ಅಮೆರಿಕದ ಉಪಾಧ್ಯಕ್ಷ ಜೆಡಿ ವ್ಯಾನ್ಸ್ ಭಾರತ ಪ್ರವಾಸದಲ್ಲಿ

ಅಮೆರಿಕಾದ ಉಪಾಧ್ಯಕ್ಷ ಜೆಡಿ ವ್ಯಾನ್ಸ್ ಮತ್ತು ಅವರ ಪತ್ನಿ ಭಾರತ ಮೂಲದ ಉಷಾ ಈಗ ಹಿಂದೂಸ್ತಾನ ಪ್ರವಾಸದಲ್ಲಿದ್ದಾರೆ. ನಾಲ್ಕು ದಿನಗಳ ಈ ಭಾರತ ಯಾತ್ರೆಯಲ್ಲಿ ವ್ಯಾನ್ಸ್ ದಂಪತಿ ದೆಹಲಿ, ಆಗ್ರಾ ಸೇರಿದಂತೆ ಜೈಪುರಕ್ಕೂ ಭೇಟಿ ನೀಡುತ್ತಿದ್ದಾರೆ. ಹೀಗೆ ಭಾರತಕ್ಕೆ ಬಂದಿರುವ ಅಮೆರಿಕ ಉಪಾಧ್ಯಕ್ಷರ ಜೈಪುರ ಪ್ರವಾಸವೇ ಈಗ ತೀವ್ರ ಕುತೂಹಲ ಕೆರಳಿಸಿರುವುದು. ಅದು ಜೈಪುರದಲ್ಲಿ ವ್ಯಾನ್ಸ್ ದಂಪತಿ ತಂಗಲು ಆಯ್ಕೆ ಮಾಡಿಕೊಂಡಿರುವ ತಾಣವೇ ಈಗ ಬಲು ಚರ್ಚಿತ ಮತ್ತು ಐತಿಹಾಸಿಕವೂ ಹೌದು.

ಸವಾಯಿ ಮಾನ್ ಸಿಂಗ್ ಅರಮನೆಯಲ್ಲಿ ವಾಸ್ತವ್ಯ
ಇವತ್ತು ಅಮೆರಿಕಾ ಉಪಾಧ್ಯಕ್ಷರ ಭೇಟಿಯಿಂದ ಜೈಪುರದ ಐತಿಹಾಸಕ ರಾಮ್ ಬಾಗ್ ಅರಮನೆಗೆ ಇನ್ನಿಲ್ಲದ ಪ್ರಾಶಸ್ತ್ಯ ಬಂದಿದೆ. ಅಸಲಿಗೆ ತನ್ನೊಡಲಲ್ಲಿ ಅಪಾರ ಚಾರಿತ್ರಿಕ ಕತೆಗಳನ್ನು ಬಚ್ಚಿಟ್ಟುಕೊಂಡಿರುವ ರಾಮ್ ಬಾಗ್ ಪ್ಯಾಲೇಜ್ ಇವತ್ತು ತಾಜ್ ಗ್ರೂಪ್ ಆಫ್ ಹೋಟೆಲ್ ನ ಅಂಗವಾಗಿ ಕಾರ್ಯ ನಿರ್ವಹಿಸುತ್ತಿದೆ. ಭಾರತದ ಅತ್ಯಂತ ದುಬಾರಿ ಹೋಟೆಲ್ ಗಳಲ್ಲಿ ಒಂದೆನ್ನಿಸಿಕೊಳ್ಳುವ ರಾಮ್ ಬಾಗ್ ಪಂಚತಾರಾ ಹೋಟೆಲ್ ಆಗಿದ್ದು, ಇಲ್ಲೇ ವ್ಯಾನ್ಸ್ ದಂಪತಿ ತಂಗಲಿದ್ದಾರೆ.

ರಾಣಿ ಗಾಯತ್ರಿ ದೇವಿಯ ಕನಸಿನ ಅರಮನೆ
1835ರಲ್ಲಿ ರಾಜಾ ರಾಮ್ ಸಿಂಗ್ ತಮ್ಮ ಕನಸಿನ ಫಾರ್ಮ್ ಹೌಸ್ ಆಗಿ ಈ ಅರಮನೆಯನ್ನು ಕಟ್ಟಲು ಆರಂಭಿಸಿದರು. ಸಣ್ಣ ಪ್ರಮಾಣದಲ್ಲಿದ್ದ ಕಟ್ಟಡ ಮುಂದೆ 1857ರ ಸುಮಾರಿಗೆ ರಾಜ ವಂಶಸ್ಥರು ಶಿಕಾರಿಗೆ ಹೋದಾಗ ತಂಗುವ ತಾಣವಾಗಿ ಬದಲಾಗಿತ್ತು. ದಟ್ಟ ಕಾಡಿನ ನಡುವಿದ್ದ ಈ ಕಟ್ಟಡವನ್ನು ಮುಂದೆ ಸವಾಯ್ ಮಾನ್ ಸಿಂಗ್ 1931ರ ಹೊತ್ತಿಗೆ ರಾಜಮನೆತನದ ಅಧಿಕೃತ ನಿವಾಸವಾಗಿ ಪರಿವರ್ತಿಸಿದ್ದರು. ಮುಂದೆ ಅಂದ್ರೆ 1940ರಲ್ಲಿ ಮಾನ್ ಸಿಂಗ್ ರ ಮೂರನೇ ಪತ್ನಿಯಾಗಿ ಬಂದ ರಾಣಿ ಗಾಯತ್ರಿ ದೇವಿ ಈ ಅರಮನೆಯ ಒಡತಿಯಾದರು. ಇಂಗ್ಲೆಂಡ್ ನಲ್ಲಿ ಜನಿಸಿದ್ದ ಗಾಯತ್ರಿದೇವಿ ತಮ್ಮ ಅಪೂರ್ವ ಸೌಂದರ್ಯದಿಂದಲೇ ಖ್ಯಾತಿ ಪಡೆದವರು. ಅಂದಿನ ಕಾಲದಲ್ಲೇ ಮಾನ್ ಸಿಂಗ್ ಮತ್ತು ಗಾಯತ್ರಿ ದೇವಿ ವಿವಾಹಕ್ಕೆ ಮೂರೂವರೆ ಲಕ್ಷ ಖರ್ಚು ಮಾಡಲಾಗಿತ್ತು.

