ಬೆಂಗಳೂರು: ಇದು ಡಿಜಿಟಲ್ ಯುಗವಾಗಿರುವ ಕಾರಣ ಬಹುತೇಕ ಜನ ಗೂಗಲ್ ಪೇ, ಫೋನ್ ಪೇ ಸೇರಿ ಹಲವು ಆ್ಯಪ್ ಗಳ ಮೂಲಕವೇ ವಹಿವಾಟು ನಡೆಸುತ್ತಾರೆ. ಒಂದು ಕಾಫಿ ಕೂಡಿದರೂ, 5-10 ರೂಪಾಯಿ ಬಿಲ್ ಆದರೂ, ಅದನ್ನು ಯುಪಿಐ ಮೂಲಕ ಪಾವತಿಸಲಾಗುತ್ತದೆ. ಇದರ ಮಧ್ಯೆಯೇ, ಪೋಷಕರು ಮಕ್ಕಳ ಪಾಕೆಟ್ ಮನಿ ಮೇ ನಿಗಾ ಇರಿಸುವ ದಿಸೆಯಲ್ಲಿ ಗೂಗಲ್ ಪೇ ಈಗ ಜಿ ಪೇ ಪಾಕೆಟ್ ಮನಿ ಎಂಬ ಹೊಸ ಫೀಚರ್ ಜಾರಿಗೆ ತಂದಿದೆ. ಇದರಿಂದಾಗಿ ಮಕ್ಕಳು ಗೂಗಲ್ ಪೇ ಮೂಲಕ ಮಾಡುವ ಖರ್ಚುಗಳ ಮೇಲೆ ನಿಗಾ ಇರಿಸುವ ಜತೆಗೆ ಮಿತಿಯನ್ನೂ ನಿಗದಿಪಡಿಸಿದೆ.
ಹೌದು, ಮನೆಯಲ್ಲಿ ಶಾಲೆ-ಕಾಲೇಜುಗಳಿಗೆ ಹೋಗುವ ಮಕ್ಕಳು, ಗೂಗಲ್ ಪೇ ಹೆಚ್ಚಿನ ವಹಿವಾಟು ಗೊತ್ತಿರದ ಹಿರಿಯ ನಾಗರಿಕರಿಗೆ ಇದು ಒಳ್ಳೆಯ ಫೀಚರ್ ಆಗಿದೆ. ಗೂಗಲ್ ಪೇನಲ್ಲಿ ಈಗಾಗಲೇ ಯುಪಿಐ ಸರ್ಕಲ್ ಎಂಬ ಫೀಚರ್ ಇದೆ. ಇದರ ಭಾಗವಾಗಿಯೇ ಈಗ ಜಿ ಪೇ ಪಾಕೆಟ್ ಮನಿ ಫೀಚರ್ ಜಾರಿಗೆ ತರಲಾಗಿದೆ. ಇದರಿಂದಾಗಿ ಮಕ್ಕಳು ನಿಗದಿತ ಮೊತ್ತಕ್ಕಿಂತ ಹೆಚ್ಚಿನ ಹಣವನ್ನು ಖರ್ಚು ಮಾಡಲು ಪೋಷಕರ ಅನುಮತಿ ಬೇಕಾಗುತ್ತದೆ.
ಗೂಗಲ್ ಪೇ ಆ್ಯಪ್ ನಲ್ಲಿ ಪೀಪಲ್ ಸೆಕ್ಷನ್ ಗೆ ಹೋದರೆ ಪೋಷಕರು ಸೆಕೆಂಡರಿ ಯೂಸರ್ ಗಳನ್ನು ಸೇರಿಸಬಹುದಾಗಿದೆ. ಆ್ಯಪ್ ನಲ್ಲಿ ಮಕ್ಕಳ ಮೊಬೈಲ್ ನಂಬರ್ ಆ್ಯಡ್ ಮಾಡಿದರೆ ಸೆಕೆಂಡರಿ ಯೂಸರ್ ಗಳು ಸೇರ್ಪಡೆಯಾಗುತ್ತಾರೆ. ಹೀಗೆ ಐವರನ್ನು ಸೆಕೆಂಡರಿ ಯೂಸರ್ ಗಳನ್ನಾಗಿ ಸೇರಿಸಬಹುದಾಗಿದೆ. ಸೆಕೆಂಡರಿ ಯೂಸರ್ ಆದವರು ಗೂಗಲ್ ಪೇ ಇನ್ ಸ್ಟಾಲ್ ಮಾಡಿಕೊಂಡು, ಮೊಬೈಲ್ ನಂಬರ್ ಆ್ಯಡ್ ಮಾಡಿದರೆ ಸಾಕು.
ಸೆಕೆಂಡರಿ ಯೂಸರ್ ಗಳು ಪ್ರೈಮರಿ ಯೂಸರ್ ಖಾತೆಯಿಂದ ಹಣ ಖರ್ಚು ಮಾಡಬಹುದಾಗಿದೆ. ಒಂದು ತಿಂಗಳಿಗೆ 15 ಸಾವಿರ ರೂಪಾಯಿ ಖರ್ಚು ಮಾಡಲು ಹಾಗೂ ಒಂದು ದಿನದಲ್ಲಿ 5 ಸಾವಿರ ರೂ. ಖರ್ಚು ಮಾಡಲು ಅವಕಾಶವಿರುತ್ತದೆ. ಹಾಗೆಯೇ, ಹೀಗೆ ಪೇಮೆಂಟ್ ಮಾಡಲು ಪೋಷಕರು ಅಥವಾ ಪ್ರೈಮರಿ ಯೂಸರ್ ಗಳ ಅನುಮತಿ ಬೇಕಾಗುತ್ತದೆ. ಇದರಿಂದಾಗಿ ಮಕ್ಕಳು ಪೋಷಕರ ಗಮನಕ್ಕೆ ಬಾರದೆ ಹೆಚ್ಚಿನ ಹಣ ಖರ್ಚು ಮಾಡಲು ಆಗುವುದಿಲ್ಲ. ಹಿರಿಯ ನಾಗರಿಕರು ಆನ್ ಲೈನ್ ವಂಚನೆಗೀಡಾಗುವುದನ್ನೂ ಇದರಿಂದ ತಡೆಯಬಹುದಾಗಿದೆ.
ಇದನ್ನೂ ಓದಿ: ವರ್ಷಕ್ಕೆ 1.5 ಲಕ್ಷ ರೂ. ಉಳಿಸಿದರೆ ನೀವು ಆಗುತ್ತೀರಿ ಕೋಟ್ಯಧಿಪತಿ : ಯಾವುದಿದು ಸುರಕ್ಷಿತ ಯೋಜನೆ?
