ನವದೆಹಲಿ: ಪ್ರಧಾನಮಂತ್ರಿ ನರೇಂದ್ರ ಮೋದಿ ಅವರ ಅಧ್ಯಕ್ಷತೆಯಲ್ಲಿ ನಡೆದ ಕೇಂದ್ರ ಸಚಿವ ಸಂಪುಟ ಸಭೆಯಲ್ಲಿ ಮಹಿಳೆಯರು ಹಾಗೂ ಪರಿಶಿಷ್ಟ ಜಾತಿ (SC) ಮತ್ತು ಪರಿಶಿಷ್ಟ ಪಂಗಡದ (ST) ಉದ್ಯಮಿಗಳಿಗಾಗಿ ಮಹತ್ವದ ನಿರ್ಧಾರ ತೆಗೆದುಕೊಳ್ಳಲಾಗಿದೆ. ಜನಪ್ರಿಯ ‘ಸ್ಟ್ಯಾಂಡ್-ಅಪ್ ಇಂಡಿಯಾ’ (Stand-Up India) ಯೋಜನೆಯನ್ನು ಮುಂದುವರಿಸಲು ಸಚಿವ ಸಂಪುಟ ಹಸಿರು ನಿಶಾನೆ ತೋರಿದೆ. ಇದರೊಂದಿಗೆ ಅರ್ಹ ಸಾಲಗಾರರಿಗೆ ಅನುಕೂಲವಾಗಲು 4,111 ಕೋಟಿ ರೂಪಾಯಿಗಳ ಸಾಲ ಖಾತರಿ ನಿಧಿಯನ್ನು ಸ್ಥಾಪಿಸಲು ಅನುಮೋದನೆ ನೀಡಲಾಗಿದೆ.
2031ರವರೆಗೆ ಯೋಜನೆ ವಿಸ್ತರಣೆ: ಮಹಿಳೆಯರು ಮತ್ತು ದಲಿತ ಸಮುದಾಯಗಳ ಉದ್ಯಮಶೀಲತೆಯನ್ನು ಮತ್ತಷ್ಟು ಬಲಪಡಿಸುವ ಉದ್ದೇಶದಿಂದ ಜಾರಿಯಲ್ಲಿರುವ ‘ಸ್ಟ್ಯಾಂಡ್-ಅಪ್ ಇಂಡಿಯಾ’ ಯೋಜನೆಯನ್ನು ಮಾರ್ಚ್ 31, 2031ರವರೆಗೆ ಅಂದರೆ ಇನ್ನೂ ಐದು ವರ್ಷಗಳ ಕಾಲ ವಿಸ್ತರಿಸಲಾಗಿದೆ. ಈ ವಿಸ್ತೃತ ಅವಧಿಯಲ್ಲಿ ಕನಿಷ್ಠ 2.5 ಲಕ್ಷಕ್ಕೂ ಅಧಿಕ ಹೊಸ ಉದ್ಯಮಿಗಳಿಗೆ ಆರ್ಥಿಕ ನೆರವು ಕಲ್ಪಿಸುವ ಗುರಿಯನ್ನು ಸರ್ಕಾರ ಹೊಂದಿದೆ.
ಯೋಜನೆಯ ಪ್ರಮುಖ ಅಂಶಗಳು
ಯಾರಿಗೆ ಲಭ್ಯ?: ಮಹಿಳಾ ಉದ್ಯಮಿಗಳು ಹಾಗೂ ಎಸ್ಸಿ ಮತ್ತು ಎಸ್ಟಿ ಸಮುದಾಯದವರು ಹೊಸ ಉದ್ಯಮಗಳನ್ನು ಸ್ಥಾಪಿಸಲು ಬಯಸುವವರಿಗೆ ಈ ಯೋಜನೆಯ ಲಾಭ ದೊರೆಯಲಿದ.
ಸಾಲದ ಮೊತ್ತ: ಉತ್ಪಾದನಾ, ಸೇವೆ, ವ್ಯಾಪಾರ ಮತ್ತು ಕೃಷಿ-ಅನುಬಂಧಿತ ಚಟುವಟಿಕೆಗಳಿಗೆ 10 ಲಕ್ಷ ರೂ.ನಿಂದ 1 ಕೋಟಿ ರೂ.ವರೆಗೆ ಸಾಲ ಪಡೆಯಬಹುದು.
ಸಾಲದ ಸ್ವರೂಪ: ಬಂಡವಾಳ ಮತ್ತು ಟರ್ಮ್ ಲೋನ್ ಎರಡನ್ನೂ ಒಳಗೊಂಡ ಸಂಯೋಜಿತ ಸೌಲಭ್ಯವಾಗಿ ಅಥವಾ ಪ್ರತ್ಯೇಕ ಅವಧಿ ಸಾಲವಾಗಿ ಇದನ್ನು ಪಡೆಯಬಹುದು.
ಕ್ರೆಡಿಟ್ ಗ್ಯಾರಂಟಿ: ಸಾಲದ ಮೊತ್ತಕ್ಕೆ ಶೇ. 85ರಷ್ಟು ಕ್ರೆಡಿಟ್ ಗ್ಯಾರಂಟಿ ರಕ್ಷಣೆ ದೊರೆಯಲಿದ್ದು, ಇದಕ್ಕೆ ಶೇ. 0.50ರಷ್ಟು ಪ್ರಮಾಣಿತ ಗ್ಯಾರಂಟಿ ಶುಲ್ಕ ಅನ್ವಯವಾಗುತ್ತದೆ.
