ಜಗತ್ತಿಗೇ ಭಾರತ ‘ಕರೆಂಟ್’ ಶಾಕ್; ಆತ್ಮನಿರ್ಭರ ಸಾಧನೆ

ದೇಶವು ಈಗ ಹಲವು ವಿಷಯಗಳಲ್ಲಿ ಆತ್ಮನಿರ್ಭರತೆ ಸಾಧಿಸುತ್ತಿದೆ. ಅದರಲ್ಲೂ, ರಕ್ಷಣಾ ಉತ್ಪಾದನೆ, ಸ್ಮಾರ್ಟ್ ಫೋನ್ ತಯಾರಿಕೆ ಸೇರಿ ಹಲವು ಕ್ಷೇತ್ರಗಳಲ್ಲಿ ಆತ್ಮನಿರ್ಭರತೆ ಸಾಧಿಸಿದೆ. ಇದರ ಬೆನ್ನಲ್ಲೇ, ಭಾರತವೀಗ ವಿದ್ಯುತ್ ಉತ್ಪಾದನೆಯಲ್ಲೂ ಆತ್ಮನಿರ್ಭರತೆ ಸಾಧಿಸಿದೆ. ಅದರಲ್ಲೂ, ಅತಿ ಹೆಚ್ಚು ವಿದ್ಯುತ್ ಉತ್ಪಾದನೆಯಲ್ಲಿ ಜಗತ್ತಿನಲ್ಲೇ ಮೂರನೇ ಸ್ಥಾನಕ್ಕೆ ಜಿಗಿದಿದೆ. ಘಟಾನುಘಟಿ ದೇಶಗಳನ್ನು ಹಿಂದಿಕ್ಕಿ ಭಾರಿ ಮುನ್ನಡೆ ಸಾಧಿಸಿದೆ.

ವಿದ್ಯುತ್ ಉತ್ಪಾದನೆಯಲ್ಲಿ ಭಾರತ ಮೈಲುಗಲ್ಲು
ಶುದ್ಧ ಇಂಧನ ಉತ್ಪಾದನೆಗೆ ಆದ್ಯತೆ ನೀಡಿದ್ದು ಸಕ್ಸೆಸ್
ಇದರೊಂದಿಗೆ ಭಾರತ ಆತ್ಮನಿರ್ಭರತೆ

2025ರ ಜನವರಿಯಲ್ಲಿ ಸೌರ ವಿದ್ಯುತ್ ಸಾಮರ್ಥ್ಯ 100 ಗಿಗಾ ವ್ಯಾಟ್ ದಾಟಿದೆ. ಮಾರ್ಚ್ ಅಂತ್ಯದ ವೇಳೆಗೆ 1,05,646 ಮೆಗಾವ್ಯಾಟ್ ಉತ್ಪಾದನೆಯಾಗಿದೆ. 2014ರಲ್ಲಿ ಸೌರ ವಿದ್ಯುತ್ ಉತ್ಪಾದನೆ ಪ್ರಮಾಣ 2.82 ಗಿಗಾ ವ್ಯಾಟ್ ಇತ್ತು. ಇದೂ 2025ರಲ್ಲಿ 100 ಗಿಗಾವ್ಯಾಟ್ ಗೆ ಜಿಗಿದಿದೆ. ಸೌರ ಫಲಕಗಳ ಅಳವಡಿಕೆಯ ಬೃಹತ್ ಯೋಜನೆಗೆ ತಗಲುವ ವೆಚ್ಚವು ಶೇ. 26ರಷ್ಟು ಕಡಿಮೆಯಾಗಿದೆ. ಇದು ಪ್ರತಿ ತ್ರೈಮಾಸಿಕಕ್ಕೂ ಶೇ. 2ರಷ್ಟು ಕಡಿತಗೊಳ್ಳುತ್ತಾ ಸಾಗಿದೆ. ಇದು ಕೂಡ ಸೌರ ವಿದ್ಯುತ್ ಉತ್ಪಾದನೆಯನ್ನು ಹೆಚ್ಚಿಸಿದೆ.

