ಗಂಟೆಗೆ 140 ಕಿ.ಮೀ. ವೇಗದ ಗಾಳಿ, ಭೀಕರ ಮಳೆಯ ಎಚ್ಚರಿಕೆ
ಬುಧವಾರ ಅಪ್ಪಳಿಸಲಿದೆ ಚಂಡಮಾರುತ; ಕರ್ನಾಟಕಕ್ಕೂ ಇದೆಯೇ ಕಂಟಕ?
ಬಂಗಾಳಕೊಲ್ಲಿಯಲ್ಲಿ ಮತ್ತೊಂದು ಮಹಾ ಅಪಾಯ ಸೃಷ್ಟಿಯಾಗಿದೆ!
ಸಮುದ್ರದ ಮಧ್ಯೆ ರೂಪುಗೊಂಡಿರುವ ಚಂಡಮಾರುತವೊಂದು ಭಾರತದ ಪೂರ್ವ ಕರಾವಳಿಯತ್ತ ವೇಗವಾಗಿ ಮುನ್ನುಗ್ಗುತ್ತಿದೆ. ಈ ಚಂಡಮಾರುತಕ್ಕೆ ಇಟ್ಟಿರುವ ಹೆಸರು ‘ಅರ್ನಬ್’!ಅಕ್ಟೋಬರ್ 28ರಂದು ಆಂಧ್ರಪ್ರದೇಶದ ಕರಾವಳಿಗೆ ಅಪ್ಪಳಿಸುವ ನಿರೀಕ್ಷೆಯಿರುವ ಅರ್ನಬ್, ಭಾರಿ ಮಳೆ, ಬಿರುಗಾಳಿ ಹಾಗೂ ಪ್ರವಾಹದ ಆತಂಕ ಸೃಷ್ಟಿಸಿದೆ.ಗಂಟೆಗೆ 115ರಿಂದ 125 ಕಿಲೋಮೀಟರ್ ವೇಗದಲ್ಲಿ ಗಾಳಿ ಬೀಸುವ ಸಾಧ್ಯತೆಯಿದ್ದು, ಗಾಳಿಯ ರಭಸ ಗಂಟೆಗೆ 140 ಕಿಲೋಮೀಟರ್‌ವರೆಗೂ ತಲುಪಬಹುದು ಎಂದು ಭಾರತೀಯ ಹವಾಮಾನ ಇಲಾಖೆ ಮುನ್ಸೂಚನೆ ನೀಡಿದೆ.ಆಂಧ್ರಪ್ರದೇಶ ಮತ್ತು ಒಡಿಶಾ ಸರ್ಕಾರಗಳು ಅರ್ನಬ್ ಚಂಡಮಾರುತವನ್ನು ಎದುರಿಸಲು ಈಗಾಗಲೇ ಮುನ್ನೆಚ್ಚರಿಕೆ ಕ್ರಮಗಳನ್ನು ಕೈಗೊಂಡಿವೆ.ಅಷ್ಟಕ್ಕೂ ಏನಿದು ಅರ್ನಬ್ ಚಂಡಮಾರುತ? ಈ ವಿಚಿತ್ರ ಹೆಸರು ಇಟ್ಟವರು ಯಾರು? ಯಾವ ಪ್ರದೇಶಗಳಿಗೆ ಹೆಚ್ಚಿನ ಅಪಾಯವಿದೆ? ಕರ್ನಾಟಕಕ್ಕೂ ಇದರ ಪರಿಣಾಮ ತಟ್ಟಲಿದೆಯೇ? ಎಂಬ ಮಾಹಿತಿ ಇಲ್ಲಿದೆ.
ಏನಿದು ಅರ್ನಬ್? ಹೇಗೆ ಸೃಷ್ಟಿಯಾಯಿತು ಚಂಡಮಾರುತ?
