ಬೆಂಗಳೂರು: ಜಪಾನ್ ಮೂಲದ ಪ್ರಮುಖ ವಾಹನ ತಯಾರಿಕಾ ಸಂಸ್ಥೆ ನಿಸ್ಸಾನ್ ಮೋಟಾರ್ ಇಂಡಿಯಾ ಭಾರತದ ವಾಹನ ಮಾರುಕಟ್ಟೆಯಲ್ಲಿ ತನ್ನ ಉತ್ಪನ್ನ ಶ್ರೇಣಿಯನ್ನು ಗಣನೀಯವಾಗಿ ವಿಸ್ತರಿಸುವ ಮಹತ್ವದ ಯೋಜನೆಯನ್ನು ಘೋಷಿಸಿದೆ. ಇದರ ಭಾಗವಾಗಿ, ಕಂಪನಿಯು ಮುಂದಿನ ದಿನಗಳಲ್ಲಿ ಮೂರು ಹೊಸ ವಾಹನಗಳನ್ನು ಭಾರತದಲ್ಲಿ ಬಿಡುಗಡೆ ಮಾಡಲಿದೆ.
ಒಂದು ಏಳು ಆಸನಗಳ ಮಲ್ಟಿ-ಪರ್ಪಸ್ ವೆಹಿಕಲ್ (ಎಂಪಿವಿ) ಮತ್ತು ಎರಡು ಹೊಸ ಎಸ್ಯುವಿಗಳು (ಒಂದು ಐದು ಆಸನಗಳ ಮತ್ತು ಒಂದು ಏಳು ಆಸನಗಳ ಎಸ್ಯುವಿ). ಈ ಮೂರೂ ಮಾಡೆಲ್ಗಳು ನಿಸ್ಸಾನ್ ಮತ್ತು ರಿನೊ ಸಹಯೋಗದ ಭಾಗವಾಗಿ ಚೆನ್ನೈನ ಒರಗಡಂನಲ್ಲಿರುವ ತಯಾರಿಕಾ ಘಟಕದಲ್ಲಿ ಉತ್ಪಾದನೆಯಾಗಲಿವೆ. ಈ ಕಾರುಗಳನ್ನು ಭಾರತೀಯ ಮಾರುಕಟ್ಟೆಗೆ ಮಾತ್ರವಲ್ಲದೆ, ಜಾಗತಿಕ ರಫ್ತು ಮಾರುಕಟ್ಟೆಗಳಿಗೂ ತಯಾರಿಸಲು ನಿಸ್ಸಾನ್ ಸಜ್ಜಾಗಿದೆ.
ಬಿಡುಗಡೆ ದಿನಾಂಕ
ನಿಸ್ಸಾನ್ನ ಈ ಹೊಸ ವಾಹನಗಳು ನಿರ್ದಿಷ್ಟ ಸಮಯಾವಧಿಯಲ್ಲಿ ಮಾರುಕಟ್ಟೆ ಪ್ರವೇಶಿಸಲಿವೆ. ಮೊದಲನೆಯದಾಗಿ, ರಿನೊ ಟ್ರೈಬರ್ನ ಆಧಾರದ ಮೇಲೆ ತಯಾರಾಗುವ ಏಳು ಆಸನಗಳ ಎಂಪಿವಿಯು 2025ರ ಎರಡನೇ ಭಾಗದಲ್ಲಿ (ಜುಲೈ-ಡಿಸೆಂಬರ್) ಬಿಡುಗಡೆಯಾಗಲಿದೆ. ಈ ಸಬ್-4 ಮೀಟರ್ ವಾಹನವು ಕೈಗೆಟುಕುವ ಬೆಲೆಯಲ್ಲಿ ಕುಟುಂಬಗಳಿಗೆ ಮತ್ತು ಫ್ಲೀಟ್ ಖರೀದಿದಾರರಿಗೆ ಉತ್ತಮ ಆಯ್ಕೆಯಾಗುವ ನಿರೀಕ್ಷೆಯಿದೆ. ವಿನ್ಯಾಸದ ವಿಷಯದಲ್ಲಿ, ಇದು ಟ್ರೈಬರ್ನ ಒಳಾಂಗಣ ವಿನ್ಯಾಸ, ಡ್ಯಾಶ್ಬೋರ್ಡ್ ಲೇಔಟ್ ಮತ್ತು ಟಚ್ಸ್ಕ್ರೀನ್ ಇನ್ಫೋಟೈನ್ಮೆಂಟ್ ಘಟಕ ಪಡೆಯಲಿದೆ.
