ಟೆಹ್ರಾನ್: ಇರಾನ್-ಇಸ್ರೇಲ್ ನಡುವಿನ ಭಾರೀ ಸಂಘರ್ಷದ ಮಧ್ಯೆಯೇ ಅಮೆರಿಕವೂ ತನ್ನ ಮೇಲೆ ದಾಳಿ ನಡೆಸುವ ಸಾಧ್ಯತೆಯಿದೆ ಎಂದು ಮೊದಲೇ ಊಹಿಸಿದ್ದ ಇರಾನ್ ಚಾಣಾಕ್ಷ ನಡೆಯಿಟ್ಟಿತ್ತೇ ಎಂಬ ಚರ್ಚೆ ಈಗ ಆರಂಭವಾಗಿದೆ.
ಅಮೆರಿಕವು ತನ್ನ ಮೂರು ಪರಮಾಣು ಕೇಂದ್ರಗಳನ್ನು ಗುರಿಯಾಗಿಸಿ ದಾಳಿ ನಡೆಸುವುದಕ್ಕೂ ಮುನ್ನವೇ ಇರಾನ್ ತನ್ನ ಪ್ರಮುಖ ಅಣ್ವಸ್ತ್ರ ಕೇಂದ್ರಗಳಿಂದ ಸುಮಾರು 400 ಕಿಲೋಗ್ರಾಂ ಶುದ್ಧೀಕರಿಸಿದ ಯುರೇನಿಯಂ ಅನ್ನು ಅಜ್ಞಾತ ಸ್ಥಳಕ್ಕೆ ಸ್ಥಳಾಂತರಿಸಿರಬಹುದು ಎಂಬ ಹೊಸ ಗುಪ್ತಚರ ಮಾಹಿತಿ ಬೆಳಕಿಗೆ ಬಂದಿದೆ. ಇದು ನಿಜವೆಂದಾದರೆ ಅಮೆರಿಕ ಅಧ್ಯಕ್ಷ ಡೊನಾಲ್ಡ್ ಟ್ರಂಪ್‌ರವರ “ಇರಾನ್‌ನ ಅಣ್ವಸ್ತ್ರ ಸಾಮರ್ಥ್ಯವನ್ನು ಸಂಪೂರ್ಣವಾಗಿ ಧ್ವಂಸಗೊಳಿಸಲಾಗಿದೆ” ಎಂಬ ಹೇಳಿಕೆಗೆ ಬೆಲೆಯಿಲ್ಲದಂತಾಗಲಿದೆ. ಜೊತೆಗೆ ಟ್ರಂಪ್‌ಗೆ ಮುಖಭಂಗವಾದಂತಾಗಲಿದೆ.
ಜೂನ್ 21ರ ತಡರಾತ್ರಿ (ಭಾರತೀಯ ಕಾಲಮಾನ ಭಾನುವಾರ ಮುಂಜಾನೆ 4.20) ಅಮೆರಿಕ ಸೇನೆಯು ಇಸ್ರೇಲ್ ಗುಪ್ತಚರ ಇಲಾಖೆಯ ಸಹಯೋಗದೊಂದಿಗೆ ಇರಾನ್‌ನ ಫೊರ್ಡೊ, ನತಾಂಜ್ ಮತ್ತು ಇಸ್ಫಹಾನ್ ಅಣ್ವಸ್ತ್ರ ಕೇಂದ್ರಗಳ ಮೇಲೆ ನಿಖರವಾದ ದಾಳಿಗಳನ್ನು ನಡೆಸಿತ್ತು. ಟ್ರಂಪ್ ಈ ಕಾರ್ಯಾಚರಣೆಯನ್ನು ದೊಡ್ಡ ಯಶಸ್ಸು ಎಂದು ಬಣ್ಣಿಸಿದ್ದರೂ, ಇರಾನ್‌ನ ಅಧಿಕಾರಿಗಳು ತಮ್ಮ “ಪ್ರಮುಖ ಅಣ್ವಸ್ತ್ರ ಮೂಲಸೌಕರ್ಯವು ಯಥಾಸ್ಥಿತಿಯಲ್ಲಿದೆ” ಎಂದು ಹೇಳಿಕೊಂಡಿದ್ದಾರೆ. ನಮ್ಮ ಯುರೇನಿಯಂ ಶುದ್ಧೀಕರಣ ಸಾಮರ್ಥ್ಯಕ್ಕೆ ಗಮನಾರ್ಹ ಹಾನಿಯಾಗಿಲ್ಲ ಎಂದು ಇರಾನ್‌ನ ಸರ್ಕಾರಿ ಮಾಧ್ಯಮಗಳೂ ಹೇಳಿಕೊಂಡಿವೆ.
