ಹ್ಯೂಸ್ಟನ್: 18 ದಿನಗಳ ಐತಿಹಾಸಿಕ ಅಂತಾರಾಷ್ಟ್ರೀಯ ಬಾಹ್ಯಾಕಾಶ ನಿಲ್ದಾಣ ವಾಸ್ತವ್ಯವನ್ನು ಮುಗಿಸಿ ಮಂಗಳವಾರ ಭೂಮಿಗೆ ವಾಪಸಾಗಿರುವ ಭಾರತದ ಗಗನಯಾನಿ ಶುಭಾಂಶು ಶುಕ್ಲಾ ಅವರು ಗುರುವಾರ ತಮ್ಮ ಕುಟುಂಬವನ್ನು ಭೇಟಿಯಾಗಿದ್ದಾರೆ.
ಹ್ಯೂಸ್ಟನ್ನಲ್ಲಿ ಕ್ವಾರಂಟೈನ್ನಲ್ಲಿರುವ ಶುಭಾಂಶು ಅವರು, ತಮ್ಮ ಪತ್ನಿ ಕಾಮನಾ ಶುಕ್ಲಾ ಮತ್ತು ಆರು ವರ್ಷದ ಮಗ ಕಿಯಾಶ್ ಅವರನ್ನು ಆಲಿಂಗಿಸಿಕೊಳ್ಳುತ್ತಿರುವ ಭಾವನಾತ್ಮಕ ಫೋಟೋಗಳನ್ನು ತಮ್ಮ ಇನ್ಸ್ಟಾಗ್ರಾಮ್ನಲ್ಲಿ ಹಂಚಿಕೊಂಡಿದ್ದಾರೆ. ಭೂಮಿಗೆ ಮರಳಿದ 24 ಗಂಟೆಗಳ ಒಳಗೇ ತಮ್ಮ ಕುಟುಂಬವನ್ನು ಭೇಟಿಯಾದ ಶುಭಾಂಶು, “ಬಾಹ್ಯಾಕಾಶ ಯಾತ್ರೆಯು ಅದ್ಭುತವಾಗಿತ್ತು. ಆದರೆ ದೀರ್ಘಕಾಲದ ನಂತರ ನಿಮ್ಮ ಪ್ರೀತಿಪಾತ್ರರನ್ನು ನೋಡುವ ಅನುಭವವೂ ಅಷ್ಟೇ ಅದ್ಭುತವಾಗಿದೆ” ಎಂದು ಹೇಳಿದ್ದಾರೆ.
“ನಾನು ಕ್ವಾರಂಟೈನ್ ಪ್ರವೇಶಿಸಿ 2 ತಿಂಗಳಾಗಿದೆ. ಕ್ವಾರಂಟೈನ್ ಸಮಯದಲ್ಲಿ ಕುಟುಂಬವನ್ನು ಭೇಟಿ ಮಾಡುವ ಅವಕಾಶಗಳಿದ್ದಾಗ ನಾವು 8 ಮೀಟರ್ ದೂರವಿರಬೇಕಿತ್ತು. ನನ್ನ ಪುಟ್ಟ ಮಗನಿಗೆ ಅವನ ಕೈಯಲ್ಲಿ ಸೂಕ್ಷ್ಮಾಣುಗಳಿವೆ, ಅದಕ್ಕಾಗಿಯೇ ಅವನು ತನ್ನ ತಂದೆಯನ್ನು ಮುಟ್ಟಲು ಸಾಧ್ಯವಿಲ್ಲ ಎಂದು ಹೇಳಬೇಕಾಗಿತ್ತು. ಪ್ರತಿ ಬಾರಿ ಭೇಟಿಗೆ ಬಂದಾಗಲೂ ಅವನು ತನ್ನ ತಾಯಿಯನ್ನು ‘ನಾನು ನನ್ನ ಕೈ ತೊಳೆಯಬೇಕಾ?’ ಎಂದು ಕೇಳುತ್ತಿದ್ದ. ಅದೊಂದು ಸವಾಲಿನ ವಿಷಯವಾಗಿತ್ತು” ಎಂದು ಶುಭಾಂಶು ತಮ್ಮ ಇನ್ಸ್ಟಾಗ್ರಾಮ್ ಪೋಸ್ಟ್ನಲ್ಲಿ ಬರೆದುಕೊಂಡಿದ್ದಾರೆ.