ನಿಸ್ಸಾನ್ನ ವಿಶಿಷ್ಟ ಗ್ರಿಲ್, ಹೊಸ ಬಂಪರ್, ಎಲ್ಇಡಿ ಡಿಆರ್ಎಲ್ಗಳು ಮತ್ತು ಡ್ಯುಯಲ್-ಟೋನ್ ರೂಫ್ ರೈಲ್ಗಳಂತಹ ವಿಶಿಷ್ಟ ವೈಶಿಷ್ಟ್ಯಗಳನ್ನು ಇದು ಹೊಂದಿರಲಿದೆ. ಸಿಎಂಎಫ್-ಎ ಪ್ಲಾಟ್ಫಾರ್ಮ್ನಲ್ಲಿ ನಿರ್ಮಿಸಲಾಗುವ ಈ ಎಂಪಿವಿಯು 1.0-ಲೀಟರ್ ನ್ಯಾಚುರಲ್ ಆಸ್ಪಿರೇಟೆಡ್ ಪೆಟ್ರೋಲ್ ಇಂಜಿನ್ ಅನ್ನು ಹೊಂದಿರುವ ಸಾಧ್ಯತೆಯಿದೆ.
ನಂತರದಲ್ಲಿ ಐದು ಸೀಟ್ಗಳ ಸಿ-ಸೆಗ್ಮೆಂಟ್ ಎಸ್ಯುವಿಯು 2026ರ ಎರಡನೇ ತ್ರೈಮಾಸಿಕದಲ್ಲಿ (ಏಪ್ರಿಲ್-ಜೂನ್) ಮಾರುಕಟ್ಟೆಗೆ ಬರಲಿದೆ. ಇದು ರಿನೊ ಡಸ್ಟರ್ನ ಆಧಾರದ ಮೇಲೆ ತಯಾರಾಗುವ ಮಧ್ಯಮ ಗಾತ್ರದ ಎಸ್ಯುವಿಯಾಗಿದ್ದು, ಭಾರತದ ಹೆಚ್ಚು ಸ್ಪರ್ಧಾತ್ಮಕ ಎಸ್ಯುವಿ ವಿಭಾಗದಲ್ಲಿ ಹ್ಯುಂಡೈ ಕ್ರೆಟಾ, ಕಿಯಾ ಸೆಲ್ಟೋಸ್, ಮಾರುತಿ ಗ್ರ್ಯಾಂಡ್ ವಿಟಾರಾ ಮತ್ತು ಟೊಯೊಟಾ ಅರ್ಬನ್ ಕ್ರೂಸರ್ ಹೈರೈಡರ್ನಂತಹ ಪ್ರಮುಖ ವಾಹನಗಳೊಂದಿಗೆ ಸೆಣಸಲಿದೆ. ವಿನ್ಯಾಸದಲ್ಲಿ, ಇದು ನಿಸ್ಸಾನ್ನ ಸಿಗ್ನೇಚರ್ ಗ್ರಿಲ್, ಎರಡು ತೆಳುವಾದ ಕ್ರೋಮ್ ಸ್ಟ್ರಿಪ್ಗಳು, ಎಲ್-ಆಕಾರದ ಎಲ್ಇಡಿ ಡಿಆರ್ಎಲ್ಗಳು ಮತ್ತು ಕ್ರೋಮ್ ಟ್ರಿಮ್ನಿಂದ ಜೋಡಿಸಲಾದ ವಿಶಿಷ್ಟ ಮುಂಭಾಗದ ಫೇಶಿಯಾವನ್ನು ಒಳಗೊಂಡಿರಲಿದೆ. ಇಂಜಿನ್ ಆಯ್ಕೆಯಾಗಿ 1.3-ಲೀಟರ್ ಟರ್ಬೊ-ಪೆಟ್ರೋಲ್ ಇಂಜಿನ್ ಲಭ್ಯವಿರಲಿದೆ ಎಂದು ವರದಿಗಳು ತಿಳಿಸಿವೆ.
ಮೂರನೆಯದಾಗಿ, ಏಳು ಸೀಟ್ಗಳ ಎಸ್ಯುವಿಯು ರಿನೊ ಬೊರಿಯಲ್ ಥ್ರೀ-ರೋ ಎಸ್ಯುವಿಯ ಆಧಾರದ ಮೇಲೆ ತಯಾರಾಗಲಿದ್ದು, 2026ರ ಮೊದಲ ಭಾಗದಲ್ಲಿ ಬಿಡುಗಡೆಯಾಗುವ ಸಾಧ್ಯತೆ ಇದೆ. ಇದು ಕಿಯಾ ಕ್ಯಾರೆನ್ಸ್, ಮಾರುತಿ ಸುಜುಕಿ ಎಕ್ಸ್ಎಲ್6 ಮತ್ತು ಇತರ ಏಳು ಆಸನಗಳ ಎಸ್ಯುವಿಗಳೊಂದಿಗೆ ಸ್ಪರ್ಧಿಸಲಿದೆ. ಈ ಎರಡೂ ಎಸ್ಯುವಿಗಳು ಸಿಎಂಎಫ್-ಬಿ ಪ್ಲಾಟ್ಫಾರ್ಮ್ನಲ್ಲಿ ಆಧರಿಸಿವೆ, ಇದು ರೆನಾಲ್ಟ್ ಡಸ್ಟರ್ ಮತ್ತು ಬೊರಿಯಲ್ಗೆ ಆಧಾರವಾಗಿದೆ.
