ವಾಷಿಂಗ್ಟನ್ : ಕಳೆದ ವರ್ಷ ಭಾರತ ಮತ್ತು ಪಾಕಿಸ್ತಾನದ ನಡುವೆ ನಡೆದ ಘರ್ಷಣೆಯನ್ನು ತಾನೇ ಮಧ್ಯಸ್ಥಿಕೆ ವಹಿಸಿ ನಿಲ್ಲಿಸಿದೆ ಎಂಬ ತನ್ನ ಹಳೆಯ ವಾದವನ್ನೇ ಅಮೆರಿಕ ಅಧ್ಯಕ್ಷ ಡೊನಾಲ್ಡ್ ಟ್ರಂಪ್ ಮತ್ತೆ ಮಂಡಿಸಿದ್ದಾರೆ. ವಾಷಿಂಗ್ಟನ್ನಲ್ಲಿ ನಡೆದ ‘ಬೋರ್ಡ್ ಆಫ್ ಪೀಸ್'(ಶಾಂತಿಯ ಮಂಡಳಿ) ಕಾರ್ಯಕ್ರಮದಲ್ಲಿ ಮಾತನಾಡಿದ ಅವರು, ಈ ಸಂಘರ್ಷದ ಕುರಿತು ಹೊಸ ಅಂಕಿಅಂಶಗಳನ್ನು ನೀಡಿದ್ದಾರೆ.
ಕಾರ್ಯಕ್ರಮದಲ್ಲಿ ಮಾತನಾಡಿದ ಟ್ರಂಪ್, 2025ರ ಸೇನಾ ಘರ್ಷಣೆ ಸಂದರ್ಭದಲ್ಲಿ ನಾನು ಎರಡೂ ದೇಶಗಳಿಗೆ ಶೇ.200ರಷ್ಟು ವ್ಯಾಪಾರ ಸುಂಕ ವಿಧಿಸುವುದಾಗಿ ಬೆದರಿಕೆ ಹಾಕಿದ್ದೆ. ನಾನು ಉಭಯ ದೇಶಗಳ ನಾಯಕರೊಂದಿಗೆ ಮಾತನಾಡಿದೆ. ನೀವು ಹೋರಾಟ ನಿಲ್ಲಿಸದಿದ್ದರೆ ನಾನು ನಿಮ್ಮೊಂದಿಗೆ ಯಾವುದೇ ವ್ಯಾಪಾರ ಒಪ್ಪಂದ ಮಾಡಿಕೊಳ್ಳುವುದಿಲ್ಲ ಎಂದು ಎಚ್ಚರಿಸಿದೆ. ಹಣದ ವಿಷಯ ಬಂದಾಗ ಅವರು ಯುದ್ಧ ಬೇಡ ಎಂದು ನಿರ್ಧರಿಸಿದರು” ಎಂದು ಟ್ರಂಪ್ ಹೇಳಿಕೊಂಡಿದ್ದಾರೆ. ಅಷ್ಟೇ ಅಲ್ಲದೆ, ಈ ಹೋರಾಟದಲ್ಲಿ 11 ಅತ್ಯಾಧುನಿಕ ಯುದ್ಧ ವಿಮಾನಗಳು ಪತನಗೊಂಡವು ಎಂಬ ಹೊಸ ವಾದವನ್ನೂ ಮಂಡಿಸಿದ್ದಾರೆ. ಈ ಹಿಂದೆ ಅವರು ಈ ಸಂಖ್ಯೆಯನ್ನು 7 ಎಂದು ಹೇಳಿದ್ದರು.
ಪಾಕ್ ಪ್ರಧಾನಿ ಶಹಬಾಜ್ ಷರೀಫ್ಗೆ ಮುಜುಗರ
ಈ ಮೂಲಕ ಇದೇ ವೇದಿಕೆಯಲ್ಲಿದ್ದ ಪಾಕಿಸ್ತಾನದ ಪ್ರಧಾನಿ ಶಹಬಾಜ್ ಷರೀಫ್ ಅವರಿಗೆ ಟ್ರಂಪ್ ಅಕ್ಷರಶಃ ಮುಜುಗರ ಉಂಟುಮಾಡಿದರು. ಟ್ರಂಪ್ ತಮ್ಮ ಮಧ್ಯಸ್ಥಿಕೆಯ ಬಗ್ಗೆ ಮಾತನಾಡುವ ವೇಳೆ, ಷರೀಫ್ ಅವರಿಗೆ ಎದ್ದು ನಿಲ್ಲುವಂತೆ ಸೂಚಿಸಿದರು. “ಪಾಕಿಸ್ತಾನ ಮತ್ತು ಭಾರತದ ನಡುವಿನ ಯುದ್ಧ ನಿಲ್ಲಿಸಿ ನಾನು 25 ದಶಲಕ್ಷ ಜನರ ಪ್ರಾಣ ಉಳಿಸಿದ್ದೇನೆ ಎಂದು ನೀವೇ ಹೇಳಿದ್ದೀರಿ ಅಲ್ಲವೇ?” ಎಂದು ಷರೀಫ್ ಅವರನ್ನು ಪ್ರಶ್ನಿಸಿದರು. ಟ್ರಂಪ್ ಅವರ ಈ ನೇರ ಪ್ರಶ್ನೆ ಮತ್ತು ಸಾರ್ವಜನಿಕವಾಗಿ ಎದ್ದು ನಿಲ್ಲುವಂತೆ ಮಾಡಿದ ಸೂಚನೆ ಅಲ್ಲಿ ನೆರೆದಿದ್ದ ಇತರ ರಾಷ್ಟ್ರಗಳ ನಾಯಕರಿಗೂ ಆಶ್ಚರ್ಯ ಉಂಟುಮಾಡಿತು.
ಭಾರತದ ಸ್ಪಷ್ಟ ನಿರಾಕರಣೆ
ಟ್ರಂಪ್ ಅವರ ಈ ಎಲ್ಲಾ ವಾದಗಳನ್ನೂ ಭಾರತ ಸರ್ಕಾರ ಮೊದಲಿನಿಂದಲೂ ಸಾರಾಸಗಟಾಗಿ ತಳ್ಳಿಹಾಕುತ್ತಾ ಬಂದಿದೆ. ಕಳೆದ ವರ್ಷದ ಮೇ ತಿಂಗಳಲ್ಲಿ ನಡೆದ ಸಂಘರ್ಷದ ನಂತರದ ಕದನ ವಿರಾಮವು ಉಭಯ ದೇಶಗಳ ಮಿಲಿಟರಿ ಕಾರ್ಯಾಚರಣೆಯ ಮಹಾನಿರ್ದೇಶಕರ (DGMOs) ನಡುವಿನ ನೇರ ಮಾತುಕತೆಯ ಫಲವೇ ಹೊರತು, ಇದರಲ್ಲಿ ಯಾವುದೇ ಮೂರನೇ ವ್ಯಕ್ತಿಯ ಹಸ್ತಕ್ಷೇಪವಿಲ್ಲ ಎಂದು ಭಾರತ ಸ್ಪಷ್ಟಪಡಿಸುತ್ತಲೇ ಇದೆ. ಆದರೂ, ಟ್ರಂಪ್ ಮಾತ್ರ ಹಳೇ ರಾಗವನ್ನು ಹಾಡುತ್ತಲೇ ಇದ್ದಾರೆ.
ಇದನ್ನೂ ಓದಿ : ‘ಪೋಲಿ’ಸಪ್ಪನ ಕಾಟಕ್ಕೆ ಮಹಿಳೆ ಆತ್ಮಹ*ತ್ಯೆಗೆ ಶರಣು
