ವಾಷಿಂಗ್ಟನ್: ಅಮೆರಿಕ ಅಧ್ಯಕ್ಷ ಡೊನಾಲ್ಡ್ ಟ್ರಂಪ್ ಅವರು ಮತ್ತೆ ಮೂವರು ಭಾರತೀಯ ಮೂಲದವರನ್ನು ತಮ್ಮ ಆಡಳಿತಾತ್ಮಕ ತಂಡಕ್ಕೆ ಸೇರಿಸಿಕೊಂಡಿದ್ದಾರೆ. ವಿಶೇಷವೆಂದರೆ ಈ ಮೂವರಲ್ಲಿ ಬೆಂಗಳೂರು ಮೂಲದ ಸೌರಭ್ ಶರ್ಮಾ ಕೂಡ ಒಬ್ಬರು.
ಭಾರತೀಯ ಮೂಲದ ಅಮೆರಿಕನ್ನರಾದ ರಿಕಿ ಗಿಲ್ರನ್ನು ಅಮೆರಿಕದ ರಾಷ್ಟ್ರೀಯ ಭದ್ರತಾ ಮಂಡಳಿ (ಎನ್ಎಸ್ಸಿ)ಯ ಹಿರಿಯ ನಿರ್ದೇಶಕರನ್ನಾಗಿ ನೇಮಕ ಮಾಡಲಾಗಿದೆ. ಇವರು ದಕ್ಷಿಣ ಮತ್ತು ಮಧ್ಯ ಏಷ್ಯಾಕ್ಕೆ ಸಂಬಂಧಿಸಿದ ಜವಾಬ್ದಾರಿಗಳನ್ನು ವಹಿಸಿಕೊಳ್ಳಲಿದ್ದಾರೆ. ಇನ್ನು, ಬೆಂಗಳೂರು ಮೂಲದ ಸೌರಭ್ ಶರ್ಮಾ ಅವರನ್ನು ಅಧ್ಯಕ್ಷೀಯ ಸಿಬ್ಬಂದಿ ಕಾರ್ಯಾಲಯಕ್ಕೆ ನೇಮಕ ಮಾಡಲಾಗಿದೆ. ಅದೇ ರೀತಿ ಮಾಜಿ ಪತ್ರಕರ್ತ ಕುಷ್ ದೇಸಾಯಿ ಅವರು ಶ್ವೇತಭವನದ ಸಂವಹನ ಉಪ ಪತ್ರಿಕಾ ಕಾರ್ಯದರ್ಶಿಯಾಗಿ ನೇಮಕಗೊಂಡಿದ್ದಾರೆ.
ರಿಕಿ ಗಿಲ್
ಅಂತಾರಾಷ್ಟ್ರೀಯ ಸಂಬಂಧಗಳನ್ನು ಕಾಪಿಡುವಲ್ಲಿ ಪರಿಣತಿ ಪಡೆದಿರುವು ರಿಕಿ ಗಿಲ್ಗೆ ಈಗ ರಾಷ್ಟ್ರೀಯ ಭದ್ರತಾ ಮಂಡಳಿಯಲ್ಲಿ ಸ್ಥಾನ ಸಿಕ್ಕಿದೆ. ಟ್ರಂಪ್ ಅವರ ಆಡಳಿತದ ಮೊದಲ ಅವಧಿಯಲ್ಲಿ ಅವರು ರಷ್ಯಾ ಮತ್ತು ಐರೋಪ್ಯ ಇಂಧನ ಭದ್ರತಾ ವಿಭಾಗದ ನಿರ್ದೇಶಕರಾಗಿ ಸೇವೆ ಸಲ್ಲಿಸಿದ್ದರು. ಜತೆಗೆ ವಿದೇಶಾಂಗ ಇಲಾಖೆಯ ಬ್ಯೂರೋ ಆಫ್ ಓವರ್ಸೀಸ್ ಬಿಲ್ಡಿಂಗ್ಸ್ ಆಪರೇಷನ್ಸ್ನ ಹಿರಿಯ ಸಲಹೆಗಾರರೂ ಆಗಿದ್ದರು. ಟ್ರಂಪ್ ಆಡಳಿತಾವಧಿ ಪೂರ್ಣಗೊಂಡ ಬಳಿಕ ರಿಕಿ ಅವರು ಕ್ಯಾಪಿಟಲ್ ಗ್ರೂಪ್ನ ಸಲಹೆಗಾರರಾಗಿಯೂ, ಟಿಸಿ ಎನರ್ಜಿಗೆ ಐರೋಪ್ಯ ಮತ್ತು ಏಷ್ಯಾ ಇಂಧನದ ಸಲಹೆಗಾರರಾಗಿಯೂ ಸೇವೆ ಸಲ್ಲಿಸಿದ್ದರು.