ಸಮುದ್ರದ ಮೇಲ್ಮೈಯಲ್ಲಿ ಉಷ್ಣತೆ ಹೆಚ್ಚಾದಾಗ ನೀರು ಆವಿಯಾಗಿ ಮೇಲಕ್ಕೆ ಏರುತ್ತದೆ. ಈ ಪ್ರಕ್ರಿಯೆಯಲ್ಲಿ ಕಡಿಮೆ ಒತ್ತಡದ ಪ್ರದೇಶ ನಿರ್ಮಾಣವಾಗುತ್ತದೆ. ಸುತ್ತಮುತ್ತಲಿನ ಗಾಳಿ ಆ ಪ್ರದೇಶದತ್ತ ನುಗ್ಗಲಾರಂಭಿಸುತ್ತದೆ. ಭೂಮಿಯ ತಿರುಗುವಿಕೆಯ ಪರಿಣಾಮ ಗಾಳಿಯು ಸುರುಳಿಯಾಕಾರದಲ್ಲಿ ಸುತ್ತುತ್ತದೆ. ಅನುಕೂಲಕರ ವಾತಾವರಣವಿದ್ದರೆ ಈ ವ್ಯವಸ್ಥೆ ಮತ್ತಷ್ಟು ಬಲಗೊಂಡು ಚಂಡಮಾರುತವಾಗಿ ರೂಪುಗೊಳ್ಳುತ್ತದೆ.ಅರ್ನಬ್ ಚಂಡಮಾರುತ ಕೂಡ ಇದೇ ರೀತಿ ಬಂಗಾಳಕೊಲ್ಲಿಯಲ್ಲಿ ರೂಪುಗೊಂಡಿದೆ.ಇಂದು ಬೆಳಗ್ಗೆ ಸಿಕ್ಕಿರುವ ಮಾಹಿತಿಯಂತೆ, ಈ ಚಂಡಮಾರುತವು ವಿಶಾಖಪಟ್ಟಣದಿಂದ ಸುಮಾರು 650 ಕಿಲೋಮೀಟರ್ ದೂರದಲ್ಲಿದ್ದು, ಮುಂದಿನ ಅವಧಿಯಲ್ಲಿ ಇದು ಮತ್ತಷ್ಟು ತೀವ್ರಗೊಳ್ಳುವ ಸಾಧ್ಯತೆಯಿದೆ ಎನ್ನಲಾಗಿದೆ.
ಅರ್ನಬ್ ಎಂಬ ಹೆಸರು ಕೊಟ್ಟಿದ್ದು ಯಾರು?
ಈ ಚಂಡಮಾರುತದ ಹೆಸರಿನ ಹಿಂದೆಯೂ ಕುತೂಹಲಕಾರಿ ಕಥೆಯಿದೆ. ‘ಅರ್ನಬ್’ ಎಂಬ ಹೆಸರನ್ನು ಸೂಚಿಸಿರುವುದು ನಮ್ಮ ನೆರೆಯ ಬಾಂಗ್ಲಾದೇಶ! ಬಂಗಾಳಿ ಭಾಷೆಯಲ್ಲಿ ಅರ್ನಬ್ ಎಂಬ ಪದವನ್ನು ಸಮುದ್ರ ಅಥವಾ ಸಾಗರ ಎಂಬ ಅರ್ಥದಲ್ಲಿ ಬಳಸಲಾಗುತ್ತದೆ.ವಿಶ್ವ ಹವಾಮಾನ ಸಂಸ್ಥೆ ಹಾಗೂ ಏಷ್ಯಾ-ಪೆಸಿಫಿಕ್ ಪ್ರಾದೇಶಿಕ ವ್ಯವಸ್ಥೆಯಡಿ 13 ದೇಶಗಳು ಚಂಡಮಾರುತಗಳಿಗೆ ಹೆಸರುಗಳನ್ನು ಸೂಚಿಸುತ್ತವೆ. ಭಾರತ, ಬಾಂಗ್ಲಾದೇಶ, ಪಾಕಿಸ್ತಾನ, ಇರಾನ್, ಮಾಲ್ಡೀವ್ಸ್, ಮ್ಯಾನ್ಮಾರ್ ಸೇರಿದಂತೆ 13 ದೇಶಗಳು ತಲಾ 13 ಹೆಸರುಗಳನ್ನು ನೀಡಿವೆ. ಹೀಗೆ ಒಟ್ಟು 169 ಹೆಸರುಗಳ ಪಟ್ಟಿಯನ್ನು 2020ರಲ್ಲಿ ಸಿದ್ಧಪಡಿಸಲಾಗಿತ್ತು.ಆ ಪಟ್ಟಿಯಲ್ಲಿರುವ ಹೆಸರುಗಳನ್ನು ನಿಗದಿತ ಕ್ರಮದಲ್ಲಿ ಚಂಡಮಾರುತಗಳಿಗೆ ಇಡಲಾಗುತ್ತದೆ. ಹೀಗಾಗಿ ಚಂಡಮಾರುತ ಹುಟ್ಟಿದ ನಂತರ ಯಾರಾದರೂ ತಮಗೆ ಇಷ್ಟವಾದ ಹೆಸರನ್ನು ಇಡುವುದಿಲ್ಲ!