ಫೊರ್ಡೊ ಪರಮಾಣು ಕೇಂದ್ರದಿಂದ 400 ಕೆ.ಜಿ. 60% ಶುದ್ಧತೆಯ ಯುರೇನಿಯಂ ಮತ್ತು ಇತರ ಸಾಧನಗಳನ್ನು ದಾಳಿಗೂ ಮುನ್ನವೇ ಸ್ಥಳಾಂತರಿಸಲಾಗಿದೆ ಎಂದು ಇಸ್ರೇಲ್‌ನ ಇಬ್ಬರು ಗುಪ್ತಚರ ಅಧಿಕಾರಿಗಳನ್ನು ಉಲ್ಲೇಖಿಸಿ ನ್ಯೂಯಾರ್ಕ್ ಟೈಮ್ಸ್ ವರದಿ ಮಾಡಿದೆ. ಈ ಯುರೇನಿಯಂ 90% ಶುದ್ಧತೆಯ ಅಣ್ವಸ್ತ್ರ-ದರ್ಜೆಯ ಇಂಧನಕ್ಕಿಂತ ಸ್ವಲ್ಪ ಕಡಿಮೆ ದರ್ಜೆಯದ್ದಾಗಿದೆ. ಅಮೆರಿಕದ ಉಪಾಧ್ಯಕ್ಷ ಜೆಡಿ ವ್ಯಾನ್ಸ್ ಸೇರಿದಂತೆ ಹಿರಿಯ ಅಧಿಕಾರಿಗಳು ಇರಾನ್‌ನ ಯುರೇನಿಯಂ ಭಂಡಾರದ ಪ್ರಸ್ತುತ ಸ್ಥಳದ ಬಗ್ಗೆ ತಿಳಿದಿಲ್ಲ ಎಂದು ಒಪ್ಪಿಕೊಂಡಿದ್ದಾರೆ. “ಇದನ್ನು ಇರಾನಿಯರೊಂದಿಗೆ ಚರ್ಚಿಸಲಾಗುವುದು” ಎಂದು ವ್ಯಾನ್ಸ್ ತಿಳಿಸಿದ್ದಾರೆ.
2015ರ ಅಣ್ವಸ್ತ್ರ ಒಪ್ಪಂದದ ವೈಫಲ್ಯದ ನಂತರ ಇರಾನ್‌ನ ಯುರೇನಿಯಂ ಶುದ್ಧೀಕರಣ ಚಟುವಟಿಕೆಗಳು ಗಮನಾರ್ಹವಾಗಿ ಹೆಚ್ಚಿವೆ. ಇತ್ತೀಚಿನ ಐಎಇಎ ವರದಿಯ ಪ್ರಕಾರ, ಇರಾನ್‌ನ 60% ಶುದ್ಧತೆಯ ಯುರೇನಿಯಂ ಭಂಡಾರವು 140 ಕಿಲೋಗ್ರಾಂಗಳನ್ನು ಮೀರಿದ್ದು, ಇದು ಹೆಚ್ಚಿನ ಶುದ್ಧೀಕರಣದೊಂದಿಗೆ ಬಹು ಅಣ್ವಸ್ತ್ರಗಳನ್ನು ತಯಾರಿಸಲು ಸಾಕಾಗುತ್ತದೆ. ಈ ಘಟನೆಯು ಇರಾನ್‌ನ ಚಾಣಾಕ್ಷತನವನ್ನು ತೋರಿಸಿದ್ದು, ಅಮೆರಿಕ ಮತ್ತು ಇಸ್ರೇಲ್‌ನ ದಾಳಿಗಳ ಉದ್ದೇಶವನ್ನು ಭಾಗಶಃ ವಿಫಲಗೊಳಿಸಿರಬಹುದು ಎಂದು ವಿಶ್ಲೇಷಕರು ಅಂದಾಜಿಸಿದ್ದಾರೆ.
