ಬೆಂಗಳೂರು: ಉದ್ಯೋಗಿಗಳ ಭವಿಷ್ಯ ನಿಧಿ ಸಂಸ್ಥೆಯು ( ಇಎಫ್ಎಫ್ಒ) ಇತ್ತೀಚೆಗೆ ಹತ್ತಾರು ಸುಧಾರಣೆಗಳನ್ನು ಜಾರಿಗೆ ತಂದಿದೆ. ಪಿಎಫ್ ವಿತ್ ಡ್ರಾ ನಿಯಮಗಳ ಸಡಿಲಿಕೆ, ಆನ್ ಲೈನ್ ನಲ್ಲೇ ಸುಲಭವಾಗಿ ವಿತ್ ಡ್ರಾ ಮಾಡುವುದು ಸೇರಿ ಹಲವು ಸುಧಾರಣೆ ತಂದಿದೆ. ಇದರ ಬೆನ್ನಲ್ಲೇ, ಇಪಿಎಫ್ಒ ಸದಸ್ಯರು ನಿಧನರಾದರೆ ಅವರ ಕುಟುಂಬಕ್ಕೆ ನೀಡುವ ಮರಣ ಪರಿಹಾರ ನಿಧಿಯನ್ನು 15 ಲಕ್ಷ ರೂಪಾಯಿಗೆ ಏರಿಕೆ ಮಾಡಲಾಗಿದೆ. ಇದುವರೆಗೆ ಇದು 8.8 ಲಕ್ಷ ರೂಪಾಯಿ ಇತ್ತು.
ಪರಿಹಾರ ನಿಧಿಯ ಮೊತ್ತವನ್ನು ಸಿಬ್ಬಂದಿ ಕಲ್ಯಾಣ ನಿಧಿಯಿಂದ ಭರಿಸಲಾಗುತ್ತದೆ. ಇದು 2025ರ ಏಪ್ರಿಲ್ 1ರಿಂದ ಪೂರ್ವಾನ್ವಯವಾಗುವಂತೆ ಜಾರಿಗೆ ಬಂದಿದೆ ಎಂದು ಇಪಿಎಫ್ಒ ತಿಳಿಸಿದೆ. ಈ ದಿನಾಂಕದ ನಂತರ ಉದ್ಯೋಗಿಯೊಬ್ಬರು ಮೃತಪಟ್ಟರೆ ಅವರ ಕುಟುಂಬಕ್ಕೆ 8.8 ಲಕ್ಷ ರೂ.ಗಳ ಬದಲಿಗೆ 15 ಲಕ್ಷ ರೂ.ಗಳು ಸಿಗುತ್ತವೆ. ಇದರಿಂದ 7 ಕೋಟಿಗೂ ಅಧಿಕ ಇಪಿಎಫ್ಒ ಸದಸ್ಯರ ಕುಟುಂಬಸ್ಥರಿಗೆ ಆರ್ಥಿಕ ಭದ್ರತೆ ಸಿಗಲಿದೆ.
ಇಪಿಎಫ್ಒ ಈ ಕುರಿತು ಆಗಸ್ಟ್ 19 ರಂದು ಸುತ್ತೋಲೆ ಹೊರಡಿಸಲಾಗಿದೆ. ಇದರೊಂದಿಗೆ 2026ರ ಏ.1ರಿಂದ ಈ ಪರಿಹಾರದ ಮೊತ್ತ ಪ್ರತಿವರ್ಷ ಶೇ.5ರಷ್ಟು ಹೆಚ್ಚಾಗುತ್ತದೆ. ಮೃತರ ಕುಟುಂಬಗಳಿಗೆ ನೀಡಲಾಗುವ ಆರ್ಥಿಕ ನೆರವು ಕಾಲಾನಂತರದಲ್ಲಿ ಹೆಚ್ಚಾಗುತ್ತದೆ. ಉದ್ಯೋಗಿಯ ಕುಟುಂಬಸ್ಥರು ಹೆಚ್ಚು ಆರ್ಥಿಕ ತೊಂದರೆಗಳನ್ನು ಎದುರಿಸುತ್ತಿದ್ದಾರೆ ಎಂಬುದನ್ನು ಪರಿಗಣಿಸಿ ಈ ನಿರ್ಧಾರ ಕೈಗೊಳ್ಳಲಾಗಿದೆ ಎಂದು ತಿಳಿದುಬಂದಿದೆ.
ಇಪಿಎಫ್ಒ ಸದಸ್ಯರು ಯಾರನ್ನು ನಾಮರ್ನಿದೇಶಿತರನ್ನಾಗಿ ಮಾಡಿರುತ್ತಾರೋ, ಅವರಿಗೆ ಪರಿಹಾರದ ಮೊತ್ತ ಸಿಗುತ್ತದೆ. ಯಾವುದಾದರೂ ಇಪಿಎಫ್ಒ ಸದಸ್ಯ ಮೃತಪಟ್ಟರೆ, ಅವರ ಕುಟುಂಬಸ್ಥರಿಗೆ ನೆರವಾಗಲಿ ಎಂದು ಪರಿಹಾರ ನಿಧಿಯನ್ನು ಸ್ಥಾಪಿಸಿರಲಾಗಿರುತ್ತದೆ. ಆ ಮೊತ್ತವನ್ನು ಇದುವರೆಗೆ 8.8 ಲಕ್ಷ ರೂಪಾಯಿ ಎಂದು ನಿಗದಿಪಡಿಸಲಾಗಿತ್ತು.
