ಚಿಕ್ಕಮಗಳೂರು: ಹೋಟೆಲ್ ವೊಂದರಲ್ಲಿ ಊಟ ಮಾಡಿ ಬರೋಬ್ಬರಿ 35 ವರ್ಷಗಳ ನಂತರ ಬಿಲ್ ಪಾವತಿಸಿರುವ ಘಟನೆಯೊಂದು ವರದಿಯಾಗಿದೆ.
ಈ ಘಟನೆ ಮೂಡಿಗೆರೆ (Mudigere) ತಾಲೂಕಿನ ಕೊಟ್ಟಿಗೆಹಾರದಲ್ಲಿ ನಡೆದಿದೆ. 35 ವರ್ಷಗಳ ಹಿಂದೆ ಹೋಟೆಲ್ ನಲ್ಲಿ ಊಟ ಮಾಡಿ ಬಿಲ್ ನೀಡದೆ ಮರೆತು ಹೋಗಿದ್ದ ವ್ಯಕ್ತಿ, ಮತ್ತೆ ನೆನಪು ಮಾಡಿಕೊಂಡು ಅದೇ ಹೋಟೆಲ್ ಹುಡುಕಿಕೊಂಡು ಬಂದು ತಾವು ಊಟ ಮಾಡಿದ್ದ ಬಿಲ್ ಪಾವತಿಸಿ ಪ್ರಮಾಣಿಕತೆ ಮೆರೆದಿದ್ದಾರೆ. ಮಂಗಳೂರಿನ ದೇರಲಕಟ್ಟೆ ನಿವಾಸಿ ಮೊಹಮದ್ ಎಂಬುವವರು 35 ವರ್ಷಗಳ ಹಿಂದೆ ಕೆಲಸದ ಹಿನ್ನೆಲೆಯಲ್ಲಿ ಮೂಡಿಗೆರೆಗೆ ಬಂದಿದ್ದರು. ಕೆಲಸದ ನಂತರ ಮಂಗಳೂರಿಗೆ (Mangaluru) ಹಿಂದಿರುಗುವಾಗ ಹೊಟ್ಟೆ ಹಸಿವಿದ್ದರಿಂದ ಕೊಟ್ಟಿಗೆಹಾರದ ಹಳೆಯ ಭಾರತ್ ಹೋಟೆಲ್ ನಲ್ಲಿ ಕಡುಬು, ಮೀನು ಸಾರು ಊಟ ಸೇವಿಸಿದ್ದರು ಎನ್ನಲಾಗಿದೆ. ಊಟ ಮಾಡಿದ ನಂತರ ಬಿಲ್ ನೀಡಲು ಮರೆತಿದ್ದ ಅವರು ಬಸ್ ಹತ್ತಿ ಹೋಗಿದ್ದರು.
ಬಸ್ ಹತ್ತಿದ ನಂತರ ಅವರಿಗೆ ಬಿಲ್ ನೀಡದಿರುವುದು ನೆನಪಾಗಿದೆ. ಆಗ ಬೇಸರ ಮಾಡಿಕೊಂಡಿದ್ದಾರೆ. ಆನಂತರ ಅವರಿಗೆ ಕೊಟ್ಟಿಗೆಹಾರಕ್ಕೆ ಬರಲು ಆಗಿರಲಿಲ್ಲ. ಈಗ 35 ವರ್ಷದ ಹಿಂದೆ ಊಟ ಮಾಡಿ ಬಿಲ್ ನೀಡದೆ ಹೋಗಿದ್ದ ವಿಚಾರ ನೆನಪಾಗಿ ಕೊಟ್ಟಿಗೆಹಾರದ ಭಾರತ್ ಹೊಟೇಲ್ ಹೋಗಿ ವಿಷಯ ತಿಳಿಸಿ ಬಿಲ್ ನೀಡಿದ್ದಾರೆ. ಭಾರತ್ ಹೋಟೆಲ್ ಮಾಲೀಕರ ಮಗ ಅಬ್ದುಲ್ ಅಜೀದ್ ಎಂಬುವವರು ಅಲ್ಲಿದ್ದರು. ಅವರ ಬಳಿ ತಮ್ಮ ಊಟದ ವಿಚಾರ ಹೇಳಿ ಬಿಲ್ ಪಾವತಿ ಮಾಡಿ ಮತ್ತೆ ಅಲ್ಲೇ ಅದೇ ಕಡುಬು, ಮೀನು ಸಾರು ಊಟ ಮಾಡಿ ತೆರಳಿದ್ದಾರೆ. ಅವರ ಪ್ರಾಮಾಣಿಕತೆ ಕಂಡು ಎಲ್ಲರು ಮೆಚ್ಚುಗೆ ಗಳಿಸಿದ್ದಾರೆ.