ಕುಷ್ ದೇಸಾಯಿ
ಕುಷ್ ದೇಸಾಯಿ ಅವರು 2024ರ ರಿಪಬ್ಲಿಕನ್ ಪಕ್ಷದ ರಾಷ್ಟ್ರೀಯ ಸಮಾವೇಶದ ಉಪ ಸಂವಹನ ನಿರ್ದೇಶಕರಾಗಿದ್ದರು. ಅದಕ್ಕೂ ಮುನ್ನ ರಿಪಬ್ಲಿಕನ್ ಪಾರ್ಟಿ ಆಫ್ ಅಯೋವಾದ ಸಂವಹನ ನಿರ್ದೇಶಕರಾಗಿ ಸೇವೆ ಸಲ್ಲಿಸಿದ್ದರು. ರಿಪಬ್ಲಿಕನ್ ರಾಷ್ಟ್ರೀಯ ಸಮಿತಿಯಲ್ಲಿ ಸಂವಹನ ನಿರ್ದೇಶಕರಾಗಿದ್ದರು. ಪೆನ್ಸಿಲ್ವೇನಿಯಾ ಸೇರಿದಂತೆ ನಿರ್ಣಾಯಕ ರಾಜ್ಯಗಳಲ್ಲಿ ಟ್ರಂಪ್ ಪಕ್ಷದ ಗೆಲುವಿಗೆ ರಣತಂತ್ರ ರೂಪಿಸುವಲ್ಲಿ ಇವರ ಪಾತ್ರ ಹಿರಿದು.
ಸೌರಭ್ ಶರ್ಮಾ
2019ರಲ್ಲಿ ಆಸ್ಟಿನ್ನಲ್ಲಿರುವ ಟೆಕ್ಸಾಸ್ ವಿಶ್ವವಿದ್ಯಾಲಯದಿಂದ ಜೀವರಸಾಯನಶಾಸ್ತ್ರದಲ್ಲಿ ಪದವಿ ಪಡೆದಿರುವ ಬೆಂಗಳೂರು ಮೂಲದ ಸೌರಭ್ ಶರ್ಮಾ ಅವರು ಸಂಪ್ರದಾಯವಾದಿ ಸಂಘಟನೆ, ಅಮೆರಿಕನ್ ಮೊಮೆಂಟ್ಸ್ನ ಅಧ್ಯಕ್ಷರಾಗಿ ಸೇವೆ ಸಲ್ಲಿಸಿದ್ದಾರೆ. ಟ್ರಂಪ್ ತಮ್ಮ ಮೊದಲ ಅಧ್ಯಕ್ಷೀಯ ಅವಧಿಯಲ್ಲಿ ಕಾಲೇಜು ಕ್ಯಾಂಪಸ್ಗಳಲ್ಲಿ ವಾಕ್ ಸ್ವಾತಂತ್ರ್ಯಕ್ಕೆ ಸಂಬಂಧಿಸಿದಂತೆ ಕಾರ್ಯಾದೇಶಕ್ಕೆ ಸಹಿ ಹಾಕಿದ ಸಂದರ್ಭದಲ್ಲಿ, ಶ್ವೇತಭವನಕ್ಕೆ 10 ಮಂದಿ ವಿದ್ಯಾರ್ಥಿಗಳನ್ನು ಸಂವಾದಕ್ಕೆಂದು ಕರೆಯಲಾಗಿತ್ತು. ಆ ವಿದ್ಯಾರ್ಥಿಗಳಲ್ಲಿ ಸೌರಭ್ ಕೂಡ ಒಬ್ಬರಾಗಿದ್ದರು. ಈಗ ಅದೇ ಸೌರಭ್ ಶರ್ಮಾಗೆ ಟ್ರಂಪ್ ಆಡಳಿತದಲ್ಲಿ ಉನ್ನತ ಹುದ್ದೆ ಸಿಕ್ಕಿದೆ.
