅಂದ ಟ್ರಂಪ್
