ನವದೆಹಲಿ: ಅಂತಿಮ ಹಂತದ ಕ್ಯಾನ್ಸರ್ನೊಂದಿಗೆ ಹೋರಾಡುತ್ತಿರುವ 21 ವರ್ಷದ ಯುವಕನೊಬ್ಬ ರೆಡ್ಡಿಟ್ (Reddit) ಸಾಮಾಜಿಕ ಮಾಧ್ಯಮದಲ್ಲಿ ಬರೆದ ಹೃದಯ ವಿದ್ರಾವಕ ಪೋಸ್ಟ್ ಸಾವಿರಾರು ಜನರನ್ನು ಭಾವುಕರನ್ನಾಗಿಸಿದೆ. “ಕ್ಯಾನ್ಸರ್ ಗೆದ್ದಿತು ಗೆಳೆಯರೇ, ಹೋಗಿ ಬರುತ್ತೇನೆ” (Cancer won guys, see ya) ಎಂಬ ಶೀರ್ಷಿಕೆಯ ಈ ಪೋಸ್ಟ್, ಇದೀಗ ವೈರಲ್ ಆಗಿದೆ.
ತನ್ನನ್ನು ತಾನು 21 ವರ್ಷದ ಯುವಕ ಎಂದು ಗುರುತಿಸಿಕೊಂಡಿರುವ ಬಳಕೆದಾರ, 2023ರಲ್ಲಿ ತನಗೆ ನಾಲ್ಕನೇ ಹಂತದ ಕೊಲೊರೆಕ್ಟಲ್ ಕ್ಯಾನ್ಸರ್ (ಕರುಳಿನ ಕ್ಯಾನ್ಸರ್) ಇರುವುದು ಪತ್ತೆಯಾಗಿತ್ತು ಎಂದು ಬಹಿರಂಗಪಡಿಸಿದ್ದಾರೆ. ತಿಂಗಳುಗಟ್ಟಲೆ ಕಿಮೊಥೆರಪಿ ಮತ್ತು ಸತತ ಆಸ್ಪತ್ರೆ ವಾಸದ ನಂತರ, ವೈದ್ಯರು ಇನ್ನು ಯಾವುದೇ ಚಿಕಿತ್ಸಾ ಆಯ್ಕೆಗಳು ಉಳಿದಿಲ್ಲ ಎಂದು ತಿಳಿಸಿದ್ದಾರೆ. “ನಾನು ಬಹುಶಃ ಈ ವರ್ಷದ ಅಂತ್ಯದವರೆಗೆ ಬದುಕುವುದು ಅನುಮಾನ,” ಎಂದು ಅವರು ತಮ್ಮ ಪೋಸ್ಟ್ನಲ್ಲಿ ನೋವು ತೋಡಿಕೊಂಡಿದ್ದಾರೆ.
“ಕೊನೆಯ ದೀಪಾವಳಿ”
ದೀಪಾವಳಿ ಹಬ್ಬ ಸಮೀಪಿಸುತ್ತಿರುವಾಗ, ಇದು ತನ್ನ ಕೊನೆಯ ಬೆಳಕಿನ ಹಬ್ಬವಾಗಿರಬಹುದು ಎಂಬ ನೋವಿನ ಆಲೋಚನೆಯನ್ನು ಅವರು ಹಂಚಿಕೊಂಡಿದ್ದಾರೆ. “ನನ್ನ ಕುಟುಂಬವನ್ನು ಕೊನೆಯ ಬಾರಿಗೆ ನೋಡುತ್ತಿದ್ದೇನೆ ಎಂಬುದನ್ನು ಊಹಿಸಲೂ ಕಷ್ಟವಾಗುತ್ತಿದೆ. ಆ ಬೆಳಕು, ನಗು ಮತ್ತು ಗದ್ದಲವನ್ನು ನಾನು ಶಾಶ್ವತವಾಗಿ ಕಳೆದುಕೊಳ್ಳುತ್ತೇನೆ. ಸುತ್ತಲಿನ ಜೀವನವು ಎಂದಿನಂತೆ ಸಾಗುತ್ತಿದ್ದರೆ, ನನ್ನ ಜೀವನ “ಸದ್ದಿಲ್ಲದೆ ಅಂತ್ಯಗೊಳ್ಳುತ್ತಿದೆ” ಎಂದು ಅವರು ಬರೆದುಕೊಂಡಿದ್ದಾರೆ.