ಯಾವಾಗ, ಎಲ್ಲಿ ಅಪ್ಪಳಿಸಲಿದೆ ಅರ್ನಬ್?
ಹವಾಮಾನ ಇಲಾಖೆಯ ಮುನ್ಸೂಚನೆಯಂತೆ ಅಕ್ಟೋಬರ್ 28ರ ಬುಧವಾರ ಬೆಳಗ್ಗೆ ಅರ್ನಬ್ ಆಂಧ್ರಪ್ರದೇಶದ ಕರಾವಳಿಯನ್ನು ದಾಟುವ ನಿರೀಕ್ಷೆಯಿದೆ. ಬಾಪಟ್ಲಾ ಮತ್ತು ವಿಶಾಖಪಟ್ಟಣ ನಡುವಿನ ಕರಾವಳಿ ಪ್ರದೇಶದಲ್ಲಿ, ಯಾನಂ ಸಮೀಪ ಚಂಡಮಾರುತ ಭೂಪ್ರವೇಶ ಮಾಡುವ ಸಾಧ್ಯತೆಯಿದೆ.ಆಂಧ್ರಪ್ರದೇಶದ ಕಾಕಿನಾಡ, ಕೃಷ್ಣಾ, ಪೂರ್ವ ಗೋದಾವರಿ, ಪಶ್ಚಿಮ ಗೋದಾವರಿ, ಏಲೂರು ಹಾಗೂ ಎನ್‌ಟಿಆರ್ ಜಿಲ್ಲೆಗಳಿಗೆ ಭಾರಿ ಮಳೆಯ ಕೆಂಪು ಎಚ್ಚರಿಕೆ ನೀಡಲಾಗಿದೆ.ಕೆಲವು ಪ್ರದೇಶಗಳಲ್ಲಿ 24 ಗಂಟೆಗಳಲ್ಲಿ 200 ಮಿಲಿಮೀಟರ್‌ಗಿಂತಲೂ ಹೆಚ್ಚು ಮಳೆಯಾಗುವ ಸಾಧ್ಯತೆಯಿದೆ.
ಒಡಿಶಾದ ಗಂಜಾಂ, ಗಜಪತಿ, ರಾಯಗಡ, ಕೋರಾಪುಟ್ ಮತ್ತು ಮಲ್ಕಾನ್‌ಗಿರಿ ಜಿಲ್ಲೆಗಳಿಗೂ ಭಾರಿ ಮಳೆಯ ಆತಂಕ ಎದುರಾಗಿದೆ.ಅಂಡಮಾನ್ ದ್ವೀಪಗಳಲ್ಲಿಯೂ ಮಳೆಯ ಪರಿಣಾಮ ಕಂಡುಬರುವ ಸಾಧ್ಯತೆಯಿದೆ.
ಕರ್ನಾಟಕಕ್ಕೂ ಇದೆಯೇ ಮಳೆಯ ಭೀತಿ?