ನಿಸ್ಸಾನ್ನ ದೀರ್ಘಾವಧಿ ಯೋಜನೆಗಳು
ನಿಸ್ಸಾನ್ ಭಾರತವನ್ನು ತನ್ನ ಪ್ರಮುಖ ರಫ್ತು ಕೇಂದ್ರವನ್ನಾಗಿ ಮಾಡಲು ಯೋಜಿಸಿದೆ. ಚೆನ್ನೈನ ರೆನೊ -ನಿಸ್ಸಾನ್ ಒಕ್ಕೂಟದ ಘಟಕದಲ್ಲಿ ತಯಾರಾಗಲಿರುವ ಈ ಹೊಸ ವಾಹನಗಳು ದೇಶೀಯ ಮಾರಾಟದ ಜೊತೆಗೆ ಜಾಗತಿಕ ಮಾರುಕಟ್ಟೆಗಳಿಗೆ ರಫ್ತಾಗಲಿವೆ. 2026ರ ವೇಳೆಗೆ ನಿಸ್ಸಾನ್ ಭಾರತದಲ್ಲಿ 1 ಲಕ್ಷ ಯೂನಿಟ್ಗಳ ಮಾರಾಟ (ದೇಶೀಯ ಮತ್ತು ರಫ್ತು) ಗುರಿಯನ್ನು ಹೊಂದಿದೆ. ಈ ಮಹತ್ವಾಕಾಂಕ್ಷೆಯ ಯೋಜನೆಗಾಗಿ, ರೆನಾಲ್ಟ್-ನಿಸ್ಸಾನ್ ಒಕ್ಕೂಟವು 600 ಮಿಲಿಯನ್ ಡಾಲರ್ಗಳ ಬೃಹತ್ ಹೂಡಿಕೆಯನ್ನು ಘೋಷಿಸಿದೆ, ಇದರಲ್ಲಿ ಚೆನ್ನೈ ತಯಾರಿಕಾ ಘಟಕದ ಉನ್ನತೀಕರಣವೂ ಸೇರಿದೆ.
ಈ ಮೂರು ವಾಹನಗಳ ಜೊತೆಗೆ, ನಿಸ್ಸಾನ್ ಎ-ಸೆಗ್ಮೆಂಟ್ ಎಲೆಕ್ಟ್ರಿಕ್ ಕಾರನ್ನು ಸಹ ಭಾರತದಲ್ಲಿ ಪರಿಚಯಿಸುವ ಯೋಜನೆಯಲ್ಲಿದೆ, ಆದರೆ ಇದರ ಬಿಡುಗಡೆ ದಿನಾಂಕವನ್ನು ಇನ್ನೂ ದೃಢೀಕರಿಸಲಾಗಿಲ್ಲ. ನಿಸ್ಸಾನ್ ಇಂಡಿಯಾದ ವ್ಯವಸ್ಥಾಪಕ ನಿರ್ದೇಶಕ ಸೌರಭ್ ವತ್ಸಾ ಅವರು, “ನಾವು ಭಾರತದಿಂದ ಎಲ್ಲಿಯೂ ಹೋಗುತ್ತಿಲ್ಲ” ಎಂದು ಸ್ಪಷ್ಟಪಡಿಸಿದ್ದಾರೆ. ಈ ಹೊಸ ಉತ್ಪನ್ನಗಳು ಭಾರತದಲ್ಲಿ ನಿಸ್ಸಾನ್ನ ಸ್ಥಾನವನ್ನು ಬಲಪಡಿಸಲಿವೆ ಮತ್ತು ಕಂಪನಿಯು ತನ್ನ ಭವಿಷ್ಯದ ಯೋಜನೆಗಳನ್ನು ಯಶಸ್ವಿಯಾಗಿ ಜಾರಿಗೊಳಿಸಲಿದೆ ಎಂದು ಅವರು ಒತ್ತಿಹೇಳಿದ್ದಾರೆ.
ನಿಸ್ಸಾನ್ನ ಈ ಹೊಸ ವಾಹನಗಳು ಭಾರತದ ಹೆಚ್ಚು ಸ್ಪರ್ಧಾತ್ಮಕ ಎಂಪಿವಿ ಮತ್ತು ಎಸ್ಯುವಿ ವಿಭಾಗಗಳಲ್ಲಿ ಸ್ಥಾನ ಪಡೆಯಲಿವೆ. ಸ್ಪರ್ಧಾತ್ಮಕ ಬೆಲೆ ಮತ್ತು ಸ್ಥಳೀಯವಾಗಿ ತಯಾರಾದ ವೈಶಿಷ್ಟ್ಯಗಳೊಂದಿಗೆ ಈ ವಾಹನಗಳು ಮಾರುಕಟ್ಟೆಯಲ್ಲಿ ಗಮನ ಸೆಳೆಯುವ ಸಾಧ್ಯತೆ ಇದೆ ಎಂದು ಉದ್ಯಮ ತಜ್ಞರು ಭಾವಿಸಿದ್ದಾರೆ.
