ನವದೆಹಲಿ: ಭಾರತದ ಪರ್ವತಾರೋಹಿ ಸುಬ್ರತಾ ಘೋಷ್(45) ಮತ್ತು ಫಿಲಿಪ್ಪೀನ್ಸ್ ಪರ್ವತಾರೋಹಿ ಫಿಲಿಪ್ ಸ್ಯಾಂಟಿಯಾಗೋ(45) ಅವರು ಎವರೆಸ್ಟ್ ಶಿಖರದಲ್ಲೇ(Mount Everest) ಪ್ರಾಣ ಬಿಟ್ಟ ಘಟನೆ ನಡೆದಿದೆ. ಇವರು ಈ ವರ್ಷದ ಮಾರ್ಚ್-ಮೇ ಪರ್ವತಾರೋಹಣದ ಸೀಸನ್ನಲ್ಲಿ ಜಗತ್ತಿನ ಅತಿ ಎತ್ತರದ ಶಿಖರ ಮೌಂಟ್ ಎವರೆಸ್ಟ್ ನಲ್ಲಿ ಮೃತಪಟ್ಟ ಮೊದಲಿಗರು.
ಶಿಖರದ ತುತ್ತತುದಿ 29032 ಅಡಿ ಎತ್ತರಕ್ಕೆ ತಲುಪಿ, ವಾಪಸ್ ಬರುವ ವೇಳೆ ಹಿಲರಿ ಸ್ಟೆಪ್ ನ ಕೆಳಗೇ ಸುಬ್ರತಾ ಘೋಷ್ ಸಾವನ್ನಪ್ಪಿದ್ದಾರೆ. ಹಿಲರಿ ಸ್ಟೆಪ್ನಿಂದ ಕೆಳಗಿಳಿಯಲು ಅವರು ನಿರಾಕರಿಸಿದರು. ಹೀಗಾಗಿ ಅಲ್ಲೇ ಪ್ರಾಣ ಕಳೆದುಕೊಂಡರು ಎಂದು ನೇಪಾಳದ ಸ್ನೋವೀ ಹಾರಿಜಾನ್ ಟ್ರೆಕ್ಸ್ ಆಂಡ್ ಎಕ್ಸ್ ಪೆಡಿಷನ್ ಕಂಪನಿಯ ಬೋಧ್ರಾಜ್ ಭಂಡಾರಿ ಹೇಳಿದ್ದಾರೆ. ಸಾವಿನ ಕುರಿತು ಹೆಚ್ಚಿನ ವಿವರಗಳು ಲಭ್ಯವಾಗಿಲ್ಲ.
ಹಿಲರಿ ಸ್ಟೆಪ್ ಎನ್ನುವುದು “ಸಾವಿನ ವಲಯ”(ಡೆತ್ ಝೋನ್) ಎಂದು ಕರೆಯಲ್ಪಡುವ ಪ್ರದೇಶದಲ್ಲಿದೆ. ಇಲ್ಲಿ ಸಾಮಾನ್ಯ ಬದುಕುಳಿಯಲು ಸಾಲುವಷ್ಟು ಆಮ್ಲಜನಕದ ಮಟ್ಟ ಇರುವುದಿಲ್ಲ.
ಸುಬ್ರತಾ ಘೋಷ್ ಅವರ ಮೃತದೇಹವನ್ನು ಬೇಸ್ ಕ್ಯಾಂಪ್ಗೆ ತರಲು ಎಲ್ಲ ಪ್ರಯತ್ನ ನಡೆಸಲಾಗುತ್ತಿದೆ. ಮರಣೋತ್ತರ ಪರೀಕ್ಷೆಯ ಬಳಿಕವೇ ಅವರ ಸಾವಿಗೆ ನಿಖರ ಕಾರಣ ತಿಳಿದುಬರಲಿದೆ ಎಂದು ಭಂಡಾರಿ ತಿಳಿಸಿದ್ದಾರೆ. ಇದೇ ವೇಳೆ, ಫಿಲಿಪ್ಪೀನ್ಸ್ ಪರ್ವತಾರೋಹಿ ಫಿಲಿಪ್ ಸ್ಯಾಂಟಿಯಾಗೋ ಅವರು ಸೌತ್ ಕೋಲ್ ನಲ್ಲಿ ಪರ್ವತ ಏರುತ್ತಿರುವಾಗ ಮೃತಪಟ್ಟಿದ್ದಾರೆ ಎಂದು ಪ್ರವಾಸೋದ್ಯಮ ಇಲಾಖೆಯ ಅಧಿಕಾರಿಗಳು ತಿಳಿಸಿದ್ದಾರೆ.
ಸ್ಯಾಂಟಿಯಾಗೋ ಅವರು 4ನೇ ಕ್ಯಾಂಪ್ ತಲುಪುವಷ್ಟರಲ್ಲಿ ಸುಸ್ತಾಗಿದ್ದರು. ನಂತರ ತಮ್ಮ ಟೆಂಟ್ನಲ್ಲಿ ವಿಶ್ರಾಂತಿ ತೆಗೆದುಕೊಳ್ಳುತ್ತಿದ್ದಾಗ ಅಲ್ಲೇ ಕೊನೆಯುಸಿರೆಳೆದಿದ್ದಾರೆ ಎನ್ನಲಾಗಿದೆ.
ಪ್ರಸ್ತುತ ಋತುವಿನಲ್ಲಿ ಎವರೆಸ್ಟ್ ಶಿಖರ ಏರಲು ನೇಪಾಳವು 459 ಮಂದಿಗೆ ಪರವಾನಗಿ ನೀಡಿದೆ. ಮೇ ತಿಂಗಳಲ್ಲಿ ಈ ಋತು ಮುಗಿಯುತ್ತದೆ. ಈ ವಾರ ಸುಮಾರು 100 ಪರ್ವತಾರೋಹಿಗಳು ಮತ್ತು ಅವರ ಮಾರ್ಗದರ್ಶಕರು ಶಿಖರದ ತುದಿಗೆ ತಲುಪಿದ್ದಾರೆ. ಜಗತ್ತಿನ ಬಡ ದೇಶಗಳಲ್ಲಿ ಒಂದಾದ ನೇಪಾಳಕ್ಕೆ ಪರ್ವತಾರೋಹಣ, ಟ್ರೆಕಿಂಗ್ ಮತ್ತು ಪ್ರವಾಸೋದ್ಯಮವೇ ಆದಾಯ ಮತ್ತು ಉದ್ಯೋಗದ ಮೂಲವಾಗಿದೆ.
ಇದನ್ನೂ ಓದಿ: ಹಿಮಾಲಯ ವೆಲ್ನೆಸ್ ಹಿಮಾಲಯ 1ಡರ್ವೊಮನ್ ಪ್ರಾಜೆಕ್ಟ್ ಆರಂಭ
ಹಿಮಾಲಯದ ಹೈಕಿಂಗ್ ಅಧಿಕಾರಿಗಳ ಪ್ರಕಾರ, ಎವರೆಸ್ಟ್ ನಲ್ಲಿ ಪರ್ವತಾರೋಹಣಕ್ಕೆ ಅವಕಾಶ ನೀಡಿದ ನಂತರ 100ಕ್ಕೂ ಅಧಿಕ ವರ್ಷಗಳಲ್ಲಿ ಕನಿಷ್ಠ 345 ಮಂದಿ ಸಾವಿಗೀಡಾಗಿದ್ದಾರೆ.
