ಬೆಂಗಳೂರು : ಸಣ್ಣ-ಪುಟ್ಟ ವ್ಯಾಪಾರಿಗಳು, ಮಧ್ಯಮ ವರ್ಗದವರು ಷೇರು ಮಾರುಕಟ್ಟೆಯಲ್ಲಿ ಹೂಡಿಕೆ ಮಾಡಿ ಹಣ ಗಳಿಸುವುದು ಕಷ್ಟ. ಹಾಗಾಗಿ, ಹೆಚ್ಚಿನವರು ಪೋಸ್ಟ್ ಆಫೀಸ್, ಬ್ಯಾಂಕ್ ಉಳಿತಾಯ, ಹೂಡಿಕೆ ಯೋಜನೆಗಳಲ್ಲಿ ಹಣವನ್ನು ತೊಡಗಿಸುತ್ತಾರೆ. ಇದೇ ರೀತಿ, ಪಬ್ಲಿಕ್ ಪ್ರಾವಿಡೆಂಟ್ ಫಂಡ್ ಯೋಜನೆ (PPF) ಕೂಡ ಸಣ್ಣ ಪುಟ್ಟ ವ್ಯಾಪಾರಿಗಳು ಹಾಗೂ ಮಧ್ಯಮ ವರ್ಗದವರು ಸುರಕ್ಷಿತವಾಗಿ ಹೂಡಿಕೆ ಮಾಡಲು, ಹಾಗೆಯೇ, ಸುದೀರ್ಘವಾಗಿ ಹೂಡಿಕೆ ಮಾಡಿ 1 ಕೋಟಿ ರೂ. ಗಳಿಸಲು ಸಹಕಾರಿಯಾಗಿದೆ.
1 ಕೋಟಿ ರೂ. ಗಳಿಕೆ ಮಾಡುವುದು ಹೇಗೆ?
ನಿಮ್ಮ ಪಿಪಿಎಫ್ ಖಾತೆಯು 15 ವರ್ಷಕ್ಕೆ ಮೆಚ್ಯೂರ್ ಆಗುತ್ತದೆ. ಆಗ ಹಣವನ್ನು ಹಿಂಪಡೆಯುವ ಬದಲು, ಬ್ಯಾಂಕ್ ಅಥವಾ ಪೋಸ್ಟ್ ಆಫೀಸ್ ಗೆ ಅರ್ಜಿ ಫಾರ್ಮ್ ಎಚ್ ಸಲ್ಲಿಸುವ ಮೂಲಕ ಮುಂದಿನ 5 ವರ್ಷಗಳ ಕಾಲ ವಿಸ್ತರಿಸಿ. 20 ವರ್ಷ ಮುಗಿದ ನಂತರ ಮತ್ತೆ 5 ವರ್ಷ ವಿಸ್ತರಿಸಿ. ಹೀಗೆ ಒಟ್ಟು 25 ವರ್ಷ ನಿರಂತರವಾಗಿ ವರ್ಷಕ್ಕೆ 1.5 ಲಕ್ಷ ರೂಪಾಯಿಹೂಡಿಕೆ ಮಾಡಿದರೆ, ನಿಮ್ಮ ಕೈ ಸೇರುವ ಮೊತ್ತ 1.03 ಕೋಟಿ ರೂಪಾಯಿ ಆಗುತ್ತದೆ.
ಇದು ಸರಕಾರಿ ಯೋಜನೆಯಾಗಿರುವ ಕಾರಣ ಸುರಕ್ಷಿತವಾಗಿದೆ. ವರ್ಷದಲ್ಲಿ ಕನಿಷ್ಠ 500 ರೂಪಾಯಿಯಿಂದ 1.5 ಲಕ್ಷ ರೂ. ಹೂಡಿಕೆ ಮಾಡಬಹುದು. ಹೂಡಿಕೆಗೆ ಶೇ.7.10ರಷ್ಟು ಬಡ್ಡಿ ಲಭಿಸುತ್ತದೆ. ಇಲ್ಲಿ 15 ವರ್ಷಗಳವರೆಗೆ ಲಾಕ್-ಇನ್ ಪಿರಿಯಡ್ ಇರುತ್ತದೆ. ನೀವು 15 ವರ್ಷಗಳವರೆಗೆ ಪ್ರತಿ ವರ್ಷ 1.5 ಲಕ್ಷ ರೂ. ಹೂಡಿಕೆ ಮಾಡಿದರೆ 40.68 ಲಕ್ಷ ರೂ. ಗಳಿಕೆಯಾಗುತ್ತದೆ. ಇನ್ನೂ 5 ವರ್ಷ ವಿಸ್ತರಣೆ ಮಾಡಿದರೆ 66.58 ಲಕ್ಷ ರೂಪಾಯಿ ಹಾಗೂ ಮತ್ತೆ 5 ವರ್ಷ ಹೂಡಿಕೆಯನ್ನು ವಿಸ್ತರಣೆ ಮಾಡಿದರೆ 1.03 ಕೋಟಿ ರೂ. ಲಭಿಸುತ್ತದೆ. ಶೇ.7.10ರ ಬಡ್ಡಿದರಲ್ಲಿ ಇದನ್ನು ಲೆಕ್ಕ ಹಾಕಲಾಗಿದೆ.
ಪ್ರತಿ ವರ್ಷದ ಏಪ್ರಿಲ್ 1 ರಿಂದ 5 ರೊಳಗೆ 1.5 ಲಕ್ಷ ರೂಪಾಯಿಯನ್ನು ಒಟ್ಟಿಗೆ ಜಮಾ ಮಾಡಿದರೆ ಗರಿಷ್ಠ ಬಡ್ಡಿ ಸಿಗುತ್ತದೆ. ಒಂದು ವೇಳೆ ತಿಂಗಳು ಪಾವತಿಸುವುದಾದರೆ ಪ್ರತಿ ತಿಂಗಳ 5 ನೇ ತಾರೀಖಿನೊಳಗೆ ಹಣ ಜಮಾ ಮಾಡುವುದು ಉತ್ತಮ ಎಂಬುದು ತಜ್ಞರ ಸಲಹೆಯಾಗಿದೆ. ಹಾಗೆಯೇ, ಪಿಪಿಎಫ್ ಮೂಲಕ ಗಳಿಸುವ ಹಣಕ್ಕೆ ಒಂದೇ ಒಂದು ರೂಪಾಯಿ ತೆರಿಗೆ ಇರುವುದಿಲ್ಲ ಎಂಬುದು ಗಮನಾರ್ಹ ಸಂಗತಿಯಾಗಿದೆ.
ಇದನ್ನೂ ಓದಿ : ರಾಮನ್ ಸಂಶೋಧನಾ ಸಂಸ್ಥೆಯಲ್ಲಿ 3 ಹುದ್ದೆಗಳ ನೇಮಕಾತಿ : ಬೆಂಗಳೂರಿನಲ್ಲೇ ಉದ್ಯೋಗ