“ನನಗೂ ಕನಸುಗಳಿದ್ದವು, ಗೊತ್ತಾ? ಹೆಚ್ಚು ಪ್ರಯಾಣಿಸಬೇಕೆಂದು, ಹಲವು ಊರುಗಳನ್ನು ಸುತ್ತಬೇಕೆಂದು, ಸ್ವಂತವಾಗಿ ಏನಾದರೂ ಪ್ರಾರಂಭಿಸಬೇಕೆಂದು, ಎಲ್ಲವೂ ಸರಿಹೋದ ನಂತರ ಒಂದು ನಾಯಿಯನ್ನು ದತ್ತು ತೆಗೆದುಕೊಳ್ಳಬೇಕೆಂದು ಬಯಸಿದ್ದೆ. ಆದರೆ, ನನ್ನ ಬಳಿ ಇದ್ದ ಸಮಯ ಮುಗಿದು ಹೋಗುತ್ತಿದೆ. ನನ್ನ ಕನಸುಗಳು ಕನಸಾಗಿಯೇ ಉಳಿಯುತ್ತಿವೆ,” ಎಂದು ಅವರು ಹೇಳಿದ್ದಾರೆ.
“ಬಹುಶಃ ಮುಂದೇನಿದೆಯೋ ಅದರಲ್ಲಿ ಸದ್ದಿಲ್ಲದೆ ಮರೆಯಾಗುವ ಮೊದಲು, ನನ್ನದೊಂದು ಸಣ್ಣ ಕುರುಹು ಬಿಟ್ಟುಹೋಗಲು ಇದೆಲ್ಲವನ್ನೂ ಗಟ್ಟಿಯಾಗಿ ಹೇಳುತ್ತಿದ್ದೇನೆ. ಹೋಗಿ ಬರುತ್ತೇನೆ!!” ಎಂಬ ನೋವಿನ ವಿದಾಯದ ಸಂದೇಶದೊಂದಿಗೆ ಈ ಪೋಸ್ಟ್ ಕೊನೆಗೊಂಡಿದೆ.
“ನೆಟ್ಟಿಗರಿಂದ ಪ್ರಾರ್ಥನೆಗಳ ಮಹಾಪೂರ”
ಈ ಭಾವನಾತ್ಮಕ ಪೋಸ್ಟ್ ಇಂಟರ್ನೆಟ್ನಾದ್ಯಂತ ಸಂಚಲನ ಹುಟ್ಟಿಸಿದೆ. “ದೇವರೇ, ಪವಾಡಗಳು ಸಂಭವಿಸುವುದಾದರೆ, ದಯವಿಟ್ಟು ಈ ಹುಡುಗನಿಗೆ ಅದು ಸಂಭವಿಸಲಿ,” ಎಂದು ಒಬ್ಬರು ಪ್ರಾರ್ಥಿಸಿದರೆ, ಇನ್ನೊಬ್ಬರು, “ದೇವರು ಇದ್ದರೆ, ದಯವಿಟ್ಟು ಈ ಹುಡುಗನನ್ನು ಉಳಿಸು,” ಎಂದು ಬರೆದಿದ್ದಾರೆ.
ಅನೇಕರು ಹೋರಾಟವನ್ನು ಮುಂದುವರಿಸಲು ಮತ್ತು ಜೀವನದ ಸಣ್ಣ ಪುಟ್ಟ ಕ್ಷಣಗಳಲ್ಲಿ ಶಾಂತಿಯನ್ನು ಕಂಡುಕೊಳ್ಳುವಂತೆ ಪ್ರೋತ್ಸಾಹಿಸಿದ್ದಾರೆ.
“ಧೈರ್ಯವಾಗಿರು ಗೆಳೆಯ. ನಿನ್ನ ಬಳಿ ಈಗ ಏನಿದೆಯೋ ಅದನ್ನು ಸಂಪೂರ್ಣವಾಗಿ ಅನುಭವಿಸು. ಸಂಜೆ ವಾಕಿಂಗ್ ಹೋಗು, ಸಂಗೀತ ಕೇಳು, ಕುಟುಂಬದೊಂದಿಗೆ ಉತ್ತಮ ಭೋಜನವನ್ನು ಆನಂದಿಸು. ಈ ಮಧ್ಯೆ, ಒಂದು ಪವಾಡ ಸಂಭವಿಸಲಿ ಎಂದು ನಾನು ನಿಜವಾಗಿಯೂ ಆಶಿಸುತ್ತೇನೆ,” ಎಂದು ಮತ್ತೊಬ್ಬರು ಬರೆದಿದ್ದಾರೆ.
ಯುವಕನ ಗುರುತು ತಿಳಿದಿಲ್ಲವಾದರೂ, ಅವರ ಮಾತುಗಳನ್ನು ಮರೆಯಲಾಗುವುದಿಲ್ಲ ಎಂದು ಅನೇಕರು ಹೇಳಿದ್ದಾರೆ. ಕೆಲವರು ಅವರ ಆರೋಗ್ಯದ ಬಗ್ಗೆ ಅಪ್ಡೇಟ್ಗಳನ್ನು ಕೋರಿದ್ದರೆ, ಇತರರು ಅವರಿಗೆ ಸಾಂತ್ವನ, ಪ್ರೀತಿ ಮತ್ತು ಸಾಧ್ಯವಾದರೆ ಒಂದು ಪವಾಡ ಸಂಭವಿಸಲಿ ಎಂದು ಆಶಿಸಿದ್ದಾರೆ.