ಅರ್ನಬ್ ಚಂಡಮಾರುತ ನೇರವಾಗಿ ಕರ್ನಾಟಕಕ್ಕೆ ಅಪ್ಪಳಿಸಲ್ಲ. ಆದರೆ ಅಕ್ಟೋಬರ್ 27 ಮತ್ತು 28ರಂದು ಉತ್ತರ ಹಾಗೂ ದಕ್ಷಿಣ ಒಳನಾಡಿನ ಕೆಲವು ಪ್ರದೇಶಗಳಲ್ಲಿ ಗುಡುಗು, ಮಿಂಚು ಮತ್ತು ಬಲವಾದ ಗಾಳಿಯ ಎಚ್ಚರಿಕೆ ನೀಡಲಾಗಿದೆ. ಬೆಂಗಳೂರು, ಮೈಸೂರು, ಕೊಡಗು ಹಾಗೂ ಚಾಮರಾಜನಗರದ ಕೆಲವು ಭಾಗಗಳಲ್ಲಿ ಅಕ್ಟೋಬರ್ 27ರವರೆಗೆ ಮಳೆಯ ಸಾಧ್ಯತೆಯಿದೆ.ಇಂದು ಹವಾಮಾನ ಇಲಾಖೆ ನೀಡಿರುವ ಮುನ್ಸೂಚನೆಯ ಪ್ರಕಾರ, ಕರಾವಳಿ ಕರ್ನಾಟಕಕ್ಕೆ ಮುಂದಿನ ಏಳು ದಿನಗಳವರೆಗೆ ವಿಶೇಷ ಹವಾಮಾನ ಎಚ್ಚರಿಕೆಯಿಲ್ಲ. ಬೆಂಗಳೂರಿನಲ್ಲಿಯೂ 27 ಮತ್ತು 28ರಂದು ಭಾರಿ ಮಳೆಯ ಎಚ್ಚರಿಕೆ ನೀಡಿಲ್ಲ. ಹೀಗಾಗಿ ಕರ್ನಾಟಕದಲ್ಲಿ ಮಳೆಯ ಸಾಧ್ಯತೆಯಿದ್ದರೂ, ಆಂಧ್ರಪ್ರದೇಶದಂತಹ ಚಂಡಮಾರುತದ ತೀವ್ರ ಅಪಾಯ ಸದ್ಯಕ್ಕಿಲ್ಲ.
ಚಂಡಮಾರುತ ಎದುರಿಸಲು ಏನೇನು ಸಿದ್ಧತೆ?
ಅರ್ನಬ್ ಅಪ್ಪಳಿಸುವ ಮೊದಲೇ ಆಂಧ್ರಪ್ರದೇಶ ಮತ್ತು ಒಡಿಶಾ ಸರ್ಕಾರಗಳು ಸಮರೋಪಾದಿಯಲ್ಲಿ ಸಿದ್ಧತೆ ಆರಂಭಿಸಿವೆ. ಆಂಧ್ರಪ್ರದೇಶದಲ್ಲಿ ಸುಮಾರು 5.70 ಲಕ್ಷ ಜನರನ್ನು ಚಂಡಮಾರುತದಿಂದ ಅಪಾಯ ಎದುರಿಸಬಹುದಾದ ಪ್ರದೇಶಗಳ ನಿವಾಸಿಗಳೆಂದು ಗುರುತಿಸಲಾಗಿದೆ. ತಗ್ಗು ಪ್ರದೇಶಗಳ ಜನರನ್ನು ಸುರಕ್ಷಿತ ಸ್ಥಳಗಳಿಗೆ ಸ್ಥಳಾಂತರಿಸಲು ಕ್ರಮ ಕೈಗೊಳ್ಳಲಾಗುತ್ತಿದೆ. ಮೀನುಗಾರರಿಗೆ ಸಮುದ್ರದಿಂದ ವಾಪಸಾಗುವಂತೆ ಸೂಚಿಸಲಾಗಿದೆ. ವಿದ್ಯುತ್ ಸಂಪರ್ಕ ಕಡಿತಗೊಂಡರೆ ತ್ವರಿತವಾಗಿ ಮರುಸ್ಥಾಪಿಸಲು ವಿಶೇಷ ತಂಡಗಳನ್ನು ಸಜ್ಜುಗೊಳಿಸಲಾಗುತ್ತಿದೆ.
ಒಡಿಶಾದಲ್ಲಿ ಜನರ ಪ್ರಾಣಹಾನಿಯನ್ನು ಸಂಪೂರ್ಣ ತಪ್ಪಿಸುವ ಗುರಿಯನ್ನು ಸರ್ಕಾರ ಹೊಂದಿದೆ. ಗಂಜಾಂ, ಗಜಪತಿ, ರಾಯಗಡ, ಕೋರಾಪುಟ್ ಹಾಗೂ ಮಲ್ಕಾನ್‌ಗಿರಿ ಜಿಲ್ಲೆಗಳಲ್ಲಿ ಅಕ್ಟೋಬರ್ 28 ಮತ್ತು 29ರಂದು ಶಾಲಾ-ಕಾಲೇಜುಗಳು ಹಾಗೂ ಅಂಗನವಾಡಿಗಳನ್ನು ಮುಚ್ಚಲು ನಿರ್ಧರಿಸಲಾಗಿದೆ. ರಕ್ಷಣಾ ತಂಡಗಳು ಮತ್ತು ಚಂಡಮಾರುತ ಆಶ್ರಯ ಕೇಂದ್ರಗಳನ್ನು ಸಿದ್ಧಪಡಿಸಲಾಗುತ್ತಿದೆ.