ಸಾಂಪ್ರದಾಯಿಕ ವಿದ್ಯುತ್ ಉತ್ಪಾದನೆಗೆ ವೇಗ
ಕಳೆದ 5 ವರ್ಷಗಳಲ್ಲಿ ಉತ್ಪಾದನೆ ಹೆಚ್ಚಳ
ಜಾಗತಿಕ ಸಂಸ್ಥೆಯಿಂದಲೇ ಸಿಕ್ತು ಸರ್ಟಿಫಿಕೇಟ್

ಸಾಂಪ್ರದಾಯಿಕ ಹಾಗೂ ನವೀಕೃತ ಇಂಧನ ಮೂಲಗಳಿಂದ ದೇಶದಲ್ಲಿ ವಿದ್ಯುತ್ ಉತ್ಪಾದನೆ ತೀವ್ರಗತಿಯಲ್ಲಿ ಹೆಚ್ಚುತ್ತಿದೆ. ಕಳೆದ ಐದು ವರ್ಷಗಳಲ್ಲಿ ಭಾರತ ವಿದ್ಯುತ್ ಉತ್ಪಾದನಾ ಸಾಮರ್ಥ್ಯ ಹೆಚ್ಚಳವಾಗಿದ್ದು, ಮೂರನೇ ಸ್ಥಾನ ಗಳಿಸಿದೆ. ಪಳೆಯುಳಿಕೆ ರಹಿತ ವಿದ್ಯುತ್ ಉತ್ಪಾದನೆಯಲ್ಲಿಯೂ ಭಾರತ ಉತ್ತಮ ಸಾಧನೆ ಮಾಡುತ್ತಿದೆ ಎಂದು ಅಂತಾರಾಷ್ಟ್ರೀಯ ಇಂಧನ ಏಜೆನ್ಸಿ ಎಂಬ ಸಂಸ್ಥೆಯೇ ತಿಳಿಸಿದೆ.

ವಾಣಿಜ್ಯ ಮತ್ತು ವಸತಿ ಸ್ಥಳಗಳ ವಿಸ್ತರಣೆ, ಹವಾ ನಿಯಂತ್ರಕ ಸಾಧನಗಳ ವ್ಯಾಪಕ ಬಳಕೆ, ಗೃಹೋಪಯೋಗಿ ಸಲಕರಣೆಗಳ ಬಳಕೆಯಲ್ಲಿ ಕ್ರಾಂತಿ ಹಾಗೂ ಕೈಗಾರಿಕೆಗಳಿಂದ ಭಾರತದಲ್ಲಿ ವಿದ್ಯುತ್ಗೆ ಹೆಚ್ಚಿನ ಬೇಡಿಕೆ ಉಂಟಾಗಿದೆ. ಬೇಡಿಕೆಯನ್ನು ತಲುಪಲು ಪರ್ಯಾಯ ಶಕ್ತಿಮೂಲಗಳನ್ನೂ ವ್ಯಾಪಕವಾಗಿ ಬಳಸಿಕೊಳ್ಳಲಾಗುತ್ತಿದೆ.

ಸ್ವಚ್ಛ ಇಂಧನ ಉತ್ಫಾದನೆಗೆ ಹೆಚ್ಚು ಹಣ ಬಳಕೆ
ಜಾಗತಿನ ಸಂಸ್ಥೆಯ ನೆರವಿನ ಸದ್ಬಳಕೆ
ವಿದ್ಯುತ್ ಕ್ಷೇತ್ರದಲ್ಲಿ ಎಫ್ ಡಿ ಐಗೂ ಉತ್ತೇಜನ