ಸಹಪಾಠಿ ಸೌಂದರ್ಯದ ಮೇಲೆ ಇಂದಿರಾ ಗಾಂಧಿ ಮುನಿಸು
ರವೀಂದ್ರನಾಥ್ ಠಾಗೂರು ಸ್ಥಾಪಿಸಿದ್ದ ಶಾಂತಿನಿಕೇತನ ಶಾಲೆಯಲ್ಲೇ ಗಾಯತ್ರಿದೇವಿ ಹಾಗೂ ಇಂದಿರಾ ಬಾಲ್ಯದಲ್ಲಿ ಶಿಕ್ಷಣ ಪಡೆದಿದ್ದರು. ಆದರೆ, ಮುಂದೆ 1975ರಲ್ಲಿ ದೇಶದಲ್ಲಿ ತುರ್ತು ಪರಿಸ್ಥಿತಿ ಹೇರಿದಾಗ ಇದೇ ಗಾಯತ್ರಿ ದೇವಿಯನ್ನು ಇಂದಿರಾ ಬಂಧನದಲ್ಲಿಡುತ್ತಾರೆ. ಸ್ಪುರದ್ರೂಪಿ ಗಾಯತ್ರಿ ಸೌಂದರ್ಯದ ಮೇಲೆ ಇಂದಿರಾಗೆ ಸಣ್ಣದೊಂದು ಅಸೂಯೆ ಇತ್ತು ಎಂಬ ಮಾತುಗಳಿವೆ. ಅಷ್ಟೇ ಅಲ್ಲಾ ಇದೇ ರಾಮ್ ಬಾಗ್ ಅರಮನೆ ಮೇಲೆ ಇಂದಿರಾ ಗಾಂಧಿ ನಿರ್ದೇಶನದಂತೆ ಐಟಿ ದಾಳಿ ಕೂಡ ನಡೆದಿತ್ತು. ಆಗ ಅರಮನೆಯಿಂದ 800 ಕೆಜಿ ಬಂಗಾರವನ್ನು ಸರ್ಕಾರ ಜಪ್ತಿ ಮಾಡಿತ್ತು ಎಂಬ ಮಾತುಗಳಿವೆ. ಇದೇ ಅರಮನೆ ಇದೀಗ ಚಾರಿತ್ರಿಕ ಪಂಚತಾರಾ ಹೋಟೆಲ್ ಆಗಿ ಬದಲಾಗಿದ್ದು, ಒಟ್ಟು 79 ಐಷಾರಾಮಿ ರೂಂಗಳಿವೆ. ಅಷ್ಟೇ ಅಲ್ಲಾ ಬರೋಬ್ಬರಿ 5 ಎಕರೆ ವ್ಯಾಪ್ತಿಯಲ್ಲಿರುವ ಹೋಟೆಲ್ ನಲ್ಲಿ ಬೃಹತ್ ಈಜುಕೊಳಗಳು, ದೊಡ್ಡ ಸಭಾ ಕೊಠಡಿಗಳು, ಶ್ರೀಮಂತ ಹೂದೋಟಗಳಿದ್ದು ಒಂದು ರಾತ್ರಿಗೆ 35ರಿಂದ 40 ಸಾವಿರ ರೂಪಾಯಿಂದ ಸೇವೆಗಳು ಆರಂಭವಾಗುತ್ತವೆ. ಒಟ್ಟಿನಲ್ಲಿ ಹತ್ತಾರು ಮೊದಲುಗಳಿಗೆ ಸಾಕ್ಷಿಯಾಗಿರುವ ರಾಮ್ ಬಾಗ್ ಹೋಟೆಲ್ ಇದೀಗ ಅಮೆರಿಕ ಉಪಾಧ್ಯಕ್ಷರ ಆತಿಥ್ಯಕ್ಕೆ ಅಣಿಯಾಗಿದೆ.