2026ರ ಮೊದಲ ಚಂಡಮಾರುತ ಅರ್ನಬ್!
ಇನ್ನೊಂದು ಕುತೂಹಲಕಾರಿ ಸಂಗತಿಯೆಂದರೆ, ಅರ್ನಬ್ 2026ರಲ್ಲಿ ಉತ್ತರ ಹಿಂದೂ ಮಹಾಸಾಗರ ಪ್ರದೇಶದಲ್ಲಿ ರೂಪುಗೊಂಡ ಮೊದಲ ಅಧಿಕೃತ ಹೆಸರಿನ ಚಂಡಮಾರುತವಾಗಿದೆ. ಸಾಮಾನ್ಯವಾಗಿ ಬಂಗಾಳಕೊಲ್ಲಿ ಮತ್ತು ಅರಬ್ಬಿ ಸಮುದ್ರದಲ್ಲಿ ವರ್ಷಕ್ಕೆ ಸರಾಸರಿ ನಾಲ್ಕು ಚಂಡಮಾರುತಗಳು ರೂಪುಗೊಳ್ಳುತ್ತವೆ. ಅವುಗಳಲ್ಲಿ ಸುಮಾರು ಮೂರು ಬಂಗಾಳಕೊಲ್ಲಿಯಲ್ಲಿಯೇ ಹುಟ್ಟುತ್ತವೆ. ಅಕ್ಟೋಬರ್‌ನಿಂದ ಡಿಸೆಂಬರ್‌ವರೆಗಿನ ಅವಧಿ ಚಂಡಮಾರುತಗಳ ರಚನೆಗೆ ಹೆಚ್ಚು ಅನುಕೂಲಕರ. ಸಮುದ್ರದ ಮೇಲ್ಮೈ ಉಷ್ಣತೆ, ವಾತಾವರಣದ ತೇವಾಂಶ ಹಾಗೂ ಗಾಳಿಯ ಚಲನೆ ಚಂಡಮಾರುತದ ತೀವ್ರತೆಯನ್ನು ನಿರ್ಧರಿಸುತ್ತವೆ.
ಅರ್ನಬ್‌ನಿಂದ ಎದುರಾಗುವ ದೊಡ್ಡ ಅಪಾಯವೇನು?
ಚಂಡಮಾರುತದ ಅಪಾಯ ಕೇವಲ ಬಿರುಗಾಳಿಗೆ ಸೀಮಿತವಲ್ಲ. ಅತಿಯಾದ ಮಳೆಯಿಂದ ನದಿಗಳು ಉಕ್ಕಿ ಹರಿಯಬಹುದು. ತಗ್ಗು ಪ್ರದೇಶಗಳು ಜಲಾವೃತವಾಗಬಹುದು. ಸಮುದ್ರದ ಅಲೆಗಳು ಕರಾವಳಿಯೊಳಗೆ ನುಗ್ಗುವ ಅಪಾಯವೂ ಇರುತ್ತದೆ. ಗಾಳಿಯ ರಭಸಕ್ಕೆ ಮರಗಳು, ವಿದ್ಯುತ್ ಕಂಬಗಳು ಉರುಳುವ ಸಾಧ್ಯತೆಯಿದೆ.ಹೀಗಾಗಿ ಅರ್ನಬ್‌ನ ನಿಜವಾದ ಪರಿಣಾಮ ಎಷ್ಟಿರಲಿದೆ ಎಂಬುದು ಅದು ಕರಾವಳಿಗೆ ಅಪ್ಪಳಿಸುವಾಗ ಹೊಂದಿರುವ ತೀವ್ರತೆ ಮತ್ತು ಚಲನೆಯ ಮಾರ್ಗವನ್ನು ಅವಲಂಬಿಸಿದೆ. ಅಕ್ಟೋಬರ್ 28ರಂದು ಅರ್ನಬ್ ಚಂಡಮಾರುತ ಯಾವ ಸ್ವರೂಪದಲ್ಲಿ ಕರಾವಳಿಗೆ ಅಪ್ಪಳಿಸಲಿದೆ ಎಂಬುದೇ ಸದ್ಯದ ದೊಡ್ಡ ಪ್ರಶ್ನೆ!