“ಭೂಮಿಗೆ ಮರಳಿ ಈಗ ನನ್ನ ಕುಟುಂಬವನ್ನು ಆಲಿಂಗಿಸಿಕೊಂಡಾಗ ಮನೆಗೆ ಮರಳಿದಂತಾಯಿತು. ನೀವೂ ಅಷ್ಟೇ- ನಿಮ್ಮ ಪ್ರೀತಿಪಾತ್ರರನ್ನು ಭೇಟಿ ಮಾಡಿ, ನೀವು ಅವರನ್ನು ತುಂಬಾ ಪ್ರೀತಿಸುತ್ತೀರಿ ಎಂಬುದನ್ನು ಅವರಿಗೆ ಹೇಳಿ. ನಾವು ಬಹಳಷ್ಟು ಬಾರಿ ನಮ್ಮ ಕೆಲಸಗಳಲ್ಲಿ ಬ್ಯುಸಿಯಾಗಿ, ನಮ್ಮ ಜೀವನದಲ್ಲಿ ಪ್ರೀತಿಪಾತ್ರರು ಎಷ್ಟು ಮುಖ್ಯ ಎಂಬುದನ್ನೇ ಮರೆತುಬಿಡುತ್ತೇವೆ” ಎಂದು ಹೇಳಿದ್ದಾರೆ.
ಅವರ ನೆಚ್ಚಿನ ಖಾದ್ಯಗಳನ್ನು ಸಿದ್ಧಪಡಿಸುತ್ತಿದ್ದೇನೆ
ಶುಭಾಂಶು ಅವರ ಪತ್ನಿ ಕಾಮನಾ ಅವರು, ಜೂನ್ 25ರಂದು ಶುಭಾಂಶು ಅವರ ಬಾಹ್ಯಾಕಾಶ ಯಾತ್ರೆ ಸಿದ್ಧತೆಗಳನ್ನು ಪ್ರಾರಂಭಿಸಿದಾಗಿನಿಂದ ಅಮೆರಿಕದಲ್ಲೇ ಇದ್ದಾರೆ. “ಶುಭಾಂಶು ಸುರಕ್ಷಿತವಾಗಿ ಮರಳಿದ ನಂತರ, ನಮ್ಮ ತಕ್ಷಣದ ಗಮನ ಅವರ ಪುನಶ್ಚೇತನ ಮತ್ತು ಭೂಮಿಯ ಜೀವನಕ್ಕೆ ಅವರು ಸುಗಮವಾಗಿ ಹೊಂದಿಕೊಳ್ಳುವುದನ್ನು ಖಚಿತಪಡಿಸಿಕೊಳ್ಳುವುದಾಗಿದೆ.
ಈ ಅದ್ಭುತ ಪ್ರಯಾಣದ ನಂತರ ನಾವು ಮತ್ತೆ ಒಂದಾಗಿರುವುದೇ ಒಂದು ಸಂಭ್ರಮ” ಎಂದು ಕಾಮನಾ ಹೇಳಿದ್ದಾರೆ. “ಅವರು ಬಾಹ್ಯಾಕಾಶದಲ್ಲಿ ಮನೆಯ ಊಟವನ್ನು ಬಹಳ ಮಿಸ್ ಮಾಡಿಕೊಂಡಿರುತ್ತಾರೆ. ಅದಕ್ಕಾಗಿ ನಾನು ಈಗಾಗಲೇ ಅವರ ನೆಚ್ಚಿನ ಕೆಲವು ಖಾದ್ಯಗಳನ್ನು ಸಿದ್ಧಪಡಿಸುತ್ತಿದ್ದೇನೆ” ಎಂದಿದ್ದಾರೆ.