ಐಇಎ ವರದಿ ಪ್ರಕಾರ ಕಳೆದ ಐದು ವರ್ಷದಲ್ಲಿ ಭಾರತದಲ್ಲಿ ಸ್ವಚ್ಛ ಇಂಧನ ಕ್ಷೇತ್ರದಲ್ಲಿ ಮಾಡಲಾಗಿರುವ ಹೂಡಿಕೆಯಲ್ಲಿ ಅರ್ಧಕ್ಕಿಂತ ಹೆಚ್ಚಿನ ಮೊತ್ತವನ್ನು ಸೌರ ವಿದ್ಯುತ್ ಉತ್ಪಾದನೆಗೆ ಹೂಡಲಾಗಿದೆ. ಕಳೆದ ವರ್ಷ ಅಂದರೆ 2024ರಲ್ಲಿ ವಿದ್ಯುತ್ ಕ್ಷೇತ್ರದಲ್ಲಿನ ಶೇ. 83ರಷ್ಟು ಹೂಡಿಕೆಯು ಸ್ವಚ್ಛ ಇಂಧನ ತಯಾರಿಕೆಗೆ ವೆಚ್ಚವಾಗಿದೆ. ಶುದ್ಧ ಇಂಧನಕ್ಕಾಗಿ 2024ರಲ್ಲಿಅಭಿವೃದ್ಧಿ ಹಣಕಾಸು ಸಂಸ್ಥೆ (ಡಿಎಫ್ಐ) ಮೂಲಕ ಭಾರತ ಹೆಚ್ಚಿನ ಹಣಕಾಸು ನೆರವನ್ನು ಪಡೆದಿದೆ. ಶುದ್ಧ ಇಂಧನ ತಯಾರಿಕೆಯ ಯೋಜನೆಗಳಿಗೆ 2.4 ಶತಕೋಟಿ ಡಾಲರ್ ನೆರವು ಪಡೆದಿದೆ. ಇದಲ್ಲದೆ ವಿದ್ಯುತ್ ಕ್ಷೇತ್ರದಲ್ಲಿ ವಿದೇಶಿ ನೇರ ಹೂಡಿಕೆಗೆ ಹೆಚ್ಚು ಅವಕಾಶ ಕಲ್ಪಿಸಲಾಗಿದೆ. ಪರಮಾಣು ವಿದ್ಯುತ್ ಹೊರತು ಪಡಿಸಿ ಉಳಿದೆಲ್ಲಾ ಮೂಲಗಳ ವಿದ್ಯುತ್ ಉತ್ಪಾದನೆ, ಪ್ರಸರಣ ಮೂಲ ಸೌಕರ್ಯದ ಕ್ಷೇತ್ರಗಳಲ್ಲಿ ಎಫ್ಡಿಐಗೆ ಶೇ.100 ರಷ್ಟು ಅವಕಾಶ ನೀಡಲಾಗಿದೆ.

10 ವರ್ಷದಲ್ಲಿ ಶೇ.56ರಷ್ಟು ಉತ್ಪಾದನೆ ಏರಿಕೆ
ವಿದ್ಯುತ್ ಕೊರತೆಯ ಪ್ರಮಾಣವೂ ಗಣನೀಯ ಕುಸಿತ
2030ರ ವೇಳೆಗೆ ಭಾರತದ ಗುರಿ ಇನ್ನೂ ಸ್ಪಷ್ಟ

ಕಳೆದ ಹತ್ತು ವರ್ಷಗಳಲ್ಲಿ ಭಾರತದ ವಿದ್ಯುತ್ ಉತ್ಪಾದನೆ ಸಾಮರ್ಥ್ಯ ಶೇ.56ರಷ್ಟು ಹೆಚ್ಚಾಗಿದೆ. ಅಂದ್ರೆ, 305 ಗಿಗಾ ವ್ಯಾಟ್ ನಿಂದ 476 ಗಿಗಾವ್ಯಾಟ್ ಗೆ ಹೆಚ್ಚಳವಾಗಿದೆ. ಪಳೆಯುಳಿಕೆ ರಹಿತ ಇಂಧನ ಉತ್ಪಾದನೆ ಒಟ್ಟು ಉತ್ಪಾದನೆಯ 49% ಆಗಿದೆ. ಇದರಲ್ಲಿ226.9 ಗಿಗಾವ್ಯಾಟ್ ನವೀಕರಿಸಬಹುದಾದ ಮೂಲಗಳಿಂದ ಉತ್ಪಾದಿಸಲಾದರೆ, 8.8 ಗಿಗಾವ್ಯಾಟ್ ಪರಮಾಣು ವಿದ್ಯುತ್ ನಿಂದ ಉತ್ಪಾದಿಸಲಾಗಿದೆ. ವಿದ್ಯುತ್ ಕೊರತೆಯ ಪ್ರಮಾಣವೂ ಶೇ.4ರಿಂದ ಶೇ.0.1ಕ್ಕೆ ಇಳಿಸಲಾಗಿದೆ. ಇನ್ನು, 2030ರ ವೇಳೆಗೆ 500 ಗಿಗಾ ವ್ಯಾಟ್ ಉತ್ಪಾದಿಸುವ ಗುರಿಯನ್ನು ಭಾರತ ಹೊಂದಿದೆ. ಜಗತ್ತಿನಲ್ಲೇ ಭಾರತವು ಚೀನಾ, ಅಮೆರಿಕ ನಂತರ ಹೆಚ್ಚು ವಿದ್ಯುತ್ ಉತ್ಪಾದಿಸುವ ರಾಷ್ಟ್ರವಾಗಿ ಹೊರಹೊಮ್ಮಿದೆ.